2012 ᐅᐱᕐᖓᓴᖓᓂ ᑕᓪᓕᒪᑦ ᐃᓄᐃᑦ ᐃᓅᓐᖏᑐᐃᓪᓗ, ᐅᑯᐊᒍᑦᓱᑎᒃ: ᒪᕐᕉᒃ ᐊᕙᑕᐅᑉ ᑕᑯᔭᒐᖃᕐᕕᖓᓐᓂᒥᐅᒃ Martine Gascon ᐊᒻᒪᓗ Julie Anne Tremblay ᐊᒻᒪᓗ ᒥᐊᔨ ᐲᕐᑎ ᖁᒫᓗᒃ (ᑖᓂᐊᓪᓕ ᐅᐃᑖᓗᑦᑑᑉ ᑕᑯᔭᒐᖃᕐᕕᖓᓐᓂᒥᐅᖅ) ᐃᓚᖃᕐᓱᑎᒃ ᐊᓐᑦᔫ ᐸᐱᑲᑦᑐᒥᒃ ᐊᕙᑕᐅᑉ ᐃᑦᓴᓂᑕᕐᓂᐊᕕᖓᓐᓂᒥᐅᒥᒃ, ᐅᕙᖓᓗ, ᓄᓇᕕᒻᒥ ᐱᖓᓲᔪᕐᑐᓄᑦ ᓄᓇᓕᓕᐊᓚᐅᔪᕗᒍᑦ ‘ᐆᑦᑐᕋᐅᑎᒥᒃ ᐱᓇᓱᐊᕆᐊᕐᑐᓱᑕ‘ ᐆᒥᖓ ᐊᑎᓕᒻᒥᒃ: ‘ᐱᐅᓯᑐᖃᑦᑎᓂᒃ ᓄᐃᑕᑎᑦᓯᓚᐅᕐᑕ‘.
ᐊᕐᓇᓕᓐᖒᑎᕕᒃ 16-ᒥᑦ 18-ᒧᑦ, ᑲᖏᕐᓱᔪᐊᕐᒥ ᑲᑎᒪᓂᖃᓚᐅᔪᕗᖅ ᐅᖃᖃᑎᒌᓐᓂᖃᕐᑎᓗᒍ ᑲᖏᕐᓱᔪᐊᑉ ᒥᑦᓵᓂ ᐱᐅᓯᐅᓯᒪᔪᓂᒃ. ᑖᓐᓇ ᑲᑎᒪᓂᐅᓚᐅᔪᔪᖅ ᑲᑐᑦᔮᖑᑦᓱᓂ ᐱᒋᐊᓐᖓᐅᑎᐅᓚᐅᔪᔪᖅ ᑲᑎᒪᑎᓪᓗᒋᑦ ᑲᖏᕐᓱᔪᐊᑉ ᑲᕙᒫᐱᖓ, ᐊᕙᑕᖅ ᐱᐅᓯᑐᖃᓕᕆᕕᒃ ᐊᒻᒪᓗ ᐱᖑᐊᓗᐃᑦ ᒥᕐᖑᐃᓯᕐᕕᖓᓂ ᐳᓚᕋᕐᑐᓕᕆᔨᖏᑦ. ᑲᑎᒪᓂᐅᑉ ᑐᕌᕐᓂᕆᓚᐅᔪᔭᖓ ᐱᐅᓯᐅᓯᒪᔪᓂᒃ ᖃᐅᔨᒪᔭᐅᒋᐊᓕᓂᒃ ᑐᓴᕐᑎᓯᒍᒪᑦᓱᑎᒃ ᐃᓄᓐᓂᒃ ᐃᓚᐅᖃᑦᑕᓯᒪᔪᓂᒃ ᑲᖏᕐᓱᔪᐊᕐᒥ ᐳᓚᕋᕐᑐᓕᕆᓂᐅᑉ ᐱᕙᓪᓕᐊᔭᐅᓂᖓᓂᒃ, ᑐᓴᕐᑎᑕᐅᖃᑕᐅᒻᒥᑎᓪᓗᒋᑦ ᐊᓯᖏᑦ ᐃᓚᐅᒻᒥᔪᑦ ᑲᖏᕐᓱᔪᐊᕐᒥ.
ᐅᑭᐅᒍᓚᐅᕐᑐᒥ, ᐊᕙᑕᖅ ᐱᐅᓯᑐᖃᓕᕆᕕᒃ ᐱᓇᓱᐊᒋᐊᓪᓚᓯᓚᐅᔪᕗᖅ ᓄᓇᓐᖑᐊᓕᕆᓂᕐᒥᒃ, ᓄᓀᑦ ᐊᑎᓕᐅᕐᑕᐅᒋᐊᑦᓯᐊᑎᓪᓗᒋᑦ 1980-ᒥ ᐱᒋᐊᕐᑕᐅᒋᐊᓐᖓᓚᐅᕐᓯᒪᒐᓗᐊᕐᓱᑎᒃ.
ᑐᕓᔮᕈᑦ (ᔪᓓ) 30, 2012-ᒥ, ᒪᕐᕉᒃ ᐃᑦᓴᓂᑕᕐᓂᐊᑏᒃ—Christian Roy (ᒃᕆᔅᑎᐊᓐ ᕈᐊ) ᐊᒻᒪᓗ Benjamin Patenaude (ᐱᐊᓐᔭᒥᓐ ᐹᑎᓅ) ᐊᕙᑕᕐᒥᒃ ᐱᒍᑦᔨᓱᑎᒃ—ᕿᑭᕐᑖᓗᓕᐊᓚᐅᔪᕘᒃ ᑕᓯᐅᔭᐅᑉ ᓴᓂᐊᓃᑦᑐᒧᑦ 50-ᑭᓗᒦᑕᓄᑦ ᐅᖓᓯᑦᑕᓕᒻᒧᑦ ᐅᒥᐅᔭᐅᑉ ᓯᕿᓂᖓᓂ. ᑖᕗᓐᖓᓚᐅᔪᔫᒃ ᐱᔭᕇᒋᐊᕐᑐᓱᑎᒃ ᐃᑦᓴᓂᑕᕐᓂᐊᓂᑎᒍᑦ ᓇᐅᑦᓯᑐᒋᐊᕐᑐᓱᑎᒃ ᑲᒻᐸᓂᒃᑰᕙᓚᐅᕐᑐᑯᑦ ᓂᐅᕐᕈᓯᕐᕕᒋᓚᐅᕐᑕᕕᓂᖓᓂᒃ ᕿᑭᕐᑖᓗᒻᒥ (HaGb-11)-ᒥ ᓂᐅᕐᕈᓯᕐᕕᐅᓚᐅᕐᑐᕕᓂᐅᑦᓱᓂ 1750-ᒥᑦ 1758-ᒧᑦ.
ᔪᓓᖑᕋᑖᓚᐅᕐᑐᒥ, ᐃᑦᓴᓂᑕᕐᓂᐊᕕᐅᑉ ᐱᒍᑦᔨᕕᖓ ᐱᓇᓱᐊᕈᓯᓕᒫᒥ ᖃᐅᔨᓴᕐᓂᒪᕆᖃᓚᐅᔪᕗᖅ ᐊᐅᐸᓗᒻᒥ.
