• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᐊᕐᓇᓕᓐᖒᑎᕕᒃ 16-ᒥᑦ 18-ᒧᑦ, ᑲᖏᕐᓱᔪᐊᕐᒥ ᑲᑎᒪᓂᖃᓚᐅᔪᕗᖅ ᐅᖃᖃᑎᒌᓐᓂᖃᕐᑎᓗᒍ ᑲᖏᕐᓱᔪᐊᑉ ᒥᑦᓵᓂ ᐱᐅᓯᐅᓯᒪᔪᓂᒃ. ᑖᓐᓇ ᑲᑎᒪᓂᐅᓚᐅᔪᔪᖅ ᑲᑐᑦᔮᖑᑦᓱᓂ ᐱᒋᐊᓐᖓᐅᑎᐅᓚᐅᔪᔪᖅ ᑲᑎᒪᑎᓪᓗᒋᑦ ᑲᖏᕐᓱᔪᐊᑉ ᑲᕙᒫᐱᖓ, ᐊᕙᑕᖅ ᐱᐅᓯᑐᖃᓕᕆᕕᒃ ᐊᒻᒪᓗ ᐱᖑᐊᓗᐃᑦ ᒥᕐᖑᐃᓯᕐᕕᖓᓂ ᐳᓚᕋᕐᑐᓕᕆᔨᖏᑦ. ᑲᑎᒪᓂᐅᑉ ᑐᕌᕐᓂᕆᓚᐅᔪᔭᖓ ᐱᐅᓯᐅᓯᒪᔪᓂᒃ ᖃᐅᔨᒪᔭᐅᒋᐊᓕᓂᒃ ᑐᓴᕐᑎᓯᒍᒪᑦᓱᑎᒃ ᐃᓄᓐᓂᒃ ᐃᓚᐅᖃᑦᑕᓯᒪᔪᓂᒃ ᑲᖏᕐᓱᔪᐊᕐᒥ ᐳᓚᕋᕐᑐᓕᕆᓂᐅᑉ ᐱᕙᓪᓕᐊᔭᐅᓂᖓᓂᒃ, ᑐᓴᕐᑎᑕᐅᖃᑕᐅᒻᒥᑎᓪᓗᒋᑦ ᐊᓯᖏᑦ ᐃᓚᐅᒻᒥᔪᑦ ᑲᖏᕐᓱᔪᐊᕐᒥ.

ᐅᓪᓗᐃᑦ ᐱᖓᓱᑦ ᐅᖓᑖᓄᑦ, ᐊᔪᒉᑦᑐᕋᑕᖅ ᐊᑦᓱᐃᑐᒻᒪᕆᐅᑦᓱᓂᓗ ᐱᐅᓯᐅᓯᒪᔪᖅ ᐃᑦᓴᓂᑕᕐᓂᐊᑕᐅᓂᕕᓂᖓᓗ ᑲᖏᕐᓱᔪᐊᑉ ᒥᑦᓵ ᑕᑯᑦᓴᕈᕐᑎᑕᐅᓚᐅᔪᔪᖅ ᑲᑎᒪᔪᐃᓪᓗ ᕿᒥᕐᕈᓚᐅᔪᑦᓱᑎᒃ ᐱᕙᓪᓕᐊᔭᐅᑐᐃᓐᓇᕆᐊᖃᕐᓂᖓᓂᒃ ᒪᓕᑦᑎᖃᕐᓗᑎᒃ ᐳᓛᕆᐊᕐᓂᕆᓲᖏᓐᓂᒃ ᐳᓚᕋᕐᑏᑦ. ᑖᓐᓇ ᑲᑎᒪᓂᐅᓚᐅᔪᔪᖅ ᑭᓇᓕᒫᓄᑦ ᐅᐸᑦᑕᐅᒍᓐᓇᓚᐅᔪᔪᖅ ᓄᕿᑎᕆᔪᒻᒪᕆᐅᑦᓱᓂᓗ ᐃᓄᓐᓂᒃ ᖃᓄᐃᓪᓗᐊᑐᑐᐃᓐᓇᓂᒃ ᐊᕐᕌᒍᓕᓐᓂᒃ, ᐃᓚᐅᑎᓪᓗᒋᑦ ᐳᕐᑐᓂᕐᓴᒥ ᐃᓕᓐᓂᐊᑏᑦ, ᐃᓕᓐᓂᐊᑎᑦᓯᔩᑦ ᐃᓄᑐᙯᓪᓗ. ᒥᐊᔨ ᐋᕐᖓᖅ ᐱᓗᕐᑑᑦ (ᑲᖏᕐᓱᔪᐊᑉ ᓯᕗᓕᕐᑎᖓ) ᑲᑎᒪᑎᑦᓯᓚᐅᔪᔪᖅ ᐃᑲᔪᕐᓯᒪᑎᓪᓗᒍ Sylvie Côté Chew (ᐊᕙᑕᖅ ᐱᐅᓯᑐᖃᓕᕆᕕᒻᒥᐅᖅ).

ᓯᓚᕐᔪᐊᒥ ᐃᓅᖃᑎᒌᑦᑐᓂᒃ ᓱᑯᐃᔦᔨ Bernard Saladin d’Anglure (ᐱᕐᓈ) ᑲᑎᒪᓂᕐᒥ ᐅᖃᕐᑎᒋᔭᐅᕙᓪᓗᓚᐅᔪᔪᖅ: ᐱᕐᓈ ᐱᐅᔪᓪᓚᕆᐊᓗᓂᒃ ᖃᐅᔨᒪᔭᖃᕐᑐᖅ ᑲᖏᕐᓱᔪᐊᑉ ᐱᐅᓯᕆᓯᒪᔭᖓᓂᒃ, ᑲᖏᕐᓱᔪᐊᕐᒥᐅᑦ ᐱᐅᓯᑐᖃᖓᓂᒃ ᓱᒐᓗᑦᑐᖅ 1950-ᐄᑦ 1960-ᐄᓪᓗ ᐊᕐᕌᒍᖏᓂᑕᕐᓂᒃ. ᐱᕐᓈ ᒪᓕᑦᑕᐅᓯᒪᓚᐅᔪᔪᖅ Pierre Desrosiers-ᒧᑦ (ᐊᕙᑕᖅ ᐱᐅᓯᑐᖃᓕᕆᕕᒻᒥᐅᖅ), ᑖᓐᓇᓗ ᑐᓴᕐᑎᓯᓚᐅᔪᑦᓱᓂ ᓱᓇᓂᒃ ᐱᔭᖃᕐᓂᒪᖔᕐᒥᒃ ᐃᑦᓴᓂᑕᕐᓂᐊᓱᑎᒃ ᑲᖏᕐᓱᔪᐊᑉ ᒥᑦᓵᓂ; ᓄᓇᕕᓕᒫᒥ ᑲᖏᕐᓱᔪᐊᑉ ᒥᑦᓵ ᐅᓄᕐᓂᐹᑦᓯᐊᓂᒃ ᓇᔪᒐᐅᓚᐅᕐᑐᕕᓂᕐᑕᓕᒃ. ᑭᖑᓪᓕᐹᒥ, Pierre Philie (ᐱᖑᐊᓗᐃᑦ ᒥᕐᖑᐃᓯᕐᕕᖓᓂ ᐳᓚᕋᕐᑐᓕᕆᔨᖓ) ᑕᑯᑎᑦᓯᓚᐅᔪᔪᖅ ᐱᓇᓱᐊᕐᑕᒥᑕ ᒥᑦᓵᓄᑦ ᐊᑎᓕᒻᒥᒃ ‘ᐃᑦᓴᓂᑌᑦ 2,000-ᐄᑦ ᐊᕐᕌᒍᖏᓐᓂ: ᐃᑦᓴᓂᑕᐅᓛᕐᓂᐊᑐᑦ ᓯᕗᓂᑦᓴᑎᓐᓂ‘. ᐊᒻᒪᓗ, ᓯᕗᓪᓕᐹᖅ ᐆᑦᑐᕋᐅᑎᒃ ᕿᒥᕐᕈᐊᓕᐊᒧᑦ ᐊᕐᕕᓂᐊᕐᓂᕕᓂᐅᑉ ᒥᑦᓵᓄᑦ ᑕᑯᔭᐅᑎᑕᐅᓚᐅᔪᒻᒥᔪᖅ; ᑖᓐᓇ ᕿᒥᕐᕈᐊᖅ ᐅᓂᒃᑳᑐᖅ ᓄᓇᕕᒻᒥ ᐊᕐᕕᓂᐊᕐᓂᕕᓂᕐᒥᒃ.