• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

2012 ᐅᐱᕐᖓᓴᖓᓂ ᑕᓪᓕᒪᑦ ᐃᓄᐃᑦ ᐃᓅᓐᖏᑐᐃᓪᓗ, ᐅᑯᐊᒍᑦᓱᑎᒃ: ᒪᕐᕉᒃ ᐊᕙᑕᐅᑉ ᑕᑯᔭᒐᖃᕐᕕᖓᓐᓂᒥᐅᒃ Martine Gascon ᐊᒻᒪᓗ Julie Anne Tremblay ᐊᒻᒪᓗ ᒥᐊᔨ ᐲᕐᑎ ᖁᒫᓗᒃ (ᑖᓂᐊᓪᓕ ᐅᐃᑖᓗᑦᑑᑉ ᑕᑯᔭᒐᖃᕐᕕᖓᓐᓂᒥᐅᖅ) ᐃᓚᖃᕐᓱᑎᒃ ᐊᓐᑦᔫ ᐸᐱᑲᑦᑐᒥᒃ ᐊᕙᑕᐅᑉ ᐃᑦᓴᓂᑕᕐᓂᐊᕕᖓᓐᓂᒥᐅᒥᒃ, ᐅᕙᖓᓗ, ᓄᓇᕕᒻᒥ ᐱᖓᓲᔪᕐᑐᓄᑦ ᓄᓇᓕᓕᐊᓚᐅᔪᕗᒍᑦ ‘ᐆᑦᑐᕋᐅᑎᒥᒃ ᐱᓇᓱᐊᕆᐊᕐᑐᓱᑕ‘ ᐆᒥᖓ ᐊᑎᓕᒻᒥᒃ: ‘ᐱᐅᓯᑐᖃᑦᑎᓂᒃ ᓄᐃᑕᑎᑦᓯᓚᐅᕐᑕ‘. ᑖᓐᓇ ᐱᓇᓱᐊᕋᑦᓴᖅ ᑫᓪᓗᑐᐃᒍᑕᐅᒐᓱᐊᕐᑐᖅ ᓄᓇᓕᓐᓂ ᐱᐅᓯᑐᖃᓕᕆᔨᓂᒃ ᑕᑯᓐᓇᖑᐊᕐᓗᑎᒃ ᐃᓱᒪᒐᓱᐊᖁᑦᓱᒋᑦ, ᓇᓗᓀᕐᓯᖁᑦᓱᒋᑦ ᓱᓪᓕᑎᑦᓯᖁᑦᓱᒋᓪᓗ ᐃᓱᐊᓄᑦ, ᐱᓇᓱᐊᕈᒪᒐᔭᓐᖑᐊᑕᕐᒥᓂᒃ ᓄᓇᓕᒻᒥᓂ ᐱᐅᓯᕐᓱᕈᑎᒥᓐᓂᒃ ᓱᔪᐃᑎᑦᓯᑌᓕᒍᑎᒋᓗᒍ.

ᓄᓇᓖᑦ ᐅᐸᓚᐅᔪᔭᕗᑦ ᐅᑯᐊᖑᕗᑦ: ᑲᖏᕐᓱᔪᐊᖅ, ᑲᖏᕐᓱᒃ, ᑕᓯᐅᔭᖅ, ᐃᓄᑦᔪᐊᖅ, ᐊᐅᐸᓗᒃ ᓯᓵᓯᐱᓗ. ᓯᕗᓪᓕᒥ ᐊᕐᕕᑕᕐᓂᕆᓚᐅᔪᔭᑦᑎᓂ, ᓄᓇᓖᑦ ᐅᑯᓂᖓ ᐱᕙᓪᓕᐊᒍᒪᒐᔭᓐᖑᐊᑐᑦ:

• ᑲᖏᕐᓱᔪᐊᕐᒥ: ᐊᑐᐃᓐᓇᕈᕐᑎᕆᓗᑎᒃ ᐃᑦᓴᓂᑌᑦ ᑲᖏᕐᓱᔪᐊᕐᒥᐅᔦᑦ ᑕᑯᑦᓴᐅᑎᑕᐅᒐᔭᕐᓂᖏᓐᓂᒃ;
• ᑲᖏᕐᓱᒥ: ᑌᑦᓱᒪᓂᑕᓪᓚᕆᒻᒥᒃ ᐅᓗᓕᐅᕐᓗᑎᒃ ᓴᕕᓕᐅᕐᓗᑎᓗ (ᐃᓪᓗᑑᓕᒻᒥᒃ);
• ᑕᓯᐅᔭᕐᒥ: ᑕᕐᓯᑐᕐᓯᒪᔪᒥᒃ ᐊᑭᓐᓇᒥᐅᑖᓗᓕᐅᖃᑎᖃᕐᓗᑎᒃ ᐃᓕᓐᓂᐊᕕᒻᒥ ᐃᓕᓐᓂᐊᑎᓂᒃ ᑕᕐᓯᑐᕐᑕᖓ ᑐᑭᖃᓐᖑᐊᑎᓪᓗᒍ ‘ᐃᓄᑐᐃᓐᓇᐅᓱᓂ ᐃᓅᓱᑦᑑᓂᖅ 2012-ᒥ‘;
• ᐃᓄᑦᔪᐊᒥ: ᖁᓂᕉᔭᕐᒥᒃ ᖁᓕᑦᑕᓕᐅᕐᓗᑎᒃ, ᐃᖃᓗᖃᐅᑎᓕᐅᕐᓗᑎᒃ, ᓂᕐᓕᐅᑉ ᐃᑎᒐᔮᕕᓂᖏᓐᓂᒃ ᐴᖃᑦᑖᐱᓕᐅᕐᓗᑎᒃ ᑎᒻᒥᐊᓂᐅᑎᓕᐅᕐᓗᑎᓗ;
• ᐊᐅᐸᓗᒻᒥ: ᓄᓇᐅᑉ ᒥᑦᓵᓅᓕᖓᔪᓂᑦ ᐊᓪᓚᖁᑎᓕᐅᕐᓗᑎᒃ ᓱᓇᓕᒫᑦ ᐊᓯᑦᔨᑕᐅᓐᖏᓂᖏᓐᓂ ᐅᔭᕋᕐᓂᐊᓂᕐᒧᑦ;
• ᓯᓵᓯᐱᒥ: ᑲᒻᒥᐅᒋᐅᕐᓴᑎᑕᐅᓗᑎᒃ ᒪᕐᕈᐃᓂᓗ ᖃᒧᓯᐅᕆᐅᕐᓴᑎᑕᐅᓗᑎᒃ (ᐁᑉᐯᒋᒃ ᖃᒧᑏᒃ ᐃᕐᓯᕕᒻᒥᒃ ᓴᖑᐊᕐᓯᕕᓖᒃ ᐁᑉᐯᒋᓪᓗ ᖃᒧᑏᒃ ᐃᕐᓯᕕᖃᓐᖏᑑᒃ ᓴᖑᐊᕐᓯᕕᒥᒃ.

ᑖᕙᒃᑯᓇᓂ ᓄᓇᓕᓐᓃᓂᑦᑎᓂ ᑐᓴᐅᑎᒃᑰᖃᑦᑕᓚᐅᔪᔪᒍᑦ ᐊᑕᐅᓯᕐᒥᒃ ᐊᐱᕐᓲᑎᖃᕐᓱᑕ ᓄᓇᓕᓕᒫᒨᓕᖓᔪᒥᒃ ᐅᓇ ᐊᐱᕐᓲᑕᐅᑎᓪᓗᒍ: ‘ᓱᓇᒥᒃ ᑕᑯᒍᒪᕕᓯ ᐊᕙᑕᐅᑉ ᐱᓇᓱᐊᕐᑕᖓᓂᒃ? ᐊᒻᒪᓗ/ᐅᕝᕙᓘᓐᓃᑦ: ᐊᕙᑕᖅ ᓱᓇᒥᒃ ᐱᓇᓱᐊᓐᖏᑑᕙ?‘ ᑭᐅᒍᑕᐅᖃᑦᑕᓚᐅᔪᔪᖅ ᐊᐱᕐᓱᑕᓕᒫᑲᓵᑦᑎᓂ ᐅᓇᐅᓚᐅᔪᔪᖅ: ᐃᓄᐃᑦ ᐱᐅᓯᑐᖃᖓ ᓄᐃᑕᓕᐅᒥᑎᓪᓗᒍ. ᐃᓱᒪᑦᓱᖓᓗ ᑖᓐᓇ ᐆᑦᑐᕋᐅᑎᐅᑦᓱᓂ ᐱᓇᓱᐊᕋᑦᓴᖅ ᐱᒋᐊᕐᕕᓕᐅᑎᑦᓯᐊᕆᑕᖓᓂᐅᒃ ᐊᕙᑕᐅᑉ ᑕᑯᑦᓴᐅᓕᐅᒥᓂᐊᕐᒪᑦ ᐃᓄᓐᓄᑦ ᓄᓇᕕᒻᒥᐅᓄᑦ. ᐱᔭᑦᓴᒥᑕ ᐃᓚᒋᑕᖓᓂᐅᒃ, ᓄᓇᓕᓐᓂ ᐱᐅᓯᑐᖃᓕᕆᔩᑦ ᐃᓚᐅᓚᐅᔪᔪᑦ ᑖᑦᓱᒧᖓ ᐱᓇᓱᐊᓚᐅᔪᔭᑦᑎᓄᑦ ᐱᔭᕇᕐᓯᒪᔪᒥᒃ ᐊᓪᓚᖁᑎᓕᐅᕆᐊᓖᑦ ᓄᓇᓕᒻᒥᑕ ᐃᓗᐊᓂ ᐱᑦᓴᑖᕐᕕᐅᒍᓐᓇᕋᔭᕐᑐᓂᒃ ᐱᐅᓯᑐᖃᕐᑎᒎᕐᑐᓂᒃ. ᐆᑦᑑᑎᒋᓗᒋᑦ ᐅᑯᐊ: ᑭᓇᒃᑯᑦ ᑲᒻᒥᐅᓯᑎᓪᓚᕆᐅᕙᑦ? ᐅᕝᕙᓘᓐᓃᑦ ᑭᓇᒃᑯᑦ ᒥᕐᓱᓯᑎᓪᓚᕆᐅᕙᑦ? ᑭᓇᒃᑯᑦ ᓴᓇᓐᖑᐊᓲᖑᕙᑦ? ᐅᕝᕙᓘᓐᓃᑦ ᓱᓇᑐᐃᓐᓇᓯᐊᓂᒃ ᓴᓇᑦᓱᒍ ᑕᑯᒥᓇᕐᑐᓕᐅᓲᖑᕙᑦ? ᑭᓇᒃᑯᑦ ᐅᓂᒃᑳᑐᐊᓲᖑᕙᑦ? ᓇᓪᓕᐊ ᓄᓀᑦ ᐃᑉᐱᒋᔭᐅᓗᐊᓐᖑᐊᕆᐊᖃᕐᖃᑦ ᐃᓕᓐᓄᑦ ᓄᓇᓕᓐᓂᐅᕖᑦᑐᑦ ᓄᓇᓕᑉᐱᓗ ᒥᑦᓵᓃᑦᑐᑦ? ᐊᓯᖏᓪᓗ.

ᐱᓇᓱᐊᕆᐊᓕᓕᒫᕗᑦ ᑲᔪᓯᑦᓯᐊᑐᕕᓂᐅᑉᐸᑕ, ᓯᕗᓂᑦᓴᑎᓐᓂ ᖃᒻᒥᒐᓛᒃ ᓄᓇᓕᓐᓄᑦ ᐅᐸᓯᒪᓐᖏᑕᑦᑎᓄᑦ ᐊᕐᕕᑕᓛᕈᓇᐅᒻᒥᔪᒍᑦ ᑌᒫᑦᓭᓇᖅ ᐊᐱᕐᓱᑲᑦᑕᕆᐊᕐᑐᓗᑕ.

ᓄᓇᓕᓕᒫᓂ ᐱᐅᓯᑐᖃᓕᕆᔨᓂᒃ ᐊᑕᐅᑦᓯᑰᕐᑎᓯᔨᐅᑦᓱᖓ, ᐊᓕᐊᓚᐅᔪᕗᖓ ᐱᓇᓱᐊᖃᑎᖃᑲᑦᑕᕆᐊᒥᒃ ᐃᓱᒪᓕᐅᖃᑎᖃᕋᓱᐊᖃᑦᑕᓱᖓᓗ ᑖᕙᒃᑯᓂᖓ ᓄᓇᓕᓐᓂᒃ, ᓇᑯᕐᒦᓱᖓᓗ ᐃᓚᐅᓚᐅᔪᔪᓂᒃ ᐱᓇᓱᐊᕐᑕᑎᓐᓄᑦ.

Nancy Palliser
Regional Cultural Committees Coordinator
1(514)-254-8919 /-8939
1(866)-897-2287
nancyp@avataq.qc.ca

ᐱᓇᓱᐊᖃᑕᐅᑦᓱᖓ ᐊᕙᑕᐅᑉ ᐃᑦᓴᓂᑕᕐᓂᐊᕕᖁᑎᖓᓐᓂ, ᐊᓕᐊᓱᒻᒪᕆᓚᐅᔪᕗᖓ ᐱᓇᓱᐊᖃᑎᖃᕆᐊᒥᒃ ᐅᐸᑦᑕᑎᓐᓂ ᓄᓇᓕᓐᓂ ᐱᐅᓯᑐᖃᓕᕆᔨᓂᒃ. ᑐᓵᖃᑦᑕᓱᖓ ᐅᖃᐅᓯᑦᓴᖏᓐᓂᒃ ᑲᑦᓱᙰᓕᑎᑕᐅᖃᑦᑕᓚᐅᔪᕗᖓ ᐱᕕᓕᒫᒃᑯᑦ ᐃᑲᔪᕈᒪᓯᑦᓱᒋᑦ. ᑲᖏᕐᓱᒦᓐᓂᑎᓂ ᓴᐅᑦᔪᐃᑦ ᐃᓕᓐᓂᐊᕕᖓᓂ ᐃᓅᓱᓐᓂᓴᓂᒃ ᐅᖄᒋᐊᕐᑐᕕᖃᕐᓯᒪᓚᐅᔪᒻᒥᔪᒍᑦ ᓱᓇᐅᒻᒪᖔᑦ ᐃᑦᓴᓂᑕᕐᓂᐊᓂᖅ, ᐱᐅᓯᑐᖃᑦᑎᓂᒃ ᓄᐃᑕᑎᑦᓯᓕᐅᒥᑦᓱᑕ ᐃᓄᐃᑦ ᓄᓇᖏᓐᓅᕆᐅᕐᑐᓂᒃ. ᐊᒻᒪᓗ ᐱᓇᓱᐊᖃᑕᐅᓲᖑᒐᒪ ᐊᕙᑕᐅᑉ ᐃᑦᓴᓂᑕᕐᓂᐊᕕᖓᓐᓂ, ᐊᒥᓱᑲᓪᓚᓂᒃ ᐊᐱᕐᓱᑕᐅᖃᑦᑕᓚᐅᔪᔪᖓ ᓄᓇᓕᓐᓂ ᐱᐅᓯᑐᖃᓕᕆᔨᓄᑦ ᓇᔪᒐᐅᓚᐅᕐᑐᕕᓃᑦ ᓄᓇᓕᖓᑕ ᓴᓂᐊᓃᑦᑐᑦ ᒥᑦᓵᓄᐊᖓᔪᓂᒃ, ᓄᓇᓕᒻᒥᐅᑐᐃᓐᓀᑦ ᐊᒥᓱᒻᒪᕆᓐᓂᒃ ᐊᐱᕐᓲᑎᖃᖃᑦᑕᓚᐅᔪᒻᒥᔪᑦ, ᐅᓇ ᐆᑦᑑᑎᒋᓗᒍ: ‘ᖃᖓᓖ ᐊᕙᑕᐅᑉ ᐃᑦᓴᓂᑕᕐᓂᐊᑎᖁᑎᖏᑦ ᓄᓇᓕᑦᑎᓂ ᐃᑦᓴᓂᑕᕐᓂᐊᕆᐊᕐᑐᓛᕐᖃᑦ?‘ ᐆᑦᑑᑎᒋᓗᒍ: ᐊᐅᐸᓗᒻᒥ, Oceanic Iron Ore ᐅᔭᕋᕐᓂᐊᑏᑦ ᐅᔭᕋᕐᓂᐊᓕᕈᑎᒃ ᓄᓇᑦᓴᒥᓂᒃ ᐊᐅᐸᓘᑉ ᓴᓂᐊᓂᐊᐱᒃ ᐋᕐᕿᓱᐃᓯᒪᓕᕇᓚᐅᔪᔪᑦ, ᑌᒣᒻᒪᑦ ᐊᐅᐸᓗᒻᒥᐅᑦ ᐃᓚᖏᑦ ᐃᓱᒫᓗᓕᕐᐸᓕᐊᔪᑦ ᐊᓯᐅᔨᓛᓕᕐᓂᒥᓂᒃ ᐱᐅᓯᑐᖃᕐᑎᒍᑦ ᑭᓇᐅᓂᕐᒥᓂᒃ ᒪᙯᕝᕕᒋᓲᒥᓂᓪᓗ ᐅᔭᕋᕐᓂᐊᑐᑦ ᓇᓂᓕᒫᖅ ᐊᖏᔪᐊᓗᒻᒥ ᓄᓇᒥ ᐃᕐᐸᓯᒪᓛᕐᓂᐊᒪᑕ, ᐊᒥᓱᑲᓪᓓᑦ ᓇᔪᒐᐅᓚᐅᕐᑐᕕᓃᑦ ᓱᕐᕋᑕᐅᓛᕐᓂᐊᒪᑕ ᐃᓄᐃᑦ ᐊᒥᓱᑦ ᐊᒥᓱᓂᒃ ᐊᐱᕐᓲᑎᑦᓴᖃᖃᑦᑕᓚᐅᔪᔪᑦ ᖃᖓ ᐊᕙᑕᖅ ᐃᑦᓴᓂᑕᕐᓂᐊᑎᖁᑎᒥᓂᒃ ᓄᓇᓕᓐᓅᑎᑦᓯᓴᕋᑕᓛᕐᒪᖔᑦ.

ᐃᓕᑦᓯᒪᕆᓚᐅᔪᕗᖓ ᐱᓇᓱᐊᖃᑎᖃᖃᑦᑕᓱᖓ ᓄᓇᓕᓐᓂ ᐱᐅᓯᑐᖃᓕᕆᔨᓂᒃ ᐊᑕᐅᑦᓯᑰᕐᑎᓯᔨᖓᓂᓗ. ᐃᓚᐅᓚᐅᔪᓕᒫᓂᒃ ᐱᓇᓱᐊᕐᑕᑎᓐᓄᑦ ᓇᑯᕐᒦᑐᒻᒪᕆᐅᕗᖓ ᐊᒻᒪᓗ ᖃᒻᒥᐊᐱᒃᑯᑦ ᐃᓕᑦᓯᓂᒃ ᐱᓇᓱᐊᖃᑎᖃᓛᕈᒣᓐᓈᓱᖓ... ᐱᐅᓯᑐᖃᑦᑎᓂᒃ ᓄᐃᑕᑎᑦᓯᓗᑕ ᐃᓄᑐᐃᓐᓇᐅᓗᑕ ᑭᓇᐅᓂᕗᑦ ᓲᖑᔪᒻᒪᕆᐅᓚᖓᒻᒪᑦ!

Andrew Papigatuk
Archaeology Lab Technician
1(514)-989-9031 Ext: 233
1(800)-361-5029
apapigatuk@avataq.qc.ca

ᐊᑦᔨᖑᐊᓂᒃ ᑕᑯᒋᐊᕈᒪᒍᕕᑦ; ᖃᕆᑕᐅᔭᑎᒍᑦ ᐅᕗᖓ ᐱᑐᓪᓗᑎᑦ:
http://www.facebook.com/groups/lccofnunavik/