• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᔪᓓᖑᕋᑖᓚᐅᕐᑐᒥ, ᐃᑦᓴᓂᑕᕐᓂᐊᕕᐅᑉ ᐱᒍᑦᔨᕕᖓ ᐱᓇᓱᐊᕈᓯᓕᒫᒥ ᖃᐅᔨᓴᕐᓂᒪᕆᖃᓚᐅᔪᕗᖅ ᐊᐅᐸᓗᒻᒥ. ᑕᕝᕙᓂ ᖃᐅᔨᓴᕐᓂᒥ ᓯᕗᓕᓚᐅᔪᔪᖅ Elsa Cencig (ᐊᕙᑕᖅ ᐱᐅᓯᑐᖃᓕᕆᕕᒻᒥᐅᒧᑦ) ᐃᑲᔪᕐᑎᓗᒍ Marianne-Marilou Leclerc (ᒧᓐᑐᔨᐊᑉ ᐃᓕᓐᓂᐊᕕᕐᔪᐊᖓᓐᓂᒥᐅᖅ), ᑭᑎᑦᓯᓚᐅᔪᔫᒃ ᓇᔪᒐᐅᖃᑦᑕᓚᐅᕐᑐᕕᓂᕐᓂᒃ ᐊᐅᐸᓘᑉ ᒥᑦᓵᓃᑦᑐᓂᒃ, ᓱᒐᓗᑦᑐᖅ ᐅᔭᕋᕐᓂᐊᕕᐅᒐᒪᒐᔭᓐᖑᐊᑐᓂᒃ ᐅᔭᕋᕐᓂᐊᑎᓄᑦ. ᐊᐅᐸᓗᒻᒥᐅᑦ ᐊᐱᕆᔪᕕᓂᐅᓚᐅᔪᔪᑦ ᐊᕙᑕᕐᒥᒃ ᐊᑯᓐᓂᖁᓯᓕᐅᑦᔨᖁᑦᓱᒍ ᐅᖑᒪᑦᓯᓗᓂ ᐱᐅᓕᑦᓯᒐᓱᐊᕐᓗᓂᓗ ᐃᓄᐃᑦ ᐱᐅᓯᕐᓱᕈᑎᖏᓐᓂᒃ ᑲᔪᓯᔪᓂᒃ. ᑌᑰᓇᓪᓗᐊᖅ ᖃᐅᔨᓴᕐᓂᕆᓚᐅᔪᔭᖓ ᓈᒻᒪᓈᕐᓯᒪᑦᓯᐊᑐᐃᓐᓇᓚᐅᔪᔪᖅ ᐅᔭᕋᕐᓂᐊᑏᑦ ᑎᒥᐅᔪᖁᑎᖓ Ocean Iron Ore ᓯᕗᓪᓕᐹᖓᓃᓕᑌᓐᓇᒪᑦ ᐅᔭᕋᕐᓂᐊᓂᓪᓗᑐᖅ ᐱᒋᐊᓛᑦᔭᖐᓐᓈᓱᓂ ᐊᕐᕌᒍᕐᓂ ᐊᒥᓱᒐᓛᓂ ᓱᓕ. Ocean Iron Ore ᑮᓇᐅᔭᖃᕐᑎᓯᕙᓪᓗᑐᑑᖃᑕᐅᕗᖅ ᑖᑦᓱᒧᖓ ᐱᓇᓱᐊᕐᑕᐅᓕᕐᑐᒧᑦ ᓱᖏᕐᑐᐃᓱᓂᓗ ᐅᔭᕋᕐᓂᐊᕕᓕᐅᕐᓂᖅ ᐅᔭᕋᕐᓂᐊᓂᓪᓗᑐᕐᓗ ᐊᒻᒪᓗ ᐅᔭᕋᕐᓂᐊᓂᓪᓗᑯᕕᓃᑦ ᓱᒃᑯᑎᕆᓛᓐᖏᓂᖏᓐᓂᒃ ᐃᑦᓴᓂᑕᕐᓂᐊᕕᓐᓂᒃ ᓇᔪᒐᐅᓚᐅᕐᑐᕕᓂᕐᓂᓗ.

ᒪᕐᕉᒃ ᐃᑦᓴᓂᑕᕐᓂᐊᑏᒃ ᓄᓇᑐᕐᓕᓕᐊᕐᖄᓚᐅᔪᔫᒃ ᒪᓕᑦᑎᓗᒍ ᑖᕕᑎ ᐊᖑᑎᓐᖑᐊᖅ, ᐊᐅᐸᓘᑉ ᓯᕗᓕᕐᑎᖓ. ᑖᕙᓂ ᖃᒻᒥᓂᑕᐅᓂᕐᓴᒥᒃ ᐱᐅᓯᐅᓯᒪᔪᒥᒃ ᐊᓪᓚᖁᑎᓕᐅᕈᒪᓚᐅᔪᒐᑦᑕ. ᑖᕙᒃᑯᐊ ᐱᖓᓱᑦ ᐊᓪᓚᕕᓕᐊᓚᐅᔪᒻᒥᔪᑦ, ᑕᓯᐊᓗᒻᒧᑦ, Castle Mountain-ᒧᑦ, Iron Valley-ᒧᑦ ᑎᑭᕌᓗᑦᔪᐊᒧᓪᓗ, ᓇᓗᓀᕐᓯᒋᐊᕐᑐᓱᑎᒃ ᓇᔪᒐᐅᓚᐅᕐᑐᕕᓂᓕᒫᓂᒃ ᐅᔭᕋᕐᓂᐊᕕᐅᔪᑦᓴᒫᓂ.

ᓀᓈᕐᓱᒍ, ᑖᕙᒃᑯᐊ ᓄᓀᑦ ᖃᐅᔨᓴᕐᑕᐅᓚᐅᔪᔪᑦ ᐃᓄᖃᖃᑦᑕᓚᐅᕐᑐᕕᓂᐅᔭᓐᖏᑐᑦ ᐅᔭᕋᕐᓂᐊᕕᐅᔪᑦᓴᒫᒍᑦᓱᑎᒃ Oceanic Iron Ore-ᑯᓐᓄᑦ (ᐆᑦᑑᑎᒋᓗᒋᒃ Iron Valley ᐊᒻᒪᓗ Castle Mountain). ᐊᒥᓲᓐᖏᑑᓗᐊᓂᒃ ᑌᑦᓱᒪᓂᒻᒪᕆᒃ ᓄᓇᓕᖃᕐᓯᒪᒻᒥᔪᖅ ᐊᓪᓚᕕᐅᑉ ᓯᑦᓴᔭᖓᑕ ᓯᕿᓂᐊᓃᑦᑐᓂᒃ ᐊᒻᒪᓗ ᐊᑕᐅᓯᕐᒥᒃ ᓄᓇᓕᖃᕐᓯᒪᒻᒥᓱᓂ ᑕᓯᐊᓘᑉ ᓴᓂᐊᓂ, ᑭᓯᐊᓂ ᑖᒃᑯᐊ ᓄᓇᓕᐅᓚᐅᕐᑐᕕᓃᒃ ᐅᔭᕋᕐᓂᐊᕕᐅᓛᕐᑑᑉ ᓯᓚᑖᓃᑦᑑᒃ. ᑭᓯᐊᓂᓗᑦᑕᐅᖅ, ᑎᑭᕌᓗᑦᔪᐊᖅ ᓄᓇᑦᓯᐊᕌᓗᒃ ᑌᑦᓱᒪᓂᐊᓗᒋᐊᖅ ᖃᒻᒥᓂᑕᐅᓂᕐᓴᓗ ᓇᔪᕐᑕᐅᓯᒪᒐᒥ ᐃᓄᓐᓄᑦ. ᑖᓐᓇ ᓄᓇᒃ Oceanic-ᑯᑦ ᓇᑉᐹᑎᕐᕕᒋᓛᕐᑕᖓ ᐊᒥᓱᒐᓛᓂᒃ (ᐆᑦᑑᑎᒋᓗᒍ ᐃᓪᓗᕈᐊᓂᒃ, ᐅᓯᖏᐊᕐᕕᓂᒃ, ᐊᓯᖏᓐᓂᓗ), 15-ᓗᑐᐊᓗᓐᓂᒃ ᓇᔪᒐᐅᓚᐅᕐᑐᕕᓂᕐᓂᒃ ᐃᑦᓴᓂᑕᕐᓂᐊᕕᓕᒃ, ᑌᑦᓱᒪᓂ ᑐᓂᖃᕐᑎᓗᒍ ᓱᓕ ᑌᑦᓱᒪᓂᒧᑦ ᑎᑭᑦᓱᒍ ᐃᓄᖃᖃᑦᑕᓚᐅᕐᓂᒪᑦ. ᐅᓪᓗᒥᐅᓕᕐᑐᖅ, ᑖᕙᓐᓇ ᓄᓇ ᒪᙯᕝᕕᓯᐊᕌᓗᖓ ᐊᐅᐸᓗᒻᒥᐅᑦ. ᐅᖃᖃᑎᒌᒃᑲᓂᓛᕐᓂᐊᑐᑦ ᐊᕙᑕᒃᑯᑦ, ᐊᐅᐸᓗᒻᒥᐅᑦ Oceanic Iron Ore-ᑯᓗ ᓱᖏᕐᑐᐃᒋᐊᓪᓛᒐᓱᐊᕐᓗᑎᒃ ᓱᔪᑎᑕᐅᑦᑌᓕᖏᐊᖃᕐᓂᖏᓐᓂᒃ ᐊᓐᓇᑐᐃᔭᐅᒋᐊᖃᕐᓂᖏᓐᓂᓗ ᑖᕙᒃᑯᐊ ᓇᔪᒐᐅᓚᐅᕐᑐᕕᓃᑦ.