• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᑐᕓᔮᕈᑦ (ᔪᓓ) 30, 2012-ᒥ, ᒪᕐᕉᒃ ᐃᑦᓴᓂᑕᕐᓂᐊᑏᒃ—Christian Roy (ᒃᕆᔅᑎᐊᓐ ᕈᐊ) ᐊᒻᒪᓗ Benjamin Patenaude (ᐱᐊᓐᔭᒥᓐ ᐹᑎᓅ) ᐊᕙᑕᕐᒥᒃ ᐱᒍᑦᔨᓱᑎᒃ—ᕿᑭᕐᑖᓗᓕᐊᓚᐅᔪᕘᒃ ᑕᓯᐅᔭᐅᑉ ᓴᓂᐊᓃᑦᑐᒧᑦ 50-ᑭᓗᒦᑕᓄᑦ ᐅᖓᓯᑦᑕᓕᒻᒧᑦ ᐅᒥᐅᔭᐅᑉ ᓯᕿᓂᖓᓂ. ᑖᕗᓐᖓᓚᐅᔪᔫᒃ ᐱᔭᕇᒋᐊᕐᑐᓱᑎᒃ ᐃᑦᓴᓂᑕᕐᓂᐊᓂᑎᒍᑦ ᓇᐅᑦᓯᑐᒋᐊᕐᑐᓱᑎᒃ ᑲᒻᐸᓂᒃᑰᕙᓚᐅᕐᑐᑯᑦ ᓂᐅᕐᕈᓯᕐᕕᒋᓚᐅᕐᑕᕕᓂᖓᓂᒃ ᕿᑭᕐᑖᓗᒻᒥ (HaGb-11)-ᒥ ᓂᐅᕐᕈᓯᕐᕕᐅᓚᐅᕐᑐᕕᓂᐅᑦᓱᓂ 1750-ᒥᑦ 1758-ᒧᑦ. ᐅᒥᐅᔭᕐᒥᐅᑦ ᓯᑕᒪᐅᔪᓐᖏᒐᕐᑐᑦ ᐃᓕᓐᓂᐊᑏᑦ, ᐁᓴ ᐊᒻᒪᓗ ᑑᒪᓯ ᐊᔭᒍᑕᖅ, ᓵᓕ ᑯᔫ, ᐸᐅᓗᓯ ᐃᓄᑉᐸᖅ. ᐅᔨᑦᓱᑦ ᖁᒫᓗᒃ, ᐹᐱ ᓇᕐᑌ ᐊᒻᒪᓗ ᔫᓱᐊ ᓵᓚ, ᐃᑲᔪᕆᐊᕐᓯᒪᓚᐅᔪᔪᑦ ᐃᑦᓴᓂᑕᕐᓂᐊᓂᑦᑎᓂᒃ. ᐃᑦᓴᓂᑕᕐᓂᐊᑏᑦ ᒪᓕᑦᑕᐅᓯᒪᓚᐅᔪᒻᒥᔪᑦ ᒪᕐᕉᓄᑦ ᒪᙯᑦᑎᐅᓱᑎᒃ/ᒪᓕᒑᓐᓄᑦ: ᔫᐱ ᑯᔫ ᐊᒻᒪᓗ ᓵᓕ ᑐᒃᑑ, ᐃᒐᔨᖃᕐᓱᑕ ᕗᕌᓐᓯᔅ ᐅᐃᑖᓗᑦᑐᒥᒃ. ᐊᐅᓚᓂᒃᑯᑦ ᑐᔪᕐᒥᐅᕕᖃᕐᓂᑯᓪᓗ ᐃᑲᔪᕐᑕᐅᓚᐅᔪᒻᒥᔪᒍᑦ ᓵᓕ ᖁᒫᓗᒻᒧᑦ. ᑖᓐᓇ ᐃᑦᓴᓂᑕᕐᓂᐊᑎᑦᓯᓂᖅ ᐃᓕᓐᓂᐊᑎᓂᒃ ᐊᑐᐃᓐᓇᕈᕐᑎᑕᕕᓂᐅᓚᐅᔪᔪᖅ ᐊᕙᑕᖅ ᐱᐅᓯᑐᖃᓕᕆᕕᒻᒧᑦ ᑮᓇᐅᔭᖃᕐᑎᑕᐅᑦᓱᓂᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓐᓄᑦ ᐃᑦᓴᓂᑕᕐᓂᐊᓂᖅ ᐃᓚᒋᔭᐅᑎᑕᐅᑎᓪᓗᒍ ᐃᓕᓐᓂᐊᑎᓂᒃ ᐃᓕᓐᓂᐊᑎᑦᓯᓂᐅᓲᑉ ᐱᓇᓱᐊᕐᑕᐅᓂᖓᓄᑦ. ᐊᓪᓓᑦ ᑯᔩᑦ ᓄᓇᓕᓕᒫᓂ ᐊᖓᔪᕐᖃᐅᕕᖃᕐᕕᖓ ᑕᒪᑦᓱᒧᖓ ᑮᓇᐅᔭᖃᕐᑎᓯᒐᓛᐱᖃᑕᐅᓚᐅᔪᔪᖅ.

2012-ᒥ ᓇᐅᑦᓯᑐᕐᓂᐅᓚᐅᔪᒧᑦ ᐱᑦᔪᑎᒋᔭᐅᓚᐅᔪᔪᖅ ᐱᔭᕇᒍᒪᓚᐅᔪᒻᒪᑕ ᐃᑦᓴᓂᑕᕐᓂᐊᓂᕕᓂᕐᒥᓂᒃ ᕿᑭᕐᑖᓗᒻᒥ ᑕᓯᐅᔭᐅᑉ ᓴᓂᐊᓂ, ᓯᕗᓪᓕᒥ ᑖᕙᓐᓇ ᐃᑦᓴᓂᑕᕐᓂᐊᕕᐅᓚᐅᔪᒻᒪᑦ 2007-ᒥ, ᐊᒻᒪᓗ ᐃᓕᓐᓂᐊᑎᑦᓯᓂᖃᓚᐅᔪᑦᓱᑕ ᐃᓄᓐᓂᒃ ᐃᓕᓐᓂᐊᑎᓂᒃ ᐃᑦᓴᓂᑕᕐᓂᐊᓂᐅᑉ ᒥᑦᓵᓄᑦ. ᐱᓇᓱᐊᕈᓯᕐᓂ ᐱᖓᓱᓂ ᐃᑦᓴᓂᑕᕐᓂᐊᓂᖏᓐᓂ, 38 ᓄᓀᑦ ᓴᒡᒐᑕᐅᓚᐅᔪᔪᑦ ᐃᓗᕐᓴᓕᐅᕐᑐᖃᖃᑦᑕᓱᓂᓗ ᐅᕝᕙᓘᓐᓃᑦ 50 m2-ᒥᒃ ᓄᓀᑦ ᐊᖏᓂᓖᑦ ᓴᒡᒐᑕᐅᓚᐅᔪᑦᓱᑎᒃ, ᑖᕙᓂ ᑲᒻᐸᓂᒃᑰᕙᓚᐅᕐᑐᑯᑦ ᓂᐅᕐᕈᓯᕐᕕᒋᕐᖄᓚᐅᕐᓯᒪᔭᖓ ᓇᑉᐸᑕᐅᓚᐅᕐᑐᕕᓂᐅᑎᓪᓗᒍ. ᐃᑦᓴᓂᑕᕐᓂᐊᓂᐅᓚᐅᔪᔫᑉ ᑐᕌᕐᓂᕆᓚᐅᔪᔭᖓ ᓇᕝᕚᒍᒪᓚᐅᔪᒐᑦᑕ ᕿᔪᐃᓐᓇᐅᓱᑎᒃ ᓴᕕᕋᔦᓐᓇᐅᓱᑎᓘᓐᓃᑦ ᐃᓪᓗᕈᐊᑉ ᐊᕙᓗᒥᐅᑕᕕᓂᖏᓐᓂᒃ, ᖃᐅᔨᒍᒪᒐᑦᑕ ᖃᓄᓪᓗᐊᑎᒋᑦ ᑖᕙᓂᒥᐅᒍᓚᐅᕐᑐᕕᓃᑦ ᐱᓇᓱᐊᓲᒍᓐᓂᒪᖔᑕ ᓇᓂᒥᐅᕙᓪᓘᓂᕐᒪᖔᑕᓗ, ᓄᐊᑦᓯᒍᒪᓚᐅᔪᑦᓱᑕᓗ ᐊᖏᓂᕐᓴᓂᒃ ᐱᐅᑎᒋᔭᐅᖃᑦᑕᓚᐅᕐᑐᕕᓂᕐᓂᒃ ᑐᑭᓯᓕᐅᒥᒍᑎᒋᒐᓱᐊᕐᓱᒋᑦ ᖃᓄᖅ ᐃᓅᓯᖃᕐᐸᓂᕐᒪᖔᑕ ᕿᑭᕐᑖᓗᒻᒥᐅᒍᓚᐅᕐᑐᕕᓃᑦ.

ᑌᑰᓇ ᐃᑦᓴᓂᑕᕐᓂᐊᑐᑦ ᐊᖏᔪᑲᓪᓚᓂᒃ ᐱᐅᔪᕋᑕᕐᓂᓗ ᓇᕝᕚᑕᕕᓂᕐᒥᓂᒃ ᓄᐊᑦᓯᓚᐅᔪᔪᑦ. ᐱᖓᓱᑦ ᐅᔭᕃᓐᓀᑦ ᐃᓪᓗᕈᐊᑉ ᐊᕙᓗᕕᓂᖏᑦ ᑕᑯᔭᐅᓚᐅᔪᓐᖏᑑᒐᓗᐊᑦ, ᐃᓚᑰᒍᑕᐅᔪᑦ ᐊᑭᓐᓇᐅᓚᐅᕐᑐᕕᓃᑦ ᑐᓐᖓᕕᕕᓂᖏᑦ ᓇᓗᓀᕐᑕᐅᓚᐅᔪᔪᑦ ᖃᐅᔨᒍᑕᐅᑦᓱᑎᒃ ᖃᓄᐃᓪᓗᐊᓗᑐᓚᐅᕐᓂᒪᖔᑦ ᑕᐅᑦᑐᖓ, ᐃᓚᖏᑦ ᓴᓇᒻᒪᕕᓂᖏᑦ ᐱᓇᓱᐊᕐᕕᐅᓲᕕᓃᑦ, ᐆᑦᑑᑎᒋᓗᒍ ᕿᔪᐃᓐᓇᐅᓱᓂ ᐃᓗᕐᕈᐊᑉ ᓇᐸᕈᑕᕕᓂᖓ (ᖃᓇᖅ?), ᒪᕐᕉᒃ ᕿᔪᐃᓐᓇᐅᓱᑎᒃ ᓇᐸᔫᓚᐅᕐᑐᕕᓃᒃ, ᐅᔭᕋᐅᑦᓱᑎᒃ ᐃᑯᐊᓚᑦᓯᕕᐅᓚᐅᕐᑐᕕᓃᑦ ᐊᒻᒪᓗ ᐊᒥᓱᑲᓪᓓᑦ ᓵᑦᑐᔮᒍᑦᓱᑎᒃ ᐆᓐᓂᐅᓱᑎᓗ ᐅᔭᕃᑦ ᓇᕝᕚᑕᐅᓚᐅᔪᒻᒥᔪᑦ ᓴᕕᕋᔭᓕᐅᕐᕕᐅᕙᑦᑐᕕᓂᕐᒥ. ᐃᑦᓴᓂᑕᕐᓂᐊᑐᑦ ᓇᕝᕚᓚᐅᔪᒻᒥᔪᑦ ᐊᒥᓱᑲᓪᓚᓂᒃ ᐱᐅᑎᒋᔭᐅᖃᑦᑕᓚᐅᕐᑐᕕᓂᕐᓂᒃ ᐱᓇᓱᐊᕐᕕᕕᓂᖏᓐᓃᑐᓂᒃ. ᐊᕐᓇᓇᕿᐊᑦ ᓱᐴᕈᑎᐅᓚᐅᕐᑐᕕᓃᑦ, ᓄᓇᐅᔦᑦ ᐳᓪᓚᐅᔭᕕᓃᑦ ᕓᓂᖃᐅᑎᕕᓂᐅᑦᓱᑎᒃ, ᐴᒍᑕᕕᓃᑦ ᒥᓛᕐᓂᑯᖏᑦ ᑕᕆᐅᑉ ᐊᑭᐊᓂᒥᐅᔦᑦ, ᖃᑯᐊᖓᔪᑦ ᖃᑦᑕᕕᓂᓗᑳᑦ ᖃᓪᓗᑎᕕᓂᓗᑳᑦ, ᑕᕆᐅᑉ ᐊᑭᐊᓂᒥᐅᔦᑦ ᐴᒍᑕᐅᓚᐅᕐᑐᕕᓃᑦ, ᓭᓃᓰᓪᓗ ᐴᒍᑕᑦᓴᔭᖏᑦ ᓇᕝᕚᑕᐅᓚᐅᔪᒻᒥᔪᑦ ᐃᓪᓗᕈᐊᕕᓂᐅᑉ ᓴᕕᕋᔭᓕᐅᕐᕕᕕᓂᖓᓂ ᐊᒻᒪᓗ ᓴᕕᕋᔭᓕᐅᕈᑕᐅᖃᑦᑕᑐᕕᓃᑦ. 2012-ᒥ ᐃᑦᓴᓂᑕᕐᓂᐊᓂᐅᓚᐅᔪᔪᖅ ᕿᑭᕐᑖᓗᒻᒥ ᑕᓯᐅᔭᐅᑉ ᓴᓂᐊᓂ ᑐᑭᓯᓐᓇᓂᕐᓴᐅᓕᕐᑎᓗᒍ ᐅᖄᔭᐅᑦᓯᐊᓛᕐᓂᐊᑐᖅ ᑐᓴᕐᑎᓯᐅᑎᐅᓛᓕᕐᒥᔪᒥ.