ᖁᓕᓪᓗ ᓯᑕᒪᐅᔪᓐᖏᒐᕐᑐᓘᖑᒍᑕᐅᔪᖅ ᓄᓇᕕᒻᒥᐅᑦ ᐃᓄᑐᙯᑦ ᑲᑎᒪᓂᒻᒪᕆᖓ ᐃᓱᓕᓚᐅᔪᔪᕗᖅ ᓂᕿᑦᓯᑐᓂ ᐊᒥᕃᔭᐅᑦ (ᓯᑎᒻᐱᕆ) 28-ᒥ ᑲᖏᕐᓱᔪᐊᕐᒥ, ᐱᔭᕇᑦᓯᐊᓱᑎᒃ ᐱᔭᑦᓴᒐᓴᕐᔪᐊᓂᒃ ᕿᑦᑌᖓᓇᕐᑑᓱᑎᒃ ᐅᓪᓗᓂ ᓯᑕᒪᑐᕐᑐᓂᒃ ᑐᑭᒧᐊᒍᑎᓃᑦᑐᓂᒃ.
2006-2007 ᐃᓕᓐᓂᐊᓇᐅᓂᖏᓐᓂ, ᐅᐃᒍᐃᑎᑐᑦ ᐃᓕᓐᓂᐊᑏᑦ ᐳᕐᑐᓂᕐᓴᒥ ᐅᓪᓗᕆᐊᑉ ᐃᓕᓐᓂᐊᕕᖓᓂᒥᐅᑦ ᑲᖏᕐᓱᐊᓗᑦᔪᐊᒥ ᐊᓐᓇᑐᐃᒐᓱᐊᕐᓱᑎᒃ ᑐᓂᕐᑕᓂᐊᕐᓂᖃᓚᐅᔪᕗᑦ ᓄᓇᓕᒥᑕ ᓴᓂᐊᓂ. ᐱᓇᓱᐊᕐᑕᐅᔫᑉ ᑐᕌᕐᓂᕆᓚᐅᔪᔭᖓ, ᑐᑭᒧᐊᕐᑎᑕᐅᑦᓱᓂ ᑐᓂᕐᑕᓂᐊᕐᑎᒧᑦ ᐃᓕᓐᓂᐊᑎᑦᓯᔨᐅᑦᓱᓂᓗ Amélie Langlais (ᐊᒥᓕ ᒫᖕᓓ-ᒧᑦ), ᐱᓇᓱᐊᖃᑎᖃᕐᓱᓂ ᐊᕙᑕᕐᒥᒃ, ᐊᓐᓇᑐᐃᒐᓱᐊᕈᒪᑦᓱᑎᒃ ᐊᒥᐊᒃᑯᕆᓕᕐᑕᖏᓐᓂᒃ ᐊᓂᕐᕋᐅᓚᐅᕐᑐᕕᓂᐅᑉ ᓯᖁᑦᑎᑕᐅᓯᒪᓕᕐᓱᓂ ᑎᓪᓕᒐᕐᑐᕕᓂᕐᓄᑦ.
ᓄᓇᕕᒻᒥ ᑐᓂᕐᑕᓂᐊᕐᑐᑦ ᓂᐱᓕᐅᕐᑕᐅᓛᕐᓂᐊᑐᑦ ᑕᕐᕋᒥᐅᑦ ᓂᐱ¯ᒃᑯᓄᑦ ᐱᖓᑦᓯᓕᕐᐸᑕ ᐊᕐᓇᓕᓐᖑᑎᕕᒃ (ᐅᒃᑑᐸ) 3, 2007-ᒥ. ᑖᓐᓇ ᓈᓚᐅᑎᒃᑯᑦ ᑐᓴᕐᓴᐅᓂᖅ ᐱᑦᔪᑎᖃᓛᕐᓂᐊᑐᖅ ᐊᕙᑕᐅᑉ ᐃᓄᓕᒫᓂᒃ ᐱᒍᑦᔨᓂᕆᓲᖓᓂᒃ, ᐊᐅᔭᓕᒫᓪᓗ ᑐᓴᕐᑎᓯᐅᑎᐅᖃᑦᑕᓚᐅᔪᑦᓱᓂ ᓄᓇᕕᒻᒥᐅᓄᑦ.
ᓇᑦᓯᐊᓕᐅᑦ (ᒫᑦᓯ) 2006-ᒥ, ᐊᕙᑕᖅ ᖃᐅᔨᔪᕕᓂᖅ Social Sciences and Humanities Research Council of Canada (SSHRC)-ᑯᑦ (ᐃᓅᖃᑎᒌᑦᑐᓂᒃ ᓱᑯᐃᔦᔨᖏᑦᑕ ᓄᓇᕐᔪᐊᒥᐅᓂᓪᓗ ᖃᐅᔨᓴᕐᑎᖏᑦᑕ ᑲᑎᒪᔨᖁᑎᖏᑦ ᑲᓇᑕᒥ) ᐁᑦᑑᑎᖃᕐᑐᕕᓂᐅᒋᐊᖏᑦ ᑐᓂᕐᑕᓂᐊᕐᑏᑦ ᐱᒍᑦᔨᕕᖓᓐᓂᒃ ᓄᓇᓖᑦ ᐃᓕᓐᓂᐊᕕᕐᔪᐊᒥᐅᓪᓗ ᖃᐅᔨᓴᖃᑎᒌᒍᑎᑦᓴᖏᑦᑕ ᓂᖏᕐᑎᓯᐅᑎᓂᒃ.
ᐱᓇᓱᐊᖃᑎᒌᑦᑐᑦ ᐊᕙᑎᑦ ᒥᑦᓵᓃᑦᑐᑦ ᐃᓚᐅᓚᐅᔪᕗᑦ ᓴᒡᒐᓂᕐᒧᑦ ᑐᓂᕐᑕᓂᐊᕐᕕᒥ ᐃᑎᖑᐊᓗᒻᒥ IbGk-3-ᒍᓂᕋᕐᑕᒥ ᓇᔪᒐᕕᓂᕐᒥ, ᕿᒥᕐᕈᓵᑲᓪᓛᐱᑦᓱᑎᓗ ᑐᓂᕐᑕᓂᐊᕐᕕᐅᒍᓐᓇᕋᔭᕐᑐᓂᒃ.
