• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᑐᓂᕐᑕᓂᐊᕐᓂᕕᓂᖅ ᐃᑎᖑᐊᓗᒻᒥ ᐊᕙᑎᖓᓂᓪᓗ, ᐃᓄᒃᔪᐊᑉ ᓴᓂᐊᓂ, ᐊᐅᔭᖅ 2007-ᒥ

ᐱᓇᓱᐊᖃᑎᒌᑦᑐᑦ ᐊᕙᑎᑦ ᒥᑦᓵᓃᑦᑐᑦ ᐃᓚᐅᓚᐅᔪᕗᑦ ᓴᒡᒐᓂᕐᒧᑦ ᑐᓂᕐᑕᓂᐊᕐᕕᒥ ᐃᑎᖑᐊᓗᒻᒥ IbGk-3-ᒍᓂᕋᕐᑕᒥ ᓇᔪᒐᕕᓂᕐᒥ, ᕿᒥᕐᕈᓵᑲᓪᓛᐱᑦᓱᑎᓗ ᑐᓂᕐᑕᓂᐊᕐᕕᐅᒍᓐᓇᕋᔭᕐᑐᓂᒃ. ᑖᒃᑯᐊ ᐱᓇᓱᐊᕐᑕᐅᔪᑦ, ᐊᕙᑕᐅᑉ ᐃᓚᐅᕕᒋᓚᐅᔪᔭᖏᑦ ᓄᓇᕐᔪᐊᓕᒫᒥ ᐅᑭᐅᕐᑕᑐᒥᐅᑦ ᐊᕐᕌᒍᖁᑎᖓᓐᓅᓕᖓᑎᓪᓗᒋᑦ, ᐱᒋᐊᕐᑎᑕᐅᒋᐊᓐᖓᑐᕕᓂᐅᑦᓱᑎᒃ Daniel Gendron-ᒧᑦ (ᑕᓂᐊᓪ ᔮᓐᑦᕉᓐ) ᑲᔪᓯᑎᑕᐅᑦᓱᑎᓪᓗ Pierre M. Desrosiers-ᒧᑦ (ᐱᔦ ᑎᕉᓯᔦ) ᐱᓇᓱᖃᑎᖏᓐᓄᓗ ᐅᑯᓄᖓ: ᑖᒥ ᐅᐃᑖᓗᑦᑐᖅ (ᐃᓄᒃ ᑐᓂᕐᑕᓂᐊᕐᑎ), ᓵᑲᕆᐊᓯ ᐸᐅᓗᓯ (ᒪᙯᑦᑎ-ᒪᓕᒐᖅ), ᐋᓕ ᓈᓚᑦᑑᔭᖅ (ᒪᙯᑦᑎ-ᒪᓕᒐᖅ), ᐋᓂ ᑯᑭᐊᐱᒃ (ᐃᒐᔨ), ᒣ ᐹᑦᑐᔨᑦᔅ (ᐃᒐᔨ), ᐊᒻᒪᓗ ᐸᐅᓗᓯ ᐃᓄᑉᐸᖅ ᒃᔨᔅ ᐊᖏᔫᕐᓗ – ᐃᑲᔪᕐᑏᒃ ᒪᙯᑦᑎᓂᒃ ᒪᓕᒐᕐᓂᒃ. ᒪᕐᕉᒃ ᐃᓕᓐᓂᐊᑏᒃ ᑕᕆᐅᑉ ᐊᑭᐊᓂᒥᐅᔮᒃ (Europe-ᒥᑦ) ᐃᓚᐅᓚᐅᔪᒻᒥᔫᒃ: Claire Houmard (ᒃᓕᐊᔾ ᖂᒫᕐ) (ᑖᓐᓇ ᐃᓕᓐᓂᐊᕕᕐᔪᐊᒥ ᑕᕆᐅᑉ ᐊᑭᐊᓂ ᐅᐃᒍᐃᑦ ᓄᓇᖓᓐᓂ ᐱᔭᕇᕈᑎᑖᕋᓱᐊᕐᑐᖅ) ᐊᒻᒪᓗ Enrico Foietta (ᐃᐊᓐᔩᑯ ᕗᐃᑦᑕ) (ᐃᓕᓐᓂᐊᕕᕐᔪᐊᒥ ᐃᓕᓐᓂᐊᑎ, ᐃᑕᓕᒥ). ᑕᕝᕘᓇᑦᓭᓇᖅ, ᖁᓕᐅᓐᖏᒐᕐᑐᑦ ᐃᓄᐃᑦ ᐃᓕᓐᓂᐊᑏᑦ ᓯᑕᒪᓂ ᐱᓇᓱᐊᕈᓯᕐᓂ ᐃᓚᐅᓚᐅᔪᒻᒥᔪᑦ ᐃᓕᓐᓂᐊᑎᑕᐅᑦᓱᑎᒃ ᓴᒡᒐᒍᓯᑦᓯᐊᒥᒃ ᐃᓚᐅᑎᓪᓗᒍ ᕿᓂᕈᓯᖅ, ᐱᓪᓗᑯᒋᐊᓕᑎᒍᑦ ᐊᓪᓚᖑᐊᕐᓂᐅᒋᐊᓕᒃ, ᐊᑐᕐᓂᒥᒃ ᑐᓂᕐᑕᓂᐊᕈᑐᓂᒃ ᕿᔪᐊᐱᓐᓂᒃ ᓯᒃᑭᑕᓪᓛᒍᑦᓱᑎᒃ ᐊᒻᒪᓗ ᑐᓂᕐᑕᓂᒃ ᐱᒐᓱᐊᕈᓯᕐᓂᒃ. ᐅᑯᐊ ᐃᓕᓐᓂᐊᑎᑕᐅᓚᐅᔪᔪᑦ: ᓈᑕᓕ ᐃᖃᓗᒃ, ᐁᐸᔭᖄ ᖃᓴᓪᓗᐊᖅ ᒣᓇ, ᐁᐱᓕ ᐅᐃᓕᐊ, ᒦᑲᓐ ᖃᓴᓪᓗᐊᖅ, ᔅᑎᕚᓐ ᒣᓇ, ᑖᒥ ᓂᕕᐊᕐᓯ, ᐋᓕ ᐊᑯᓕᐊᖅ, ᒨᓱᓯ ᐃᓪᓚᐅᑦ ᐊᒻᒪᓗ ᓲᓯ ᒣᓇ. ᑖᒃᑯᐊ ᐃᓕᓐᓂᐊᑏᑦ ᐃᓚᖏᑦ ᐃᓕᓐᓂᐊᑎᑕᐅᒋᐊᓪᓛᓚᐅᔪᒻᒥᔪᑦ ᓄᓇᓐᖑᐊᑎᒍᑦ ᓄᓇᒥᒃ ᐊᓪᓚᓂᕐᒥᒃ ᓄᓇᐅᑉ ᖄᑐᐃᓐᓇᖓᓂᒃ ᖃᐅᔨᓴᕐᑎᓄᑦ ᓚᕚᓪ ᐃᓕᓐᓂᐊᕕᕐᔪᐊᖓᓐᓂᒥᐅᓄᑦ ᑖᒃᑯᐊ ᙯᓯᒪᖃᑕᐅᓚᐅᔪᒻᒪᑕ ᖃᐅᔨᓴᕐᓂᑎᓄᑦ. ᓚᕚᓪ ᐃᓕᓐᓂᐊᕕᕐᔪᐊᖓᓐᓂᒥᐅᑦ ᓯᕗᓕᕐᑕᐅᓱᑎᒃ Najat Bhiry-ᒧᑦ (ᓇᔮᑦ ᐴᔨ) ᐃᓚᐅᒻᒥᑎᓪᓗᒋᑦ Anne-Marie Lemieux (ᐋᓐ-ᒪᔩ ᓚᒥᐅ), Elsa Censig (ᐃᐊᓪᓴ ᓯᐊᓐᓯᒃ) ᐊᒻᒪᓗ Bryan Sinkunas (ᐳᔦᔭᓐ ᓯᓐᑯᓇᔅ).

ᓴᒡᒐᓱᑕ IbGk-3-ᒥ ᐊᒥᓱᒐᓛᓂᒃ ᖃᐅᔨᒍᓐᓇᓯᓚᐅᔪᕗᒍᑦ ᑖᕙᑦᓱᒪ ᒥᑦᓵᓄᑦ. ᑖᕙᓐᓇ ᓇᔪᒐᕕᓂᕐᔫᔮᕐᑐᖅ ᐃᓄᑐᐃᓐᓇᓗᑐᕐᖄᕕᓂᕐᓄᑦ 2,500 ᐊᕐᕌᒍᐃᑦ ᐅᖓᑖᓄᑦ. 2,000 ᐊᕐᕌᒍᑲᓵᑦ ᑭᖑᓂᐊᓂ, ᑖᓐᓇ ᓇᔪᒐᕕᓂᖅ ᓇᔪᕐᑕᐅᓕᕐᓂᒥᔪᖅ ᐃᓄᑐᐃᓐᓇᓄᑦ ᑖᕙᓂ ᖃᕐᒪᓕᐅᕐᑐᕕᓂᐅᒻᒪᑕ ᑲᑕᓕᓐᓂᒃ ᓄᓇᐅᑉ ᐊᑖᒎᕐᑐᓂᒃ. ᑖᑦᓱᒪ ᓇᔪᒐᕕᓂᐅᑉ ᐃᓓᓐᓈᐱᖓ ᓴᒡᒐᑕᐅᓯᒪᔪᖅ ᐅᓪᓗᒥᒧᑦ ᑎᑭᑦᓱᒍ, ᑭᓯᐊᓂ ᓴᒡᒐᓱᑎᒃ ᐊᑐᕐᑐᒪᕆᓐᓂᒃ ᓇᕝᕚᑐᕕᓃᑦ. ᖃᐅᔨᓚᐅᔪᔪᒍᑦ ᕿᔪᒃ ᐊᑐᕐᑕᐅᕙᑦᑐᕕᓂᐅᒻᒪᑦ ᐊᓂᕐᕋᕆᔭᐅᔪᓄᑦ ᖁᓛᑦᓴᓕᐊᕆᔭᐅᑦᓱᓂ, ᑖᓐᓇ ᕿᔪᒃ ᑕᑯᔭᐅᓚᐅᕐᓯᒪᑦᓯᐊᔭᖏᑦᑐᖅ ᐅᑭᐅᕐᑕᑑᑉ ᐅᐊᓐᓂᖓᓂ. ᑐᑭᓯᓴᑦᓯᐊᕋᓱᐊᕐᓂᒥᒃ ᐱᒋᐊᓚᐅᕋᑕᓐᖏᑲᓗᐊᕐᑐᒍᑦ ᖃᐅᔨᓴᕐᓂᕕᓂᑦᑕ ᒥᑦᓵᓄᑦ, ᓯᕗᓂᑦᓴᑎᓐᓂ ᑕᑯᓐᓇᓕᕇᕐᑐᒍᑦ ᑖᒃᑯᐊ ᓇᕝᕚᑕᕕᓂᕗᑦ ᐅᕙᑦᑎᓂᒃ ᑐᑭᓯᑎᑦᓯᓕᐅᒥᓛᕐᒪᑕ ᑌᑦᓱᒪᓂᐊᓗᒃ ᑌᒣᑦᑐᓂᒃ ᐃᓪᓗᓕᐅᕈᓯᐅᔪᕕᓂᕐᓂᒃ. ᑐᓂᕐᑕᓂᐊᑲᓪᓛᐱᓐᓂᑎᓐᓂ ᓇᓗᓀᕐᓯᓚᕿᓚᐅᔪᒻᒥᔪᒍᑦ ᐊᕙᑎᑦ ᒪᕐᕉᒃ ᐅᖓᑖᓅᕐᑐᓂᒃ ᓄᑖᓂᒃ ᓇᔪᒐᐅᓚᐅᕐᑐᕕᓂᕐᓂᒃ ᐃᑎᖑᐊᓗᒻᒦᕙᓪᓗᑐᓂᒃ ᐃᓐᓇᓕᑲᓪᓚᒥᓪᓘᒐᓗᐊᖅ ᓇᐹᕐᑐᓕᒻᒥᓗ. ᑖᓐᓇ ᑕᑯᑎᑦᓯᔪᖅ ᓄᓇᐅᑉ ᐊᑦᓱᐃᑐᒻᒪᕆᐅᓂᖓᓂᒃ ᑐᓂᕐᑕᖃᕐᓂᑎᒍᑦ, ᕿᑭᕐᑕᓂᓗᐊᓐᖑᐊᖅ. ᓇᔪᒐᐅᓚᐅᕐᑐᕕᓃᑦ ᓇᕝᕚᖃᑦᑕᓚᐅᔪᔭᕗᑦ ᐃᓚᖃᖃᑦᑕᓚᐅᔪᑦ ᐊᒥᓱᓂᒃ ᐊᐅᔭᒥ ᐊᓂᕐᕋᕆᔭᐅᔪᕕᓂᕐᓂᒃ ᐊᒻᒪᓗ ᓴᓇᔭᐅᕙᑦᑐᕕᓂᕐᓂᒃ ᐆᑦᑑᑎᒋᓗᒋᑦ ᐅᒃᑯᐊᑕᔫᑦ, ᕿᓐᖏᕖᑦ ᐃᓗᕖᓪᓗ, ᐃᓚᐅᒻᒥᑎᓪᓗᒋᑦ ᐊᒥᓱᒐᓛᑦ ᐃᓄᕐᖄᕕᓃᑦ ᓇᔪᓚᐅᕐᑕᕕᓂᖏᑦ. ᓇᕝᕚᓚᐅᔪᒻᒥᔪᒍᑦ ᐊᒥᓱᒐᓛᓂᒃ ᓯᓪᓕᓂᐊᕐᕕᕕᓂᕐᓂᒃ, (ᓯᓪᓕᖅ ᐃᓐᓇᓕᒻᒥᐅᔭᖅ ᓴᕕᑦᓴᔭᐅᑦᓱᓂ ᓴᓇᕐᕈᑎᓕᐅᕈᑕᐅᕙᑦᑐᕕᓂᖅ).