ᑐᓴᐅᒪᖃᑎᒌᓐᓂᓕᕆᕕᒃ ᐊᑐᐊᒐᓐᖑᑎᑕᐅᑎᑦᓯᕕᓪᓗ
ᐊᑐᐊᒐᓐᖑᑎᑕᐅᓯᒪᓕᕐᑐᑦ
ᐊᑐᐊᒐᓐᖑᑎᑕᐅᓯᒪᔪᑦ ᐃᓄᑦᑎᑑᕐᓱᑎᒃ ᐱᒻᒪᕆᐊᓘᕗᑦ ᐃᓄᓐᓂᒃ ᐃᓄᑦᑎᑑᓲᓂᒃ ᐃᓄᑦᑎᑐᓪᓗ ᐃᓱᒪᒍᓯᓕᓐᓂᒃ ᑫᓪᓗᑐᐃᒐᒥᒃ. ᐊᕐᕌᒎᖃᑦᑕᓯᒪᓕᕐᑐᓂ, ᐊᕙᑕᖅ ᐱᐅᓯᑐᖃᓕᕆᕕᒃᑯᑦ ᐅᓄᕐᑐᑲᓪᓚᓂᒃ ᐊᑐᐊᒐᓐᖑᑎᑕᐅᑎᑦᓯᓯᒪᓕᕐᑐᑦ ᐱᓇᓲᑦᑏᓗ ᑐᓂᕐᕈᑎᖃᓗᑭᑲᑦᑕᓲᒍᑦᓱᑎᒃ ᕿᒥᕐᕈᐊᓂᒃ, ᓱᑯᐃᔦᓂᕕᓂᕐᓄᒃ ᐊᓪᓚᑕᐅᒪᔪᓂᒃ ᐊᓯᖏᓐᓂᓗ ᓈᒻᒪᓯᑦᑕᓱᑎᒃ ᐊᑐᐊᒐᓕᐊᖑᓲᓂᒃ.
ᐃᓚᖏᑦ ᐊᕙᑕᒃᑯᑦ ᐊᑯᐊᒐᓐᖑᑎᑕᐅᑎᓯᒪᓕᕐᑕᖏᑦ ᐊᑐᐃᓐᓇᐅᔪᑦ ᐃᓄᑦᑎᑑᕐᓱᑎᒃ, ᖃᓪᓗᓈᑎᑑᕐᓱᑎᒃ ᐅᐃᒍᐃᑎᑑᕐᓱᑎᓗ, ᐊᓯᖏᑦᑕᐅᖅ ᐊᑐᐃᓐᓇᐅᓱᑎᒃ ᐃᓄᑦᑎᑑᑐᐃᓐᓇᓛᕆᑦᓱᑎᒃ, ᐆᑦᑑᑎᒋᓗᒍ ᐲᑕ ᖃᓴᓪᓗᐊᑉ ᖃᐅᔨᒪᐅᓯᕕᓂᖏᑦ.
ᖃᒻᒥᐅᓚᐅᔪᖅ, ᐊᕙᑕᒃᑯᑦ ᐱᔭᕇᓚᐅᔪᑦ ᐅᐃᒻᒪᖓᓇᕐᑐᖑᐊᒍᑦᓱᓂ ᐱᓇᓱᐊᕐᑕᒥᓐᓂᒃ ᓄᓇᕕᒻᒥᐅᑦ ᐱᐊᕃᑦ ᐱᕈᕐᐸᓕᐊᓂᖓᓅᓕᖓᔪᒥᒃ. ᐊᑎᖃᕐᓱᓂ ᐅᓂᒃᑳᖑᐊᓚᐅᕐᑖ – ᑕᕝᕙᓃᑦᑐᑦ ᐊᕙᑎᓗ ᐱᖓᓲᔪᕐᑐᓘᖑᕗᑦ ᐅᓂᒃᑳᖑᐊᑦ ᐃᓐᖏᖑᐊᕈᓰᓪᓗ ᓄᓇᕕᓕᒫᒥᑦ ᐱᓯᒪᑦᓱᑎᒃ, ᐃᓚᖃᕐᓱᑎᒃ ᐱᐊᕌᐲᑦ ᓱᖃᑦᓯᐅᑎᑦᓴᖏᓐᓂᒃ. ᑖᓐᓇ ᐊᑐᐊᒐᖅ ᐱᒻᒪᕆᐅᑦᓱᓂ ᐱᔭᕆᔭᐅᓯᒪᔪᖅ ᐱᐊᕌᐱᓐᓂᒃ ᐃᓕᓐᓂᐊᑎᑦᓯᔨᓂᒃ ᓴᓇᕐᕈᑎᑖᕐᑎᓯᓯᒪᓕᕋᒥ ᐃᓕᓐᓂᐊᑎᑦᓯᒍᑎᒋᑦᓱᒍ ᐃᓄᐃᑦ ᐃᓗᕐᕈᓯᖓᑕ ᒥᑦᓵᓄᑦ.
ᐊᑐᐊᒐᖅᔭᕿᒥᕐᕈᐊᖅ ᐊᑎᖃᕐᓱᓂ ᐱᕈᕐᑐᐃᑦ ᓇᓃᓐᓂᖏᑦ ᓄᓇᕕᒻᒥ ᓄᓇᓕᐅᔪᓂ (ᐊᑐᐊᒐᓐᖑᑎᑕᕕᓂᖅ Éditions MultiMondes-ᑯᓐᓄᑦ, 2004-ᒥ) ᑲᖐᒋᓇᕐᑐᖑᐊᒍᒻᒥᔪᖅ ᐊᑐᐊᒐᓐᖑᑎᑕᕕᓂᐅᑦᓱᓂ. ᑖᓐᓇ ᐋᕐᕿᓱᕐᑕᕕᓂᖅ ᐊᓪᓚᑕᐅᒋᐊᓐᖓᑐᕕᓂᖅ Marcel Blondeau-ᒧᑦ (ᒫᕐᓯᐊᓪ ᑉᓛᓐᑑ) Claude Roy-ᒧᓪᓗ (ᒃᓘᑦ ᕈᐊ) ᐃᑲᔪᕐᑕᐅᓱᑎᒃ Alain Cuerrier-ᒧᑦ (ᐊᓓᓐ ᑰᕆᔦ) ᐊᕙᑕᖅ ᐱᐅᓯᑐᖃᓕᕆᕕᒃᑯᓄᓪᓗ.
2002 ᑎᑭᑦᓱᒍ, ᐊᕙᑕᒃᑯᑦ ᒪᕐᕈᕕᑦᓱᑎᒃ ᐊᕐᕌᒍᕐᒥ ᐊᑐᐊᒐᓐᖑᑎᑕᐅᑎᑦᓯᖃᑦᑕᓚᐅᔪᒻᒥᔪᑦ ᐊᑎᖃᕐᑐᒥᒃ ᑐᒥᕗᑦ. ᑖᒃᑯᐊ ᐊᑐᐊᒉᑦ ᐃᓗᓕᓖᑦ ᑲᖐᒋᓐᓇᑐᒻᒪᕆᐅᑦᓱᑎᒃ ᐅᓂᒃᑳᑐᐊᓂᒃ ᑕᑯᒐᑦᓴᓂᓪᓗ, ᐃᓚᐅᑎᓪᓗᒋᑦ ᖃᐅᔨᒪᔭᐅᒋᐊᓖᑦ ᐱᓯᒪᑦᓱᑎᒃ ᐃᓄᐃᑦ ᐅᓂᒃᑳᑐᐊᕐᐸᓂᕕᓂᖏᓐᓂᑦ ᓄᐊᑕᕕᓂᐅᑦᓱᑎᒃ ᐊᐱᕐᖁᓂᖃᑲᑦᑕᑎᓪᓗᒍ ᐃᓄᒻᒪᕆᓐᓂᑦ. ᐊᑐᐊᒐᓐᖑᑎᑕᐅᓯᒪᔪᑦ ᐃᓚᖃᕐᓯᒪᔪᑦ ᐅᖄᔭᐅᔪᓂᒃ ᐱᓐᖑᐊᕈᓯᑐᖃᕐᓅᓕᖓᔪᓂᒃ, ᐊᑦᔨᖑᐊᑐᖃᕐᓂᒃ ᐃᓚᒌᓐᓂᓕᕆᓂᕐᒥᓗ ᓄᓇᕕᒻᒥ.
ᖃᐅᔨᒪᔭᐅᒋᐊᓕᒃ: ᑐᒥᕗᑦ ᕿᒥᕐᕈᐊᑦ ᐊᑭᖃᑦᔭᑎᓐᓇᒋᑦ ᐃᓄᐃᑦ ᓄᓇᕕᒻᒥᐅᑦ ᐊᓂᕐᕋᖏᓐᓅᖃᕐᑕᐅᓲᑦ, ᑐᒃᓯᕌᕆᔭᐅᑐᐊᕈᑎᓗ ᓂᐅᕕᐊᕆᔭᐅᒍᓐᓇᓱᑎᒃ ᑎᒥᐅᔪᓄᑦ ᐃᓄᑑᓈᕐᑎᑐᓄᓪᓗ ᓄᓇᕕᒻᒥᐅᒍᓐᖏᑐᓄᑦ.
ᓯᕗᓂᑦᓴᑎᓐᓂ ᑐᕌᕐᓂᕆᒐᓱᐊᕐᑕᖓᑕ ᐃᓚᖓ, ᐊᕙᑕᖅ ᐱᐅᓯᑐᖃᓕᕆᕕᒃᑯᑦ ᐊᑐᐊᒐᓐᖑᑎᑕᐅᑎᑦᓯᒋᐊᓪᓛᑲᑦᑕᕈᒪᔪᑦ ᐃᓄᐃᑦ ᐊᓪᓚᑕᕕᓂᖏᓐᓂᒃ ᕿᒥᕐᕈᐊᓂᓪᓗ ᐃᓄᑦᑎᑑᕐᑐᓂᒃ ᐊᑐᐊᒐᓐᖑᑎᑕᐅᑎᑦᓯᑲᑦᑕᕈᒪᑦᓱᑎᒃ.
