ᖃᐅᔨᓴᕐᓂᖅ, ᐊᑐᐊᒐᒃᑯᕕᒃ ᐱᓇᓱᐊᕐᑕᐅᓯᒪᔪᓂᓪᓗ ᑲᑎᕐᓱᐃᕕᒃ
ᖃᐅᔨᓴᕈᓯᕕᓂᖅ
ᖃᐅᔨᒪᔭᐅᒋᐊᓕᓐᓂᒃ ᐳᑯᕝᕕᐅᔪᕕᓃᑦ
ᑖᓐᓇ ᐱᓇᓱᐊᕋᑦᓴᖅ ᐱᒋᐊᕐᑕᐅᓚᐅᕐᓯᒪᔪᖅ ᐊᐱᕐᖁᓂᖃᑲᑦᑕᑎᓪᓗᒍ ᐃᓄᒃᔪᐊᒥ. ᐊᑐᓂᑦ ᐃᓚᒌᑦᑐᓂᑦ ᐃᓄᒻᒪᕆᒋᔭᐅᓂᕐᐹᖅ ᐊᐱᕐᓱᑕᐅᖃᑦᑕᓱᓂ ᐃᓚᓕᒫᑦᓯᐊᒥᑕ ᒥᑦᓵᓄᐊᖓᔪᓂᒃ, ᐱᒍᓐᓇᕕᓕᒫᒥᒍᑦ ᑭᐅᒐᓱᐊᖃᑦᑕᓱᑎᒃ. ᑖᓐᓇ ᓯᕗᓪᓕᐸᐅᓚᐅᕐᓯᒪᔪᖅ ᓄᓇᓕᓕᒫᓂᑦ ᐃᓚᒌᑦᑐᓂᒃ ᑲᑎᕐᓱᐃᕕᐅᑦᓱᓂ ᖃᕆᑕᐅᔭᑎᒍᑦ. ᑐᖓᓖᖏᑦ ᖃᕆᑕᐅᔭᒨᔭᕐᑕᐅᓕᕐᓂᒥᔪᑦ ᐱᔭᕕᓃᑦ ᐃᓚᒌᑦᑐᑦ ᖃᓄᐃᓕᖓᓂᖏᓐᓂᒃ ᐃᓂᕐᑕᕕᓂᐅᑦᓱᑎᒃ ᐊᕐᕕᑕᕐᓂᖃᕐᑎᓗᒍ. ᖃᕆᑕᐅᔭᕐᒨᔭᕐᑕᐅᕙᓐᓂᖏᑦ ᐃᓚᒌᑦᑐᐃᑦ ᖃᓄᐃᓕᖓᓂᖏᑦᑕ ᑲᔪᓯᐅᒐᕐᐸᑐᑦ, ᐃᓚᒌᑦᑐᓕᒫᑲᓵᑦ ᑭᖑᓪᓕᐹᒥ ᖃᐅᔨᓴᕐᕕᐅᓂᕐᒪᑕ ᖃᐅᔨᓴᕐᑎᓄᑦ ᓚᕚᓪ ᐃᓕᓐᓂᐊᕕᕐᔪᐊᖓᓐᓂᒥᐅᓄᑦ 1960-ᐄᑦ ᐊᕐᕌᒍᖏᓐᓂ. ᐊᓯᖏᑦ ᖃᐅᔨᔭᐅᖃᑦᑕᑐᕕᓃᑦ ᑕᑯᔭᐅᒍᓐᓇᑐᑦ ᓄᓇᕐᔪᐊᒥᐅᓂᒃ ᐃᓅᖃᑎᒌᑦᑐᓂᒃ ᖃᐅᔨᓴᕐᑏᑦ ᐊᑐᐊᒐᓐᖑᐸᑦᑕᕕᓂᖏᓐᓂᑦ ᐅᓂᒃᑲᐅᓯᕐᓂᓗ ᐊᐱᕐᖁᓂᕕᓂᕐᓂᑦ ᐊᕙᑕᖅ ᐱᐅᓯᑐᖃᓕᕆᒃᑯᓃᑦᑐᓂ.
ᐃᓚᒌᓐᓂᓕᕆᓂᖅ ᐃᓚᑯᒐᓚᐅᖏᓐᓈᑐᖅ ᖃᐅᔨᒪᔭᐅᒋᐊᓕᓪᓗᑯᐊᐱᓐᓂᒃ, ᓱᒐᓗᑦᑐᖅ ᐃᓅᓕᕐᕕᕕᓃᑦ ᐅᓪᓗᖏᓐᓂᒃ. ᐱᓯᒪᓐᖏᑕᑦᑎᓂᒃ ᐱᒐᓱᐊᒧᑦ, ᐊᓯᖏᑦ ᐱᕕᐅᒍᓐᓇᑐᑦ ᖃᐅᔨᒪᔭᐅᒋᐊᓕᓐᓂᒃ ᖃᐅᔨᒋᐊᕐᕕᐅᓯᒪᓕᕐᑐᑦ, ᐅᑯᐊ ᐃᓚᐅᑎᓪᓗᒋᑦ:
- ᑲᕙᒪᑐᖃᒃᑯᓃᑦᑐᑦ ᐊᖁᒍᓐᓇᐅᑎᑖᕋᓱᐊᕈᑎᕕᓃᑦ ᐊᓪᓚᖁᑎᖏᑦ,
- ᑲᕙᒪᒃᑯᓂ ᐃᓄᐃᑦ ᖃᓄᐃᓕᖓᓕᕐᓂᖏᑦᑕ ᖃᐅᔨᒪᐅᑎᖏᑦ,
- ᐃᓅᓕᕐᑐᕕᓃᑦ ᑐᖁᔪᕕᓃᓪᓗ ᐊᓪᓚᖁᑎᖏᑦ ᑲᒪᒋᔭᐅᕙᑦᑐᕕᓃᑦ ᓄᓇᓖᑦ ᐋᓐᓂᐊᓯᐅᕐᕕᖏᓐᓄᑦ,
- ᐃᓅᓕᕐᑐᕕᓃᑦ ᑐᖁᔪᕕᓃᓪᓗ ᐊᓪᓚᖁᑎᖏᑦ ᑲᒪᒋᔭᐅᕙᑦᑐᕕᓃᑦ ᑲᒻᐸᓂᒃᑰᓚᐅᕐᓯᒪᔪᒃᑯᓄᑦ.
ᓇᓪᓕᐅᑎᓯᒪᖃᑎᒌᑦᑐᑦ ᐱᑦᓴᑖᕐᕕᐅᒍᓐᓇᑐᑦ ᖃᐅᔨᒪᔭᐅᒋᐊᖃᕐᒥᔪᓂᒃ ᐅᑯᓂᖓ ᐃᓚᓖᑦ:
- ᓄᓇᓕᒻᒥᐅᑦ ᐊᓪᓚᑕᐅᓯᒪᓂᖏᓐᓂᑦ ᐋᕐᕿᓱᕐᑕᕕᓂᐅᑦᓱᑎᒃ ᓄᓇᓖᑦ ᑲᕙᒫᐱᖏᓐᓄᑦ
- ᐊᖏᖃᑎᒌᒍᑎᒦᑦᑐᑦ ᐃᓚᐅᔪᑦ ᐱᓯᒪᑦᓱᑎᒃ ᑯᐯᒻᒥ ᐋᓐᓂᐊᓂᓕᕆᔨᒃᑯᓂᑦ ᐃᓅᓯᓕᕆᔨᒃᑯᓂᓪᓗ.
ᐊᒻᒪᓗᒋᐊᓪᓚᒃ, ᖃᐅᔨᒪᔭᐅᒋᐊᓕᓪᓗᑯᐊᐲᑦ ᐱᔭᕕᓂᕗᑦ ᐃᓚᒌᓪᓗᑐᕐᑐᓂᑦ ᓱᕐᖁᐃᔭᕐᑕᐅᒋᐊᖃᓲᑦ ᓄᓇᓐᖑᐊᓕᕆᓂᕕᓂᑦᑕ ᖃᐅᔨᔭᐅᓂᑯᖏᓐᓂᑦ, ᑖᒃᑯᐊ ᐃᑲᔪᕐᓯᒪᓲᒍᒻᒪᑕ ᓱᓕᒐᓗᐊᕐᒪ¯ᑕ ᐅᓪᓗᐃᑦ ᐃᓅᓕᕐᕕᐅᔪᕕᓃᑦ ᑐᖁᕕᐅᔪᕕᓃᓪᓗ.
ᐅᓇᒻᒥᓇᕐᑐᐃᑦ ᑕᕝᕙᓂ ᐱᓇᓱᐊᕋᑦᓴᒥ ᓵᓐᖓᔭᐅᒋᐊᖃᕐᐸᑐᑦ ᐃᓚᖃᕐᐳᑦ ᐊᑏᑦ ᐊᓪᓚᑕᐅᒪᓂᖏᑦᑕ ᒪᕐᕈᕕᑦᑕᐅᓯᒪᓂᖏᓂᒃ, ᐊᒥᓱᑲᓪᓓᑦ ᐃᓄᐃᑦ ᖃᐅᔨᒪᔭᐅᒍᑎᖃᕐᒪᑕ ᐊᑕᐅᓯᐅᓐᖏᑐᒥᒃ ᐊᑦᓯᕋᕐᑕᐅᓲᒍᓂᑯᒥᓄᑦ. ᐃᓚᒌᑦᑐᑦ ᓄᓇᓯᒪᔪᑦ ᐊᑦᔨᒌᓐᖏᑐᓂ ᓄᓇᐅᔪᓂ ᐊᐅᓚᔨᓂᖃᑐᐃᓐᓇᕆᐊᓖᑦ ᐃᓄᒻᒥᒃ ᐊᑕᐅᓯᕐᒥᒃ ᐊᑦᔨᒌᓐᖏᑐᓂᒃ ᐊᑎᓕᒻᒥᒃ. ᐆᑦᑑᑎᒋᓗᒍ, ᐊᕐᓇᖅ ᐊᑎᓕᒃ ᒥᐊᔨᒥᒃ ᓄᓇᓕᒻᒥ ᐊᑕᐅᓯᕐᒥ ᐃᓚᒥᓄᑦ ᓄᓇᕐᖃᑎᒋᓐᖏᑕᒥᓄᑦ ᖃᐅᔨᒪᔭᐅᔪᕕᓂᖅ ᐃᓄᒃᑎᑐᑦ ᐊᑎᖃᕆᐊᖓ ᓇᓴᕐᒥᒃ. ᑌᒣᒻᒪᑦ ᑖᑦᓱᒥᖓᑦᓭᓇᖅ ᐊᑎᕆᔭᐅᓕᕇᕐᑐᒥᒃ ᐊᑦᓰᓂᖅ ᐃᑉᐱᒋᔭᐅᑦᓯᐊᒋᐊᖃᒻᒪᕆᑦᑐᖅ.
ᑖᒃᑯᐊ ᐱᑦᔪᑎᒋᑦᓱᒋᑦ, ᐱᒻᒪᕆᐅᕗᖅ ᖃᐅᔨᒋᐊᕐᕕᖃᖃᑦᑕᐸᑕ ᐊᑦᔨᒌᓐᖏᑐᓂᑦ ᖃᐅᔨᒋᐊᕐᕕᓴᕐᓂᑦ ᑖᑦᓱᒥᖓᑦᓭᓇᖅ ᐊᑎᕆᔭᐅᓕᕇᕐᑐᒥᒃ ᐊᑦᓰᖃᑦᑕᓂᐊᓐᖏᒪᑕ.
ᐊᑎᕐᓂᒃ ᐱᕕᕕᓂᓕᒫᕗᑦ ᐊᓪᓚᑕᐅᒪᑦᓯᐊᓲᑦ ᐱᓇᓱᐊᕐᑕᕕᓂᑦᑎᓂ.
ᖃᐅᔨᒪᔭᐅᒋᐊᓖᑦ ᐊᐱᕐᖁᖁᑎᑦᑎᓄᑦ: ᐃᓚᒋᐊᕈᑎᑦᓴᓯᐊᓂᒃ ᖃᐅᔨᒪᔭᐅᒋᐊᓕᓐᓂᒃ ᓄᐊᑦᓯᓚᖓᑐᐊᕈᕕᑦ, ᐊᐱᕐᖁᖁᓇᕐᑐᑎᑦ ᑕᒪᖏᓐᓂᒃ ᐁᑉᐸᕇᑦᑑᓂᒃ/ᓄᓕᐊᕇᑦᑑᓂᒃ (ᐊᖑᑎᒃ ᐊᕐᓇᓗ) ᑭᖑᓕᕇᑦᓯᐊᑎᓪᓗᒋᒃ. ᐊᐱᕐᓱᓯᐊᕋᓱᐊᖃᑦᑕᓗᑎᑦ ᐊᐱᕐᖁᑕᕐᓂᐅᕕᑦ ᐊᑎᕐᖄᖏᓐᓂᒃ (ᖃᓄᕐᓗ ᐃᓚᒋᒻᒪ¯ᕐᒥᐅᒃ) ᐃᓄᐃᑦ ᐅᖃᕐᑕᖏᑦᑕ, ᐆᑦᑑᑎᒋᓗᒍ, ”ᐊᓈᓇᑦᓯᐊᕋ ᒥᐊᔨ” ᐅᕝᕙᓘᓐᓃᑦ “ᓄᑲᕋ/ᐊᖓᔪᒐ ᓘᓯ.”
ᑎᒍᐊᕐᓃᑦ
ᑕᕐᕋᒥ ᐱᐅᓯᑐᖃᕕᓂᖅ ᒪᓕᑦᓱᒍ, ᓄᑕᕃᑦ ᑎᒍᐊᕐᑖᕆᔭᐅᕙᑦᑐᕕᓃᑦ ᑎᒎᔨᒥᓐᓄᑦ ᐊᓪᓚᑕᐅᒪᓂᖃᒐᓛᒐᑎᒃ ᓇᐅᒃᑯᓘᓐᓃᑦ. ᑎᒍᐊᕆᔦᑦ ᖃᖓᑐᐃᓐᓇᓯᐊᖅ ᖃᐅᔨᒪᓕᐅᒥᒍᒪᒐᔭᕐᖂᒪᑕ ᐊᖓᔪᕐᖄᓗᑐᕕᓂᕐᒥᓂᒃ, ᑕᕝᕘᓇ ᐊᓪᓚᓯᒪᓚᕿᔭᕗᑦ ᒪᕐᕈᐃᓂᒃ ᐊᑎᑐᖃᖃᕐᑎᓗᒋᑦ: ᐊᖓᔪᕐᖄᓗᑐᖏᑦᑕ ᐊᑎᑐᖃᖏᑦ (ᐊᓪᓚᓯᒪᓂᒃᑯᑦ ᒪᓕᑦᑕᐅᓱᓂ “&”-ᒧᑦ) ᐊᒻᒪᓗ ᑎᒎᕕᖏᑦᑕ ᐊᑎᑐᖃᖏᑦ (ᐊᓪᓚᓯᒪᓂᒃᑯᑦ ᒪᓕᑦᑕᐅᓱᓂ “@”-ᒧᑦ). ᕿᓂᕐᑐᖃᑐᐊᕈᓂ ᐊᑎᕐᓂᑦ ᑎᒍᐊᕐᑕᐅᔪᒥᒃ, ᓈᒻᒪᓈᕐᓯᒪᔪᖅ ᓇᓗᓀᒃᑯᑕᐅᒋᐊᓕᒃ ᒪᓕᑦᓯᐊᕆᐊᓕᒃ ᐊᑎᑐᖃᖓᓐᓂᒃ. ᐱᐅᓯᑐᖃᕐᑎᒍᑦ, ᑎᒍᐊᑦ ᐃᓄᐃᑦ ᖃᐅᔨᒪᓲᑦ ᓄᑲᓪᓗᑐᕐᒥᓂᒃ, ᐊᖓᔪᓪᓗᑐᕐᒥᓂᒃ, ᐊᓂᓪᓗᑐᕐᒥᓂᒃ ᓇᔭᓪᓗᑐᕐᒥᓂᓪᓘᓃᑦ. ᐱᐅᓯᐅᑎᓪᓗᒍ ᐊᓪᓚᑕᐅᒪᓂᖃᓲᑦ ᒪᓕᑦᓱᑎᒃ ᐱᐅᓯᐅᔪᒥᑦ ᑎᒎᕕᒋᓚᖓᔭᖓᓐᓂᑦ: ᓄᑫᑦ, ᓇᔦᑦ, ᐊᖓᔪᐃᑦ, ᐊᓯᖏᓪᓗ, ᑌᒣᖏᓐᓇᓕᒫᓲᒍᓐᖏᑑᒐᓗᐊᖅ.
ᑭᖑᕚᕇᑦᑎᑐᑦ ᑭᓇᒌᓐᓂᖏᑦ ᒪᓕᑦᓱᒋᑦ, ᐃᓄᐃᑦ ᐱᐅᓯᑐᖃᕐᑎᒍᑦ ᓯᕗᓕᕕᓂᖏᑦᑕ ᐃᓄᒻᒪᕆᖏᑦᑕᓘᓐᓃᑦ ᐊᑎᖏᓐᓂᒃ ᑎᒍᓯᕙᑦᑐᕕᓃᑦ, ᓴᐅᓂᐅᓂᕋᕐᑕᐅᑎᓪᓗᒍ, ᑕᒪᓐᓇ ᐱᐅᓯᕐᓲᑎᒃ ᑕᑯᓐᓇᑕᐅᓪᓗᐊᓲᖑᒍᓐᓀᑑᒐᓗᐊᖅ.
ᑭᓇᑐᐃᓐᓇᑯᓐᓄᑦ ᖃᐅᔨᔭᐅᒋᐊᖃᓐᖏᓂᖅ
ᐃᓚᒌᑦᑐᑦ ᖃᓄᐃᓕᖓᓂᖏᑦ ᑭᓇᑐᐃᓐᓇᑯᓐᓄᑦ ᖃᐅᔨᒪᔭᐅᒋᐊᖃᓐᖏᑐᑦ ᖃᐅᔨᒋᐊᕐᕕᐅᒍᓐᓇᓱᑎᓪᓗ ᐃᓚᒋᔭᐅᓪᓗᑐᕐᑐᑦ ᑭᓯᐊᓂ ᐅᕝᕙᓘᓐᓃᑦ ᐊᖏᕐᖄᓚᐅᑲᑦᑎᓗᒋᑦ.
ᐊᑏᑦ ᖃᕆᑕᐅᔭᒨᔭᕐᑕᐅᓂᖏᑦ
ᓇᒻᒥᓂᕐᒥᓄᑦ ᓯᕗᓕᕕᓂᖏᑦᑕᓗ ᐊᓪᓚᖁᑏᑦ (Personal Ancestral File) ᐱᓇᓱᐊᕐᑕᐅᓂᖓ ᐱᓇᓱᐊᕐᑕᐅᓚᐅᕐᓯᒪᕗᖅ Church of Jesus Christ and Latter Day Saints (Mormons) in Salt Lake City, Utah, USA ᐊᒥᐊᔨᑲᒥᐅᑦ ᑐᒃᓯᐊᕕᖁᑎᖓᓐᓄᑦ. ᐱᕙᓪᓕᐊᔭᕕᓂᐅᑦᓱᓂ ᑐᒃᓯᐊᕕᐅᑉ ᑭᓐᖒᒪᑦᓯᓂᖓ ᒪᓕᑦᓱᒍ, ᖃᕆᑕᐅᔭᒨᔭᕐᑕᐅᒪᔪᑦ ᐃᓓᓐᓇᖏᑦ ᑭᓯᐊᓂ ᐊᑑᑎᖃᕐᑐᑦ ᐱᒋᐊᕐᑎᑕᐅᒐᓱᐊᕐᓂᖓᓄᑦ ᑕᕐᕋᒥ ᐃᓚᒌᑦᑐᑦ ᐊᓪᓚᖁᑎᖏᑦ.
ᐅᑯᐊ ᐊᑐᕐᑑᓱᑎᒃ ᖃᕆᑕᐅᔭᒨᔭᕐᑕᐅᒍᓐᓇᑐᑦ:
- ᐅᓪᓗᖓ ᓇᓃᓐᓂᖓᓗ ᐃᓅᓕᕐᕕᖓᑕ
- ᐅᓪᓗᖓ ᓇᓃᓐᓂᖓᓗ ᐸᑦᑎᑕᐅᕕᕕᓂᖓᑕ (ᑖᓐᓇ ᓇᓗᓀᕐᓯᕕᐅᓲᖅ E9-ᖏᓐᓂᒃ, ᐅᔭᒥᖏᓐᓂᒃ)
- ᐅᓪᓗᖓ ᓇᓃᓐᓂᖓᓗ ᑲᑎᑎᑕᐅᕕᕕᓂᖓᑕ
- ᐅᓪᓗᖓ ᓇᓃᓐᓂᖓᓗ ᐃᓅᒍᓐᓀᕕᕕᓂᖓᑕ
ᐱᖁᔭᑎᒍᑦ ᑲᑎᑎᑕᐅᓯᒪᒐᓗᐊᕐᐸᑕ ᖏᒃᑲᓗᐊᕐᐸᑕᓘᓐᓃᑦ, ᐃᓄᐃᑦ ᐊᓪᓚᑕᐅᒪᓂᓖᑦ ᐱᑐᑦᑎᑕᐅᓯᒪᔪᑦ ᓄᓕᐊᕐᒥᓄᑦ/ᐊᖑᑎᒥᓄᑦ. ᑖᓐᓇ ᓴᕐᕿᑎᑦᓯᔪᖅ ᐃᓚᒌᑦᑐᓂᒃ, ᑖᒃᑯᐊ ᓇᓗᓀᒃᑯᑕᕐᑖᓲᑦ ᐅᔭᒥᐅᓂᕋᕐᑕᓂᒃ. ᑌᒪ ᐱᐊᕃᑦ ᐃᓚᒋᓕᐅᑎᑎᑕᐅᓂᐊᓕᕐᒪᑕ ᐅᔭᒥᕐᒥᓂᒃ ᐊᑐᕐᑎᓗᒋᑦ, ᐱᑐᑦᑕᐅᒍᓐᓇᓱᑎᓗ ᐊᖓᔪᕐᖄᓗᑐᕐᒥᓄᑦ ᑭᖑᕚᒥᓄᓪᓗ, ᐊᓯᖏᓐᓄᓘᒐᓗᐊᖅ.
ᖃᐅᔨᒪᐅᑏᑦ ᐊᓪᓚᓯᒪᔪᖁᑏᓪᓗ
ᐊᒥᓲᓐᖏᑑᒐᓗᐊᓂᒃ ᖃᐅᔨᒋᐊᕐᕕᕈᓯᖃᕐᐳᖅ ᐊᓪᓚᖁᑎᑦᑎᓂᑦ:
- ᑭᖑᕚᕇᑦᑐᑦ ᐊᓪᓚᖁᑎᖏᑦ ᐊᓪᓚᓯᒪᓲᑦ ᕿᑐᕐᖓᕆᔭᐅᔪᓂᒃ, ᐃᕐᖑᑕᕆᔭᐅᔪᓂᒃ, ᐊᓯᖏᓐᓂᓗ, ᐃᓄᑐᐊᑉ ᐃᓚᖏᓐᓂᒃ, ᐃᓚᐅᑎᓪᓗᒋᑦ ᐃᓅᓕᕐᕕᕕᓂᖏᑦᑕ ᐅᓪᓗᖏᑦ;
- ᐃᓚᒌᑦᑐᑦ ᐊᓪᓚᖁᑎᖏᑦ ᐊᓪᓚᓯᒪᓲᑦ ᖃᐅᔨᒪᔭᐅᒋᐊᓕᓐᓂᒃ ᐊᑐᐃᓐᓇᐅᓱᑎᒃ ᑭᓇᓪᓗᑐᒃᑯᓂᒃ ᐊᖓᔪᕐᖄᖃᕐᒪ¯ᑦ (ᐊᑖᑕᖓ, ᐊᓈᓇᖓ, ᕿᑐᕐᖓᖏᑦ);
- ᐃᓚᒌᑦᑐᓂᒃ ᖃᐅᔨᒪᐅᑎᒃ ᓄᐃᑕᑎᑦᓯᓲᖅ ᐃᓄᑐᐊᑉ ᓯᕗᓕᕕᓂᖏᓐᓂᒃ, ᑕᑯᑦᓴᐅᑎᓪᓗᒋᑦ ᐊᖓᔪᕐᖄᒋᒃ, ᐊᓈᓇᑦᓯᐊᑯᒋᒃ, ᐊᓯᖏᓪᓗ.
ᐃᓚᖏᑦ ᑖᒃᑯᐊ ᖃᐅᔨᒪᐅᑏᑦ ᓴᕐᕿᑎᑕᐅᓯᒪᒻᒥᔪᑦ ᑐᒥᕗᑦ ᐊᑐᐊᒐᕐᓂ.
