ᖃᐅᔨᓴᕐᓂᖅ, ᐊᑐᐊᒐᒃᑯᕕᒃ ᐱᓇᓱᐊᕐᑕᐅᓯᒪᔪᓂᓪᓗ ᑲᑎᕐᓱᐃᕕᒃ
ᐱᓇᓱᐊᕐᑕᐅᓯᒪᔪᑦ ᓄᐊᑦᓯᕕᒻᒦᑐᑦ ᓴᓂᕐᕙᑕᐅᒪᓂᖏᑦ ᑐᓂᕐᕈᑏᓪᓗ
ᐱᓇᓱᐊᕐᑕᐅᓯᒪᔪᑦ ᓄᐊᑦᓯᕕᒻᒦᑐᑦ ᓴᓂᕐᕙᑕᐅᒪᓂᖏᑦ
ᐃᓂᓪᓚᑎᕐᑕᐅᓯᒪᓂᖏᑦ ᓇᓗᓀᒃᑯᑕᓕᐅᕐᑕᐅᓯᒪᓂᖏᓪᓗ ᓄᐊᓯᒪᔭᑦᑕ ᒪᓕᑦᓯᐊᑐᑦ ᑯᐯᒻᒥ ᓄᐊᑕᐅᓯᒪᔪᓕᕆᓂᕐᓄᑦ ᒪᓕᒐᐅᒋᐊᓕᓐᓂᒃ, ᑐᓐᖓᕕᖃᕐᓱᑎᒃ ᓱᓪᓕᑕᐅᒪᔪᒥᒃ ᐊᑦᔨᒌᓕᕐᑎᓯᒪᔪᒥᓪᓗ ᐊᑑᑎᒋᐊᓕᒻᒥᒃ. ᐊᖑᒪᑦᓰᓇᕋᓱᐊᒧᑦ ᑌᒣᑦᑐᓂᒃ ᐊᑦᔨᒌᓕᕐᑎᓯᒪᔪᓂᒃ, ᐊᑐᐊᒐᑦᓴᑯᕕᒃ ᐃᓘᓐᓇᓯᐊᖏᓐᓂᒃ ᐊᓯᑦᔩᓯᒪᓕᕐᑐᖅ ᑕᒪᖏᓐᓂ ᑕᐅᑦᑐᑎᒍᑦ ᐃᓂᓪᓚᖓᓂᖓᓂᒃ ᓄᐊᓯᒪᔭᒥᓂᓪᓗ ᐊᓪᓚᖁᑎᓂᒃ.
ᐱᐅᒃᑯᑏᑦ ᐊᑐᕐᑕᐅᔪᕕᓃᑦ ᑖᑦᓱᒧᖓ ᓄᐊᑕᐅᓯᒪᔪᓂᒃ ᐊᓪᓚᖁᑎᓂᒃ ᓇᓗᓀᒃᑯᑕᓕᐅᕐᓂᒧᑦ ᐊᓪᓚᑕᐅᒪᓂᓖᑦ FilemakerTM -ᒦᑦᑎᓗᒋᑦ ᑲᑎᕐᓱᐃᕕᒻᒥ ᖃᕆᑕᐅᔭᐅᑉ ᐱᓇᓲᑎᖓᓐᓂ.
ᒫᓐᓇᐅᔪᖅ ᓯᕗᓪᓕᐅᔭᐅᔪᖅ ᐊᑯᓃᕐᑐᒥᑦ ᐊᓯᐅᖏᓐᓇᑎᑦᓯᑌᓕᓂᕐᒥᒃ ᓱᔪᐃᑦᑌᓕᓂᕐᒥᓗ ᐊᑦᑕᓇᕐᑑᓱᑎᒃ ᐊᓪᓚᑕᐅᕙᑦᑐᕕᓂᕐᓂᒃ ᐊᑯᓂᓂᑕᐅᓗᐊᓕᕐᑐᓂᒃ ᓴᓂᕐᕙᑕᐅᓯᒪᑦᓱᑎᒃ ᓂᐱᓕᐊᕆᔭᐅᕙᑦᑐᕕᓂᕐᓂᒃ (ᐆᑦᑑᑎᒋᓗᒍ ᓂᐱᓕᐅᕈᑎᕐᖄᕕᓃᑦ ᓂᐱᑦᓴᔭᑐᖃᖏᑦ). ᑖᓐᓇ ᐱᑦᔪᑎᒋᑦᓱᒍ, ᐃᑭᑦᑑᒐᓗᐊᓂ ᐊᕐᕌᒎᖃᑦᑕᓚᐅᕐᑐᓂ ᐱᓇᓱᐊᕐᓂᖃᕙᓪᓗᖃᑦᑕᓚᐅᔪᖅ ᖃᕆᑕᐅᔭᑎᒍᑦ ᓇᓗᓀᒃᑯᓯᕐᑐᐃᓂᕐᒥᒃ ᐊᑦᔨᖑᐊᑐᖃᕐᓂᒃ ᓂᐱᓕᐊᕆᔭᐅᕙᑦᑐᕕᓂᕐᓂᓗ. ᓂᐱᑦᓴᔭᑐᖃᕐᓂ ᓂᐱᓕᐊᕆᔭᐅᕙᑦᑐᕕᓂᓕᒫᑦ ᓅᑕᐅᓯᒪᓕᕐᑐᑦ, ᐃᓗᐃᑦᑐᓯᐊᒍᖏᓐᓈᑎᓪᓗᒋᑦ, ᖃᕆᑕᐅᔭᐅᑉ ᑕᑯᓐᓇᕈᑎᖓᓄᑦ ᕿᑐᑦᑐᔭᐅᑦᓱᓂ ᓵᑦᑐᔮᒧᑦ. ᐊᑦᔨᖑᐊᖁᑏᑦ ᓄᐊᓯᒪᔭᕗᑦ ᒫᓐᓇᐅᔪᖅ ᖃᕆᑕᐅᔭᑎᒍᑦ ᓇᓗᓀᒃᑯᓯᕐᑐᑕᐅᔪᑦ.
ᑐᓂᕐᕈᓯᐊᑦ
ᐊᕙᑕᖅ ᐱᐅᓯᑐᖃᓕᕆᕕᒃᑯᑦ ᐊᐅᓚᑦᓯᓲᑦ ᐊᒥᓲᓂᕐᓴᓂᒃ ᐱᓇᓱᐊᕐᑕᐅᓯᒪᔪᓂᒃ ᓄᐊᓯᒪᔭᕐᒥᓂᒃ. ᓇᔪᕐᑎᒋᔭᕗᑦ, ᐃᓚᖃᕐᓱᑎᒃ ᐊᒥᓱᑲᓪᓚᓂᒃ ᐊᓪᓚᑕᐅᒋᓐᖓᓗᑐᕐᑐᕕᓂᕐᓂᒃ, ᐱᓯᒪᓚᕿᔭᕗᑦ ᐃᒻᒥᓂᕐᓱᓱᑎᒃ ᑭᓇᓕᒫᒃᑯᓂᓪᓗ ᑐᓂᕐᕈᓰᖃᑦᑕᑐᕕᓂᕐᓄᑦ.
ᐊᒥᓱᑦ ᐃᓄᑐᐃᓐᓇᐅᖏᑦᑐᑦ ᓄᓇᓯᒪᕙᑦᑐᕕᓃᑦ, ᐱᓇᓱᐊᕆᐊᕐᑐᓯᒪᔪᕕᓃᑦ ᐊᕐᕕᑕᓲᕕᓃᓪᓗ ᓄᓇᕕᒻᒥ ᑐᓂᕐᕈᓰᓯᒪᔪᑦ ᐊᓐᓂᓇᕐᑑᓱᑎᒃ ᐊᓪᓚᐸᑦᑕᕕᓂᕐᒥᓂᒃ ᓂᐱᓕᐊᕆᕙᑦᑕᕕᓂᕐᒥᓂᒃ ᐊᑦᔨᓕᐊᕆᕙᑦᑕᕕᓂᕐᒥᓂᓪᓗ. ᐅᑯᐊ ᐃᓚᖏᑦ ᑐᓂᕐᕈᓰᔪᕕᓃᑦ: ᐋᓐᓂᐊᓯᐅᕐᑎᐊᐲᑦ, ᐊᔪᕿᕐᑐᐃᔩᑦ, ᐃᓅᖃᑎᒌᑦᑐᓂᒃ ᖃᐅᔨᓴᕐᑏᑦ ᐊᒻᒪᓗ ᐃᓄᑑᓈᕐᑎᑐᑦ ᐃᓚᐅᕙᑦᑐᕕᓃᑦ ᓄᓇᕕᒻᒥ ᐃᓅᖃᑎᒌᓐᓂᑯᑦ, ᑮᓇᐅᔭᓕᐅᕋᓱᐊᕐᓂᑯᑦ ᐱᓂᐊᕐᓂᓕᕆᓂᑎᒍᓪᓗ ᐱᕙᓪᓕᐊᑎᑦᓯᖃᑕᐅᕙᑦᑐᕕᓃᑦ. ᑖᒃᑯᐊ ᑐᓂᕐᕈᑎᕕᓂᖏᑦ ᓲᖑᓯᐅᒥᑎᑦᓯᓯᒪᓕᕐᑐᑦ ᐊᔪᐃᓐᓇᓂᐅᓲᓂᒃ ᐊᓯᐅᔨᑦᑌᓕᓂᕐᒥᒃ ᐊᓪᓚᑕᐅᒪᓂᖏᓐᓂᒃ ᐃᓗᕐᕈᓯᖓᑕ ᐃᕐᖃᓇᕐᑑᓂᖓᑕᓗ ᓄᓇᕕᒻᒥᐅᑦ ᓄᓇᕕᐅᓪᓗ.
ᐊᕙᑕᒃᑯᑦ ᓇᑯᕐᒦᒋᐊᖃᕐᔪᐊᒥᔪᑦ ᑕᒪᖏᓐᓂᒃ ᐱᒋᐅᕐᓴᓱᑎᒃ ᐱᔪᓐᓇᑐᓪᓚᕆᐅᑦᓱᑎᓪᓗ ᐊᑦᔨᓕᐅᕆᔨᓂᒃ, ᑖᒃᑯᐊ ᑐᓂᕐᕈᓰᕙᓐᓂᒪᑕ ᐅᕝᕙᓘᓐᓃᑦ ᐊᖏᕐᖄᓚᐅᑲᑦᓱᑎᒃ ᐊᑦᔨᓕᐅᕐᑕᐅᑎᑦᓯᒍᓐᓇᖃᑦᑕᓚᐅᔪᒻᒪᑕ ᐊᑦᔨᖑᐊᖁᑎᒥᓐᓂᒃ. ᐊᖏᖃᑎᒌᓐᓂᒥ ᐊᑎᓕᐅᕐᓂᖏᓐᓂ ᐊᕙᑕᒃᑯᑦ ᐊᒻᒪᓗ ᑐᓂᕐᕈᓰᔪᐃᑦ ᐱᑦᔪᑎᖃᕐᓱᑎᒃ ᓇᑯᕐᒦᓂᕐᒥᒃ ᐃᑦᔪᐊᑕᐅᒌᒃᑯᑎᖃᕐᓂᒥᓪᓗ, ᑐᓂᕐᕈᓰᔪᑦ ᐊᑎᓕᕐᕿᖏᑦ ᐊᑐᕐᑕᐅᓲᑦ ᑐᕌᕐᑎᓯᒍᑕᐅᑦᓱᑎᒃ ᐱᓇᓱᐊᕐᑕᐅᓯᒪᔪᓄᑦ ᓄᐊᑕᐅᒪᔪᓄᑦ ᑐᓂᕐᕈᓯᐊᑉ ᐃᓂᒋᓂᐊᓕᕐᑕᖓᓅᕐᓱᒍ.
ᑐᓂᕐᕈᑎᓕᒫᑦ ᐅᐱᒋᔭᐅᒻᒪᕆᑦᑐᑦ. ᑐᓂᕐᕈᓰᔪᑦ ᐱᑎᑕᐅᓲᑦ ᐃᓕᑕᕆᔭᐅᔪᒥᒃ ᐊᑭᓖᓂᕃᒍᑎᒥᒃ ᑖᒃᓰᔭᕐᓇᐅᓕᕐᐸᑦ ᐊᑐᕐᑕᐅᒍᓐᓇᕋᔭᕐᑐᒥᒃ.
ᑐᓂᕐᕈᓰᒍᒪᒍᕕᑦ ᐊᕙᑕᖅ ᐱᐅᓯᑐᖃᓕᕆᕕᒃᑯᑦ ᐱᓇᓱᐊᕐᑕᐅᓯᒪᔪᓂᒃ ᑲᑎᕐᓱᐃᕕᖓᓐᓅᑐᑦᓴᓂᒃ, ᑐᓴᕐᑎᓯᓗᑎᑦ ᐱᓇᓱᐊᕐᑕᐅᓯᒪᔪᓕᕆᔨᒥᒃ ᐊᑎᖓ ᒃᕆᔅᑌᓪ:
Sarah Gauntlett (Archivist).
Email: sarah.gauntlett@avataq.qc.ca
Telephone: 1 800 361-5029, extension 241
