- ᑭᓇᒃᑰᒪᖔᑦᑕ
- ᖃᐅᔨᒋᐅᕐᓂᖅ ᑐᓂᕐᑕᓂᐊᕐᓂᒥᒃ
- ᐱᓇᓱᐊᕐᑕᐅᔪᐃᑦ ᐱᓇᓱᐊᕋᑦᓭᓗ
- ᖃᕆᑕᐅᔭᑎᒍᑦ ᓄᓇᕐᔪᐊᓕᒫᒨᕈᑏᑦ
- ᑐᑭᓯᒋᐊᕐᕕᓭᑦ
ᑐᓂᕐᑕᓂᐊᕐᓂᖅ
ᐊᑑᑎᔭᐅᓯᒪᔪᑦ
ᑐᓂᕐᑕᓂᐊᕐᓂᖅ ᓄᓇᕕᒻᒥ
ᐃᓄᐃᑦ ᐃᓗᕐᕈᓯᖓ ᑐᓐᖓᕕᖃᕐᐳᖅ ᑐᓴᐅᒪᔭᐅᓂᑐᐃᓐᓇᒥᑎᒍᑦ, ᑭᓯᐊᓂ ᖃᒻᒥᐅᓕᕐᒪᑦ ᐱᐅᓯᕆᓯᒪᔭᕗᑦ ᐊᓪᓚᑕᐅᖃᑦᑕᓯᓐᓂᒪᑕ. ᒐᓗᐊᕐᑎᓗᒍ, ᐱᐅᓯᕆᓯᒪᔭᕗᑦ ᐆᒪᖏᓐᓈᑐᑦ ᐅᓂᒃᑳᑐᐊᕐᑎᒍᑦ, ᐱᐅᓯᕐᑎᒍᑦ ᐊᒻᒪᓗ ᐱᐅᓕᓂᐊᒐᕕᓂᖏᑦᑎᒍᑦ ᓯᕗᓪᓕᕕᓂᑦᑕ. ᑐᓂᕐᑕᓂᐊᕐᓂᖅ ᐅᕙᑦᑎᓂᒃ ᖃᐅᔨᓕᐅᒥᑎᑦᓯᒍᓐᓇᐳᖅ ᓯᕗᓪᓕᕕᓂᑦᑕ ᐱᐅᓯᕆᓯᒪᔭᖏᓐᓂᒃ ᐊᒻᒪᓗ ᐊᓪᓚᓯᒪᓐᖏᑐᓂᒃ ᐃᕐᖃᓇᕐᑐᓂᒃ ᓄᓇᕕᒻᒨᓕᖓᔪᓂᒃ. 1980-ᐄᑦ ᐊᕐᕌᒍᖏᑦ ᑎᑭᕋᑕᕐᓱᒋᑦ, ᑐᓂᕐᑕᓂᐊᕐᓂᓕᒫᑦ ᓄᓇᕕᒻᒥ ᐊᐅᓚᑕᐅᓲᕕᓃᑦ ᐃᓕᓐᓂᐊᕕᕐᔪᐊᓄᑦ ᑲᕙᒪᒃᑯᓂᓗ ᑎᒥᐅᔪᓄᑦ ᖃᓪᓗᓈᑦ ᓄᓇᖓᓐᓃᑐᓄᑦ. ᑭᓯᐊᓂ ᑕᒪᓐᓇ ᐊᓯᑦᔨᓚᐅᕐᓯᒪᔪᖅ ᑖᓂᐊᓪᓕ ᐅᐃᑖᓗᑦᑐᖅ, ᐃᓄᒃᔪᐊᒥᐅᑦᓴᔭᖅ, ᑐᓂᕐᑕᓂᐊᕐᓂᒥᓪᓗ ᑲᖐᒋᔭᖃᑦᓯᐊᓱᓂ, ᑲᖐᓱᐊᑎᑦᓯᓚᕿᓯᒪᒻᒪᑦ ᒪᑭᕝᕕᑯᒻᒥᐅᓂᒃ ᓱᑯᐃᔦᓂᕐᓂᒃ ᑐᓂᕐᑕᓂᐊᕐᓂᓂᓪᓗ ᓄᓇᕕᒻᒥᐅᓕᒫᓂᓪᓗ. ᐃᓛᓂᐅᓐᖏᑐᖅ ᐃᓅᒍᓐᓀᓂᕕᓂᖓ 1982-ᒥ ᐊᖏᔪᒻᒪᕆᐊᓗᒻᒥᒃ ᑭᓪᓚᓕᐅᕐᓯᒪᔪᖅ ᐅᑭᐅᕐᑕᑐᒥᐅᑦ ᑐᓂᕐᑕᖁᑎᖏᑦᑕ ᐃᓗᐊᓂ.
ᑖᓂᐊᓪᓕ ᐅᐃᑖᓗᑦᑐᖅ ᒪᑭᕝᕕᑯᑦ ᐊᓪᓚᕕᖓᓐᓂ ᐃᓄᒃᔪᐊᒥ, 1979-ᒍᑦᓴᕈᓂ 1980-ᐅᑦᓴᕈᓂ
Charles Martijn (ᓵᕐᓪ ᒫᕐᑎᓐ) ᐊᒻᒪᓗ ᐹᐱ ᑯᔩ, JgEj-3 ᓄᓇᖓᓐᓂ, ᖁᐊᕐᑕᒥ, ᐅᐱᕐ¯ᖅ/ᐊᐅᔭᖅ 1985-ᒥ
ᑐᓂᕐᑕᓂᐊᕐᑏᑦ ᐱᒍᑦᔨᕕᖓᑕ ᑎᒥᓐᖑᑎᑕᐅᓂᕕᓂᖓ
ᑌᒣᓐᓂᑯᕕᓂᖓᓄᑦ, ᐃᓄᒻᒪᕇᑦ ᓄᓇᕕᒻᒥᐅᑦ ᑐᑭᑖᑉᑐᕕᓃᑦ ᓄᓇᕕᒻᒥᐅᓂᒃ ᐱᑖᕐᑎᓯᓂᐊᕐᓗᑎᒃ ᓴᓇᕐᕈᑎᓂᒃ ᐃᓚᐅᑦᔪᑎᑦᓴᓂᓪᓗ ᖃᐅᔨᓴᕐᓂᓂᒃ ᓱᕐᖁᐃᓯᑦᓯᐊᕋᓱᐊᕐᓂᓂᓪᓗ ᓄᓇᕕᒻᒥᐅᑦ ᐱᐅᓯᕆᓯᒪᔭᖏᓐᓂᒃ. 1983-ᒥ. ᐃᓄᐃᑦ ᐃᓄᒻᒪᕇᑦ ᓄᓇᕕᒻᒥᐅᑦ ᑲᑎᒪᓂᒻᒪᕆᖓ ᐊᑐᓕᕐᑎᓯᔪᕕᓂᖅ ᑐᑭᑖᕈᑎᒥᒃ ᑎᒥᓐᖑᑎᑕᐅᓂᖓᓄᑦ ᑐᓂᕐᑕᓂᐊᕐᑏᑦ ᐱᒍᑦᔨᕕᖓᓂᒃ ᐊᕙᑕᖅ ᐱᐅᓯᑐᖃᓕᕆᕕᒃᑯᓂ. ᑐᓂᕐᑕᓂᐊᕐᑏᑦ ᐱᒍᑦᔨᕕᖓ ᑎᒥᓐᖑᑎᑕᕕᓂᖅ 1985-ᒥ ᑎᓕᐅᕐᑕᐅᓱᓂ ᐱᓇᓱᐊᕐᓂᐊᑎᓪᓗᒍ ᓯᕗᓕᓗᓂᓗ ᑐᓂᕐᑕᓂᐊᕐᓂᑎᒍᑦ ᖃᐅᔨᓴᕐᑕᐅᓂᖏᓐᓂᒃ ᐃᓄᐃᑦ, ᓯᕗᓪᓕᕕᓂᖏᑦ ᓯᕗᓪᓕᕕᓃᓪᓗ ᓯᕗᓪᓕᕕᓂᒋᐊᓪᓚᖏᑦ. ᑕᒪᓐᓇ ᐃᑲᔪᕐᓯᒪᔪᖅ ᐅᖑᒪᑦᓯᓂᕐᒥᒃ, ᐱᐅᓕᑦᓯᓂᕐᒥᒃ ᐱᕙᓪᓕᐊᓂᕐᒥᓗ ᑐᓂᕐᑕᓂᐊᕐᓂᑎᒍᑦ ᐱᑦᓴᑖᕐᕕᐅᒍᓐᓇᑐᓂᒃ ᓄᓇᕕᒻᒥᑦ ᐊᑦᔨᒌᓐᖏᑐᓂ ᐃᓗᐊᓃᑦᑐᓂ ᐃᓗᓕᖃᕐᑐᓂᒃ ᓱᖏᐅᓭᓂᕐᒥᒃ ᓄᐃᑕᓪᓗᕆᑦᑑᓱᓂ ᐱᓇᓱᐊᕐᓂᒥᒃ ᑐᓂᕐᑕᓂᐊᕐᓂᐅᑉ ᐃᓗᐊᓂ.
ᑐᓂᕐᑕᓂᐊᖃᑕᐅᓂᖏᑦ ᐃᓄᐃᑦ ᐅᕕᒐᕐᑐᐃᑦ
ᑐᓂᕐᑕᓂᐊᕐᑏᑦ ᐱᒍᑦᔨᕕᖓ ᐱᒋᐊᕐᑎᓯᓯᒪᓕᕐᒥᔪᖅ ᐱᓇᓱᐊᕐᓂᒥᒃ ᑐᕌᕐᓂᖃᕐᑐᒥᒃ ᐃᓄᐃᑦ ᐃᓕᓐᓂᐊᑏᑦ ᑐᓂᕐᑕᓂᐊᕐᓂᒥᒃ ᖃᐅᔨᕙᓪᓕᐊᖁᓪᓗᒋᑦ. ᐊᒥᓲᓐᖏᑑᒐᓗᐊᓂ ᐊᕐᕌᒍᕐᓂ, ᐃᓄᐃᑦ ᐅᕕᒐᕐᑐᐃᑦ ᐱᓇᓱᐊᖃᑎᖃᕐᐸᓕᕐᑐᑦ ᐊᕙᑕᖅ ᐱᐅᓯᑐᖃᓕᕆᕕᒃᑯᑦ ᑐᓂᕐᑕᓂᐊᕐᑎᖁᑎᖏᓐᓂᒃ ᖃᐅᔨᓴᕐᓱᑎᒃ ᐊᑦᔨᒌᓐᖏᑐᓂᒃ ᓄᓇᕕᐅᑉ ᒥᑦᓵᓄᐊᖓᔪᓂᒃ. ᑖᒃᑯᐊ ᐅᕕᒐᕐᑐᐃᑦ ᐃᓕᑦᓯᓯᒪᓕᕐᑐᑦ ᓄᑖᓂᒃ ᖃᐅᔨᒪᔭᐅᒋᐊᓕᓐᓂᒃ, ᐃᓚᖏᓪᓗᑕᐅᖅ ᓯᕗᓂᑦᓴᑎᓐᓂᒃ ᓄᓇᕕᒻᒥᐅᒍᓗᑎᒃ ᑐᓂᕐᑕᓂᐊᕐᑎᖑᑐᐃᓐᓇᕆᐊᓖᑦ ᐱᐅᓯᐅᓯᒪᔪᕐᓂᐊᑎᐅᓗᑎᓗ.
Daniel Gendron (ᑕᓂᐊᓪ ᔮᓐᑦᕉᓐ) (ᑕᓕᕐᐱᐊᓃᑦᑐᖅ) ᑐᑭᓯᑎᑦᓯᔪᖅ Mike Keelan-ᒥᒃ ᐱᓇᓱᐊᕐᑕᐅᔪᕕᓂᕐᓂᒃ JgEj-3 ᓄᓇᖓᓐᓂ, ᖁᐊᕐᑕᒥ, ᐅᐱᕐ¯ᒥ/ᐊᐅᔭᒥ 1987-ᒥ.
ᐃᓕᓐᓂᐊᑏᑦ ᓴᒡᒐᑐᑦ JgEj-3 ᓄᓇᖓᓐᓂ, ᐅᐱᕐ¯ᒥ/ᐊᐅᔭᒥ 1985-ᒥ.
ᑐᓂᕐᑕᓂᐊᕐᑏᑦ ᐱᒍᑦᔨᕕᖓᑕ ᐱᓇᓱᐊᕋᑦᓴᖏᑦ ᐱᓇᓱᐊᕐᓯᒪᔭᖏᓪᓗ
ᑐᓂᕐᑕᓂᐊᕐᓂᐅᑉ ᐱᒍᑦᔨᕕᖓ ᐱᒋᐊᕐᑎᑕᐅᓚᐅᕐᓂᕋᒥ, ᐃᓚᐅᓯᒪᓕᕐᑐᖅ ᐊᒥᓱᑲᓪᓚᓂ ᐱᒻᒪᕆᐅᑦᓱᑎᒃ ᖃᐅᔨᓴᕐᓂᐅᔪᓂᒃ ᖃᐅᔨᓴᕐᓱᑎᒃ ᐊᐅᓚᑦᓯᓱᑎᓗ ᑐᓂᕐᑕᓂᐊᕐᕕᐅᒍᓐᓇᑐᓂᒃ, ᑕᕝᕙᓂ ᑕᑯᑦᓴᐅᓂᕐᐹᖅ ᐱᐅᓕᔭᐅᓂᖓ ᓄᓇᐅᑉ ᖃᔭᕐᑕᓕᒻᒥᒃ ᐊᑎᓕᐅᑉ, (JhEv-1) ᓄᓇᖓᓂ, ᐃᓅᖃᑎᒌᓂᒃ ᓱᑯᐃᔦᔨᒻᒪᕇᑦ ᑲᑎᒪᔨᖏᓐᓄᑦ SSHRC-ᑯᓄᑦ ᑮᓇᐅᔭᖃᕐᑎᑕᐅᑦᓱᓂ ᓄᓇᓖᑦ ᐃᓕᓐᓂᐊᕕᕐᔪᐊᓗ ᖃᐅᔨᓴᕐᓂᕆᓲᖓ CURA-ᑯᑦ ᐊᑎᖃᕐᓱᓂ ᑐᓂᕐᓂᑦ ᐃᓄᓐᓄᑦ (2001-2003-ᒥ), ᐱᓇᓱᐊᕐᓂᖅ ᐱᕙᓪᓕᐊᓂᕐᒧᑦ ᑯᐯᓕᒫᒥ ᒥᕐᖑᐃᓯᕕᓐᓂᒃ (2001-ᒥᓂᑦ ᑲᔪᓯᖏᓐᓈᓱᓂᓗ) ᐊᒻᒪᓗ ᐋᕐᕿᓱᕐᓯᒪᔪᑎᒍᑦ ᑭᑎᑦᓯᓂᕐᒥᒃ ᖁᓕᓐᓃᑐᓂᒃ ᓄᓇᕕᒻᒥ ᓄᓇᓕᓐᓂ (1985-1987). ᑐᓂᕐᑕᓂᐊᕐᑏᑦ ᐊᓪᓚᓯᒪᔪᖁᑎᓕᐅᕐᓯᒪᓕᕐᑐᑦ 600 ᒥᑦᓵᓃᑦᑐᓂᒃ ᑐᓂᕐᑕᑕᓕᓐᓂᒃ ᑕᑯᑦᓴᐅᑎᑦᓯᓱᑎᒃ 4000-ᓂᒃ ᐊᕐᕌᒍᖃᓕᕐᑐᓂᒃ. ᖃᐅᔨᓴᕐᓂᕕᓂᕐᒥᓄᑦ ᐊᒥᓱᑲᓪᓚᓂᒃ ᐊᑐᐊᒐᓐᖑᑎᑦᓯᓯᒪᓕᕐᑐᑦ 100 ᐅᖓᑖᓄᓪᓗ ᐱᓪᓗᑯᒋᐊᓕᑎᒍᑦ ᑐᓴᕐᑎᓯᐅᑎᓂᒃ.
ᐃᑲᔪᕐᑎᖃᕐᓱᑎᒃ ᐱᓇᓱᐊᕐᓂᕆᓲᖏᑦ
ᐊᕙᑕᒃᑯᑦ ᐱᓇᓱᐊᖃᑎᖃᕐᐸᑐᑦ ᐃᓕᓐᓂᐊᕕᕐᔪᐊᓂᒃ, ᑲᕙᒪᒃᑯᑦ ᓱᑯᐃᔦᔩᓪᓗ ᑎᒥᐅᔪᖁᑎᖏᓐᓂᒃ, ᖃᐅᔨᓴᕐᑎᓂᒃ ᐃᓕᓐᓂᐊᕕᕐᔪᐊᓂᓪᓗ ᐃᓕᓐᓂᐊᑎᓂᒃ ᑐᓂᕐᑕᓂᐊᕐᓂᓕᒫᑲᓵᑦᓯᐊᓂᒃ ᓄᓇᕕᒻᒥ.
