ᑭᓇᒃᑰᒪᖔᑦᑕ
ᐱᐅᓯᐅᓯᒪᓕᕐᑐᑦ ᖃᐅᔨᒪᔭᐅᒋᐊᓖᑦ
ᐃᓄᒻᒪᕇᑦ ᐃᓚᐅᖃᑕᐅᔪᒻᒪᕆᐅᕗᑦ ᐃᓅᖃᑎᒌᓕᒫᓂ. ᑎᒍᒥᐊᕐᑎᓚᕇᑦ ᐃᓄᖁᑎᓕᒫᒥᑕ ᖃᐅᔨᓯᒪᓕᕐᑕᖏᓐᓂᒃ ᖃᐅᔨᒪᐅᓯᖏᓐᓂᓗ ᐊᒻᒪᓗ ᐃᓕᓭᒍᓐᓇᓂᕐᐸᐅᓱᑎᒃ ᐅᕕᒐᕐᑐᓂᒃ ᐃᓄᐃᑦ ᐃᓪᓕᓇᕐᑐᖁᑎᖏᓐᓂᒃ ᐱᐅᓯᑐᖃᖏᓐᓂᓗ.
ᓱᓕᒻᒥᔪᖅ ᐅᕕᒐᕐᑐᐃᑦ ᐅᓄᕐᓂᖏᑦ ᓄᓇᓯᒪᔪᓕᒫᓂ ᐊᒥᓲᓂᕐᐸᐅᒪᑕ ᐅᓪᓗᒥᐅᓕᕐᑎᓗᒍ. ᑖᒃᑯᐊᑕᒐ ᐅᕕᒐᕐᑐᐃᑦ ᐱᑦᔪᑎᑐᐊᑦᓯᐊᕕᓃᑦ ᐊᕙᑕᖅ ᐱᐅᓯᑐᖃᓕᕆᕕᐅᑉ ᑎᒥᖕᖑᑎᑕᐅᓂᕕᓂᖓᓄᑦ 1980-ᒥ. ᐊᕙᑕᖅ ᑎᓕᐅᕐᑕᐅᒪᐅᑎᖃᕐᐳᖅ ᐱᐅᓕᐊᕋᓱᐊᕐᓂᐊᓗᓂ ᓯᕗᒧᐊᑦᑎᓯᒐᓱᐊᕐᓂᐊᓗᓂᓗ ᐃᓄᐃᑦ ᐅᖃᐅᓯᖓᓐᓂᒃ ᐃᓗᕐᖁᓯᖓᓂᓪᓗ ᐊᓐᓇᑐᐃᔭᐅᒐᔭᕐᒪᑎᒃ ᑐᕌᖓᓚᖓᓗᑎᒃ ᐅᓪᓗᒥ ᐃᓅᓕᕐᑐᓄᑦ ᑭᖑᕚᑦᓴᑎᓄᓪᓗ ᓯᕗᓂᑦᓴᑎᓐᓂ.
ᐱᒋᐊᖕᖓᓂᐊᐱᕕᓂᕐᒥᓂᑦ ᐊᕐᕌᒎᓯᒪᓕᕐᑐᓂ ᐊᕙᑕᒃᑯᑦ ᐱᓇᓱᑦᑎᖏᑦ ᐊᔪᐃᓐᓇᐅᔨᕙᑉᐳᑦ ᓱᕐᕃᓯᒣᓐᓇᑐᓂᒃ ᐊᑕᐅᓯᐅᓕᕿᖓᑦᓯᐊᑐᓂᓪᓗ ᐊᐅᓚᑦᓯᓂᖃᕋᓱᐊᕐᓱᑎᒃ. ᐊᒥᓱᓂ ᐊᕐᕌᒍᕐᑐᒋᐊᖃᓚᐅᔪᕗᑦ ᓄᐊᑦᓯᒐᓱᐊᕐᓱᑎᒃ ᐊᓪᓚᖁᑎᓂᒃ ᐊᒻᒪᓗ ᑲᑎᕐᓱᑕᕕᓂᕐᓂᒃ ᐊᑦᔨᖑᐊᓂᒃ, ᑐᓂᕐᑕᓂᒃ, ᐊᓪᓚᖑᐊᕐᓯᒪᔪᓂᒃ/ᓴᓇᖕᖑᐊᓯᒪᔪᓂᓪᓗ. ᑖᒃᑯᓇᓂ ᐊᕐᕌᒍᕐᓂ ᐊᕙᑕᒃᑯᑦ ᓲᖑᔪᒻᒪᕆᒻᒥᒃ ᖃᐅᔨᒪᔭᐅᒍᑎᑖᕐᓯᒪᓕᕐᖁᑦ ᐱᓇᓱᐊᖃᑎᖃᕐᑐᐹᓘᕙᒃᑲᒥᒃ ᐊᓯᖏᓐᓂᒃ ᑎᒥᐅᒻᒥᔪᓂᑦ.
ᐊᕙᑕᖅ ᐱᐅᓯᑐᖃᓕᕆᕕᐅᑉ ᐱᓇᓱᑦᑎᖏᑦ ᐱᓇᓱᐊᕐᐸᑕᖏᓪᓗ ᐊᒥᓲᓕᕙᓪᓕᐊᑐᐃᓐᓇᖁᑦ, ᐊᒻᒪᓗ ᐊᑐᕐᑐᓚᕇᑦ ᐃᓕᒋᔦᑦ ᐃᑲᔪᕐᓯᓯᒪᕗ ᐊᕙᑕᒃᑯᓂᒃ ᑎᑭᑎᑦᓯᓱᑎᒃ ᐊᒥᓱᓄᑦ ᑐᕌᒐᓱᐊᕐᑕᑎᓐᓄᑦ.
ᓄᓇᓕᓕᒫᓂ ᓇᒻᒥᓂᖅ ᑲᕙᒪᓕᐅᕋᓱᐊᕐᓂᐅᑉ ᐃᓗᐊᓂ ᐃᓄᐃᓪᓗ ᓄᓇᓯᒪᔪᑦ ᐊᒥᓲᓕᒋᐊᑲᓪᓚᓂᖏᓐᓄᑦ, ᕿᓚᓈᕐᓂᖃᕐᓗᓂ ᐱᓂᐊᕐᓂᖃᕋᓱᐊᕐᓂᖅ ᑕᓯᐅᕐᓯᒪᕗᖅ ᐊᕙᑕᒃᑯᓂᒃ ᐱᐅᓯᐅᒦᒋᐊᕐᑎᓗᒍ ᐱᒍᑦᔨᓂᕆᕙᑦᑕᒥᓂᒃ ᑕᑯᒋᐊᑦᓯᐊᓚᕿᑦᓱᓂᓗ ᓄᑖᓂᒃ ᖃᓄᕐᑑᒐᓱᐊᕐᓂᐅᒐᔭᕐᑐᓂᒃ.
2005-ᖑᑎᓪᓗᒍ ᐊᕙᑕᖅ ᐱᐅᓯᑐᖃᓕᕆᕕᒃ ᐊᕙᑎ ᑕᓪᓕᒪᓪᓘᓂᒃ ᐊᕐᕌᒍᕐᑖᓚᐅᔪᕗᖅ ᐃᓄᐃᑦ ᐃᓄᒻᒪᕇᑦ ᑲᑎᒪᓂᒻᒪᕆᖃᕐᑎᓗᒋᑦ ᐃᕗᔨᕕᒻᒥ.
ᐊᕙᑎ ᑕᓪᓕᒪᓪᓗ ᐊᕐᕌᒍᐃᑦ ᐅᖓᑖᓄᑦ ᐱᓇᓱᐊᕐᑐᒪᕆᐅᕙᒌᑐᐊᕋᒥ, ᐊᕙᑕᖅ ᐱᐅᓯᑐᖃᓕᕆᕕᒃ ᐊᑐᐃᓐᓇᐅᓕᕐᖁᖅ ᓵᖕᖓᓯᒋᐊᒥᒃ ᓄᑖᓂᒃ ᐅᓇᒻᒥᓇᕐᑐᓂᒃ ᐊᒻᒪᓗ ᓄᑕᐅᓯᓕᕆᓗᓂ ᐊᔪᐃᓐᓇᐅᔨᕙᓐᓂᒥᓂᒃ ᓄᓇᕕᒻᒥᐅᓂᒃ.
