ᑲᑐᑦᔮᒍᑦᓱᓂ ᐊᐅᓚᑕᐅᓂᖃᕐᐸᑐᖅ ᓄᓇᕕᒻᒦᑐᑦ ᑲᕙᒫᐱᒃᑯᖏᓐᓄᑦ ᐊᕙᑕᒃᑯᓄᓗ, ᑕᑯᔭᕐᑐᕕᖃᕐᓂᒧᑦ ᐃᓗᕐᕈᓯᓕᕆᔨᕕᖃᕐᓂᒧᓪᓗ ᐱᑐᑦᓯᒪᐅᑎᓂᖓ ᐊᔪᐃᓐᓇᑕᐅᓂᕐᓴᐅᕙᓪᓕᐊᔪᖅ ᓱᕈᐃᑦᑌᓕᒐᓱᐊᕐᓂᒧᑦ ᖁᕝᕙᑎᑦᓯᒐᓱᐊᕐᓂᒧᓪᓗ ᓄᓇᓕᐅᑉ ᐃᓗᐊᓂ ᐃᓗᕐᕈᓯᖓᓐᓂᒃ, ᐊᖏᓕᕙᓪᓕᐊᑐᐃᓐᓇᑐᓂᒃ ᐊᑦᔨᒌᓐᖏᑐᓂᓪᓗ ᐱᓇᓱᐊᕐᑎᓯᕙᓐᓂᒥᒃ ᓱᔪᖃᓕᕐᑐᓂᓪᓗ. ᑭᓇᓕᒫᒃᑯᓅᓕᖓᒐᒥᒃ, ᑕᑯᔭᕐᑐᕖᑦ ᐃᓂᖃᕐᑎᑦᓯᔪᑦ ᒪᕐᕈᐃᓈᒃ ᑕᑯᓐᓇᐅᑎᔫᒃ ᐱᓇᓱᐊᖃᑎᒌᒍᒪᑉᐸᓂᒃ ᐃᑉᐱᒍᓱᓗᐊᓐᖑᐊᕋᓱᐊᕋᒥ ᐃᓗᕐᕈᓯᐅᑉ ᓄᓇᕐᖃᑎᒌᑦᑐᐃᓗ ᐊᖏᓕᕙᓪᓕᐊᑐᐃᓐᓇᓂᖏᓐᓂᒃ ᐱᐅᓯᐅᒥᕙᓪᓕᐊᑐᐃᓐᓇᓱᑎᒃ ᓄᐃᑕᓪᓗᕆᑦᑐᑯᑦ ᐃᓚᐅᓂᖃᕐᐸᒪᑕ ᐱᐅᓕᑦᓯᒐᓱᐊᕐᓂᒧᑦ ᓄᓇᓕᐅᑉ ᐱᐅᓯᕐᓲᑎᖓᓂᒃ ᑲᔪᓯᔪᒥᒃ. ᑌᒣᒻᒪᑦ ᑕᑯᔭᕐᑐᑯᕕᖃᕐᓂᕗᑦ ᐃᓗᕐᕈᓯᓕᕆᕕᒻᒥᓗ ᐊᐅᓚᑦᔦᒋᐊᕈᑕᐅᒍᓐᓇᑑᒃ, ᐃᒋᑕᑦᓴᐅᖏᑦᑐᒥᒃ ᑐᓐᖓᕕᖃᕐᑎᓯᓚᕿᑦᓱᓂ ᐃᕐᐸᑎᑕᐅᓂᖓᓄᑦ ᐃᓄᐃᑦ ᐃᓗᕐᕈᓯᖓ ᓴᓇᓐᖑᐊᒍᓯᖓᓗ, ᑕᒣᓐᓂ ᐃᕐᖃᓇᕐᑐᑎᒍᑦ ᓇᓪᓕᐅᑎᖃᑎᒌᓯᒪᓂᒃᑯᓗ.
ᓯᕗᓪᓕᐅᔨᓂᖅ ᐃᓂᒥᓃᖏᓐᓈᑐᓂᒃ ᐱᐅᓕᑦᓯᒐᓱᐊᕐᓂᒥᒃ ᓄᓇᓕᐅᑉ ᐃᓗᐊᓂ, ᑖᒃᑯᐊ ᑕᑯᔭᕐᑐᕖᑦ ᐃᓗᕐᕈᓯᓕᕆᕖᓪᓗ ᐊᒥᓲᓐᖏᑑᒐᓗᐊᓂᒃ ᑐᕌᕐᓂᖃᕋᓱᐊᕐᑐᐃᑦ, ᐃᓚᐅᑎᓪᓗᒋᑦ: ᐊᐅᓚᑦᔦᓂᖅ ᑲᔪᓯᑎᑦᓯᓂᕐᓗ ᓲᖑᔪᒥᒃ ᐃᓗᕐᕈᓯᕐᒥᒃ ᑕᑯᑦᓴᐅᑎᑦᓯᕕᒻᒥᒃ ᓄᓇᕕᒻᒥ; ᐱᕙᓪᓕᐊᑎᑦᓯᓂᖅ ᓄᓇᓕᐅᑉ ᐃᓗᐊᓂ ᐱᔪᓐᓇᓂᐅᔪᓂᒃ ᑕᕐᕋᒥ ᑕᑯᔭᕐᑐᑯᕕᓐᓂ ᓱᑯᐃᔦᓂᕐᓂᒃ; ᐊᒻᒪᓗ ᓴᐳᑦᔨᓯᒪᓂᖅ ᓄᓇᓕᓕᒫᓂ ᐅᐱᒪᓂᐅᔪᒥᒃ ᓄᓇᕕᒻᒥᐅᑉ ᐅᕕᒐᕐᑐᖁᑎᖏᓐᓂ.
ᐃᓄᐃᑦ ᐱᐅᓯᑐᖃᖏᑦ ᐅᓂᒃᑲᐅᓯᕙᓪᓘᓂᑯᖏᓐᓄᑦ, 1987-ᒥ ᐊᕙᑕᖅ ᐱᐅᓯᑐᖃᓕᕆᕕᒃᑯᑦ ᐱᒋᐊᕐᑎᓯᓚᐅᔪᕗᑦ ᖃᐅᔨᓴᕐᓂᒪᕆᒻᒥᒃ ᑐᕌᕐᓂᖃᕐᑐᒥᒃ ᐋᕐᕿᓱᐃᒋᐊᑦᓯᐊᓂᕐᒥᒃ ᐃᓚᒌᓐᓂᓕᕆᓂᕐᒥᒃ ᓄᓇᕕᒻᒥᐅᑦ ᐃᓄᐃᑦ ᐃᓚᒌᑦᑐᖁᑎᖏᓐᓂᒃ.
ᐱᓇᓱᐊᕐᓯᒪᓕᕐᑕᖏᑦ ᐃᓚᖃᕐᐳᑦ ᖃᕐᒪᓕᐅᕐᓂᒥᒃ, ᓇᑦᓯᔦᓐᓇᐅᓱᑎᒃ ᑐᐱᕐᓂᒃ, ᐅᒥᐊᒻᒪᕆᑐᖃᕐᓂᒃ ᓇᑦᓯᔦᓐᓇᐅᓱᑎᒃ ᖃᔭᕐᓂᓗ; ᐅᖃᐅᓯᓕᕆᓂᕐᒧᑦ ᑲᑎᒪᓂᐊᕈᓯᕐᓂᒃ; ᓂᕿᑦᓴᔭᓕᐅᕐᓂᓂᒃ/ᐸᓂᕐᑎᑕᓕᐅᕐᓂᓂᒃ, ᑲᒻᒥᐅᓂᕐᓂᒃ, ᐴᕐᑕᓕᐅᕐᓂᓂᒃ ᐊᕙᑕᓕᐅᕐᓂᓂᓗ.
