ᐊᕐᖁᑎᖃᕐᓱᓂ ᐅᖃᐅᓯᐅᑉ, ᐱᐅᓯᑐᖃᐅᑉ ᐃᓗᕐᖁᓯᑐᖃᐅᓪᓗ ᐱᓇᓱᐊᕐᑕᐅᓂᖏᓐᓂᒃ, ᐊᕙᑕᖅ ᐱᐅᓯᑐᖃᓕᕆᕕᒃ ᐊᔪᐃᓐᓇᐅᔨᔪᒻᒪᕆᐅᕙᑉᐳᖅ ᐅᓪᓗᒥ ᐃᓅᓕᕐᑐᓂᒃ ᓯᕗᓂᑦᓴᑎᓂᓪᓗ ᓴᐳᑦᔨᓯᒪᒐᓱᐊᕐᓱᓂ ᐱᐅᓕᐊᕋᓱᐊᕐᓱᓂᓗ ᐃᓄᐃᑦ ᐃᓗᕐᖁᓯᖓᓂᒃ.
ᐱᓇᓱᐊᕐᓯᒪᓕᕐᑕᖏᑦ ᐃᓚᖃᕐᐳᑦ ᖃᕐᒪᓕᐅᕐᓂᒥᒃ, ᓇᑦᓯᔦᓐᓇᐅᓱᑎᒃ ᑐᐱᕐᓂᒃ, ᐅᒥᐊᒻᒪᕆᑐᖃᕐᓂᒃ ᓇᑦᓯᔦᓐᓇᐅᓱᑎᒃ ᖃᔭᕐᓂᓗ; ᐅᖃᐅᓯᓕᕆᓂᕐᒧᑦ ᑲᑎᒪᓂᐊᕈᓯᕐᓂᒃ; ᓂᕿᑦᓴᔭᓕᐅᕐᓂᓂᒃ/ᐸᓂᕐᑎᑕᓕᐅᕐᓂᓂᒃ, ᑲᒻᒥᐅᓂᕐᓂᒃ, ᐴᕐᑕᓕᐅᕐᓂᓂᒃ ᐊᕙᑕᓕᐅᕐᓂᓂᓗ.
ᐃᓄᐃᑦ ᐱᐅᓯᑐᖃᖏᑦ ᐅᓂᒃᑲᐅᓯᕙᓪᓘᓂᑯᖏᓐᓄᑦ, 1987-ᒥ ᐊᕙᑕᖅ ᐱᐅᓯᑐᖃᓕᕆᕕᒃᑯᑦ ᐱᒋᐊᕐᑎᓯᓚᐅᔪᕗᑦ ᖃᐅᔨᓴᕐᓂᒪᕆᒻᒥᒃ ᑐᕌᕐᓂᖃᕐᑐᒥᒃ ᐋᕐᕿᓱᐃᒋᐊᑦᓯᐊᓂᕐᒥᒃ ᐃᓚᒌᓐᓂᓕᕆᓂᕐᒥᒃ ᓄᓇᕕᒻᒥᐅᑦ ᐃᓄᐃᑦ ᐃᓚᒌᑦᑐᖁᑎᖏᓐᓂᒃ.
