• ᑭᓇᒃᑰᒪᖔᑦᑕ
  • ᐊᑑᑎᔭᐅᓯᒪᔪᑦ
  • ᐱᓇᓱᖃᑎᒌᑦᑐᑦ
• ᖃᐅᔨᒋᐅᕐᓂᖅ ᑐᓂᕐᑕᓂᐊᕐᓂᒥᒃ
  • ᐅᑭᐅᕐᑕᑑᑉ ᐱᐅᓯᖓ ᐅᓪᓗᐃᑦ ᒪᓕᑦᓱᒋᑦ
  • ᐅᓕᕐᓀᓯᒍᑎᐊᕈᒃ
• ᐱᓇᓱᐊᕐᑕᐅᔪᐃᑦ ᐱᓇᓱᐊᕋᑦᓭᓗ
  • ᖃᐅᔨᓴᕐᓂᒧᑦ ᐱᓇᓱᐊᕋᑦᓭᑦ
  • ᐱᓇᓱᐊᕐᑕᐅᔪᐃᑦ
  • ᓄᓇᓕᐅᑉ ᑎᒥᐅᔪᐃᓪᓗ ᐱᒍᑦᔨᓂᖏᑦ
• ᖃᕆᑕᐅᔭᑎᒍᑦ ᓄᓇᕐᔪᐊᓕᒫᒨᕈᑏᑦ
  • ᑐᓂᕐᑕᓂᐊᕐᕕᒃ
  • ᓄᐊᑕᐅᓯᒪᔪᑦ
  • ᖃᕆᑕᐅᔭᒦᑦᑐᑦ ᐊᓪᓚᖁᑏᑦ
• ᑐᑭᓯᒋᐊᕐᕕᓭᑦ
  • ᐊᑐᐊᒉᑦ ᐊᓪᓚᖁᑎᖏᑦ
  • ᐱᑐᑦᓯᒪᒍᑏᑦ

ᑐᓂᕐᑕᓂᐊᕐᓂᖅ

ᑐᓂᕐᑕᓂᐊᕐᓂᐅᑉ ᐱᓇᓱᐊᕈᓯᖓ

< ᒪᒃᐱᒐᐅᑫᓐᓇᑐᒧᑦ

ᓴᒡᒐᓂᖃᕐᑎᓗᒍ ᓄᓇᐅᔪᒥ IbGk-3-ᖑᓂᕋᕐᑕᒥ (ᐃᑎᖑᐊᓗᒻᒥ ᐃᓄᒃᔪᐊᑉ ᓯᕿᓂᖓᓂ), ᐊᐅᔭᖅ 2008-ᒥ, ᐅᖃᖃᑎᒌᓐᓂᖅ ᐱᒋᐊᕐᑕᐅᓯᒪᓕᓚᐅᔪᖅ ᐱᓐᖑᑎᑦᓯᒍᒪᓂᕐᒧᑦ ᓄᑖᒥᒃ ᐱᓇᓱᐊᕋᑦᓴᒥᒃ ᖁᕝᕙᑎᑦᓯᒋᐊᕈᑕᐅᒐᔭᕐᑐᒥᒃ ᐃᓗᕐᕈᓯᕐᒨᓕᖓᑦᓱᑎᒃ ᐱᐅᓯᕐᓱᕈᑎᓂᒃ ᑲᔪᓯᔪᓂᒃ ᓄᓇᕕᒻᒥᐅᓄᑉ ᐅᕕᒐᕐᑐᓅᓕᖓᑦᓱᑎᒃ. ᐊᖁᐃᒪᕕᐅᑉ ᐃᒐᔨᒋᓚᐅᔪᔭᖓ ᐋᓚᓯ ᓈᓚᑦᑑᔭᖅ, ᑲᑎᕕᒃ ᐃᓕᓐᓂᐊᓂᓕᕆᔨᒃᑯᑦ ᐊᖓᔪᕐᖄᖓᑦ. ᐸᕐᓀᓂᖃᓚᐅᔪᖅ ᐃᑲᔪᕐᑎᒌᓐᓂᐊᑎᓗᒋᒃ ᑲᑎᕕᒃ ᐃᓕᓐᓂᐊᓂᓕᕆᔨᒃᑯᑦ ᐊᕙᑕᖅ ᐱᐅᓯᑐᖃᓕᕆᕕᒃᑯᓗ ᐱᓐᖑᑎᑦᓯᓗᑎᒃ ᐆᑦᑐᕋᐅᑎᒥᒃ ᑐᓂᕐᑕᓂᐊᕐᓂᒥᒃ ᐃᓕᓐᓂᐊᑎᓄᑦ ᑲᑦᓱᙰᑦᑑᓱᑎᒃ ᑲᖐᒋᔭᖃᒻᒪᕆᑦᓱᑎᓪᓗ ᑐᓂᕐᑕᓂᐊᕐᓂᒥᒃ.

ᐱᓇᓱᐊᕋᑦᓴᖅ ᑕᑯᑎᑦᓯᒐᔭᕐᑐᖅ ᐃᓕᓐᓂᐊᑎᓂᒃ ᓱᓇᓱᐊᓲᒍᒻᒪ¯ᑕ ᑐᓂᕐᑕᓂᐊᕐᕕᒥᒃ ᓴᒡᒐᓂᖃᕇᑐᐊᕐᒪᑦ, ᐊᒻᒪᓗ ᖃᐅᔨᒪᒋᐊᓕᖏᓐᓂᒃ ᖃᐅᔨᑎᓪᓗᒋᑦ ᐳᕐᑐᓂᕐᓴᒥᒃ ᐃᓕᓐᓂᐊᓂᕐᒥᒃ ᐊᒻᒪᓗ ᐱᓇᓱᒐᒋᒍᓐᓇᑕᖏᓐᓂᒃ ᑐᓂᕐᑕᓂᐊᕐᓂᒨᓕᖓᒐᓚᑦᑐᓂᒃ. ᓯᕗᓪᓕᐹᖅ ᐊᕐᕌᒍᒃ ᐱᓇᓱᐊᕐᓂᐅᓚᐅᔪᖅ ᐆᑦᑐᕋᐅᑎᑐᐃᓐᓇᐅᓂᕋᕐᑕᐅᓚᐅᔪᖅ: ᐊᒻᒪᓗ ᓱᓇᓕᒫᑦ ᐱᑦᓯᐊᑐᕕᓂᐅᑉᐸᑕ, ᑖᓐᓇ ᐊᑑᑎᔭᐅᖃᑦᑕᕋᔭᕐᓱᓂ ᐊᕐᕌᒍᑕᒫᑦ ᐊᕙᑕᒃᑯᓄᑦ ᑲᑎᕕᒃ ᐃᓕᓐᓂᐊᓂᓕᕆᔨᒃᑯᓄᓗ, ᑖᓐᓇ ᐊᑦᔨᐸᓱᖓ ᓱᑯᐃᔦᓂᕐᒧᑦ ᐊᖁᐃᒪᕕᐅᖃᑦᑕᓚᐅᔪᓄᑦ. ᑖᓐᓇ ᑫᓪᓗᑐᐃᑐᐃᓐᓇᕋᔭᓐᖏᑐᖅ ᐳᕐᑐᓂᕐᓴᒥᒃ ᐃᓕᓐᓂᐊᑎᓂᒃ ᓄᓇᕕᒻᒥᐅᓂᒃ ᐃᓚᐅᑎᒐᓱᐊᕐᓂᖏᓐᓄᑦ ᐊᕙᑕᒃᑯᑦ ᑐᓂᕐᑕᓂᐊᕐᓂᒥᒃ ᐃᓕᓐᓂᐊᑎᑦᓯᓂᕆᕙᑦᑕᖏᓐᓄᑦ, ᑭᓯᐊᓂᓗᑦᑕᐅᖅ ᐃᑲᔪᕐᓯᒪᒐᔭᕐᑐᖅ ᐃᓕᓐᓂᐊᑏᑦ ᓅᓐᓂᖏᓐᓂᒃ ᑕᕐᕋᒥᑦ ᓄᓇᓕᓐᓂᑦ ᐳᕐᑐᓂᕐᓴᒥᒃ ᐃᓕᓐᓂᐊᕕᓐᓄᑦ.

ᑖᓐᓇ ᐱᓇᓱᐊᕋᑦᓴᖅ ᑮᓇᐅᔭᖃᕐᑎᑕᐅᓚᐅᔪᖅ SSHRC-ᑯᓄᑦ, (ᐃᓅᓰᑦ ᐱᐅᓯᖏᑦᑕ ᐱᕙᓪᓕᐊᓂᖓᓂᒃ ᐃᓅᖃᑎᒌᑦᑐᓂᓪᓗ ᑐᑭᓯᓴᕐᑎᓄᑦ), CURA-ᑯᓄᑦ (ᓄᓇᓖᑦ ᐃᓕᓐᓂᐊᕕᕐᔪᐊᓗ ᖃᐅᔨᓴᖃᑎᒌᓐᓂᖏᓐᓄᑦ), ᑲᑎᕕᒃ ᐃᓕᓐᓂᐊᓂᓕᕆᔨᒃᑯᓄᑦ, ᒪᑭᕝᕕᑯᓐᓄᓗ (ᒪᑭᕝᕕᑯᑦ ᐅᓄᕐᑐᒐᓛᑦᓯᐊᓄᑦ ᖃᖓᑦᑕᐅᑎᓂᒃ ᐊᑭᑭᓪᓕᑎᕆᓚᐅᔪᑦ). ᑖᓐᓇ ᐱᓇᓱᐊᕐᑕᐅᔪᖅ ᑐᑭᒧᐊᕐᑎᑕᐅᓚᐅᔪᖅ ᐊᓐᑦᔫ ᐃᐳᒧᑦ, ᐱᓪᓗᑯᒋᐊᓕᑎᒍᑦ ᓱᕐᖁᐃᓯᒐᓱᐊᕐᕕᒥ ᐃᑲᔪᕐᑎᒋᔭᐅᔪᖅ ᐊᕙᑕᒃᑯᑦ ᑐᓂᕐᑕᓂᐊᕐᓂᕐᒧᑦ ᐱᒍᑦᔨᕕᖓᓐᓂ. ᐃᑲᔪᕐᑕᐅᓂᖏᑦ ᑲᑎᕕᒃ ᐃᓕᓐᓂᐊᓂᓕᕆᔨᒃᑯᓄᑦ ᑲᔪᓯᑎᑕᐅᓚᐅᔪᖅ ᓯᐊᔭ ᐁᕈᒧᑦ Elias Moukannas-ᒧᓪᓗ (ᐄᓕᐊᔅ ᒨᑳᓇᔅ). Dave McMullen (ᑌᕝ ᒪᒃᒪᓚᓐ), ᐃᓕᓐᓂᐊᕋᑦᓴᓕᐅᕐᓂᑎᒍᑦ ᐃᓱᐊᕐᓭᔨᒃ ᑭᑎᑦᔪᑎᓐᓂᐊᓂᕐᒥᒃ ᓱᑯᐃᔦᓂᕐᒥᓗ ᑲᑎᕕᒃ ᐃᓕᓐᓂᐊᓂᓕᕆᔨᒃᑯᓂ ᐱᒍᑦᔨᓚᐅᔪᖅ ᐃᑉᐱᒍᓱᑦᑎᐅᓱᓂ ᑕᑯᓂᐊᕐᓯᒪᔪᓂᒃ ᐃᓕᓐᓂᐊᑎᓂᒃ.

ᐱᖓᓲᔪᕐᑐᑦ ᐃᓕᓐᓂᐊᑏᑦ ᐃᓚᐅᓚᐅᔪᑦ ᐆᑦᑐᕋᕐᓂᐅᑉ ᐊᕐᕌᒍᖓᓄᑦ ᐱᓇᓱᐊᕐᓂᐅᔪᒥ. ᑖᒃᑯᓇᓐᖓᑦ ᓯᑕᒪᑦ ᐃᓄᑦᔪᐊᒥᐅᒍᓚᐅᔪᑦ ᒪᕐᕉᓗ ᐃᕗᔨᕕᒻᒥᐅᒍᑎᓪᓗᒋᒃ. ᐃᓕᓐᓂᐊᑏᑦ ᐃᓄᑦᔪᐊᒥᐅᑦ ᒪᕐᕉᓂ ᐊᕐᕌᒎᓐᓂ ᑐᓂᕐᑕᓂᐊᕐᓂᒥᒃ ᐃᓕᓐᓂᐊᓯᒪᓚᐅᔪᑦ ᐃᕗᔨᕕᒻᒥᐅᑕᐅᖅ ᐊᑕᐅᓯᕐᒥ ᐊᕐᕌᒍᕐᒥ ᑐᓂᕐᑕᓂᐊᕐᓂᒥᒃ ᐃᓕᓐᓂᐊᓯᒪᑎᓪᓗᒋᑦ. ᑐᓂᕐᑕᓂᐊᕐᕕᒦᓚᐅᔪᑦ ᑎᕆᓪᓗᓕᐅᑦ (ᐁᕆᓕ) 10-ᒥᑦ 18-ᒧᑦ. ᐊᐅᓚᓂᖏᑦᑕ ᐅᓪᓗᖏᑦ ᓇᓪᓕᑳᕐᑕᐅᓯᒪᓚᐅᔪᑦ ᓈᒻᒪᓈᕐᑎᒐᓱᐊᕐᓱᒋᑦ ᑐᖁᑕᐅᕕᐊᓂ ᕿᑲᕐᓇᐅᔪᒥᒃ ᑌᒣᑦᓱᑎᓪᓗ ᐃᓕᓐᓂᐊᑏᑦ ᐃᓕᓐᓂᐊᖏᑦᑑᓚᕿᓚᐅᔪᓐᖏᑐᑦ ᐃᓕᓐᓂᐊᕕᒻᒥ.

ᒪᕐᕉᒃ ᐅᓪᓘᒃ ᓯᕗᓪᓕᐅᓚᐅᔫᒃ ᐸᕐᓇᑕᐅᒪᓚᐅᔫᒃ ᐃᓕᓐᓂᐊᑏᑦ ᓱᖏᐅᓯᓴᕐᑕᐅᓂᐊᕐᑎᓗᒋᑦ ᖃᓪᓗᓈᓂ ᐃᓅᒍᓯᕐᒥᒃ ᐃᓚᐅᑎᑦᓱᒋᓪᓗ ᐃᒻᒥᒎᕐᑎᓱᑎᒃ ᓴᓇᓂᓗᑳᓄᑦ. ᓂᐅᕕᕐᓂᐊᒍᓐᓇᓯᓚᐅᔪᒻᒥᔪᑦ. ᐅᓪᓗᐃᑦ ᐊᓯᓕᒫᖏᑦ ᑕᑯᑎᑦᓯᓂᐅᒐᓱᐊᒻᒪᕆᓚᐅᔪᑦ ᐃᓕᓐᓂᐊᑎᓂᒃ ᐊᒥᓲᒍᓐᓇᕕᓕᒫᖏᓐᓄᑦ ᐊᑦᔨᒌᑦᔭᕋᑎᒃ ᑐᓂᕐᑕᓂᐊᕐᓂᒨᓕᖓᔪᓂᒃ. ᐅᑯᐊ ᐃᓚᐅᑎᓪᓗᒋᑦ ᑕᑯᔭᕐᑐᕕᑑᓐᖏᑐᑦ, ᑭᓯᐊᓂ ᐃᓕᓐᓂᐊᕕᕐᔪᐊᑦ. ᐃᓚᐅᔪᑦ ᑕᑯᓂᐊᕈᓐᓇᓯᓚᐅᔪᒻᒥᔪᑦ ᐳᕐᑐᓂᕐᓴᒥ ᐃᓕᓐᓂᐊᕕᓐᓂᒃ ᐊᐅᓚᑕᐅᔪᓂᒃ ᑲᑎᕕᒃ ᐃᓕᓐᓂᐊᓂᓕᕆᔨᒃᑯᓄᑦ.

ᑐᕌᕐᓂᕆᓗᐊᓐᖑᐊᓚᐅᔪᔭᖏᑦ ᑖᒃᑯᐊ ᐱᓇᓱᐊᕋᑦᓭᑦ ᐃᓕᓐᓂᐊᑏᑦ ᑕᑯᑎᑐᐃᓐᓇᔭᕈᓐᓀᓗᒋᑦ ᑐᓂᕐᑌᑦ ᓱᔭᐅᓲᒍᒻᒪ¯ᑕ ᓴᒡᒐᓂᖃᕇᑐᐊᕐᒪᑦ, ᑭᓯᐊᓂᓗᑦᑕᐅᖅ ᖃᐅᔨᑎᒻᒥᓱᒋᑦ ᐊᑦᔨᒌᓐᖏᑐᓂᒃ ᐊᕐᖁᑎᐅᒍᓐᓇᑐᓂᒃ ᐊᑐᐃᓐᓇᐅᔪᓂᒃ ᑐᓂᕐᑕᓂᐊᕐᓂᒥ ᐊᑦᔨᐸᓱᖏᓐᓂᓗ, ᐃᓚᐅᑎᓪᓗᒍ ᐆᑦᑑᑎᖃᑎᒌᑦᑎᓯᓂᖅ ᖃᓄᕐᓗ ᐊᑦᔨᒌᓐᖏᑑᒻᒪ¯ᓐᓃᒃ ᖃᓪᓗᓈᑦ ᓄᓇᖓᓂ ᐃᓅᒍᓯᐅᑉ ᑕᕐᕋᒥᓪᓗ ᐃᓅᒍᓯᐅᑉ. ᐃᓕᓐᓂᐊᑏᑦ ᐳᓛᕆᐊᓚᐅᔪᒻᒥᔪᑦ ᐊᕙᑕᒃᑯᑦ ᐊᓪᓚᕕᖓᓐᓄᑦ ᒧᓐᑐᔨᐊᒦᑦᑐᒧᑦ, ᑐᓂᕐᑕᓂᒃ ᓴᓂᕐᕓᓯᒪᕕᖓᓐᓄᑦ CDCM-ᒧᑦ, John Abbott ᐳᕐᑐᓂᕐᓴᒥᒃ ᐃᓕᓐᓂᐊᕕᒻᒧᑦ, Marie Victorin ᐳᕐᑐᓂᕐᓴᒥᒃ ᐃᓕᓐᓂᐊᕕᒻᒧᑦ, ᑕᑯᔭᕐᑐᕕᒻᒧᑦ (Museum of Fine Arts)-ᒍᓂᕋᕐᑕᒧᑦ, Redpath ᑕᑯᔭᕐᑐᕕᖓᓄᑦ, ᒧᓐᑐᔨᐊᑉ ᐃᓕᓐᓂᐊᕕᕐᔪᐊᖓᑕ ᑐᓂᕐᑕᓂᐊᕐᕕᖓᓐᓄᑦ, McCord ᑕᑯᔭᕐᑐᕕᖓᓄᑦ ᐊᒻᒪᓗ Civilization ᑕᑯᔭᕐᑐᕕᖓᓄᑦ Hull-ᒦᑦᑐᒧᑦ. ᐳᓛᕆᐊᕐᓂᓕᒫᑲᓵᓂ, ᑕᑯᔭᕐᑐᕕᓐᓂ ᐱᓇᓱᑦᑏᑦ ᐱᓇᓱᐊᒐᖃᓗᐊᓐᖑᐊᓱᑎᒃ ᐅᑭᐅᕐᑕᑐᒥᒃ, ᑐᑭᒧᐊᕐᑎᓯᓚᐅᔪᑦ ᐳᓚᕋᕐᓂᒥᒃ ᑕᒪᒃᑯᓂᑲᓗᑳᖅ, ᑭᐅᖃᑦᑕᓱᑎᓗ ᐃᓕᓐᓂᐊᑏᑦ ᐊᐱᕐᓲᑎᖏᓐᓂᒃ. ᑕᒪᓐᓇ ᐱᑦᓯᐊᑐᒻᒪᕆᐊᓘᓚᐅᔪᖅ ᐃᓚᐅᔪᓕᒫᑦᓯᐊᓄᑦ.

ᐊᕙᑕᒃᑯᑦ ᑎᓕᔭᐅᒪᐅᑎᖃᕐᐳᑦ ᖁᕝᕙᑎᑦᓯᒋᐊᕐᑎᐅᓚᖓᑎᓪᓗᒋᑦ ᐊᓯᐅᖏᓐᓇᑎᑦᓯᑌᓕᔨᐅᓚᖓᓗᑎᓗ ᐃᓄᐃᑦ ᐃᓗᕐᕈᓯᖓᓐᓂᒃ ᐱᐅᓯᕐᓱᕈᑎᐅᑦᓱᓂ ᑲᔪᓯᔪᒥᒃ, ᐊᒻᒪᓗ ᑫᓪᓗᑐᐃᑦᓱᑎᒃ ᓴᐳᒻᒥᓯᒪᑦᓱᑎᓪᓗ ᐅᕕᒐᕐᑐᓂᒃ ᐃᓄᓐᓂᒃ ᓄᓇᕕᒻᒥᐅᓂᒃ ᐃᓕᓐᓂᐊᓂᕐᒥᓂᒃ ᑲᔪᓯᒐᓱᐊᕐᑎᓗᒋᑦ. ᓴᐳᑦᔭᐅᒪᑦᓱᑎᒃ ᑲᑎᕕᒃ ᐃᓕᓐᓂᐊᓂᓕᕆᔨᒃᑯᓄᑦ ᐊᓯᖏᓐᓄᓗ ᓄᓇᓕᐅᔪᓂ ᑎᒥᐅᔪᓄᑦ, ᑖᓐᓇ ᐆᑦᑐᕋᐅᑎᐅᑦᓱᓂ ᐱᓇᓱᐊᕋᑦᓴᖅ ᑲᓲᑎᑦᓯᐊᑐᖅ ᑎᓕᔭᐅᒪᐅᑎᓄᑦ. ᐃᓕᓐᓂᐊᑏᑦ ᐃᓕᓐᓂᐊᕆᐊᓪᓛᓗᑐᓚᐅᔪᑦ ᐃᓗᕐᕈᓯᕐᒥᓂᒃ ᐱᐅᓯᕐᓱᓱᓂ ᑲᔪᓯᔪᒥᒃ, ᑭᓯᐊᓂᓗᑦᑕᐅᖅ ᖃᐅᔨᓚᐅᔪᒻᒥᔪᑦ ᓇᓪᓕᐊᓂᒃ ᐊᕐᖁᑎᖃᕈᓐᓇᒪ¯ᒻᒥᒃ ᐃᓕᓐᓂᐊᓂᕐᒥᑎᒍᑦ.

Dave McMullen (ᑌᕝ ᒪᒃᒪᓚᓐ), ᐊᓐᑦᔫ ᐃᐳ