ᐃᓄᐃᑦ ᐅᖃᐅᓯᖓ
ᐃᓄᑦᑎᑑᕐᓂᐅᑉ ᓴᑐᕐᑕᐅᒐᓱᐊᕐᓂᖓᑕ ᐱᓇᓱᐊᕐᑕᐅᓂᖓ
ᑖᓐᓇ ᐱᓇᓱᐊᕐᑕᐅᓯᒋᐊᓚᐅᕐᓯᒪᔪᖅ ᓄᓇᐅᑉ ᒥᑦᓵᓄᑦ ᐊᖏᖃᑎᒌᓐᓂᖃᕋᓱᐊᕐᓂᖓᓂ ᓄᓇᕕᒻᒥ, ᐊᖏᖃᑎᒌᒐᓱᐊᕐᑏᑦ ᐱᓯᒪᔪᑦ ᓄᓇᕕᒻᒥ ᐊᖁᕝᕕᖔᒥᑦ ᓇᒻᒥᓂᖅ ᑲᕙᒪᑖᕋᓱᐊᕐᑐᑦ ᑐᒃᓯᕋᑐᐊᕐᒪᑕ ᑐᓴᕐᑎᓯᐅᑎᒥᒃ ᖃᓄᕐᑑᕈᑕᐅᒐᓱᐊᕈᑎᓂᒃ ᐅᖑᒪᔭᐅᒋᐊᖃᕐᓂᖏᓐᓄᑦ ᐅᖃᐅᓰᑦ ᐅᓄᕐᑑᓗᐊᓐᖏᑐᓄᑦ ᐅᖃᐅᓯᕆᔭᐅᔪᑦ. ᑐᖓᓕᐊ ᐱᓇᓱᐊᕐᓂᐅᓚᐅᔪᖅ ᖃᐅᔨᓴᕐᓂᖃᕐᓱᓂ ᓄᓇᕕᒻᒥᐅᑦ ᐅᖃᐅᓯᖓ ᖃᓄᐃᓕᖓᓕᕐᒪᖔᑦ ᑕᑯᓐᓇᓱᒋᑦ ᖃᓄᕐᑑᕈᑕᐅᒐᓱᐊᕐᐸᑐᑦ ᓄᓇᕐᔪᐊᒥᐅᖃᑎᑦᑎᓄᑦ. ᑭᓯᐊᓂ, ᖃᐅᔨᓴᕐᑏᑦ ᑐᑭᑖᕐᑐᕕᓃᑦ ᓱᓕᓪᓚᕆᑦᑐᒥᒃ ᖃᐅᔨᓴᕐᓂᖃᕆᐊᖃᕐᓂᒥᓂᒃ ᓇᒻᒥᓂᖅ ᓄᓇᓕᓐᓅᔭᕐᓗᑎᒃ, ᑌᒣᒻᒪᑦ ᓄᓇᓖᑦ ᐃᓗᐊᓂ ᑲᑎᒪᓂᐊᕈᓰᑦ ᐊᑕᐅᓯᓐᖑᑎᑕᐅᓕᕐᑐᕕᓃᑦ ᐱᓇᓱᐊᕋᑦᓴᖑᕐᓱᒋᑦ.
ᐃᓄᐃᑦ ᓄᓇᕕᒻᒥᐅᑦ ᐅᖃᕐᑐᕕᓃᑦ ᐃᓱᒫᓗᓕᕐᐸᓕᐊᓕᕐᓂᒥᓂᒃ ᐃᓄᑦᑎᑑᕐᓂᐅᑉ ᐊᓐᓇᒋᐊᖃᕐᓂᖓᓂᒃ, ᑕᕝᕘᓇ ᐊᕙᑕᒃᑯᑦ ᑭᐅᓕᕐᑐᕕᓃᑦ, ᓴᐳᑦᔭᐅᒪᑦᓱᑎᒃ ᓄᓇᕕᒻᒥ ᐊᖁᕝᕕᖔᒧᑦ ᒪᑭᕝᕕᒃ ᑯᐊᐳᕇᓴᒃᑯᓄᓪᓗ, ᐱᒋᐊᕐᑎᓯᑦᓱᑎᒃ ᐃᓄᑦᑎᑑᕐᓂᐅᑉ ᓴᑐᕐᑕᐅᒐᓱᐊᕐᓂᖓᑕ ᐱᓇᓱᐊᕐᑕᐅᓂᑦᓴᖓᓂᒃ. ᐱᓇᓱᐊᕋᑦᓴᐅᑉ ᑐᕌᕐᓂᕆᒐᓱᐊᕐᑕᖏᑦ ᓱᔪᑎᑦᓯᑌᓕᓂᕐᒥᒃ ᐃᓄᑦᑎᑐᑦ ᐅᖃᐅᓯᕐᒥᒃ ᐊᒻᒪᓗ ᓱᖏᕐᑐᐃᒐᓱᐊᕐᓱᑎᒃ, ᖃᓪᓗᓈᑎᑑᕙᓪᓗᓕᕐᑐᓂ ᐅᐃᒍᐃᑎᑐᓪᓗ, ᐅᖃᐅᓯᕆᔭᐅᓂᕐᓴᐅᖁᔨᑦᓱᑎᒃ ᐃᓄᑦᑎᑑᕐᓂᒥᒃ ᓄᓇᕕᒻᒥᐅᓕᒫᑲᓵᓄᑦ.
ᐊᕙᑕᒃᑯᑦ ᑐᑭᓯᓕᕐᑐᕕᓃᑦ ᓯᕗᓪᓕᐹᖅ ᐊᓪᓗᕆᐊᕐᓂᐅᒋᐊᓕᒃ ᐊᑦᑕᕆᐊᐱᓪᓗᒍ ᖃᐅᔨᓴᕐᓂᖃᕐᑎᓗᒍ ᖃᓄᐃᓕᖓᓪᓗᑐᓕᕐᒪᖔᑦ ᐃᓄᑦᑎᑐᑦ ᐅᖃᐅᓯᐅᑉ. ᑐᑭᑖᕈᑎᖃᓚᐅᕋᑕ ᖃᓄᕐᑑᕋᓱᐊᕈᑎᑦᓴᓂᒃ ᓱᖏᕐᑐᒐᓱᐊᕐᓱᒍ ᐊᓐᓇᓂᖓ ᐃᓄᑦᑎᑑᕐᓂᐅᑉ, ᑭᓇᒃᑯᑦ ᐊᑐᓕᕐᑎᓯᒐᔭᕐᒪᖔᑕ ᖃᓄᕐᑑᕋᓱᐊᕈᑎᓂᒃ ᖃᓄᕐᓗ ᐱᓇᓱᐊᕐᑕᐅᒐᔭᕐᒪᖔᑦ, ᑭᐅᕐᖄᕆᐊᖃᕐᑐᒍᑦ ᐱᖓᓱᓂᒃ ᐋᕐᕿᓯᒪᐅᑎᐅᑦᓱᑎᒃ ᐊᐱᕐᓲᑎᓂᒃ:
ᐅᓪᓗᒥ ᐃᓄᑦᑎᑑᕐᓂᖅ ᖃᓄᐃᑦᑐᒦᓕᕐᖃᕙ
ᓱᓇᓂᒃ ᓲᖑᓂᙯᓐᓈᖃᕙ
ᓱᓇᓄᑦ ᓴᓐᖐᓕᑎᕐᑕᐅᕙᓪᓕᐊᕙᕙ
ᖃᐅᔨᓴᕈᓯᖅ
ᑐᑭᒧᐊᕐᑎᒋᐊᓚᖓᑦᓱᒍ ᑖᓐᓇ ᐱᓇᓱᐊᕐᑕᐅᒋᐊᓕᒃ, ᑭᒡᒐᑐᕐᑏᑦ ᐱᓯᒪᔪᑦ ᑲᑎᕕᒃ ᐃᓕᓐᓂᐊᓂᓕᕆᔨᒃᑯᓂᑦ, ᒪᑭᕝᕕᒃ ᑯᐊᐳᕇᓴᒃᑯᓂᑦ ᐊᕙᑕᖅ ᐱᐅᓯᑐᖃᓕᕆᕕᒃᑯᓂᓪᓗ ᑎᒥᓐᖑᐃᓚᐅᔪᑦ ᐃᓄᑦᑎᑑᕐᓂᐅᑉ ᓴᑐᕐᑕᐅᒐᓱᐊᕐᓂᖓᓄᑦ ᐱᔪᓇᕐᓭᔨᓂᒃ.
ᓯᓚᑎᑦᑎᓂᒥᐅᓂᑦ ᐱᔪᓐᓇᑐᓪᓚᕆᓐᓂᓗ ᐱᓇᓱᐊᖁᔨᖔᒐᑕ ᖃᐅᔨᓴᕐᓂᒥᒃ, ᐱᔪᓇᕐᓭᔨᓂᑦ ᐃᓚᐅᔪᑦ ᑐᑭᑖᕐᑐᕕᓃᑦ ᐱᓇᓱᐊᕈᒪᓕᕐᓱᑎᒃ ᑐᕃᓐᓇᓗᑎᒃ ᐃᓄᓐᓄᑦ ᑕᒪᑦᓱᒧᖓ ᐊᑦᑐᐊᔭᐅᓂᕐᐹᓄᑦ – ᐃᓄᐃᑦ ᓄᓇᕕᒻᒥᐅᑦ.
ᐃᓄᓐᓂᒃ ᓄᓇᕕᒻᒥᐅᓂᒃ ᐃᓚᐅᑎᑦᓯᓯᐊᕋᓱᐊᒧᑦ ᐱᒋᐊᓐᖓᓂᖓᓂᑦ ᖃᐅᔨᓴᕐᓂᐅᑉ, ᐱᔪᓇᕐᓭᔩᑦ ᐊᑐᓕᕐᑎᓯᓯᓚᐅᔪᑦ ᓄᓇᓕᐅᑉ ᐃᓗᐊᓂ ᖃᐅᔨᓴᕐᓂᖃᖃᑦᑕᓂᐊᕐᓱᑎᒃ, ᑕᒪᓐᓇ ᐊᑑᕐᑕᐅᓯᐊᕐᓯᒪᒻᒪᑦ ᖁᓖᑦ ᐊᕐᕌᒍᑲᓵᒍᓕᕐᑐᑦ ᑲᑎᕕᒃ ᐃᓕᓐᓂᐊᓂᓕᕆᔨᒃᑯᑦ ᐃᓕᓐᓂᐊᕕᖁᑎᖏᓐᓄᑦ, ᐊᒻᒪᓗ ᑕᒪᓐᓇ ᐊᖏᑦᓯᐊᑐᐃᓐᓇᓱᓂ ᒪᓕᒐᐅᖁᔭᐅᔪᓂᒃ ᑕᒪᖏᓐᓄᑦ ᑯᐯᒻᒥ ᐃᓕᓐᓂᐊᓂᓕᕆᔩᑦ ᑐᕐᖃᑕᕐᕕᖓᓐᓄᑦ ᐊᒻᒪᓗ ᐃᓅᒐᓱᐊᕐᓂᑯᑦ ᐃᓚᐅᓂᕐᒧᑦ ᐱᕙᓪᓕᐊᓂᕐᒧᓗ (OECD)-ᑯᓄᑦ.
ᐊᕐᕌᒎᖃᑦᑕᓯᒪᓕᕐᑐᓂ. ᑲᑎᕕᒃ ᐃᓕᓐᓂᐊᓂᓕᕆᔨᒃᑯᓂᖓᒥᐅᑦ ᐱᖓᓲᑦᓱᑎᒃ ᑫᓪᓚᑐᐃᔩᑦ ᓈᒻᒪᑐᐃᓐᓇᑐᓂᒃ ᖃᐅᔨᓯᒪᓕᕐᑐᑦ ᓄᓇᕕᒻᒥ ᐃᓕᓐᓂᐊᕖᑦ ᐃᓗᐊᓂ ᖃᓄᖅ ᐊᑐᕐᑕᐅᓲᒍᒻᒪᖔᑦ ᖃᐅᔨᓴᕈᓯᖅ, ᐊᒻᒪᓗ ᐱᔪᓇᕐᓭᔩᑦ ᑐᑭᑖᕐᓯᒪᓕᕐᓱᑎᒃ ᙯᕐᖁᔨᒍᒪᓂᕐᒥᓂᒃ ᑌᒃᑯᓂᖓ ᑲᑎᕕᒃ ᐃᓕᓐᓂᐊᓂᓕᕆᔨᒃᑯᓂᒥᐅᓂᒃ ᐸᕐᓀᓂᖁᓪᓗᒋᑦ ᑫᓪᓗᑐᐃᖁᑦᓱᒋᓪᓗ ᐅᖃᐅᓯᓕᕆᓂᕐᒧᒃ ᑲᑎᒪᓂᐊᕈᓯᕐᓂᒃ ᓄᓇᓕᓐᓂ.
ᖃᐅᔨᓴᕈᓯᖅ ᐃᓚᖃᕐᑐᖅ ᑲᑎᒪᓂᐊᕈᓯᕐᓂᒃ, ᑌᑰᓇ ᖃᐅᔨᓴᕐᑏᑦ ᐃᑲᔪᕐᑎᖏᑦ ᓄᓇᓕᓐᓂᑦ ᐱᓯᒪᔪᑦ ᐃᒣᒍᓐᓇᑐᑦ: ᖕ0 ᖃᐅᔨᓴᕐᓂᖃᕐᓗᑎᒃ ᒫᓐᓇᐅᔪᖅ ᖃᓄᐃᓕᖓᓕᕐᓂᖏᓐᓂᒃ ᐅᖃᖃᑎᒌᓐᓂᑯᑦ ᐋᕐᕿᓯᒪᐅᑎᓂᒃ ᐊᐱᕐᓲᑎᓂᒃ; ᑉ0 ᐱᒋᐊᕐᑎᓯᓗᑎᒃ ᓇᒻᒥᓂᕐᒥᓂᒃ ᐅᖃᐅᑦᔪᐃᒋᐊᕐᑎᐅᓱᑎᒃ ᑲᑎᒪᔨᓂᒃ ᓇᓗᓀᕐᓯᖁᓪᓗᒋᑦ ᓯᕗᓪᓕᐅᔭᐅᒋᐊᓕᓐᓂᒃ, ᑌᒪ ᐱᕙᓪᓕᐊᓂᐊᓕᕋᒥᒃ ᐅᑉᐱᓇᕐᑑᓱᓂ ᐊᐅᓚᑦᔭᕆᐊᕈᑎᑦᓴᒥᒃ ᐃᓂᖓᓅᕐᓗᒍᓗ; ᐊᒻᒪᓗ ᕐ0 ᖃᐅᔨᓴᓗᑭᕙᓪᓗᑎᒃ ᐋᕐᖀᒋᐊᓗᑭᕙᓪᓗᑎᓗ.
