ᐃᑦᓴᓂᑕᕐᓂᐊᓂᕐᒧᑦ ᖃᐅᔨᓴᕐᓂᕕᓂᖅ ᕿᑭᕐᑕᔪᐊᑉ ᐊᑯᓕᕕᐅᓪᓗ ᒥᑦᓵᓂ, 2010 ᐊᐅᔭᖓᓐᓂ
ᑭᓇᒨᒻᒪ¯ᑦ Pierre M. Desrosiers
ᕿᑭᕐᑕᔪᐊᖅ ᓇᓗᓀᕐᑕᐅᓚᐅᕐᑐᕕᓂᐅᕗᖅ ᐅᑭᐅᕐᑕᑐᒥ ᐃᑦᓴᓂᑕᕐᓂᐊᓂᕐᒧᑦ ᖃᐅᔨᓴᕐᑐᕕᓂᐅᓕᕐᑎᓗᒍ Manning 1949-ᒥ. ᑌᒪᓐᖓᓂᑦ, ᑖᕙᓂ ᖃᐅᔨᓴᕐᓂᖃᒐᓛᐱᑦᓯᒪᔪᖅ. ᓭᒪ ᒪᑭᒻᒪᖅ (ᒪᙯᑦᑎ-ᒪᓕᒐᖅ), ᑌᕕᑎ ᒪᑭᒻᒪᖅ (ᐃᑲᔪᕐᑎ), ᐊᒻᒪᓗ ᐊᓐᑦᔫ ᐸᐱᑲᑦᑐᖅ (ᐃᑦᓴᓂᑕᕐᓂᐊᑎᐅᑉ ᐃᑲᔪᕐᑎᖓ), ᐊᖓᔪᕐᖄᓕᑦᑖᓱᑎᒃ ᐱᔦᕐ ᑎᕉᓯᔦᕐ-ᒥᒃ (ᐊᕙᑕᒃᑯᑦ ᐃᑦᓴᓂᑕᕐᓂᐊᑎᖁᑎᖓ), ᐃᑦᓴᓂᑕᕐᓂᐊᕋᑖᓚᐅᔪᔪᑦ ᑖᕙᓂ ᓄᓇᒥ. ᑕᑯᓂᐊᕋᒋᐊᓪᓚᓚᐅᔪᑦ ᖃᐅᔨᒪᔭᐅᓕᕐᑐᓂᒃ ᓇᔪᒐᐅᓚᐅᕐᑐᕕᓂᕐᓂᒃ ᐊᓪᓚᖁᑎᓕᐅᕆᑦᓱᑎᓗ ᐊᓪᓚᖁᑎᓕᐅᕐᑕᐅᓚᐅᕐᓯᒪᓐᓂᖏᑦᑐᓂᒃ ᓇᔪᒐᐅᓚᐅᕐᑐᕕᓂᕐᓂᒃ ᕿᑭᕐᑕᔪᐊᑉ ᐊᑯᓕᕕᐅᓪᓗ ᒥᑦᓵᓃᑦᑐᓂᒃ.
ᐊᑕᐅᓯᖅ ᑐᕌᕐᓂᒋᔭᐅᓗᐊᓐᖑᐊᓚᐅᔪᔪᖅ ᖃᐅᔨᓴᕐᓂᐅᓚᐅᔪᒧᑦ ᓇᕝᕚᒐᓱᐊᕐᓱᑎᒃ ᓈᒻᒪᑐᒥᒃ ᐃᑦᓴᓂᑕᕐᓂᐊᕕᐅᒐᔭᕐᑐᒥᒃ ᐃᓕᓐᓂᐊᑎᓄᑦ 2011 ᐊᐅᔭᖓᓐᓂ. ᑖᓐᓇ ᐱᓇᓱᐊᕐᓂᐅᓚᐅᔪᔪᖅ ᐃᓚᖃᓚᐅᔪᒻᒥᔪᖅ ᐊᑯᓕᕕᒻᒥᐅᑦ ᐊᑯᓕᕕᐅᓪᓗ ᐊᖓᔪᕐᖃᐅᑎᖏᑦ ᖃᐅᔨᒋᐊᕐᕕᐅᑎᓪᓗᒋᑦ ᓇᓪᓕᐊ ᓄᓀᑦ ᐊᑯᓕᕕᒻᒥᐅᓄᑦ ᑲᖐᒋᔭᐅᒐᔭᓐᖑᐊᒪᖔᑕ ᐃᑦᓴᓂᑕᕐᓂᐊᓗᒋᑦ. ᖃᐅᔨᒋᐊᕐᕕᐅᔪᕕᓃᑦ ᑕᑯᑎᑦᓯᓚᐅᔪᔪᑦ ᕿᑭᕐᑕᔪᐊᖅ ᐃᑦᓴᓂᑕᕐᓂᐊᕕᐅᖁᔭᐅᒐᔭᓐᖑᐊᑎᓪᓗᒍ, ᐊᑯᓕᕕᒻᒥᐅᑦ ᐃᓄᑐᙯᑦ ᐊᒥᓱᑲᓪᓚᓂᒃ ᐅᓂᒃᑲᐅᓯᑦᓴᖃᖃᑦᑕᓚᐅᔪᒻᒪᑕ ᖃᐅᔨᖃᑦᑕᓯᒪᔭᕐᒥᓂᒃ ᑖᕙᓂ ᕿᑭᕐᑕᒥ. ᓭᒪ ᒪᑭᒻᒪᖅ ᐅᖄᓚᐅᔪᒻᒥᔪᖅ ᐊᑐᕐᑐᒪᕆᐊᓗᓐᓂᒃ ᖃᐅᔨᑎᑦᓯᓚᐅᔪᒐᒥ ᐃᓅᓕᕐᕕᒋᓚᐅᕐᑕᕕᓂᕐᒥᓂᒃ ᖃᑦᓴᓐ ᐯᒃᑯᓗ ᕿᑭᕐᑕᐅᑉ ᓯᕿᓂᖓᓃᓚᐅᕐᓂᕕᓂᖏᓐᓂᒃ. ᑕᒪᑦᓱᒨᓇ ᐊᑕᖏᑦᓯᐊᑐᒥᒃ ᓄᓇᓐᖑᐊᓕᐅᕈᓐᓇᓯᓚᐅᔪᒍᑦ ᓂᐅᕐᕈᓯᕐᕕᐅᓚᐅᕐᑐᕕᓂᕐᒥᒃ, 1950-ᐄᑦ ᐊᕐᕌᒍᖏᓐᓂᑕᕐᒥᒃ, ᐊᓪᓚᖁᑎᓕᐅᕐᓱᑕᓗ ᐊᓯᖏᓐᓂᒃ ᓇᔪᒐᐅᓚᐅᕐᑐᕕᓂᕐᓂᒃ ᖃᐅᔨᒪᔭᐅᑦᓱᑎᒃ ᐊᑯᓕᕕᒻᒥᐅᓄᑦ.
ᑕᑯᓂᐊᕐᑕᐅᒋᐊᓪᓚᖃᑕᐅᓚᐅᔪᔪᖅ ᓇᔪᒐᐅᓚᐅᕐᑐᕕᓂᖅ JeGn-2-ᒍᓂᕋᕐᑕᖅ (ᓴᒡᒐᑕᐅᓚᐅᕐᑐᕕᓂᖅ Manning-ᒧᑦ ᕿᑭᕐᑕᔪᐊᑉ ᑕᕐᕋᖓᑕ ᐅᐊᓐᓂᖓᓂ) ᓱᕐᕋᑕᐅᓯᒪᓪᓗᐊᕌᓗᓚᐅᔪᓐᖏᑐᖅ ᓈᒻᒪᓱᓂᓗ ᐃᓕᓐᓂᐊᑎᓄᑦ ᐃᑦᓴᓂᑕᕐᓂᐊᓂᕐᒧᑦ ᐃᓕᓐᓂᐊᕕᐅᓗᓂ. ᑖᕙᓐᓇ ᓇᔪᒐᐅᓚᐅᕐᑐᕕᓂᖅ ᐊᒥᓱᑲᓪᓚᓂᒃ ᖃᕐᒪᕕᓂᖃᕐᒥᔪᖅ ᐃᑦᓴᓂᑕᕐᓂᓗ ᖃᓄᐃᑦᑐᑐᐃᓐᓇᓂᒃ ᐱᒋᔭᐅᓚᐅᕐᑐᕕᓂᐅᑦᓱᑎᒃ ᐃᓄᑐᐃᓐᓇᖄᕕᓂᕐᓄᑦ/ᐃᓄᓐᓄᑦ ᐃᓄᑐᐃᓐᓇᓗᑐᕐᖄᕕᓂᕐᓄᓗ. ᑖᕙᓂ ᓇᔪᒐᐅᓚᐅᕐᑐᕕᓂᕐᒥ ᐃᓕᓐᓂᐊᑏᑦ ᐃᑦᓴᓂᑕᕐᓂᐊᑎᑕᐅᒍᑎᒃ ᑐᑭᓯᓕᐅᒥᒻᒪᕆᒐᔭᕐᑐᑦ ᐊᓂᕐᕋᐅᕙᑦᑐᕕᓃᑦ ᒥᑦᓵᓄᑦ ᑭᓯᐊᓂᓗᑦᑕᐅᖅ ᐱᔭᕆᐊᑭᓪᓕᑎᕆᒐᔭᕐᓱᑎᒃ ᕿᒥᕐᕈᒋᐊᑦᓯᐊᓂᕐᒥᒃ Manning ᑐᑭᓯᓚᐅᕐᑕᕕᓂᖏᓐᓂᒃ ᓇᔪᒐᐅᓚᐅᕐᑐᕕᓂᐅᑉ ᒥᑦᓵᓄᑦ.
ᐃᓚᖃᕐᓱᑎᒃ ᖃᐅᔨᒪᔭᐅᔪᓂᒃ ᓇᔪᒐᐅᓚᐅᕐᑐᕕᓂᕐᓂᒃ, ᐊᒥᓱᑦ ᓄᑖᑦ ᓇᔪᒐᐅᓚᐅᕐᑐᕕᓃᑦ ᐊᓪᓚᖁᑎᓕᐅᕐᑕᐅᓚᐅᔪᒻᒥᔪᑦ ᓄᓇᓐᖑᐊᓕᐅᕐᑕᐅᓱᑎᓗ ᑖᕙᓃᓐᓂᑎᓂ, ᐃᓚᒋᔭᐅᑎᓪᓗᒋᑦ ᐃᓄᑐᐃᓐᓇᓗᑐᕐᖄᕕᓃᑦ ᓇᔪᒐᒋᓚᐅᕐᑕᕕᓂᖏᑦ. ᐃᑲᔪᕐᑎᓗᒍ ᓭᒪ ᕿᓐᓄᐊᔪᐊᖅ, ᓇᕝᕚᒋᐊᓪᓚᕋᓱᐊᓚᐅᔪᒻᒥᔪᒍᑦ ᓇᔪᒐᐅᓚᐅᕐᑐᕕᓂᕐᒥᒃ ᕿᑭᕐᑕᐅᑉ ᑕᕐᕋᖓᑕ ᓯᑦᔭᖓᓂ, ᑭᓯᐊᓂ ᑕᑯᒍᓐᓇᓚᐅᔪᓐᖏᑐᒍᑦ.
ᐃᓘᓐᓀᓂ ᕿᑭᕐᑕᔪᐊᕐᒥ ᖃᓂᑕᖏᓐᓂᓗ ᒥᑭᓂᕐᓴᓂ ᕿᑭᕐᑕᓂ, ᐊᓪᓚᖁᑎᓕᐅᓚᐅᔪᒍᑦ ᐊᖕᒫᓂᒃ ᓄᓇᐅᔭᐅᑦᓱᑎᓗ ᒧᖁᐃᕐᓯᒪᔪᓂᒃ ᐅᔭᕋᕐᓂᒃ. ᓯᕗᓪᓕᐹᑦᓯᐊᒥᒃ ᖃᐅᔨᒋᐅᓚᐅᔪᒍᑦ ᓄᓇᐅᔭᐅᑦᓱᑎᒃ ᒧᖁᐃᕐᓯᒪᔪᓂᒃ ᐅᔭᕋᖃᕐᑎᓗᒍ ᓄᓇᕕᒻᒥ ᑖᕙᓐᓇᓗ ᖃᐅᔨᒋᐅᕐᑕᐅᓚᐅᔪᔪᖅ ᐅᕙᑦᑎᓂᒃ ᓄᑖᒥᒃ ᑕᑯᑎᑦᓯᓚᕿᑦᓱᓂ ᐊᑦᑐᐃᑑᑦᓱᑎᒃ ᐱᑦᓴᑖᕐᕕᐅᒍᓐᓇᑐᓂᒃ ᓄᓇᕕᒻᒥᐅᓄᑦ ᖃᓪᓗᓈᑦ ᑖᕗᖓ ᓄᓇᒨᓚᐅᕐᑎᓇᒋᑦ.
ᓄᓇᑐᐃᓐᓇᒥ, ᐊᓪᓚᖁᑎᓕᐅᓚᐅᔪᒻᒥᔪᒍᑦ ᐊᒥᓲᓐᖏᑑᒐᓗᐊᓂᒃ ᓄᑖᓂᒃ ᓇᔪᒐᐅᓚᐅᕐᑐᕕᓂᕐᓂᒃ ᐃᓚᒋᔭᐅᑎᓪᓗᒍ ᐃᓄᑐᐃᓐᓇᓗᑐᕐᖄᕕᓃᑦ ᓇᔪᒐᒋᓚᐅᕐᑕᕕᓂᖓ ᕿᒻᒥᕕᓂᐅᓪᓗ ᐃᓗᕕᖓ.
ᐃᑦᓴᓂᑕᕐᓂᐊᒌᕐᓯᒪᓕᕐᑎᓗᒋᑦ, ᓭᒪ ᒪᑭᒻᒪᖅ ᐊᓪᓚᕕᑦᑎᓄᑦ ᒧᓐᑐᔨᐊᒦᑦᑐᒧᑦ ᙯᖃᑦᑕᓚᐅᔪᒻᒥᔪᖅ ᐅᓪᓗᓂ ᐃᑭᑦᑑᒐᓗᐊᓂ ᖃᐅᔨᒪᔭᕐᒥᓂᒃ ᐅᓂᒃᑳᕆᐊᕐᑐᑲᑦᑕᓱᓂ ᐱᐅᓯᐅᕙᑦᑐᕕᓃᑦ ᒥᑦᓵᓄᑦ ᕿᑭᕐᑕᔪᐊᑉ ᒥᑦᓵᓂᒥᐅᓄᑦ.
ᐃᓅᓕᕐᕕᕕᓂᕐᒥᓂ ᕿᑭᕐᑕᔪᐊᕐᒥ, ᓭᒪ ᒪᑭᒻᒪᖅ ᑐᑭᓯᑎᑦᓯᒋᐊᕐᑐᖅ ᑕᕐᖁᑎ ᖃᓄᖅ ᐊᑐᕐᑕᐅᓲᒍᓐᓂᒪᖔᑦ, 2010 ᐊᐅᔭᖓᓐᓂ.
ᐊᑦᔨᓕᐅᕆᔪᕕᓂᖅ ᐱᔦᕐ ᑎᕉᓯᔦᕐ
ᐊᕐᖁᑎᒃ ᐱᑐᑦᑎᓯᓯᒪᔪᖅ ᐊᑦᔨᒌᓐᖏᑐᓂᒃ ᐃᓪᓗᕈᐊᕐᓂᒃ ᖃᑦᓴᓐ ᐯ-ᑯᑦ ᓂᐅᕐᕈᓯᕐᕕᒋᓚᐅᕐᑕᕕᓂᖓᓂ, ᕿᑭᕐᑕᔪᐊᕐᒥ, 2010 ᐊᐅᔭᖓᓐᓂ.
ᐊᑦᔨᓕᐅᕆᔪᕕᓂᖅ ᐱᔦᕐ ᑎᕉᓯᔦᕐ
ᐊᓪᓚᖁᑎᓕᐅᕐᑐᑦ ᖃᕐᒪᐅᓚᐅᕐᑐᕕᓂᕐᒥᒃ JeGn-2-ᒍᓂᕋᕐᑕᒦᑦᑐᒥᒃ ᕿᑭᕐᑕᔪᐊᕐᒥ, 2010 ᐊᐅᔭᖓᓐᓂ.
ᐊᑦᔨᓕᐅᕆᔪᕕᓂᖅ ᐊᓐᑦᔫ ᐸᐱᑲᑦᑐᖅ
ᓄᓇᐅᔭᐅᑦᓱᓂ ᒧᖁᐃᕐᓯᒪᔪᖅ ᐅᔭᕋᖅ ᓴᒻᒥᔪᖅ ᑕᑯᔭᕕᓂᖅ ᐃᓄᑐᐃᓐᓇᓗᑐᕐᖄᕕᓃᑦ ᓇᔪᒐᒋᓚᐅᕐᑕᕕᓂᖓᓐᓂᑦ ᑌᒣᑦᑐᑖᕐᕕᕕᓂᕐᒥ ᕿᑭᕐᑕᔪᐊᕐᒥ, 2010 ᐊᐅᔭᖓᓐᓂ.
ᐊᑦᔨᓕᐅᕆᔪᕕᓂᖅ ᐱᔦᕐ ᑎᕉᓯᔦᕐ
ᓄᓇᐅᔭᕐᒥᒃ ᐅᔭᕋᕐᑖᕕᕕᓂᖅ ᕿᑭᕐᑕᔪᐊᕐᒥ, 2010 ᐊᐅᔭᖓᓐᓂ.
ᐊᑦᔨᓕᐅᕆᔪᕕᓂᖅ ᐱᔦᕐ ᑎᕉᓯᔦᕐ
ᑐᓃᑦ ᐊᖕᒫᖁᑎᖓᑕ ᓄᕗᕕᓂᖓ ᑕᑯᔭᕕᓂᐅᑦᓱᓂ ᐃᓄᑐᐃᓐᓇᓗᑐᕐᖄᕕᓃᑦ ᓇᔪᒐᒋᓚᐅᕐᑕᕕᓂᖓᓐᓂᑦ ᓄᓇᑐᐃᓐᓇᒥ, ᐊᑯᓕᕕᐅᑉ ᑕᕐᕋᖓᓂ, 2010 ᐊᐅᔭᖓᓐᓂ.
ᐊᑦᔨᓕᐅᕆᔪᕕᓂᖅ ᐊᓐᑦᔫ ᐸᐱᑲᑦᑐᖅ
