ᐴᕐᑕᐅᑉ ᐱᓇᓱᐊᕐᑕᐅᓂᖓ
ᙯᓐᓂᐅᓃᑦ
ᑌᑦᓱᒪᓂᐅᑎᓪᓗᒍ, ᖃᔭᖅ ᐱᒻᒪᕆᐅᓂᕐᐸᐅᓯᒪᕗᖅ ᐱᐅᒃᑯᑎᐅᑦᓱᓂ ᐊᓐᓇᐅᒪᒐᓱᐊᕐᓂᒧᑦ. ᐅᐱᕐᖓᓴᐅᓕᕐᒪᑦ, ᐃᓄᐃᑦ ᐊᑦᔨᒌᓐᖏᑐᓂ ᒪᙯᕝᕕᒥᐅᑦ ᑲᑎᐅᕐᖃᐸᑦᑐᕕᓃᑦ ᐊᑕᐅᓯᕐᒥ ᓄᓇᒥ ᙯᓐᓂᐅᒋᐊᕐᑐᓱᑎᒃ ᒪᙯᑦᑎᓂᒃ. ᐅᓪᓛᒪᕆᒃᑯᑦ ᐱᒋᐊᕐᐸᓱᑎᒃ ᓯᕿᓂᓘᓐᓃᑦ ᓴᕐᕿᓚᐅᕐᑎᓇᒍ. ᓯᕗᓪᓕᐹᖅ ᐊᓪᓗᒋᐊᕈᓯᕕᓂᖅ ᙯᓐᓂᐅᒋᐊᓯᒻᒪᑕ, ᑎᑦᔭᓗᓐᓂᒃ ᓄᐊᑦᓯᓂᖅ, ᓄᓇᕕᒻᒥ ᓇᐹᕐᑐᖃᓐᖏᒪᑦ. ᐃᓄᐃᑦ ᐃᒋᑦᓯᓚᐅᕐᓯᒪᓲᒍᓐᓂᖏᑦᑐᑦ ᕿᔪᒻᒥᒃ, ᐊᖏᔫᒐᓗᐊᕐᐸᑦ ᒥᑭᔫᒐᓗᐊᕐᐸᓘᓐᓃᑦ, ᖃᔭᓕᐊᕆᑦᓴᕆᒐᒥᐅᒃ. ᐊᑐᓂᑦ ᖃᔭᐅᑉ ᑐᓕᒫᖏᑦ ᕿᔪᑦᑕᖏᑦ ᑖᓐᓇᓗᑑᒋᐊᖃᕐᐸᑐᕕᓃᑦ ᐋᕐᕿᓯᒪᑦᓯᐊᓗᑯᐊᐱᒋᐊᖃᕐᓱᑎᓗ. 1000 ᒥᑦᓵᓃᑦᑐᑦ ᖃᔭᓕᐊᕆᒐᑦᓭᑦ, ᐃᓘᓐᓇᑎᒃ ᐊᑐᓂᑦ ᐊᑎᖃᕐᓱᑎᒃ, ᐃᓘᓐᓇᑎᓪᓗ ᐱᒻᒪᕇᓐᓇᐅᓱᑎᒃ.
ᕿᔪᒋᒋᐊᓕᓕᒫᒥᓂᒃ ᐱᓯᒪᓕᕋᒥᒃ, ᓄᐊᑦᓯᒋᐊᖃᓯᕙᓐᓂᒥᔪᑦ ᓈᒻᒪᑐᓂᒃ ᓇᑦᓯᔭᕐᓂᒃ ᖃᔭᕐᒥᒃ ᐊᒥᐊᕐᓯᒍᑎᑦᓴᓂᒃ, ᐊᖑᑏᑦ ᒪᙯᒍᓐᓇᓯᖁᑦᓱᒍᑦ. ᐊᖏᓂᕐᐹᖏᑦ ᕿᓰᑦ ᐊᒥᐊᕐᓯᒍᑕᐅᕙᑦᑐᕕᓃᑦ ᖃᔭᐅᑉ ᑎᒥᕐᓚᐅᓂᖓᓄᑦ. ᙯᓐᓂᐅᒋᐊᓐᖓᓯᒻᒪᑕ ᐅᓪᓛᑯᑦ, ᓂᕕᐊᕐᓯᐊᑦ ᕿᑐᒻᒪᓭᒋᐊᖃᕐᐸᑐᕕᓃᑦ ᕿᓰᑦ ᑭᓂᑎᕐᓱᒋᑦ. ᒥᕐᓱᑕᐅᓚᐅᕋᑎᒃ ᕿᓰᑦ, ᑎᕐᑎᑎᑕᐅᕐᖄᐸᑦᑐᕕᓃᑦ ᒥᕐᖁᐃᔭᕐᑎᑕᐅᑦᓱᑎᒃ. ᕿᓯᓐᓂᒃ ᐅᐃᒍᓂᖅ ᒥᕐᓱᓯᒪᓪᓗᑯᐊᐱᒋᐊᖃᕐᐸᑐᕕᓂᖅ, ᑭᓗᖃᑦᓯᐊᒪᕆᐊᐱᓪᓗᓂ; ᑭᓪᓚᖃᒋᐊᖃᒐᓛᒐᓂ.
ᐃᓄᓕᒫᑦ ᓱᓇᓱᐊᕐᑎᐅᓲᕕᓂᖅ ᙯᓐᓂᐅᑐᖃᓕᕐᒪᑦ – ᐊᖑᑏᑦ, ᐊᕐᓀᑦ ᐱᐊᕃᓪᓗ. ᐃᓚᖏᑦ ᑐᓕᒫᓕᐅᕐᑎᓗᒋᑦ, ᐃᓚᖏᓪᓗ ᒥᕐᓱᑏᑦ, ᐃᑲᔪᕐᑏᑦ ᓂᕐᓯᐅᑏᓪᓗ. ᐱᐊᕃᑦ ᐊᒫᕐᑎᐅᕙᑦᑐᕕᓃᑦ ᓄᑕᕋᕐᓂᒃ ᙯᓐᓂᐅᑐᓂᒃ ᐊᕝᕕᐊᓂᐊᓐᖏᒪᑕ. ᙯᓐᓂᐅᓂᖅ ᓴᓗᒣᑦᑑᕙᑦᑐᕕᓂᖅ, ᕿᓰᓪᓗ ᑎᐸᖃᕐᓱᑎᒃ ᒪᒪᓐᖏᑐᒥᒃ, ᑭᓯᐊᓂ ᐃᓄᐃᑦ ᖃᓄᐃᒋᕙᓐᓂᖏᑦᑕᖓ ᐊᓯᐊᓂᒃ ᖃᐅᔨᒪᓐᖏᓇᒥᒃ. ᑌᑦᓱᒪᓂᐅᒻᒪᑦ, ᑕᒪᓐᓇ ᐱᐅᓯᕐᓲᑎᑐᐃᓐᓇᕕᓂᖅ.
ᖃᔭᓕᒫᑦ ᐱᔭᕇᕐᓯᒪᓕᕐᒪᑕ, ᐃᓄᐃᑦ ᐱᕈᔭᕕᓂᕐᒥᓂᒃ ᙯᓐᓂᐅᓂᖃᓚᐅᕐᑎᓇᒍᓘᓐᓃᑦ ᐁᑦᓯᓯᕙᑦᑐᕕᓃᑦ, ᑌᒪ ᓂᕆᒻᒫᓂᖃᓂᐊᓕᕐᒪᑦ. ᑭᖑᓂᐊᒍᑦ, ᐊᖑᑏᑦ ᒪᙯᓯᕙᑦᑐᕕᓃᑦ ᐃᒪᕐᐱᒥ. ᐊᐅᔭᒥ (ᐅᐱᕐᖔᒥ), ᐃᓚᒌᑦᑐᑦ ᐊᐅᓚᕙᑦᑐᕕᓃᑦ ᓄᓇᑐᐃᓐᓇᒥ ᐸᐅᕐᓱᑎᒃ ᑕᓯᕐᒥᑦ ᑕᒥᕐᒧᑦ ᖃᔭᕐᓗ ᓇᒻᒪᓯᕙᑦᓱᒍ ᑕᓰᑦ ᐊᑯᓐᓂᖏᓐᓂ. ᑌᔭᐅᒍᓯᖓ ᑖᑦᓱᒪᐅᑉ ᐃᑎᑦᔭᖅ. ᑌᒣᓘᕐᓱᑎᒃ ᐊᐅᓚᓕᕋᒥᒃ, ᐊᐅᔭᓕᒫᖅ (ᐅᐱᕐᖔᓕᒫᖅ), ᐊᑖᑕᒋᔭᖅ ᐸᐅᕐᐸᑐᕕᓂᖅ ᖃᔭᕐᒥᒃ ᐅᓯᔪᒥᒃ ᓄᓕᐊᖓᓂᒃ ᕿᑐᕐᖓᖏᓐᓂᓗ. ᕿᒻᒦᑦ ᒪᓕᑉᐸᑐᕕᓃᑦ ᓯᓈᑎᒍᑦ, ᓇᒻᒪᓱᑎᒃ ᐱᐅᒃᑯᑎᓂᒃ.
ᓱᕐᕙᓕᕐᔪᐊᓂᒃ ᐃᖏᕐᕋᐅᑎᖃᓚᐅᕐᑎᓇᒍ, ᑖᒃᑯᐊ ᐊᐅᓚᓃᑦ ᐱᐅᔪᓪᓚᕆᐊᓗᕕᓃᑦ ᓭᒪᓇᕐᑐᒪᕆᐅᑦᓱᑎᓪᓗ.
