ᐋᓐᓂᐊᓯᐅᑎᒋᔭᐅᕙᑦᑐᕕᓃᑦ

ᓇᑦᓯᕕᓂᐅᑉ ᐅᕐᓱᖓ

ᓇᑦᓯᕕᓂᐅᑉ ᐅᕐᓱᖓ «ᐋᓐᓂᐊᓯᐅᑎᑦᓯᐊᒍᓂᕋᕐᑕᐅᖃᑦᑕᓯᒪᕗᖅ» ᐃᓄᐃᑦ ᓄᓇᖓᓐᓂ ᐊᒻᒪᓗ ᓱᓕᔪᕐᔫᔮᕐᓱᓂ; ᐊᑐᕐᑕᐅᓂᕐᐸᐅᓲᕕᓂᖅ ᐆᒪᔪᕕᓂᐅᒻᒥᔪᓂᑦ ᐱᕈᕐᑐᓂᓪᓗ ᐱᐅᓯᑐᖃᕐᑎᒍᑦ ᐋᓐᓂᐊᓯᐅᑎᒋᔭᐅᑦᓱᓂ. ᐊᑐᕐᑕᐅᓂᕐᐸᐅᓲᕕᓂᖅ ᐋᕐᖀᒍᓐᓇᓂᕐᐸᐅᓱᓂᓗ ᐊᓯᓕᒫᒥᓂᑦ ᐆᒪᔪᕕᓂᐅᑉ ᐅᕐᓱᕆᒻᒥᔭᖏᓐᓂᑦ, ᐆᑦᑐᑎᒋᓗᒍ ᑐᒃᑐᕕᓂᐅᑉ ᑐᓐᓄᖓᓂᑦ ᓇᓄᕕᓂᐅᓪᓗ ᐅᕐᓱᖓᓂᑦ, ᐊᑐᕐᑕᐅᒍᓐᓇᓱᓂᓗ ᐁᐸᔫᑎᓪᓗᒍ, ᑎᕐᑎᓯᒪᑎᓪᓗᒍ ᐃᒍᓇᐅᑎᓗᒍᐊᓪᓛᑦ. ᓇᑦᓯᖅ ᑐᖁᑕᐅᑐᐊᕐᒪᑦ, ᐅᕐᓱᖓ ᐋᓐᓂᐊᓯᐅᑎᓕᐊᖑᓚᖓᔪᖅ ᓵᑦᑐᐊᐱᐅᓈᕐᑎᑎᓪᓗᒍ ᓇᑲᑎᕐᑕᐅᓲᖅ ᒪᕐᐹᑎᕐᑕᐅᔭᕋᓂ. ᐅᕐᓱᑖᕋᓱᐊᕐᑐᑦ ᐅᕐᓱᖃᕐᓂᐹᒥᒃ ᐱᒐᓱᐊᓲᑦ, ᖁᖏᓯᖓᓂᓗᐊᓐᖑᐊᖅ ᐅᐱᕐᖔᒥ/ᐊᐅᔭᒥ ᐊᒻᒪᓗ ᑯᑦᓯᓂᖓᓂᑦ ᐅᑭᐅᒍᓕᕐᒪᑦ. ᐅᕐᓱᖅ ᓴᓗᒪᔫᒋᐊᓕᒃ ᓂᕿᖃᕈᓐᓀᓗᓂ, ᐊᐅᖃᕈᓐᓀᓗᓂ ᓴᓂᐅᒍᓐᓀᓗᓂᓗ.

ᖃᓄᐃᑦᑐᑐᐃᓐᓇᖅ ᐳᐃᔨᕕᓂᖅ ᐊᑐᕐᑕᐅᒍᓐᓇᑑᒐᓗᐊᖅ, ᐅᑦᔪᕕᓂᐅᑉ ᐅᕐᓱᖓ ᐊᑐᕐᑕᐅᒍᒪᓂᕐᓴᐅᓲᕕᓂᖅ, ᓇᑦᓯᓛᕕᓂᐅᒍᓂᓗ ᐱᐅᒋᔭᐅᓂᕐᓴᐅᓱᓂ. ᐃᓘᓐᓈᓂ, ᐊᖑᑎᕕᓂᐅᑉ ᐅᕐᓱᖓ ᐊᕐᓇᓄᑦ ᐋᓐᓂᐊᓯᐅᑎᒋᔭᐅᕙᑦᑐᕕᓂᖅ ᐊᕐᓇᕕᓂᐅᓪᓗ ᐅᕐᓱᖓ ᐊᖑᑎᓄᑦ ᐋᓐᓂᐊᓯᐅᑎᒋᔭᐅᑎᓪᓗᒍ.

ᐁᐸᔪᖅ ᓇᑦᓯᕕᓂᐅᑉ ᐅᕐᓱᖓ ᐊᑐᕐᑕᐅᕙᓪᓗᓲᖅ ᐅᕕᓂᕐᓗᑐᓄᑦ. ᓵᑦᑐᐊᐱᐅᑎᓪᓗᒍ ᒥᖑᐊᕈᑕᐅᓲᖅ, ᐋᕐᖀᒍᓐᓇᓱᓂ ᑭᓪᓕᓂᒃ, ᐆᓐᓂᓂᒃ, ᐊᕐᖁᓇᕐᓂᓂᒃ ᐸᕐᑎᓂᓪᓗ, ᐊᐅᓈᕈᓐᓀᑎᑦᓯᓲᒍᑦᓱᓂᓗ. ᐁᐸᔪᖅ ᓇᑦᓯᕕᓂᐅᑉ ᐅᕐᓱᖓ ᑕᒧᐊᔭᐅᒍᓐᓇᒥᔪᖅ (ᐃᒡᒋᐊᓕᕆᔪᓄᑦ) ᐃᔨᓯᐅᑎᒋᔭᐅᓗᓂᓗ (ᐃᓪᓗᑐᓄᑦ) ᓯᐅᑎᓂᐅᑎᒋᔭᐅᒍᓐᓇᓱᓂ (ᓯᐅᓯᕆᔪᓄᑦ). ᐅᓇ ᐆᑦᑑᑎᒃ ᖃᓄᓪᓗᐊᑎᒋᒃ ᐅᕐᓱᖅ ᐋᕐᖀᒍᓐᓇᒪᖔᑦ.

ᔫᐱ ᑯᑭᐅᑉ ᐅᓂᒃᑳᖓ: «ᓱᕈᓯᐅᑦᓱᖓ – ᐸᕝᕕᓇᕐᑐᒪᕆᐅᓯᒪᕗᒍᑦ – ᐱᓐᖑᐊᓱᑕ ᐃᓄᒐᕐᒪ ᐃᓚᖓ ᐅᓕᒪᑦᑕᐅᓚᐅᕐᓯᒪᔪᖅ ᓂᕕᖓᑐᐃᓐᓇᓚᕿᑦᓱᒍ ᐅᕕᓂᒻᒧᑦ ᑭᓯᐊᓂ. ᐁᐸᔪᒧᑦ ᓇᑦᓯᕕᓂᐅᑉ ᐅᕐᓱᖓᓄᑦ ᒥᖑᐊᖃᑦᑕᓱᒍ ᐅᑭᐅᓕᒫᑦᓯᐊᖅ ᒪᒥᒐᓱᐊᓚᐅᕐᓯᒪᔪᖅ. ᑭᓯᐊᓂ ᐅᓇᑕᒐ… ᐅᓪᓗᒥ ᑌᒣᓕᔪᖃᑦᓴᐸᑦ ᓇᑲᑕᐅᑐᐃᓐᓇᕋᔭᕐᖂᑐᖅ ᐋᓐᓂᐊᓯᐅᑎᒧᑦ.»

ᓇᑦᓯᕕᓂᐅᑉ ᐅᕐᓱᖓ ᑎᕐᑎᑎᑕᐅᒍᓐᓇᒥᔪᖅ. ᐃᓚᖏᑦ ᐃᓄᐃᑦ ᑎᕐᑎᑎᑦᓯᓲᑦ ᐅᕐᓱᖅ ᕿᕐᓂᓯᕋᑕᕐᑎᓗᒍ – «ᐊᑯᓂᐅᓂᕐᓴᖅ ᐃᒐᑐᐊᕈᕕᐅᒃ ᐋᕐᖀᒍᓐᓇᓂᖓ ᓲᖑᓂᕐᓴᖅ,» ᐃᓄᒻᒧᑦ ᐅᖃᐅᑎᔭᐅᓯᒪᔪᒍᑦ. ᐅᕐᓱᖅ ᑎᕐᑎᑎᑕᐅᓕᑐᐊᕋᒥ, ᐆᓇᕐᓂᖓ ᖃᐅᔨᓴᕐᑕᐅᑲᑦᑕᓲᖅ ᖁᐸᓄᐊᑉ ᐃᓴᕈᖓᑕ ᐱᓗᖓᓄᑦ. ᓯᓚᑎᒋᓂᕐᓴᖓ ᓄᕗᐊ ᐅᕐᓱᒨᕐᑕᐅᓱᓂ ᐊᒻᒪᓗ ᑌᒣᑕᐅᓗᓂ ᐆᑐᐊᕐᐸᑦ, ᑌᒪ ᐅᕐᓱᖅ ᐃᒐᔪᖅ ᓈᒻᒪᓯᕗᖅ. ᖃᓚᒪᔪᖅ ᐅᕐᓱᖅ ᐱᐅᓕᐊᕐᑕᐅᒍᓐᓇᑐᖅ ᓴᓂᕐᕙᓗᒍ ᒪᑐᓯᒪᑦᓯᐊᕖᓐᖓᑐᒧᑦ ᐆᒪᔪᕕᓂᐅᑉ ᓱᑯᑦᓯᖓᓄᑦ (ᐊᕿᐊᕈᖓᓄᑦ, ᐃᒡᒋᐊᖓᓄᑦ, ᓯᕐᖁᖏᓐᓄᑦ) ᓂᓪᓕᒪᔪᒦᑦᑎᓗᒍᓗ. ᐄᔭᐅᑐᐊᕋᒥ ᖃᓗᕋᐅᑎᒧᑦ, ᑖᓐᓇ ᐅᕐᓱᖅ ᓄᕙᓐᓂᐅᑎᑐᐃᓐᓇᐅᔮᕐᑐᖅ ᐱᐅᔫᑦᓱᓂᓗ ᐊᓂᕐᑎᕆᑦᓯᐊᑎᑦᓯᒍᓐᓇᓱᓂᓗ. ᒥᖑᐊᕈᑎᒋᓗᒍ ᐅᕕᓂᒻᒥᒃ, ᐃᓛᓐᓂ ᐅᐊᕈᑎᖃᕐᑎᓗᒍ ᒪᒣᑦᑐᖁᑎᒥᒃ, ᖁᐊᕐᓂᑖᕐᓯᒪᔪᓂᒃ ᐋᕐᖀᒍᑎᐅᒍᓐᓇᒥᔪᖅ, ᓴᕝᕕᓕᕆᔪᓂᒃ ᖃᓄᐃᑦᑐᑐᐃᓐᓇᓂᓪᓗ ᐋᓐᓂᐊᑐᓂᒃ, ᑭᓯᐊᓂ ᐅᕕᓂᒻᒧᑦ ᐄᔭᐅᑦᓯᐊᕆᐊᓕᒃ ᐋᕐᖀᓚᖓᑐᐊᕈᓂ.

ᐃᒍᓇᐅᓕᕐᑐᖅ ᓇᑦᓯᕕᓂᐅᑉ ᐅᕐᓱᖓ ᑕᒧᐊᔭᐅᒍᓐᓇᒥᔪᖅ ᐅᐊᕈᑦᓯᓗᒍ ᐊᕿᒡᒋᕕᓂᐅᑉ ᖁᓂᕈᖏᓐᓂᒃ ᑭᓪᓕᓕᕆᒍᑎᒋᔭᐅᓗᓂ, ᐅᕝᕙᓘᓐᓃᑦ ᓯᐅᓯᕆᔪᓄᑦ ᑯᑐᕐᑎᑕᐅᖃᑦᑕᓗᓂ.