ᐊᑐᐊᒐᑦᓴᑯᕕᒃ ᐱᓇᓱᐊᕐᑕᐅᓯᒪᔪᓂᓪᓗ ᑲᑎᕐᓱᐃᕕᒃ
ᐊᕙᑕᖅ ᐱᐅᓯᑐᖃᓕᕆᕕᒃᑯᑦ ᐊᑐᐊᒐᑦᓴᑯᕕᖓ ᐱᓇᓱᐊᕐᑕᐅᓯᒪᔪᓂᓪᓗ ᓄᐊᑦᓯᕕᖓ ᐃᓗᓕᖃᕐᐳᖅ ᑕᒪᖏᓐᓂᒃ ᐊᑐᐊᒐᑦᓴᓂᒃ ᐱᓇᓱᐊᕐᑕᐅᓯᒪᔪᓂᓪᓗ ᓄᐊᑕᐅᒪᔪᓂᒃ. ᑖᓐᓇ ᐊᑐᐊᒐᑦᓴᑯᕕᒃ ᓴᕐᕿᑎᑕᐅᓯᒪᔪᑦ ᓄᓇᕕᒻᒥᐅᓅᓕᖓᓚᖓᑎᓪᓗᒍ. ᑕᑯᓇᓱᐊᕐᑕᐅᒍᓐᓇᑐᖅ ᑭᓇᑐᐃᓐᓇᓕᒫᑦᓯᐊᓄᑦ ᖃᐅᔨᓴᕐᑏᑦ, ᓴᓇᓐᖑᐊᑏᓪᓗ ᐃᓚᐅᑎᓪᓗᒋᑦ.
ᐊᑐᐊᒐᑦᓴᑯᕕᒃ ᐃᓗᓕᖃᕐᐳᖅ 4,000 ᐅᖓᑖᓅᕐᑐᓂᒃ ᐊᑐᐊᒐᓕᐊᕕᓂᕐᓂᒃ, ᓄᓇᕕᒻᒨᓕᖓᕙᓪᓗᑐᓂᒃ ᓄᓇᕕᒻᒥᐅᓄᓪᓗ, ᐃᓚᐅᑎᓪᓗᒋᑦ ᖃᐅᔨᒪᔭᐅᒋᐊᓖᑦ ᐅᑭᐅᕐᑕᑐᒨᓕᖓᔪᑦ ᓄᓇᖃᕐᖄᓯᒪᔪᓄᓪᓗ. ᐊᑐᐊᒐᑦᓴᑯᕕᐅᑉ ᐃᓗᐊᓃᑦᑐᑦ ᐃᓚᖃᕐᐳᑦ ᐊᑐᐊᒐᕐᓂᒃ ᐊᓪᓚᑕᐅᕙᑦᑐᕕᓂᕐᓂᓗ, ᕿᒥᕐᕈᐊᓂᒃ, ᓄᓇᓐᖑᐊᓂᒃ, ᐅᓕᕐᓀᓯᒍᑎᓂᒃ, ᑕᑯᓐᓇᕋᑦᓴᓂᒃ, ᐊᓯᖏᓐᓂᓗ.
ᐊᕙᑕᒃᑯᑦ ᓇᔪᕐᑎᓖᑦ ᐱᒻᒪᕆᕋᑕᕐᓂᒃ ᐱᓇᓱᐊᕐᑕᐅᖃᑦᑕᓯᒪᔪᓂᒃ ᐃᓚᐅᑎᓪᓗᒋᑦ ᐅᓂᒃᑳᑐᐊᑦ, ᐊᓪᓚᐸᑦᑕᕕᓂᖏᑦ ᑖᒧᓯ ᖁᒪᐅᑉ ᐲᑕ ᖃᓴᓪᓗᐊᓗ, ᐊᓪᓚᖑᐊᕐᓯᒪᔭᖏᑦ ᑑᒪᓯ ᑲᓪᓚᐅᑉ, ᐊᒻᒪᓗ ᐱᓇᓱᐊᕐᑕᐅᖃᑦᑕᓯᒪᔪᑦ ᐊᑦᔨᒌᓐᖏᑐᓄᑦ ᐃᓅᖃᑎᒌᑦᑐᓂᒃ ᖃᐅᔨᓴᕐᑎᓄᑦ.
