ᓂᕕᐊᕐᓯᐊᕈᓚᑳᑦ ᑲᒻᒥᐅᒋᐅᕐᓴᑐᑦ
ᑭᓇᒨᒻᒪ¯ᑦ Nancy Palliser, LCC coordinator
ᓄᓇᓕᓐᓂ ᐃᓗᕐᕈᓯᓕᕆᔩᑦ ᑲᑎᒪᔨᖏᑦ ᑐᕌᕐᓂᖃᕐᐳᑦ ᐃᓗᕐᕈᓯᑦᑎᓂᒃ ᐅᖃᐅᓯᑦᑎᓂᓗ ᐆᒪᑎᑦᓰᓇᕋᓱᐊᕐᓂᒥᒃ ᑕᑯᑦᓴᐅᑎᑦᓰᓇᕋᓱᐊᕐᓂᒥᓪᓗ ᑭᓇᓕᒫᓄᑦ. ᐅᐱᕐᖓᓴᖅ 2007-ᒥ, ᓂᕕᐊᕐᓯᐊᕈᓚᑳᑦ ᑕᓯᐅᔭᕐᒥᐅᑦ ᑲᒻᒥᐅᒋᐅᕐᓴᑎᑕᐅᓚᐅᔪᕗᑦ (ᓇᑦᓯᔦᓐᓈᒃ ᑲᒦᒃ).
ᑲᒻᒥᐅᒋᐅᕐᓴᑎᑕᐅᔪᑦ ᑕᓯᐅᔭᕐᒥ (ᐊᑦᔨᓕᐅᕆᔪᕕᓂᖅ ᒥᐊᔨ ᑫᓐ)
ᑲᒻᒥᐅᒋᐅᕐᓴᑎᑕᐅᔪᕕᓃᑦ ᐱᐊᕃᓪᓗ ᑲᒥᑦᑖᑎᑕᐅᔪᑦ (ᐊᑦᔨᓕᐅᕆᔪᕕᓂᖅ ᒥᐊᔨ ᑫᓐ)
ᒥᐊᔨ ᑫᓐ ᐊᒻᒪᓗ ᐋᓂ ᖃᐅᒃᑫ ᐱᖃᓗᔦᑦ ᐃᓗᕐᕈᓯᓕᕆᔩᑦ ᑲᑎᒪᔨᖏᓐᓂᑦ ᑕᓯᐅᔭᕐᒥ ᐱᓯᒪᔫᒃ, ᐃᓕᓐᓂᐊᑎᑦᓯᔪᕕᓃᒃ ᓂᕕᐊᕐᓯᐊᕈᕐᓂᒃ ᐊᕐᕌᒍᓕᓐᓂᒃ 11-ᒥᑦ 14-ᒧᑦ ᑲᒻᒥᐅᒋᐅᕐᓴᑎᑦᓱᒋᑦ, ᐅᐱᓐᓇᕋᓂ ᐃᓅᓱᑦᑐᐃᑦ ᓯᕗᓂᑦᓴᕆᒐᑦᑎᒋᑦ ᑲᒻᒥᐅᒍᓐᓇᕆᐊᖃᕐᒪᑕ. ᑕᒪᓐᓇ ᐊᑑᑎᒍᓐᓇᓯᔪᕕᓂᖅ ᑮᓇᐅᔭᖃᕐᑎᓯᑎᓪᓗᒋᒃ ᐊᕙᑕᖅ ᐱᐅᓯᑐᖃᓕᕆᕕᒃ ᐊᒻᒪᓗ Brighter Futures Program (ᖃᐅᒪᓂᕐᓴᖅ ᓯᕗᓂᑦᓴᖅ).
ᑲᒻᒥᐅᒋᐅᕐᓴᑎᑕᐅᓂᕐᒥᓂ ᑖᒃᑯᐊ ᓂᕕᐊᕐᓯᐊᕈᐃᑦ ᒥᕐᓱᒍᓗᑐᐃᓐᓇᓂᑦᔭᖏᑦᑐᑦ, ᐃᓕᓐᓂᐊᓂᕐᒥᔪᑦ ᕿᓯᓂᒃ ᓴᓗᒻᒪᓭᒍᓯᕐᒥᒃ ᕿᑦᓯᕆᒍᓯᕐᒥᓗ.
ᐊᑕᐅᓯᖅ ᓂᕕᐊᕐᓯᐊᖅ ᒥᕐᓱᓱᓂ ᓱᑲᑦᑐᒪᕆᐅᒐᒥ, ᒪᕐᕈᐊᓗᒻᒪᕇᓐᓂ ᑲᒻᒥᐅᑐᕕᓂᖅ.
ᓂᕕᐊᕐᓯᐊᕈᐃᑦ ᕿᓚᓈᕐᑐᕕᓃᑦ ᑲᒻᒥᐅᒋᐊᓪᓚᓛᕐᓂᒥᓂᒃ, ᑌᒣᒻᒪᑦ ᑕᕝᕙᓂ ᐅᑭᐊᑦᓴᒥ, ᑲᒻᒥᐅᒋᐅᕐᓴᑎᑕᐅᓛᖏᓐᓈᑐᑦ. ᑕᒪᑐᒪᓂ, ᑲᒻᒥᐅᑕᕕᓂᖏᑦ ᓇᒻᒥᓂᕐᑖᕆᓛᕐᑕᖏᑦ – ᑕᕝᕙᓂ ᐅᐱᕐᖓᓴᒥ ᑲᒻᒥᐅᓚᐅᔪᔭᖏᑦ ᓄᑳᐱᖏᓐᓅᑕᐅᓚᐅᔪᒻᒪᑕ ᐊᓂᐊᐱᖏᓐᓄᓘᓐᓃᑦ.
