ᐳᑭᒃᑯᑦ ᐅᒥᐊᓕᐅᕐᓂᕕᓂᖏᑦ
ᑭᓇᒨᒻᒪ¯ᑦ ᓈᓐᓯ ᐹᓕᓴ, ᓄᓇᓕᓐᓂ ᐱᐅᓯᑐᖃᓕᕆᔩᑦ ᑲᑎᒪᔨᖏᑦᑕ ᐊᑕᐅᑦᓯᑰᕐᑎᓯᔨᖓ
ᐱᖓᓲᔪᕐᑐᑦ ᐃᓄᐃᑦ ᐅᒥᐊᕐᒦᑐᑦ ᐆᑦᑐᕋᕐᓱᑎᒃ! ᑐᓄᐊᓂᑦ ᓯᕗᐊᓄᑦ: ᒫᑯᓯ ᐅᙯᑦᑐᖅ, ?, ᐅᔩᑕ ᓂᖏᐅᖅ, ᐋᓇ ᐅᐃᑖᓗᑦᑐᖅ, ᐅᔩᑕ-ᓘᓯ ᐅᙯᑦᑐᖅ ᐊᒻᒪᓗ ᒨᓱᓯ ᓇᐅᒃᑲᕈᐊᖅ (ᐊᑦᔨᓕᐅᕆᔪᕕᓂᖅ ᔫᐱ ᐅᐃᑖᓗᑦᑐᖅ)
ᑕᕝᕙᓂ ᐊᐅᔭᒥ, ᐳᑭᒃᑯᑦ ᐃᓗᕐᕈᓯᓕᕆᓂᕐᒧᑦ ᑲᑎᒪᔨᖏᑦ ᐃᓄᒃᔪᐊᒥᐅᑦ ᑌᑦᓱᒪᓂᑕᔭᕐᒥᒃ ᐅᒥᐊᓕᐅᕆᐊᓯᓚᐅᔪᕗᑦ (ᕿᓯᔦᓐᓇᒥᒃ). ᐊᖏᔪᒥᒃ ᐅᒥᐊᓕᐅᕈᒪᔪᕕᓂᐅᒐᓗᐊᕐᓱᑎᒃ, ᑮᓇᐅᔭᖃᑦᓯᐊᖏᓐᓂᑯᖓᓄᑦ ᐅᒥᐊᓕᐊᖓ ᒥᑭᓂᕐᓴᒪᕆᐅᒋᐊᖃᓚᐅᔪᔪᖅ.
ᐅᒥᐊᑉ ᑎᕐᐱᓴᖏᓐᓂᒃ ᐱᒋᐊᕐᑐᑦ (ᐊᑦᔨᓕᐅᕆᔪᕕᓂᖅ ᓈᓐᓯ ᐹᓕᓴ)
ᐅᒥᐊᑉ ᑐᓕᒫᖏᑦ ᕿᔪᐃᓐᓇᐅᓱᑎᒃ ᖃᕐᒪᐅᑉ ᓴᓂᐊᓃᑦᑐᑦ (ᐊᑦᔨᓕᐅᕆᔪᕕᓂᖅ Pierre M. Desrosiers (ᐱᔦ ᑎᕉᓯᔦ)
ᐅᒥᐊᓕᐊᕐᒥᓂᒃ ᐱᕕᓕᒫᖓᒍᑦ ᑌᑦᓱᒪᓂᑕᔭᒻᒪᕆᐅᖁᔨᓐᓂᕋᒥᒃ, ᓂᐅᕕᕐᕕᒥᓂᑕᕐᓂᒃ ᓂᐅᕕᖃᑦᑕᓕᕋᓗᐊᕋᒥᒃ, ᑭᑭᐊᓐᓂᒃ ᐊᑐᕐᓂᔭᖏᑦᑐᑦ ᑐᓕᒫᓕᐅᕆᓕᕋᒥᒃ, ᐊᑐ¯ᕐᑐᕕᓃᓪᓕ ᓇᑦᓯᔦᓐᓇᓂᒃ ᐊᑦᓱᓈᓂᒃ ᓇᒻᒥᓂᖅ ᐃᓂᕐᑕᕕᓂᕐᒥᓂᒃ.
ᓇᑦᓯᔦᑦ ᐊᑦᓱᓈᑦ ᐅᒥᐊᑉ ᑐᓕᒫᖓᓃᑦᑐᑦ (ᐊᑦᔨᓕᐅᕆᔪᕕᓂᖅ Pierre M. Desrosiers (ᐱᔦ ᑎᕉᓯᔦ)
ᓂᐊᓕ ᓈᔅᑕᐴᑲ ᑭᓪᓓᔦᓵᑲᓪᓛᐱᑦᑐᖅ. ᐅᖓᑖᓃᑦᑐᑦ ᔫᓯᐱ ᓈᓚᑦᑑᔭᖅ, ᑖᓂᐊᓪᓕ ᐃᓄᑉᐸᖅ, ᔮᓂ ᖃᓴᓪᓗᐊᖅ ᑖᓂᐊᓪᓕ ᐅᐃᑖᓗᑦᑐᖅ ᖃᓴᓪᓗᐊᓗ. (ᐊᑦᔨᓕᐅᕆᔪᕕᓂᖅ ᓈᓐᓯ ᐹᓕᓴ)
ᐅᒥᐊᑉ ᑐᓕᒫᑦᓴᖓ ᐱᔭᕇᕐᑕᐅᑐᐊᕐᒪᑦ, ᐊᕐᓀᑦ ᕿᓯᓐᓂᒃ ᐅᕐᓱᐃᔦᔦᕙᓪᓕᐊᓯᔪᕕᓃᑦ ᕿᑦᓯᕆᑦᓱᒋᑦ. ᐱᖓᓲᔪᕐᑐᑦ ᐅᑦᔪᐃᑦ ᐊᑕᐅᓯᕐᓗ ᙯᕈᓕᒃ ᐊᑐᕐᑕᐅᔪᕕᓃᑦ ᐊᒥᐊᑦᓴᓕᐊᕆᑦᓱᒋᑦ ᐅᒥᐊᕐᒧᑦ. ᓯᑕᒪᑦ ᐊᕐᓀᑦ ᕿᑦᓯᕆᔪᕕᓃᑦ ᕿᓯᓐᓂᓗ ᐅᐃᒍᑦᓱᑎᒃ ᐃᑲᔪᕐᑕᐅᓱᑎᒃ ᐱᖓᓱᓄᑦ ᐃᓄᑐᖃᐅᓂᕐᓴᓄᑦ ᐊᖑᑎᓄᑦ ᐊᑕᐅᓯᕐᒧᓗ ᐅᕕᒐᕐᓂᓴᒧᑦ ᐊᖑᑎᒧᑦ.
ᐊᕐᓀᑦ ᕿᓯᓐᓂᒃ ᐅᐃᒍᔪᕕᓃᑦ ᐅᓪᓗᓂ ᐱᖓᓱᓂ. ᐅᐃᒍᒌᑐᐊᕋᒥᐅᖅ ᐅᒥᐊᖅ ᐸᓂᕐᓯᒋᐊᖃᕐᑐᕕᓂᖅ ᐱᓇᓱᐊᕈᓯᐅᑉ ᓄᓐᖑᐊᓂᓕᒫᖓᓂ.
ᐋᕐᖀᒋᐊᕐᑐᑦ ᐅᒥᐊᑉ ᐊᒥᐊᖓᓂᒃ (ᐊᑦᔨᓕᐅᕆᔪᕕᓂᖅ ᓈᓐᓯ ᐹᓕᓴ)
ᓇᑦᓯᔦᓐᓇᖅ ᐅᒥᐊᖅ ᐸᓂᕐᓯᓕᕐᑐᖅ ᐅᐃᒍᕐᑕᐅᒌᕐᓯᒪᓕᕐᓱᓂ ᐃᒫᓅᕐᑕᐅᓚᐅᕋᓂᓗ (ᐊᑦᔨᓕᐅᕆᔪᕕᓂᖅ ᓈᓐᓯ ᐹᓕᓴ)
ᐊᓪᓕᕇᕐᑐᓂ, ᐊᒥᕃᔭᐅᑦ (ᓯᑎᒻᐱᕆ) 24-ᒥ, ᐅᒥᐊᖅ ᐃᒫᓅᕐᑕᐅᓕᕐᑐᕕᓂᖅ ᐆᑦᑐᕋᕐᑕᐅᓚᖓᑦᓱᓂ. ᖁᓕᐅᓐᖏᒐᕐᑐᕕᑦᓱᑎᒃ ᐅᒥᐊᕐᑐᑐᕕᓃᑦ ᑕᒫᑦ ᐅᒥᐊᖅ ᐅᓯᖃᑦᑕᑎᓪᓗᒍ ᐱᖓᓲᔪᕐᑐᓂᒃ ᓯᑕᒪᐅᔪᓐᖏᒐᕐᑐᓂᓘᓐᓃᑦ ᐃᓄᓐᓂᒃ ᐊᒻᒪᓗ ᐅᒥᐊᕐᑐᑐᕕᓃᑦ ᐅᖃᕐᑐᕕᓃᑦ ᐅᒥᐊᕐᑐᕆᐊᖅ ᐃᖏᐅᓪᓕᐅᓇᒐᓛᓐᖏᑐᖅ ᐅᕿᑦᑑᓱᓂᓗ!
ᐳᑭᒃᑯᑦ ᐃᓗᕐᕈᓯᓕᕆᓂᕐᒧᑦ ᑲᑎᒪᔨᖏᑦ ᓴᕐᕿᔮᕐᑎᓯᒍᒪᕗᑦ ᓇᑯᕐᒦᒪᕆᓐᓂᒥᓂᒃ ᐅᒥᐊᓕᐅᕐᓂᒃ ᐱᕕᖃᕐᑎᑕᐅᒍᓐᓇᓚᐅᔪᒻᒪᑦ ᐱᑐᕝᕕᒃ ᓄᓇᒥᒃ ᑎᒍᒥᐊᕐᑎᑯᓐᓄᑦ, ᒪᑭᕝᕕᒃ ᑯᐊᐳᕇᓴᒧᑦ, Brighter Futures Program-ᒥᒃ ᐱᓇᓱᐊᕐᑎᓄᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓐᓂᓗ.
