• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᑕᕙᓂ ᐊᐅᔭᐅᕋᑖᓚᐅᕐᑐᒥ ᐊᕙᑕᖅ ᐱᐅᓯᑐᖃᓕᕆᕕᒃᑯᑦ ᑲᔪᓯᒋᐊᓯᓚᐅᔪᕗᑦ ᑐᓂᕐᑕᓂᒃ ᖃᐅᔨᓴᕐᓂᕕᓂᕐᒥᓂᒃ ᕿᑭᕐᑖᓗᒻᒥ ᐃᓄᑦᔪᐊᑉ ᓄᓇᓕᖓᑕ ᓴᓂᐊᓂ. ᐱᓇᓱᐊᕐᑐᐃᑦ ᓯᕗᓕᕐᑕᐅᓚᐅᔪᑦ ᐱᔦ ᑎᕈᓯᔦᒧᑦ ᐃᑲᔪᕐᑎᖃᕐᓱᓂ ᐃᐊᓪᓴ ᓯᐊᓐᓯᒃᒥᒃ, ᓈᓕ ᐅᐃᑖᓗᑦᑐᒥᒃ ᐊᓐᑐᔫ ᐃᐳᒥᓪᓗ, ᑖᒃᑯᐊ ᐊᕙᑕᒃᑯᓂ ᐱᓇᓱᑦᑏᑦ. ᐃᓄᑦᔪᐊᒥᐅᑦ ᐃᓚᐅᓚᐅᔪᒻᒥᔪᑦ ᐅᑯᐊ: ᓰᒥᐅᓂ, ᐋᓚᓯ ᐊᒻᒪᓗ ᐋᓐᑎ ᓈᓚᑦᑑᔭᖅ, ᔪᐊᓂ ᐃᓓᔭᓯᐊᐱᒃ ᐊᒻᒪᓗ ᐋᓕ ᓈᓚᑦᑑᔭᖅ. 14 ᐃᓕᓴᕐᑐᐃᑦ ᐳᕐᑐᓂᕐᓴᒥ ᐃᓚᐅᓚᐅᔪᒻᒥᔪᑦ ᐅᑯᐊᒍᑦᓱᑎᒃ: ᐋᓕ ᐊᑯᓕᐊᖅ, ᐹᐱ ᐊᕐᓇᑐᖅ, ᒨᓱᓯ ᐃᓪᓚᐅᖅ, ᓈᑕᓕ ᐃᖃᓗᒃ, ᒫᓂᑲ ᐃᖃᓗᒃ, ᐹᐱ ᐃᓓᔭᓯᐊᐱᒃ, ᐋᓕᒃ ᐃᐳ, ᐹᒥᓚ ᐃᓄᑉᐸᖅ, ᓯᐊᔭ ᐃᖃᓪᓗᒃ, ᒫᑎᐅᓯ ᖃᓴᓪᓗᐊᖅ, ᒦᑲᓐ ᖃᓴᓪᓗᐊᖅ, ᑑᓐᔭ ᒧᐊᕉ, ᐄᕙ ᓇᐅᔭ ᐊᒻᒪᓗ ᐸᐅᓗ ᐹᓕᓴ. ᐋᓐ-ᒪᕇ ᓚᒥᐅ (ᓚᕚᓪ ᐃᓕᓐᓂᐊᕕᕐᔪᐊᖓᓐᓂ ᐃᓕᓴᕐᑐᖅ) ᐃᓚᐅᓚᐅᔪᒻᒥᔪᖅ, ᐆᑦᑑᑎᖃᑎᒌᑦᑎᓯᓕᕐᑐᖅ ᓄᓇᐅᑉ ᖄᖓᓃᑦᑐᕕᓂᕐᓂᒃ ᑐᓂᕐᑕᓂᓪᓗ ᖃᐅᔨᔭᐅᔪᕕᓂᕐᓂᒃ ᖃᐅᔨᓴᕐᓱᒋᑦ ᖃᓄᖅ ᐱᕙᓪᓕᐊᓯᓐᓂᒪᖔᑕ ᐊᓂᕐᕋᕆᔭᐅᕙᑦᑐᕕᓃᑦ ᑖᕙᑦᓱᒪ ᒥᑦᓵᓂ, ᐃᓚᐅᑎᑦᓯᓱᓂᓗ ᐱᐅᓯᑐᖃᕐᑎᒍᑦ ᖃᐅᔨᒪᐅᓯᒋᔭᐅᔪᓂᒃ ᐊᐱᕐᖁᖃᑦᑕᓱᓂ ᐊᒥᓱᕕᑦᓱᓂ ᐃᓄᑦᔪᐊᑉ ᐃᓄᒻᒪᕆᖁᑎᖏᓐᓂᒃ. ᓇᔮᑦ ᐲᕆ (ᓚᕚᓪ ᐃᓕᓐᓂᐊᕕᕐᔪᐊᖓᓐᓂᒥᐅᖅ ᓄᓇᐅᑉ ᖄᖓᓃᑦᑐᕕᓂᕐᓂᒃ ᖃᐅᔨᓴᕐᑎ) ᐊᒻᒪᓗ ᑕᒥᓃᒃ ᒫᑯᔩ (ᕆᐊᓐ ᐃᓕᓐᓂᐊᕕᕐᔪᐊᖓᓐᓂᒥᐅᖅ ᕿᔪᕕᓂᕐᓂᒃ ᓇᐹᕐᑐᓂᓪᓗ ᐅᓕᕐᓀᓯᒐᓱᐊᕐᑎᒪᕆᒃ) ᐃᓚᐅᓚᐅᔪᒻᒥᔫᒃ.

ᐱᓇᓱᐊᕐᓂᖃᕙᓪᓗᓚᐅᔪᖅ IbGk-3 ᓄᓇᖓᓐᓂ, ᑖᓐᓇ ᓄᓇᒃ ᐃᓄᐃᑦ ᐅᑭᐅᕐᓯᐅᕕᒋᓲᖓ ᐃᓄᑐᐃᓐᓇᖄᕕᓃᓪᓗ ᓄᓇᕕᓂᕆᑦᓱᒍ. ᓴᓇᒪᔪᖅ 1 (ᐅᑭᐅᒥ ᖃᒡᒪᕕᓂᖅ) ᓴᒡᒐᑕᐅᒍᒪᓗᐊᓐᖑᐊᖏᓐᓈᓚᐅᔪᖅ, ᓄᑖᑦ ᓯᒃᑭᑕᐅᓈᕐᑎᑐᑦ ᒦᑌᑦ ᓄᓇᐅᑉ ᖃᓚᔭᕕᓂᖏᑦ ᓄᐃᑕᐅᓚᕿᓚᐅᔪᒻᒪᑕ ᑕᑯᔭᐅᓚᕿᑎᓪᓗᒋᑦ ᐃᓓᓐᓇᒐᓗᐊᖏᑦ ᖃᒡᒪᕕᓂᐅᑉ ᕿᔪᑦᑕᕕᓂᖏᑦ ᑕᑯᔭᐅᒋᐊᓐᖓᑐᕕᓂᐅᑦᓱᑎᒃ 2007-ᒥ ᓴᒡᖓᓂᖃᕐᑎᓗᒍ. ᓄᓀᑦ ᓯᒃᑭᑕᐅᓕᓯᒪᔪᑦ ᐃᓚᖏᓐᓂ ᕿᔪᕕᓃᑦ ᐃᓗᐃᑦᑑᖏᓐᓈᑎᓪᓗᒋᑦ ᐊᒧᔭᐅᒍᓐᓇᖃᑦᑕᓚᐅᔪᑦ ᖃᒡᒪᕕᓂᕐᒥᑦ (ᓱᑯᑦᓯᐊᒦᓐᓂᖏᑦ ᖃᐅᔨᔭᐅᒌᑐᐊᕐᒪᑕ ᐆᑦᑐᕋᕐᑕᐅᒌᑐᐊᕐᒪᑕᓗ) ᑎᑭᐅᑎᒐᓱᐊᒧᑦ ᖃᒡᒪᕕᓂᐅᑉ ᐃᓗᐊᓂ ᐅᔭᕋᐅᓂᖏᓐᓂᒃ. ᑖᕙᓐᓇ ᓴᒡᒐᕕᒋᒋᐊᖓ ᐱᓀᓗᑦᓯᓯᒪᒐᓚᓚᐅᔪᒻᒪᑦ, ᖃᒡᒪᕕᓂᐅᑉ ᓵᓪᓗᐊᖓᓂ ᐱᓇᓱᐊᕙᓪᓗᓚᐅᔪᒍᑦ, ᑌᑰᓇᓗ ᓇᕚᓚᕿᑦᓱᑕ ᐃᓄᐃᑦ ᐊᓇᕐᕕᕕᓂᖏᑦᑕ ᐃᓚᖏᓐᓂᒃ, ᐆᒪᔪᕕᓃᑦ ᓴᐅᓂᕕᓂᕆᕙᓪᓗᓚᐅᔪᔭᖏᑦ ᑌᑲᓃᑦᑐᑦ. ᑖᕙᓃᓐᓂᑎᓂ ᐊᒥᓱᑲᓪᓚᓄᑦ ᐳᓛᕆᐊᕐᑕᐅᒍᓐᓇᓯᓚᐅᔪᒍᑦ, ᐃᓚᒋᔭᐅᑎᓪᓗᒋᒃ ᒪᕐᕉᒃ ᐃᓄᒻᒪᕇᒃ (ᓘᓯ ᐅᐃᑖᓗᑦᑐᖅ ᐊᒻᒪᓗ ᐋᑦᑕᒥ ᓂᕕᐊᕐᓯ) ᐅᓪᓗᓕᒫᖅ ᙯᓯᒪᓚᐅᔫᒃ ᐊᐱᕐᖁᑕᐅᑦᓱᑎᒃ. ᑐᑭᓯᑦᓯᐊᕋᓱᐊᒧᑦ ᕿᔪᕕᓃᑦ ᐱᑦᓯᐊᑕᐅᓗᑯᐊᐱᒋᐊᖃᕐᓂᖏᓐᓂᒃ ᓄᐊᑕᐅᒐᓱᐊᓕᕈᑎᒃ ᐊᒻᒪᓗ ᕿᔪᕕᓃᑦ ᓇᐹᕐᑐᐃᓗ ᐅᓕᕐᓀᑕᐅᒐᓱᐊᓕᕐᐸᑕ, ᑎᑦᔭᕕᓃᑦ ᕿᑭᕐᑕᓂᑦ ᐊᑦᔨᒌᓐᖏᑐᓂᑦ ᐱᓯᒪᔪᑦ ᐆᑦᑐᕋᐅᑕᐅᓚᐅᔪᑦ ᓱᕐᖁᐃᓯᒐᓱᐊᕐᓱᑕ ᓇᑭᓂᑕᓪᓚᕆᐅᒻᒪᖔᑕ ᖃᑦᓯᓂᓗ ᐊᕐᕌᒍᖃᕐᒪᖔᑕ. ᐊᑦᑐᐃᑐᐃᑦ ᐅᔭᕋᕐᑖᕕᐅᒍᓐᓇᑐᑦ/ᖁᓪᓕᓴᔭᕐᑖᕕᐅᒍᓐᓇᑐᑦ ᐆᑦᑐᕋᕐᑕᐅᓚᐅᔪᒻᒥᔪᑦ ᑭᓯᐊᓂ ᓄᑖᒥᒃ ᖁᓪᓕᓴᔭᕐᓂᐊᕕᒻᒥᒃ ᑕᑯᑦᔭᒐᑎᒃ.

ᐱᓇᓱᐊᕐᓂᐅᑉ ᑐᖓᓕᐊᓂ ᐊᓪᓚᖁᑎᓕᐅᕆᐊᖃᓕᓚᐅᔪᒍᑦ IcGn-8 ᓄᓇᖁᑎᖓᑕ ᖃᐅᔨᔭᐅᒍᑎᕕᓂᖏᓐᓂᒃ ᐱᓇᓱᐊᖃᑎᖃᕐᓱᑕ ᐁᑦᔨᐊᓐ ᐴᔾᒃᒥᒃ (ᒧᓐᑐᔨᐊᑉ ᐃᓕᓐᓂᐊᕕᕐᔪᐊᖓᓐᓂᒥᐅᖅ) ᐁᑦᔨᐊᓐ ᑕᒪᑦᓱᒧᖓ ᐃᓚᐅᓚᕿᓚᐅᔪᖅ ᖁᓕᓂ ᐅᓪᓗᓂ. ᐱᓇᓱᐊᕐᓂᕗᑦ ᐃᓚᖃᓚᐅᔪᖅ ᓄᓇᓐᖑᐊᓕᐅᕆᓂᕐᒥᒃ ᑖᑦᓱᒥᖓ ᐊᖏᔪᐊᓗᒻᒥᒃ ᓵᑦᑐᔮᕌᓘᑦᓱᓂ ᐅᔭᕌᓗᒻᒥᒃ 700 ᒦᑕᓄᑦ ᐅᖓᑖᓅᕐᓱᓂ ᑕᑭᓂᖓ. ᐃᓕᕐᓂᓗᑯᕕᓃᑦ ᑭᖏᑦᑐᑐᐃᓐᓇᐅᓕᕐᑐᑦ 1 ᒦᑕᒧᑦ ᑭᖏᓐᓂᖏᑦ ᑎᑭᐅᑎᒍᓇᐅᑦᓱᑎᒃ ᓄᓀᑦ ᐃᓚᖏᓐᓂ, ᓵᑦᑐᔮᕌᓘᑉ ᐅᔭᕌᓘᑉ ᓯᓈᓃᑦᑐᑦ. 200 ᐅᖓᑖᓅᕐᑐᑦ ᐅᔭᕃᓐᓇᐅᓱᑎᒃ ᑲᐅᑕᕆᔭᐅᕙᑦᑐᕕᓃᑦ ᑌᑲᓂ ᐊᓪᓚᖁᑎᓕᐅᕐᑕᐅᓚᐅᔪᑦ.

ᑭᖑᓪᓕᐹᒥ, ᑖᑦᓱᒪ ᐱᓇᓱᐊᕐᓂᐅᑉ ᓯᓚᑖᒍᑦ, ᐊᑦᔨᒌᓐᖏᑐᑦ ᕿᑭᕐᑌᑦ ᑕᑯᓂᐊᕐᑕᐅᓚᐅᔪᒻᒥᔪᑦ ᖃᐅᔨᓴᕐᕕᐅᒋᐊᕐᑐᓱᑎᒃ. ᑌᑰᓇ ᐊᓪᓚᖁᑎᓕᐅᒍᓐᓇᓯᓚᐅᔪᒍᑦ ᐊᒥᓱᓂᒃ ᑐᓂᕐᑕᓂᐊᕐᕕᐅᒍᓐᓇᕋᔭᕐᑐᓂᒃ ᐊᒻᒪᓗ 100-ᒍᓈᕐᑎᑐᓂᒃ ᑐᓂᕐᑕᐅᓱᑎᒃ ᓴᓇᒪᔪᓂᒃ. ᑕᕙᓂ ᓄᓇᑦᓯᐊᕌᓗᒻᒥ, ᕿᑭᕐᑌᑦ ᐃᓄᓕᐊᓘᕙᑦᑐᕕᓃᑦ ᐊᒻᒪᓗ ᐊᒥᓱᑲᓪᓚᓂ ᐊᕐᕌᒍᕐᓂ ᖃᐅᔨᓴᕐᓂᖃᓪᓗᑐᕆᐊᖃᕋᔭᕐᓱᓂ ᑖᕙᑦᓱᒪ ᓄᓇᖓᓂᒃ ᐊᓪᓚᖁᑎᓕᐅᒐᔭᑐᐊᕈᑦᑎᒋᑦ ᓈᒻᒪᓈᕐᓂᓴᕐᓂᒃ ᑌᑦᓱᒪᓂᐊᓗᒃ ᐃᓄᖃᕐᐸᓂᕐᒪᑦ 4000 ᐊᕐᕌᒍᐃᑦ ᓈᓕᕐᑐᑦ.

ᐱᓇᓱᐊᕐᑕᐅᔪᑦ