ᐃᓄᒻᒪᕇᑦ ᓄᓇᕕᒻᒥᐅᑦ ᐊᕙᑎᓗ ᒪᕐᕈᓘᖑᒍᑎᖓᓐᓂ ᑲᑎᒪᓂᒻᒪᕆᖓ
ᑭᓇᒨᒻᒪ¯ᑦ Michel Patry
ᑰᑦᔪᐊᕌᐱᒥ, ᐊᒥᕃᔭᐅᑦ 19-ᒥᑦ 21-ᒧᑦ 2017-ᒥ, ᐊᕙᑎᓗ ᒪᕐᕈᓘᖑᒍᑎᖓᓐᓂ ᐃᓄᒻᒪᕇᑦ ᓄᓇᕕᒻᒥᐅᑦ ᑲᑎᒪᓂᒻᒪᕆᖃᓚᐅᔪᕗᑦ. ᐃᓄᒻᒪᕇᑦ ᐊᕙᑎᓗ ᖁᓕᓪᓘᑦ ᑭᒡᒐᑐᕐᑐᑦ ᖁᓕᓪᓗ ᓯᑕᒪᓪᓘᓂᒃ ᓄᓇᕕᒻᒥ ᓄᓇᓕᓐᓂᒃ, ᐃᓚᒋᔭᐅᑎᓗᒋᑦ ᓯᓵᓯᐱᒥᐅᑦ, ᑲᑎᒪᓚᐅᔪᕗᑦ.
ᐃᓄᒻᒪᕇᑦ ᑲᑎᒪᓂᕆᓲᖓ ᐊᑑᑎᓕᒻᒪᕆᐊᓘᓲᖅ ᐃᓄᒻᒪᕆᓐᓄᑦ. ᒪᕐᕉᒃ ᐊᕐᕌᒍᑕᒫᑦ ᑲᑎᒪᓂᒻᒪᕆᐅᓲᖅ ᐊᕙᑕᐅᑉ ᑲᑎᒪᔨᖏᑦᑕ ᑲᑎᒪᓂᒻᒪᕆᒋᓲᕆᒻᒥᔭᖓ. ᑌᒣᒋᐊᖃᕐᐸᑲᒥᒃ. ᐊᕙᑕᕐᒥ ᐊᑐᓂᑦ ᐱᒍᑦᔨᕖᑦ ᑲᑎᒪᒋᐊᕐᓯᒪᔪᑦ ᑲᑎᒪᔪᓂᒃ ᑐᓴᕐᑎᓯᖃᑦᑕᓚᐅᔪᔪᑦ ᐱᓇᓱᐊᕐᓂᕕᓂᕐᒥᑕ ᒥᑦᓵᓄᑦ. ᑭᒡᒐᑐᕐᑐᑦ ᐅᕕᒐᕐᑐᐃᑦ ᓴᐳᒻᒥᔭᐅᓯᒪᒋᐊᖃᓲᒍᓂᖏᓐᓄᑦ, ᖃᕐᔪᐃᑦ ᐅᕕᒐᕐᑐᐃᑦ ᑲᑎᒪᔨᖏᓐᓂᒃ, ᐃᓄᐃᑦ ᑕᐱᕇᑦ ᑲᓇᑕᒥᒃ, ᓰᐲᓰᒃᑯᓂᒃ, ᓄᓇᕕᒻᒥ ᐃᓄᒻᒪᕇᑦ ᑲᑐᑦᔨᖃᑎᒌᖓᓂᒃ, ᓄᕝᕕᑎ ᑯᐊᐳᕇᓴᒥᒃ ᐊᒻᒪᓗ ᔫᐱ ᑕᕐᕿᐊᐱᒃ, ᒪᑭᕝᑯᑦ ᐊᖓᔪᕐᖄᖓ, ᐅᖄᒋᐊᕐᑐᓯᒪᓚᐅᔪᔪᑦ ᑲᑎᒪᓂᕐᒥ. ᑭᖑᓪᓕᐹᒥ, ᐊᕙᑕᐅᑉ ᑲᑎᒪᔨᒋᓂᐊᓕᕐᒥᔭᖏᓐᓂᒃ ᓂᕈᐊᕐᓂᖃᓚᐅᔪᔪᖅ.
ᑲᑎᒪᓂᕐᒥ ᐅᖄᔭᐅᔪᖅ ᐆᒪᐅᑉ ᑐᑭᐊᒎᓚᐅᔪᔪᖅ: “ᐃᓄᑐᐃᓐᓇᐅᓂᕘᑦ ᖃᓄᐃᑦᑐᒦᓕᕐᖃ?” ᑕᒪᓐᓇᓗ ᐅᖄᒐᓱᒋᐊᖅ ᐱᔭᕆᐊᑭᑦᑑᓚᐅᔪᒐᓂ ᐊᒥᓱᒻᒪᕇᑦ ᐅᖄᔭᐅᓚᐅᔪᒻᒪᑕ ᐅᑯᐊ: ᐃᓄᐃᑦ ᓄᓇᓕᓐᖑᑕᐅᒐᒥᒃ ᓱᕐᕋᑕᐅᓂᕕᓂᖏᑦ, ᐊᓯᐅᖏᓐᓇᑎᑕᐅᑦᑌᓕᓂᖏᒃ ᐃᓄᑦᑎᑑᕐᓂᐅᑉ ᐃᓅᒡᒍᓯᑐᖃᕕᓂᐅᓪᓗ, ᐱᐅᓯᑐᖃᑦᑎᓂᒃ ᑭᖑᕚᕐᑎᓅᕆᓂᖅ, ᐊᒻᒪᓗ ᐅᓪᓗᒥᐅᓕᕐᑎᓗᒍ ᐅᕕᒐᕐᑐᐃᑦ ᓯᕗᓂᑦᓴᖓ ᖃᓄᐃᑦᑑᕙ? ᑖᒃᑯᐊ ᐅᖄᔭᐅᔪᑦ ᓯᕗᓕᕐᑕᐅᓱᑎᒃ ᔦᐱᑎ ᓄᓐᖓᒧᑦ ᐹᐱ ᐊᐳᑎᐊᕐᔪᒧᓪᓗ, ᓲᖑᔪᒻᒪᕆᐊᓗᑎᒍᑦ ᑲᑎᒪᒋᐊᕐᓯᒪᔪᓂᒃ ᐊᐅᓚᑦᔮᖀᓚᐅᔪᔪᑦ. ᑕᒪᑦᓱᒨᓕᖓᔪᖅ ᑐᓴᕐᑎᓯᐅᑎᒃ ᐊᕙᑕᐅᑉ ᓴᕐᕿᑎᒋᐊᕕᑦᑕᖓ.
ᒍᐊᑉᒪᑳᔅᑐᐃ-ᒥᐅᑦ ᐊᓪᓚᖏᑦᑕ ᐱᐅᓯᑐᖃᓕᕆᕕᒋᑦᓱᒍ ᓄᓇᖓᓐᓃᑎᑕᐅᓚᐅᔪᒻᒥᔪᒍᑦ ᐅᓂᒃᑳᖃᑎᒌᒐᓛᐱᑦᓱᑕ, ᓂᕿᓕᐊᕆᓲᑦᓴᔭᖏᓐᓂᓗ ᓂᕆᒃᑲᑕᐅᑦᓱᑕ.
ᑲᑎᒪᓂᒻᒪᕆᐅᓛᓕᕐᒥᔪᖅ ᑲᖏᕐᓱᐊᓗᑦᔪᐊᒦᓛᕐᓂᐊᑐᖅ 2019 ᐅᑭᐊᑦᓴᖓᓂ.
ᓄᑖᑦ ᐊᕙᑕᐅᑉ ᑲᑎᒪᔨᒋᓕᕐᑕᖏᑦ:
ᔫᓯᐱ ᐹᓪᓚᔮᑦ - ᐊᖓᔪᕐᖄᖅ
ᑳᓓ ᐹᓕᓴ - ᑲᑎᒪᔨ
ᔨᓂ ᓄᓐᖓᖅ - ᑲᑎᒪᔨ
ᓵᔪᐃᓕ ᐅᐃᑖᓗᑦᑐᖅ - ᑲᑎᒪᔨ
ᓵᓚᒨᓂ ᐊᓓᑯ - ᑲᑎᒪᔨ
ᐊᕙᑕᖅ ᐱᐅᓯᑐᖃᓕᕆᕕᒃ ᓇᑯᕐᒦᒍᒪᕗᖅ ᑲᑎᒪᓂᒻᒪᕆᒻᒥᒃ ᑮᓇᐅᔭᖃᕐᑎᓯᓚᐅᔪᔪᓂᒃ ᐅᑯᓂᖓ:
ᑲᑎᕕᒃ ᓄᓇᓕᓕᒫᑦ ᑲᕙᒪᖓ
ᒪᑭᕝᕕᒃ ᑯᐊᐳᕇᓴᓐ
ᓄᓇᕕᒻᒥ ᐋᓐᓂᐊᓂᓕᕆᔩᑦ ᐃᓅᓯᓕᕆᔩᓪᓗ
ᐃᓚᒌᓴᖅ
Bombardier recreational products
ᓄᓇᒥᒃ ᑎᒍᒥᐊᕐᑎᑯᑦ ᐊᒻᒪᓗ ᓄᓇᓖᑦ ᑲᕙᒫᐱᖏᑦ
ᖃᐅᔨᒋᐊᕐᕕᐅᒍᓐᓇᑐᖅ:
ᕉᑕ ᑯᑭᐊᐱᒃ, ᑲᒪᔨᒻᒪᕆ
ᐊᓪᓚᕕᒋᓗᒍ ᖃᕆᑕᐅᔭᑎᒍᑦ: akuuku@avataq.qc.ca
Lizzie Niviaxie Allard lights the qulliq
Robert Fréchette
The participants of the 22nd Nunavik Inuit Elders Conference
Robert Fréchette
Delegates eating at the Cree cultural camp
Robert Fréchette
The Board Members Minnie Etidloie, Solomonie Alayco, Jeannie Nungak, Josepi Padlayat and Eva Quannanack
Robert Fréchette
The brand new Katittavik Centre, host of the conference
Robert Fréchette
