• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᐊᕙᑕᖅ ᒫᓐᓇᐅᔪᖅ ᕿᓂᕐᐳᖅ ᑲᑦᓱᙰᑦᑑᓗᓂ ᐱᓇᓱᐊᕈᒪᒐᔭᕐᑐᒥᒃ ᐃᒣᓘᕐᑎᐅᓗᓂ: ᑕᑯᔭᒐᖃᕐᕕᓕᕆᓂᕐᒥ ᐱᓪᓗᑯᒋᐊᓕᑎᒍᑦ ᐱᓇᓱᑦᑎᐅᓗᓂ (ᐱᓇᓱᒐᕐᑖᕋᓱᐊᕈᓐᓇᑐᑦ ᐊᖏᖃᑎᒌᓐᓂᒧᑦ ᐃᓚᐅᔪᑦ ᑭᓯᐊᓂ) ᐃᓄᓕᕐᑕᓂᒃ ᑐᓐᖓᕕᓕᐅᕆᕙᓪᓗᓂ ᐃᓂᓕᐅᕐᓗᒋᓪᓗ, ᓱᔪᒍᓇᐅᑎᑦᑌᓕᓗᒋᑦ ᓄᐊᑕᐅᒪᔪᓕᒫᓂᓗ ᐊᓪᓚᖁᑎᓕᐅᕐᐸᓗᓂ, ᐊᒻᒪᓗ ᐃᓄᓐᓂᒃ ᐳᓛᕆᐊᕐᑐᓂᒃ ᐃᓕᓐᓂᐊᕆᐊᕐᑐᓂᓪᓘᓃᑦ ᕿᒥᕐᕈᑎᑦᓯᕙᓪᓗᓂ ᐃᓕᓐᓂᐊᑎᑦᓯᕙᓪᓗᓂᓗ ᐃᓄᓕᕐᑕᓕᕆᒍᓯᐅᒋᐊᓕᓂᒃ.

ᐊᖓᔪᕐᖄᖃᕐᓗᓂ ᑕᑯᔭᒐᖃᕐᕕᓕᕆᓂᐅᑉ ᑐᑭᒧᐊᕐᑎᓯᔨᖓᓂᒃ, ᑕᑯᔭᒐᖃᕐᕕᓕᕆᓂᕐᒥ ᐱᓪᓗᑯᒋᐊᓕᑎᒍᑦ ᐱᓇᓱᑦᑎ ᐃᓪᓗᕈᐊᕐᒥᒃ ᐃᓄᓕᕐᑕᓂᒃ ᓴᓂᕐᕓᓯᒪᕕᒻᒥᒃ (ᖃᕐᒪ-ᒥ) ᐯᕆᑦᓯᔨᐅᓗᓂ ᐱᓇᓱᕝᕕᒋᓗᒍ:

ᐃᓄᓕᕐᑕᓂᒃ ᓄᐊᑕᐅᒪᔪᓂᒃ ᐊᐅᓚᑦᓯᓂᖅ

- ᐃᑲᔪᕐᐸᓗᓂ ᐃᓄᓕᕐᑌᑦ ᓄᐅᑕᐅᒪᔪᑦ ᐊᐅᓚᑕᐅᓕᕐᐸᑕ ᓱᔭᐅᓕᕐᐸᑕᓘᓐᓃᑦ - ᐃᓄᓕᕐᑕᓂᒃ ᑎᑭᓭᕙᓪᓗᓂ, ᐊᑦᑕᑐᐊᕐᑖᕋᓱᐊᕐᓂᓂᒃ ᑲᒪᖃᑕᐅᕙᓪᓗᓂ, ᐃᓄᓕᕐᑕᓄᑦ ᑎᑭᑕᐅᕙᓪᓗᓂ ᓅᑉᐸᓗᒋᓪᓗ, ᐃᓄᓕᕐᑕᓂᒃ ᓄᐊᑕᒪᔪᓂᒃ ᑭᓇᓕᒫᓄᑦ ᑕᑯᓂᐊᕐᑕᐅᑎᑦᓯᕙᓪᓗᓂ - ᐊᐅᓚᑦᓯᕙᓪᓗᓂᓗ ᐱᓇᓲᑕᐅᒋᐊᖃᓲᓂᒃ;

- ᓄᑕᐅᓯᓕᕐᑐᐃᕙᓪᓗᓂ ᓄᐃᑕᐅᒪᔪᑦ ᐊᐅᓚᑕᐅᒍᓯᖏᓐᓂᒃ (ᐃᓄᓕᕐᑕᓂᒃ ᑎᑭᓭᒍᓯᕐᓂᒃ ᖃᕐᒪᒦᖁᔭᐅᒍᓐᓀᑐᓂᒃ, ᓄᐊᑕᒪᔪᓂᓗ ᑭᑎᑦᓯᕙᓪᓗᓂ;

- ᒪᓕᑦᑕᐅᒋᐊᓕᓂᒃ ᒪᓕᑦᑕᐅᑎᑦᓯᓯᐊᕐᐸᓗᓂ, ᐊᓪᓚᖁᑎᓕᐅᕈᓯᕐᓂᒃ ᐃᓄᓕᕐᑕᓂᓗ ᓱᓇᐅᓂᖏᑎᒍᑦ ᐃᓂᓕᐅᕆᕙᓪᓗᓂ;

- ᐱᓇᓲᑎᓂᒃ ᐊᑐᕐᐸᓗᓂ (ᓯᑯᑦᓴᔭᕐᓂᒃ ᐃᑯᒪᐅᑎᒨᕐᑐᓂᓗ) ᒪᓕᑦᑎᓗᒋᑦ ᐱᒍᑦᔨᓂᐅᓕᕐᑐᓂᒃ (ᐃᓄᓕᕐᑌᑦ ᐃᑎᕐᑐᑦ ᐊᓂᔪᐃᓪᓘᓃᑦ ᖃᓄᐃᓕᖓᓕᕐᒪᖔᑕ ᓇᐅᑦᓯᑐᕐᐸᓗᓂ);

- ᓴᐳᒻᒥᔭᐅᑎᑦᓯᓯᐊᕋᓱᐊᕐᐸᓗᓂ ᐊᕙᑕᐅᑉ ᓄᐊᓯᒪᓕᕐᑕᖏᓐᓂᒃ ᓱᔪᑎᑕᐅᑦᑌᓕᒌᕐᓯᒪᓕᕐᐸᑕ, ᖃᐅᔨᔭᐅᑎᕙᓪᓗᒋᓪᓗ ᐳᓛᕆᐊᕐᑐᓄᑦ ᖃᕐᒪᒧᑦ;

- ᖃᕐᒪᒧᑦ ᐳᓛᕆᐊᕐᑐᑦ ᐃᑉᐱᒋᔨᖏᓪᓗ ᐊᑦᑕᓇᕐᑐᒨᕐᑎᑌᓕᕙᓪᓗᒋᑦ, ᐊᕙᑕᐅᑉ ᒪᓕᒐᓕᐊᕕᓂᖏᑦ ᐅᐸᑦᑕᐅᒍᓐᓇᓂᖓᓄᑦ ᒪᓕᓪᓗᒋᑦ.

ᓱᔪᑎᑦᓯᑌᓕᓂᖅ:

- ᓲᓱᑦᓴᓗᓂ ᓱᔪᑎᑦᓯᑌᓕᓂᐅᒋᐊᓖᑦ ᐅᓪᓗᖁᑎᖏᓐᓂᒃ ᐊᒻᒪᓗ ᐃᓄᓕᕐᑌᑦ ᖃᓄᐃᓕᖓᓕᕐᒪᖔᑕ ᓇᐅᑦᓯᑐᕐᐸᓗᓂ;

- ᐃᓪᓗᕈᐊᑉ ᖃᕐᒪᐅᑉ ᖃᓄᐃᓕᖓᓕᕐᓂᖓᓂᒃ ᐅᕐᖂᓂᖓᓂᒃ ᓂᓪᓕᓇᕐᓂᖓᓂᒃ ᓇᐅᑦᓯᑐᕐᐸᓗᓂ;

- ᐊᓪᓚᐸᓪᓗᓂ ᐃᓄᓕᕐᑌᑦ ᖃᓄᐃᓕᖓᓕᕐᓂᖏᓐᓂᒃ, ᑐᓴᕐᑎᓯᐅᑎᓕᐅᕈᑎᒋᕙᓪᓗᒋᑦ, ᒋᐊᖃᑐᐊᕈᓂᓗ ᐃᓄᓕᕐᑕᓂᒃ ᐊᑦᔨᓕᐅᕆᕙᓪᓗᓂ;

- ᓈᒻᒪᓈᑦᓯᐊᑐᓂᒃ ᓱᔪᑎᑦᓯᑌᓕᐅᑎᓂᒃ ᐊᑐᕐᐸᓗᓂ ᓱᔪᑎᑦᑌᓕᔭᖏᑦᑕᓗ ᖃᓄᐃᓕᖓᓕᕐᓂᖏᓐᓂᒃ ᐊᖑᒪᑦᓰᓇᕐᓗᓂ;

- ᐃᓄᓕᕐᑕᓂᒃ ᓱᔪᑎᑦᓯᑌᓕᒍᓯᕐᓂᒃ ᓱᔪᑎᑦᓯᑌᓕᕕᓐᓂᓗ ᕿᒥᕐᕈᓯᐊᕐᐸᓗᓂ;

- ᒋᐊᖃᑐᐊᕈᓂ ᐅᓐᓂᑑᑎᓕᐅᕐᐸᓗᓂ ᐃᓄᓕᕐᑌᑦ ᓯᖁᒥᓯᒪᔪᑦ ᐋᕐᕿᒋᐊᑦᓯᐊᑕᐅᒋᐊᖃᕐᓂᖏᓐᓂᒃ;

- ᐃᕐᓯᕕᐊᐱᓕᐅᕐᐸᓗᓂ, ᐴᕐᑐᐃᕙᓪᓗᓂ, ᓈᒻᒪᑐᓂᒃ ᑐᓐᖓᕕᓕᐅᕐᐸᓗᓂ ᐅᕝᕙᓘᓐᓃᑦ ᐃᓄᓕᕐᑌᑦ ᐊᐅᓚᑕᐅᒋᐊᖃᓕᕐᐸᑕ ᓴᓂᕐᕙᑕᐅᓗᑎᓗ ᐋᓐᓂᕇᒃᑯᑎᓕᐅᕐᐸᓗᓂ.

ᖃᕐᒪᒧᑦ ᐳᓛᕆᐊᕐᑐᓕᕆᓂᖅ ᐃᓕᓐᓂᐊᑎᑦᓯᓂᕐᓗ

- ᐊᑐᐃᓐᓇᕈᕐᑎᕆᕙᓪᓗᓂ ᐳᓛᕆᐊᕐᓂᓴᓂᒃ ᑐᕌᖓᑦᓱᑎᒃ ᐊᑦᔨᒌᓐᖏᑐᓄᑦ ᐳᓛᕆᐊᒍᒪᔪᓄᑦ (ᓄᓇᕕᒻᒥᐅᑦ, ᐃᓄᐃᑦ ᐱᓇᓱᕝᕕᖁᑎᖏᑦ, ᖃᐅᔨᓴᕐᑏᑦ ᑭᓇᓕᒫᓪᓗ);

- ᐊᑐᐃᓐᓇᕈᕐᑎᕆᕙᓪᓗᓂ ᐃᓕᓐᓂᐊᑎᑦᓯᒍᑎᓂᒃ ᐃᓕᓐᓂᐊᑕᐅᒍᓐᓇᕋᔭᓐᖑᐊᑐᓂᓗ ᓄᓇᕕᒻᒥᐅᓄᑦ ᑲᖐᒋᔭᖃᕐᓱᑎᒃ ᓄᓇᕕᒻᒥᐅᒃ ᐱᐅᓯᕐᓱᕈᑎᖓᓂᒃ ᑲᔪᓯᔪᒥᒃ ᐊᒻᒪᓗ ᑕᕐᕋᒥ ᑕᑯᔭᒐᖃᕐᕕᓕᕆᓂᕐᒥᒃ;

- ᐊᑐᐃᓐᓇᕈᕐᑎᕆᕙᓪᓗᓂ ᑲᔪᓯᑎᑦᓯᕙᓪᓗᓂᓗ ᖃᐅᔨᒪᔭᐅᒋᐊᖃᓕᕐᑐᓂᒃ ᐅᕝᕙᓘᓐᓃᑦ ᑲᑎᒪᓂᐊᕈᓯᖃᕐᑎᓯᕙᓪᓗᓂ ᓱᔪᑎᑦᓯᑌᓕᓂᕐᒧᑦ ᐱᐅᓯᐅᒦᒋᐊᕐᓂᒥᓪᓗ ᓄᓇᕕᒻᒥᐅᑦ ᐱᐅᓯᕐᓱᕈᑎᖏᑦᑕ ᐊᑐᕐᑐᓚᕆᐅᓂᖏᓐᓂᒃ ᑲᔪᓯᑦᓱᑎᒃ;

ᐱᔪᓐᓇᕆᐊᓕᖏᑦ:

- ᐃᑭᓐᓂᐸᐅᑎᓪᓗᒋᑦ ᐱᖓᓱᓂ ᐊᕐᕌᒍᕐᓂ ᐱᓇᓱᐊᓕᓂᐅᒋᐊᓕᒃ ᑕᑯᔭᒐᖃᕐᕕᓕᕆᓂᕐᒥ ᐊᒻᒪᓘᓐᓃᑦ ᐃᓕᓐᓂᐊᑎᑦᓯᔨᐅᓯᒪᓗᓂ ᑕᑯᒥᓇᕐᑐᓕᐅᕐᓂᒥᒃ/ᑐᓴᕐᓂᑐᓕᐅᕐᓂᒥᒃ, ᐊᒻᒪᓘᓐᓃᑦ ᐃᓗᕐᕈᓯᓕᕆᑎᑦᓯᓕᓂᐅᓗᓂ ᐃᓄᓐᓂᒃ;

- ᖃᐅᔨᒪᔪᒻᒪᕆᐅᓗᓂ ᑕᕐᕋᐅᑉ ᐱᐅᓯᖓᓂᒃ ᑲᖐᒋᔭᖃᒻᒪᕆᓪᓗᓂᓗ ᐃᓄᐃᑦ ᐃᓗᕐᕈᓯᖓᓂᒃ;

- ᖃᕆᑕᐅᔭᓕᕆᒍᓐᓇᓗᓂ FileMaker Pro-ᒥᒃ ᐊᒻᒪᓗ Microsoft Office-ᒥᒃ Mac-ᒦᑦᑎᓗᒍ;

- ᓇᓗᕐᖁᑎᒐᓛᒍᓐᓀᓗᓂ ᐃᓄᓕᒫᓄᒃ ᐅᖄᒋᐊᒥᒃ;

- ᐃᓄᒃᑎᑑᕈᓐᓇᓯᐊᕐᓗᓂ ᖃᓪᓗᓈᑎᑐᓪᓗ, ᐅᖄᓂᒃᑯᑦ ᐊᓪᓚᓂᒃᑯᓗ. ᐅᐃᒍᐃᑎᑑᕈᓐᓇᕈᓂ ᐱᐅᓗᐊᓐᖑᐊᒥᔪᖅ;

- ᓱᓇᓕᒫᓂᒃ ᑐᑭᓯᒪᒐᓱᐊᕐᐸᓗᓂ, ᐃᓂᓪᓚᖓᑦᓯᐊᓗᓂ ᐅᐸᓗᓲᖑᒍᓐᓀᓗᓂᓗ;

- ᓄᓇᕕᒻᒥ ᐊᓯᖏᓐᓂᓗ ᓄᓇᓂ ᐊᕐᕕᑕᕐᑐᓴᐅᔮᕐᓗᓂ ᖃᓄᐃᑦᓴᕈᓐᓀᓗᓂᓗ ᐱᓇᓱᐊᕈᓰᓐᓂ ᒪᕐᕈᑐᓚᖓᒐᓗᐊᕈᓂ;

- ᑭᓇᓕᒫᑦᓯᐊᓂᒃ ᑐᓴᐅᒪᖃᑎᒌᖃᑎᖃᕈᓐᓇᓗᓂ ᓇᓗᕐᖁᑎᒐᓛᒍᓐᓀᓗᓂ ᐊᒻᒪᓗ ᐊᓯᒥᓂᒃ ᐱᓇᓱᖃᑎᖃᕈᓐᓇᓯᐊᕐᓗᓂ.

ᖃᐅᔨᒪᔭᐅᒃᑲᓂᕆᐊᓖᑦ:

- ᐱᓇᓱᐊᖃᑦᑕᕋᔭᕐᑐᖅ 9-ᒥᑦ ᐅᓪᓛᑯᑦ 5-ᒧᑦ ᐅᓐᓄᓴᒧᑦ, ᐁᑉᐱᑐᓂᑦ ᓂᕿᑦᓯᑐᓄᑦ (ᐱᓇᓱᐊᕈᓯᓕᒫᒥ 28-ᓂᒃ ᐃᑲᐅᕐᓂᖃᓗᓂ);

- ᑮᓇᐅᑦᔭᓵᖏᑦ: $18.00 ᐃᑲᐅᕐᓂᑕᒫᑦ (ᑮᓇᐅᑦᔭᓵᑦ ᐊᓯᑦᔨᑕᐅᑐᐃᓐᓇᕆᐊᓖᑦ ᐃᑉᐱᒋᔭᐅᒌᕐᓯᒪᓕᕐᐸᑦ);

- ᓇᓃᓐᓂᕆᒐᔭᕐᑕᖓ: ᖃᕐᒪ-ᒥ - ᐊᕙᑕᐅᑉ ᐃᓄᓕᕐᑕᓂᒃ ᓴᓂᕐᕓᓯᒪᕕᖓᓐᓂ ᒧᓐᑐᔨᐊᒥ.

- ᐱᓇᓱᒐᕐᑖᕋᓱᐊᕈᑏᑦ ᐊᕙᑕᕐᒨᑕᐅᒍᓐᓇᑐᑦ ᓂᕿᑦᓯᑐᓂ, ᔭᓄᐊᕆ 16, 2015.

ᐱᓇᓱᒐᕐᑖᕋᓱᐊᕐᑐᕕᓃᑦ ᓇᓪᓕᑳᕐᑕᕕᓂᐅᒍᑎᒃ ᑭᓯᐊᓂ ᖃᐅᔨᑎᑕᐅᓛᕐᓂᐊᑐᑦ ᐊᐱᕐᓱᑕᐅᒍᒪᓕᕈᑎᒃ. ᐊᕙᑕᖅ ᐱᓇᓱᒐᕐᑖᕋᓱᐊᕐᑐᓂᒃ ᑭᓇᒃᑯᑐᐃᓐᓇᐅᒐᓗᐊᕐᐸᑕ ᐱᓇᓱᑦᑎᑖᓲᖑᕗᖅ.

ᐱᓇᓱᒐᕐᑖᕈᒪᐅᑎᑎᑦ ᐅᕗᖓ ᐊᐅᓪᓚᑎᓪᓗᒋᑦ:

Michel, Patry (ᒥᓯᐊᓪ ᐹᑦᕇ), ᐊᓪᓚᕕᒻᒥᒃ ᐊᐅᓚᑦᓯᔨ

4150, Ste-Catherine St. W. suite 360

Westmount, Québec, H3Z 2Y5

ᓱᑲᑦᑐᑰᕈᑎᖓ: 514 989-8789

ᖃᕆᑕᐅᔭᑎᒍᑦ ᐊᓪᓚᕕᒋᒍᒪᒍᕕᐅᒃ: michel.patry@avataq.qc.ca