• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

Mr. Maka Kotto, ᐃᓗᕐᕈᓯᓕᕆᓂᐅᑉ ᑐᓴᕈᑎᓕᕆᓂᐅᓪᓗ ᑐᕐᖃᑕᕐᕕᖓᓐᓂᒥᐅᖅ, ᐊᒻᒪᓗ Ms. Élizabeth Larouche, ᓄᓇᖃᕐᖄᓯᒪᔪᓕᕆᓂᐅᑉ ᑐᕐᖃᑕᕐᕕᖓᓐᓂᒥᐅᖅ, ᐃᑉᐸᓴᖅ ᑐᓴᕐᑎᓯᓚᐅᕐᖂᒃ ᑐᓴᕋᑦᓴᓂᐊᕐᑐᖃᕐᑎᓗᒍ ᐊᕙᑕᖅ ᐱᐅᓯᑐᖃᓕᕆᕕᐅᑉ ᐊᑐᐃᓐᓇᕈᕐᑎᑕᕕᓂᖓᓂᒃ, ᑲᑕᑦᔭᓂᖅ, ᐃᓄᐃᑦ ᐱᓐᖑᐊᕈᓯᑐᖃᖓ, ᑯᐯᑉ ᑲᕙᒪᖓᓄᑦ ᐱᖁᔭᒻᒪᕆᑎᒍᑦ ᐃᓕᑕᕆᔭᐅᓂᕐᑖᓯᒻᒪᑦ ᓯᕗᓪᓕᐹᑦᓯᐊᒍᑎᓗᒍ ᐊᑦᑐᑕᐅᕐᖃᔭᓐᖏᑑᑦᓱᓂ ᐃᓄᐃᑦ ᐱᐅᓯᕐᓱᕈᑎᒋᑕᖓᓂᐅᒃ ᑲᔪᓯᔫᑦᓱᓂ.

ᓵᓕ ᐋᕐᖓᖅ, ᐊᕙᑕᖅ ᐱᐅᓯᑐᖃᓕᕆᕕᐅᑉ ᐊᖓᔪᕐᖄᖓ, ᑐᕐᖃᑕᕐᕕᒥᐅᒧᓪᓗ ᐊᓪᓚᑐᕕᓂᐅᑦᓱᓂ ᑲᑕᑦᔭᓂᕐᒥᒃ ᐱᖁᔭᑎᒍᑦ ᐃᓕᑕᕆᔭᐅᓂᕐᑖᖁᔨᑦᓱᓂ, ᐅᐱᒪᔪᒻᒪᕆᐅᓂᕋᓚᐅᕐᑐᖅ ᑲᑕᑦᔭᓂᖅ ᐃᓄᐃᑦ ᐃᓗᕐᕈᓯᑐᖃᒋᑦᓱᒍ ᓯᕗᓪᓕᐹᑦᓯᐊᖑᓗᓂ ᑯᐯᑉ ᑲᕙᒪᖓᓄᑦ ᐃᓕᑕᕆᔭᐅᓂᕐᑖᒪᑦ ᐃᓄᐃᑦ ᐱᐅᓯᕐᓱᕈᑎᒋᑕᖓᓂᐅᒃ ᑲᔪᓯᔫᑦᓱᓂ. ᓵᓕ ᐃᓱᒪᒻᒥᔪᖅ ᑕᒪᓐᓇ ᓄᑖᒍᑦᓱᓂ ᐊᓪᓗᕆᐊᕐᓂᐅᒪᑦ ᐃᓚᐅᑎᑦᓯᓯᑦᓱᓂ ᓄᓇᖃᕐᖄᓯᒪᔪᑦ ᑭᓇᓪᓗᑑᓂᖏᓐᓂᒃ ᑯᐯᒻᒥᐅᖑᖃᑕᐅᓗᑎᒃ.

ᑲᑕᑦᔭᓂᖅ ᐃᓄᐃᑦ ᐱᓐᖑᐊᕈᓯᑐᖃᒋᕙᐅᒃ ᑯᐯᒻᒥ ᐃᓄᐃᑦ ᓄᓇᓕᖏᓐᓂ ᖁᓕᓗ ᓯᑕᒪᓪᓘᓂ ᐃᓄᐃᑦ ᑲᑕᑦᔭᓲᒍᒻᒪᑕ. ᑖᓐᓇ ᐱᓐᖑᐊᕈᓯᒃ ᑕᑯᑎᑦᓯᔪᖅ ᐊᕐᓀᑦ ᓄᓇᕕᒻᒥᐅᑦ ᑌᑦᓱᒪᓐᖓᓂᐊᓗᒃ ᑲᑕᑦᔭᓲᒍᒻᒪᑕ. ᓯᕗᓪᓕᕕᓂᕐᓂᑦ ᑭᖑᕚᖏᓐᓄᑦ, ᐊᕐᓀᑦ ᑲᑕᑦᔭᑏᑦ ᖃᐅᔨᒪᐅᓯᕐᒥᓂᒃ ᑲᑕᑦᔭᕈᓯᕐᒥᓂᓗ ᕿᑐᕐᖓᒥᓅᕆᓲᒍᕗᑦ ᐃᕐᖑᑕᒥᓄᓗ ᐃᓕᓐᓂᐊᑎᕙᑦᓱᒋᑦ. ᑌᑦᓱᒪᓐᖓᓂᐊᐱᒃ ᑲᑕᑦᔭᓂᖅ, ᐃᑦᔪᐊᓯᒍᑕᐅᓲᒍᑦᓱᓂ ᓯᓚᒥᒃ ᐱᐅᓯᕐᓱᑐᒥᒃ ᐆᒪᔪᕐᓂᓗ, ᐃᓚᒋᔭᐅᓪᓚᕆᑉᐳᖅ ᓄᓇᕕᒻᒥᐅᑦ ᐃᓗᕐᕈᓯᖓᓄᑦ ᐱᐅᓯᕐᓱᕈᑕᐅᑦᓱᓂ ᑲᔪᓯᔫᑎᓪᓗᒍ, ᐃᓄᐃᓪᓗ ᑭᓇᓪᓗᑑᒻᒪᖔᑕ ᖃᐅᔨᒪᐅᑕᐅᓪᓚᕆᑦᓱᓂ.

ᑐᓴᕋᑦᓴᓂᐊᕐᑐᖃᕐᑎᓗᒍ ᑐᓴᕐᑎᓯᓂᐅᓚᐅᕐᑐᖅ, ᐅᖄᔨᐅᑎᓪᓗᒍ ᑕᕐᕋᓕᒃ ᐹᑦᑐᔨᑦᔅ, ᐱᓐᖑᐊᓂᕐᑕᖃᓚᐅᕐᖁᖅ ᑲᑕᑦᔭᖃᑦᑕᑎᓪᓗᒋᑦ ᐄᕕ ᒫᒃ, ᑳᓯ ᑕᕐᕿᐊᐱᒃ, ᓈᓐᓯ ᓵᓐᑕ, ᐸᐅᔪᖏ ᓄᑕᕌᓗᒃ ᐊᒻᒪᓗ ᐊᐅᓪᓚᖅ ᑐᓪᓚᐅᒐᖅ. ᐊᐅᓪᓚᖅ ᑐᓪᓚᐅᒐᖅ, ᐃᓅᑦᓱᓂ ᐃᓄᒻᒪᕆᒃ, ᕿᑦᑌᖓᔪᒻᒪᕆᐅᑦᓱᓂ ᐅᓂᒃᑳᓚᐅᕐᖁᖅ ᐱᐊᕋᐅᑦᓱᓂ ᑲᑕᑦᔭᒋᐅᕐᓴᐸᓐᓂᕕᓂᕐᒥᓂᒃ ᑌᑦᓱᒪᓂ ᓱᓇᓱᐊᕋᑦᓴᖃᑦᓯᐊᐸᓐᓂᖏᒻᒪᑦ ᓂᕆᔭᑦᓴᖃᑦᓯᐊᕋᓂᓗ, ᑲᑕᑦᔭᓂᕐᓗ ᓱᖃᑦᓯᐅᑎᐅᓲᕕᓂᐅᑦᓱᓂ ᐆᒪᔪᕐᓯᐅᕆᐊᕕᓂᕐᓂᒃ ᐅᑕᕐᕿᐅᑕᐅᑦᓱᓂ. ᐊᒥᓱᑲᓪᓓᑦ ᓯᕗᓕᕐᑏᑦ ᐃᓄᐃᓪᓗ ᐱᓇᓱᕝᕕᖏᓐᓂᒃ ᑭᒡᒐᑐᕐᑏᑦ ᐊᒻᒪᓗ ᐃᓄᑐᐃᓐᓀᑦ ᒧᓐᑐᔨᐊᒥᐅᑦ ᑌᑲᓃᖃᑕᐅᓚᐅᕐᒥᔪᑦ.

ᓯᕗᓪᓕᐹᑦᓯᐊᒍᑎᓗᒍ ᐃᓄᐃᑦ ᐃᓗᕐᕈᓯᒋᑕᖓᓂᐅᒃ ᐱᐅᓯᕐᓱᕈᑎᒋᑦᓱᒍ ᑲᔪᓯᔫᑎᓪᓗᒍ, ᑐᕐᖃᑕᕐᕕᒃ Kotto ᑕᑯᑎᑦᓯᒍᒪᓚᐅᕐᑐᖅ ᐅᐱᒍᓲᑦᔨᓂᕐᒥᓂᒃ ᓯᓚᕐᔪᐊᓕᒫᒥ ᐃᓄᑐᐃᓐᓇᓂᒃ ᐊᑦᔨᐅᖏᑦᑑᓱᓂᓗ ᐃᓗᕐᕈᓯᑐᖃᖓᓂᒃ. Élizabeth Larouche, ᓄᓇᖃᕐᖄᓯᒪᔪᑦ ᑐᕐᖃᑕᕐᕕᖓᓐᓂᒥᐅᖅ, ᐅᖃᓪᓗᑐᓚᐅᕐᒥᔪᖅ ᑲᑕᑦᔭᓂᖅ ᐆᑦᑑᑎᓪᓚᕆᐅᒻᒪᑦ ᐃᓪᓕᓇᕐᑐᒪᕆᐅᑦᓱᓂ ᑭᖑᕚᓄᑦ ᕿᒻᒪᖁᑎᓕᐊᖑᒍᓐᓇᒪᑦ ᓄᓇᕕᒻᒥᐅᑦ ᓇᓗᓀᒃᑯᑕᓪᓚᕆᓕᕐᑕᖓᓂᐅᒃ.

ᑲᑕᑦᔭᓂᐅᑉ ᒥᑦᓵᓅᓕᖓᔪᑦ ᖃᐅᔨᒪᔭᐅᒃᑲᓂᒋᐊᓖᑦ ᐊᓯᖏᓪᓗ ᐱᐅᓯᕐᓱᕈᑎᓅᓕᖓᔪᑦ ᑲᔪᓯᔪᓄᑦ ᑯᐯᑉ ᐃᓗᕐᕈᓯᓕᕆᕕᒻᒪᕆᖓᓂ ᑕᑯᓇᓱᐊᕐᑕᐅᒍᓐᓇᐳᑦ ᖃᕆᑕᐅᔭᑎᒍᑦ ᐅᑯᐊ ᓇᕐᓂᓗᒋᑦ: www.patrimoine-culturel.gouv.qc.ca.

ᐊᕙᑕᖅ ᐱᐅᓯᑐᖃᓕᕆᕕᒃ ᓇᑯᕐᒦᒍᒪᒋᕗᖅ ᐃᓄᐃᑦ ᖃᖓᑦᑕᔫᒃᑯᖏᓐᓂᒃ ᑕᒪᑦᓱᒥᖓ ᑮᓇᐅᔭᑎᒍᑦ ᐃᑲᔪᕐᓯᒪᓚᐅᕐᒪᑕ.

Sources: Cabinet du ministre de la Culture et des Communications / Cabinet de la ministre déléguée aux Affaires autochtones / Avataq cultural Institute.