• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᐱᓇᓱᐊᕈᓰᑦ ᓯᕗᓪᓕᐹᖓᓂ (ᑐᕓᔮᕈᑦ 14-ᒥᑦ 20-ᒧᑦ): ᕿᑭᕐᑕᔪᐊᖅ!
ᐊᓄᕆᔪᖅ ᓯᓚᓐᓂᐊᕈᑎᒃ 4-ᒦᑦᑎᓗᒍ, ᑭᓯᐊᓂ ᓂᓪᓕᓇᕐᑐᒧᑦ ᓄᕐᖃᖓᑎᑕᐅᒐᓛᓐᖏᑐᒍᑦ ᐃᑦᓴᓂᑕᕐᓂᐊᕈᑎᑦᓴᑎᓂᒃ ᕿᑭᕐᑕᔪᐊᕐᒨᕆᑦᓱᑕ, ᕿᑭᕐᑕᔪᐊᖅ ᕿᑭᕐᑕᐅᓱᓂ ᐊᑯᓕᕕᐅᑉ ᓴᓂᐊᓃᑦᑐᖅ. ᑐᐱᕗᑦ ᐊᑯᓂᓂᑖᐱᐅᓕᕐᑐᑦ 2007-ᒥ ᐃᓚᖏᑦ ᐊᑐᕐᑕᐅᓚᐅᕐᓯᒪᒻᒥᒐᒥᒃ ᐃᓄᑦᔪᐊᑉ ᓴᓂᐊᓂ ᐃᑦᓴᓂᑕᕐᓂᐊᓂᖃᕐᑎᓗᒍ. ᑐᐲᑦ ᑯᓯᕐᓂᐊᑐᕆᒐᑦᑎᒋᑦ ᐅᓕᑦᑕᕗᑦ ᐅᓕᐊᓗᑦᓴᔭᓄᑦ. ᓇᔪᕐᑕᕗᑦ ᓇᕐᓴᐅᑉ ᓇᑎᕐᓈᖓᓃᑦᑐᖅ ᑲᖏᐊᑲᓪᓚᓕᐊᕐᑐᒧᑦ ᓇᔪᒐᐅᓚᐅᕐᑐᕕᓂᕐᒧᑦ ᓄᓇᒧᑦ (JeGn-2)-ᒍᓂᕋᕐᑕᐅᔪᒧᑦ ᑕᒫᓂᓪᓗᐊᖅ ᓴᒡᒐᓕᕐᓱᑕᓗ.

ᐊᖏᔪᐊᓗᒻᒥᒃ ᐃᒐᕕᓕᐊᕆᓯᒪᔭᑦᑎᓂᒃ ᑐᐱᖃᕐᒥᔪᒍᑦ ᐱᖓᓱᓂᒃ ᒪᖏᑦᑕᓕᒻᒥᒃ ᐊᕙᑎᓄᑦ ᐃᓄᓐᓄᑦ ᐃᑦᓯᕙᕕᐅᒍᓐᓇᓱᓂ. ᑐᐱᐅᑉ ᖁᓛᖓᓂᒃ ᑭᖏᓈᕆᒐᓱᐊᒧᑦ ᐃᓱᕐᕆᓗᓂ ᐱᓱᕝᕕᐅᒍᓐᓇᓯᑎᒋᐊᕐᓱᒍ, ᑐᐱᐅᑉ ᐃᓗᐊᓂ ᓄᓇᒥᒃ ᓴᒡᒐᒋᐊᖃᓚᐅᔪᔪᒍᑦ 30-ᓴᓐᑕᒦᑕᓄᑦ ᐃᑎᓂᓕᒻᒥᒃ. ᐃᒐᕕᖁᑎᕗᑦ ᐱᖁᔭᖃᕐᑎᒥᔭᕗᑦ: ᑐᐱᕐᒧᑦ ᐃᑎᕈᓐᓇᑐᑎᑦ ᐊᒡᒐᓂᐊᕇᒍᕕᑦ ᑭᓯᐊᓂ. ᐊᑦᑕᓇᕐᑐᒨᕐᑐᖃᓐᖏᓚᐅᕈᓂ ᐅᒡᒍᐊᑐᖃᕐᓂᐊᖏᓐᓇᒥ! ᑕᕝᕙᓂ ᐱᓇᓱᐊᕈᓯᕐᒥ ᐅᑯᐊ ᓂᕆᖃᑦᑕᓚᖓᔭᕗᑦ: ᓂᕐᓕᕕᓂᖅ, ᐃᖃᓗᑉᐱᒃ, ᓄᐊᑕᐅᕋᑖᕕᓃᑦ ᐅᕕᓗᐃᑦ, ᐅᑯᐊᑐᖃᐅᓲᓪᓗ ᖃᔪᒃ (ᓲᑉᐳᖅ) ᓂᐊᖂᔦᓪᓗ ᐃᑭᐊᕐᒥᐅᑕᓖᑦ.

ᐊᖏᓂᕐᐹᑉ ᑐᖓᓕᐊᓃᑦᑐᖅ ᑐᐱᖅ ᓄᐊᑕᕕᓂᑦᑎᓂᒃ ᓱᕐᖁᐃᓯᒐᓱᐊᕐᕕᐅᕗᖅ. ᓴᓂᕐᕓᓯᒪᕕᒋᒻᒥᔭᕗᑦ ᐱᓇᓲᑎᑦᑎᓂᒃ ᐃᑦᓴᓂᑕᕐᓂᓗ. ᐃᓕᓵᑦ ᐊᑯᓕᕕᒻᒥᐅᑦ ᓈᒻᒪᒋᑐᐃᓐᓇᑕᕐᒥᓂᒃ ᑐᐱᓖᑦ ᓇᔪᕐᑕᕗᓪᓗ ᐃᒻᒥᑯᐊᕐᑎᑐᓗᑳᓂᒃ ᑐᐱᖃᕐᒥᓱᓂ. ᐊᒻᒪᓗ ᐅᓇ ᑭᖑᓪᓕᐹᖅ ᒥᑭᓂᕐᐸᐅᒐᓛᒐᓂ, ᖁᕐᕕᑯᕕᖃᕐᑐᒍᑦ ᑐᐱᐊᐱᒻᒦᑐᒥᒃ ᓄᓇ ᐃᓗᕐᓴᓕᐅᕐᓯᒪᑐᐃᓐᓇᑎᓗᒍ ᐊᒻᒪᓗ ᕿᔫᒃ ᒪᕐᕉᒃ ᖁᑉᐸᕇᑦᓱᑎᒃ ᐃᓗᕐᓴᐅᑉ ᐊᕙᓗᒋᓐᓃᑎᓪᓗᒋᒃ, ᐅᕝᕙᓘᓐᓃᑦ ᖁᕐᕕᑐᕈᒪᔪᖃᕈᓂ ᐃᑦᓯᕙᓗᓂ ᐃᓱᕐᕆᓯᐊᕐᓗᓂ ᑌᒣᑦᑐᖃᕈᓐᓇᒥᑎᓪᓗᒍ. ᐃᓚᖏᑦᑕᐅᖅ ᖁᐃᒋᐊᑐᓗᑎᒃ ᐱᓱᒍᒪᓂᕐᓴᐅᓲᑦ, ᓯᓚᒥ ᐱᐅᓯᕐᓱᓗᑎᒃ ᕿᑭᑕᐅᑉ ᐃᓱᐊᓂ ᖁᐃᒐᓱᐊᕐᓗᑎᒃ.

ᐱᓇᓱᐊᕈᓰᑦ ᑐᖓᓕᐊᓂ (ᑐᕓᔮᕈᑦ 21-ᒥᑦ 27-ᒧᑦ): ᐃᓚᖏᑦ ᒪᒣᑦᑐᕋᑌᑦ

ᑲᖏᐊᑲᓪᓚᒃ 1 ᓇᔪᒐᐅᓚᐅᕐᑐᕕᓂᐅᑦᓱᓂ (JeGn-2)-ᒦᑦᑐᖅ ᓇᔪᕐᑕᐅᓚᐅᕐᑐᕕᓂᐅᕗᖅ ᑐᓂᕐᓄᑦ ᐅᑭᐅᕐᓰᕕᑦᓴᒥᓂᒃ ᐊᓂᕐᕋᓕᐅᕐᐸᑐᕕᓂᐅᒻᒪᑕ ᓄᓇᒥ ᐃᓗᕐᓴᒦᑦᑐᓂᒃ ᓯᒃᑭᑕᑯᑖᒥ 30-ᓴᓐᑕᒦᑕᓄᑦ ᐃᑎᓂᓕᒻᒥ. ᓯᐊᕉᓕᕐᒪᑦ, 200 ᐊᕐᕌᒍᐃᑦ ᐊᓂᒍᕐᓯᒪᓕᕐᑐᑦ, ᐃᓄᑐᐃᓐᓀᑦ ᑕᕝᕗᖓᑦᓭᓇᖅ ᓄᓇᓕᓚᐅᕐᓂᒥᔪᑦ. ᐅᑭᐅᕐᓰᕕᒋᑦᓱᒋᑦ ᐊᓂᕐᕋᖏᑦ ᐊᑦᔨᐅᓂᑦᔭᖏᑦᑐᐃᓕ ᑐᓃᑦ ᐊᓂᕐᕋᕕᓂᖏᓐᓂᑦ, ᖃᕐᒪᐅᓱᑎᒃ ᓄᓇᐅᑉ ᐊᑖᒍᑦ ᐃᑎᕆᐊᕐᕕᓖᑦ. ᐊᓂᕐᕋᓴᓕᐅᓕᕋᒥᒃ ᓯᕐᒥᒥᒃ ᐊᑐᓲᕕᓃᑦ ᑕᑕᑦᑐᒥᒃ ᑐᓂᕐᑕᓂᒃ ᐅᐊᕈᑎᒌᓚᕿᑎᓪᓗᒋᑦ ᐱᐅᓯᕐᓱᖃᑎᒌᓐᖏᑐᑦ ᐱᐅᓕᓂᐊᕆᕙᑦᑕᕕᓂᖏᑦ.

ᐃᓕᓵᑦ ᐊᑯᓕᕕᒻᒥᐅᑦ ᒫᓐᓇ ᐃᓕᓐᓂᐊᑎᑕᐅᖃᑦᑕᑐᑦ ᐃᑦᓴᓂᑕᕐᓂᐊᕈᓯᐅᒋᐊᓕᓕᒫᓂᒃ, ᐆᑦᑑᑎᒋᓗᒋᑦ ᓴᒡᒐᕕᒋᓚᖓᔭᕐᒥᓂᒃ ᓄᓇᓐᖑᐊᓕᐅᕐᓗᑎᒃ, ᓯᒃᑭᑕᐅᓈᕐᑎᑐᓂᒃ ᓴᒡᒐᓗᑎᒃ, ᓄᐊᑦᓯᓗᑎᒃ ᐃᑦᓴᓂᑕᕐᓂᒃ ᐃᓚᐅᑎᓪᓗᒍ ᐃᑦᓴᓂᑕᖅ ᓴᓃᔭᐅᑎᒧᑦ ᓴᓗᒻᒪᓴᕐᓗᒍ, ᐊᒻᒪᓗ ᐃᑦᓴᓂᑌᑦ ᓴᓗᒻᒪᓴᕐᓗᒋᑦ ᓱᕐᖁᐃᓯᒐᓱᐊᕐᕕᒥ. ᐊᐅᔭᕐᓯᐅᖃᑎᖃᕐᓂᖅ ᐊᕙᑕᒃᑯᓂᒃ ᐱᒐᓱᐊᒻᒪᕆᓐᓇᑐᕋᑕᖅ, ᑭᓯᐊᓂ ᓱᓇᓕᒫᑦ ᐃᓱᓕᕝᕕᖃᕐᒪᑕ, ᐃᓕᓵᓕᒫᑦ ᑐᐱᕐᒦᒋᐊᖃᖃᑦᑕᓚᐅᔪᔪᑦ 11-ᖑᒥ ᐅᓐᓄᑐᒃᑯᑦ ᓯᕿᓂᖅ ᓂᐱᕋᑕᕐᑎᓇᒍᓘᓐᓃᑦ. ᐅᓪᓛᑯᑦ ᑐᐸᐅᕐᖃᕋᒥᒃ ᐃᒐᕕᓕᐊᓲᑦ 8-ᖑᒥ. ᐃᓛᓐᓂ ᓱᕐᕙᖃᒐᓛᓲᒍᓐᖏᑐᖅ, ᑭᓯᐊᓂ ᐊᑐᐃᓐᓇᐅᓯᐊᑐᐊᕋᒥᒃ, ᐃᓕᓵᑦ ᐅᓪᓛᕈᒥᑕᕈᓐᓇᓯᓲᑦ ᐹᓇᑭᐊᓂᒃ, ᒪᓐᓂᓂᒃ ᐊᓯᖏᓐᓂᓘᓐᓃᑦ. ᐃᓕᓵᓕᒫᑲᓵᑦ ᐃᒐᕕᓕᐊᑲᓪᓚᒐᓱᐊᓲᑦ 8:45-ᒥ ᐅᓪᓛᕈᒥᑕᑦᓴᔭᕐᑐᑲᓪᓛᐱᒋᐊᕐᑐᓱᑎᒃ ᖃᔪᑦᓴᔭᒥᓪᓘᓃᑦ, ᒪᔪᕋᒋᐊᓚᐅᓐᖏᓂᕐᒥᓂ ᓇᔪᒐᐅᓚᐅᕐᑐᕕᓂᓕᐊᕐᓗᑎᒃ. ᐅᓪᓘᑉ ᐃᓗᐊᓂ ᐱᓇᓱᐊᓚᖓᔭᖏᑦᑕ ᐃᓚᖓ - ᐊᓪᓚᖑᐊᕐᓗᑎᒃ ᐃᑦᓴᓂᑕᕐᓂᒃ ᑌᒣᓚᓐᖔᖅ ᐃᓂᒥᓃᖏᓐᓈᑐᓂᒃ ᐊᓪᓚᖑᐊᕐᑕᖏᑦ ᐊᖏᓂᖃᕐᑎᓗᒋᑦ ᐃᒫᒃ: (scale 1:10) ᐅᕝᕙᓘᓐᓃᑦ ᓇᐸᔪᒦᑦᓱᓂ ᕿᓐᖑᑎᒧᑦ ᓇᐅᑦᓯᑐᐃᓗᑎᒃ ᐃᑦᓴᓂᑕᕐᒥᒃ, ᑕᒪᓐᓇᓗ ᕿᓐᖑᓯᔭᕐᓂᒃ ᐃᓕᑦᓯᔭᐅᒋᐊᖃᕐᓱᓂ.

ᐃᓕᓵᑦ ᖃᐅᔨᓴᕐᑎᓚᕆᐊᓗᓐᖑᓲᒍᒻᒥᔪᑦ ᐃᒻᒥᓂᕿᑦᓱᑎᒃ ᖃᐅᔨᓴᖃᑦᑕᓕᑐᐊᕋᒥᒃ, ᐃᓚᐅᑎᓪᓗᒋᑦ ᐊᓪᓚᖁᑎᓕᐅᕆᓂᖅ ᓴᒡᒐᑕᐅᔪᓂᒃ ᐃᑦᓴᓂᑕᕐᓂᐊᑏᓪᓗ ᐱᓇᓱᐊᕐᑕᖏᓐᓂᒃ ᐊᑦᔨᓕᐅᕆᖃᑦᑕᓗᑎᒃ ᐊᐅᓚᔫᓕᐅᖃᑦᑕᓗᑎᓘᓐᓃᑦ, ᐃᑦᓴᓂᑕᕐᓂᐊᑎᓂᒃ ᐊᐱᕐᓱᖃᑦᑕᓗᑎᒃ ᑕᑯᓐᓇᐅᔮᑐᐃᓐᓇᖃᑦᑕᓗᑎᓘᓐᓃᑦ. ᐅᓪᓛᓂᓂᑦ ᐅᓐᓄᐊᑐᖃᐅᓕᕋᑕᕐᑎᓗᒍ, ᕿᑭᕐᑕᖁᑎᕗᑦ ᓱᕐᕙᖃᕐᐸᑐᖅ ᐃᔪᕿᑕᕙᓪᓛᓂᒃ, ᐅᓂᒃᑳᑐᐊᕙᓪᓛᓂᒃ ᐱᓐᖑᐊᕙᓪᓛᓂᓗ ᐃᓱᒣᓐᓇᕿᕉᑕᕆᓕᑐᐊᕋᑦᑕ. ᑕᒪᓐᓇ ᐃᓅᓯᐅᑦᓱᓂ ᐱᐅᓂᕐᓴᓚᕆᐊᓗᒃ ᐳᓚᐅᑎᓗᑳᓐᓂᒃ ᑕᓚᕖᓴᖃᕐᑎᓇᒍ ᖃᕆᑕᐅᔭᑎᒍᓪᓗ ᐱᑐᑦᓯᒪᔪᖃᕐᑎᓇᒍ!

ᑕᕝᕙᓂ ᐱᓇᓱᐊᕈᓯᕐᒥ ᐱᐅᓂᕐᐸᐅᑎᓪᓗᒍ ᓇᕝᕚᑕᐅᓯᒪᓕᕐᑐᖅ ᑕᓯᐅᑉ ᐃᕐᖃᖓᓂᑦ ᐃᓪᓗᐃᓇᐅᑦᓱᓂ ᖃᒧᑎᐅᓚᐅᕐᑐᕕᓃᒃ ᐱᕐᕌᕕᓂᖓ ᓇᕝᕚᑕᕕᓂᐅᑦᓱᓂ ᕿᑭᕐᑕᔪᐊᑉ ᓂᒡᒋᖓᑕ ᐊᑐᐊᕐᓂᖓᓐᓂ. ᕿᔪᒃ ᓱᔪᓯᒪᑦᓯᐊᒐᓛᓐᖏᑐᖅ ᓄᑖᕌᐱᐅᔮᕐᓱᓂᐊᓪᓛᑦ, ᐊᓪᓛᑦ ᓴᓇᔭᕕᓂᕐᔫᔮᕐᑐᖅ ᐃᑉᐸᓵᓂ ᐃᑉᐸᓵᓂᑦᓵᓘᓐᓃᑦ. ᐅᑯᐊᓕᑦᑕᐅᖅ ᓇᕝᕚᑕᕕᓂᑦᓯᐊᕌᓘᑉ ᐊᑦᔨᒋᒐᓛᓐᖏᑕᒋᒃ, ᐃᓂᖁᓀᓐᓂᐹᑦᓯᐊᒃ ᓇᕝᕚᑕᕕᓃᒃ ᒪᕐᕉᓂ ᓯᒃᑭᑖᓐᓂ ᓴᒡᒐᕕᐅᔫᓐᓂ ᓯᕗᓪᓕᐹᒥ ᑕᑯᑦᓴᐅᑎᓪᓗᒍ ᐊᔪᒉᑦᑐᕋᑕᖅ ᓴᓗᒣᑦᑑᓱᓂ ᓯᓇᕐᓇᐅᓱᓂᓗ ᓯᐅᕋᖅ, ᒪᒣᑦᑐᓚᕆᐊᓘᑦᓱᓂ 100-ᒍᓈᕐᑎᑐᓂ ᐊᕐᕌᒎᓚᐅᕐᑐᕕᓂᕐᓂ ᕿᓐᖏᓕᔭᐅᓚᐅᕐᑐᕕᓂᖅ ᐃᒍᓇᖅ. ᑌᒃᑯᐊ ᐃᓅᓚᐅᕐᑐᕕᓃᑦ ᐳᐃᒍᓚᐅᕐᑐᕕᓂᒃᑯᐊᓗᐃᑦ ᓂᕆᒋᐊᓕᕕᓂᕐᒥᓂᒃ ᐊᐅᓪᓚᖏᓐᓂᒥᓂ ᐅᐱᕐᖏᕕᑦᓴᒥᓄᑦ.

ᐱᓇᓱᐊᕈᓰᑦ ᐱᖓᔪᖓᓂ (ᑐᕓᔮᕈᑦ 28-ᒥᑦ ᐊᐅᔭᓕᕈᑦ 3-ᒧᑦ) ᐊᒡᒐᔮᑦ ᓂᕆᓕᑐᐊᕐᒪᑕ ᐃᖃᓗᓐᓂᒃ

“ᐊᕙᑕᐅᑉ ᐃᓕᓴᕐᕕᖁᑎᖓ” ᐃᓕᓭᑐᐃᓐᓇᓲᒍᑦᔭᖏᑦᑐᖅ ᓇᔪᒐᐅᓚᐅᕐᑐᕕᓂᕐᓂᒃ ᓴᒡᒐᒍᓯᐅᒋᐊᓕᓂᒃ. ᓯᓚ ᐱᓇᓱᕝᕕᓴᐅᓐᖏᑐᐊᕐᒪᓗᐊᓐᖑᐊᖅ, ᑐᐱᕐᒥ ᐃᒐᕕᒻᒥ ᐃᑦᓴᓂᑕᕐᓂᐊᓂᐅᑉ ᒥᑦᓵᓅᓕᖓᔪᓂᒃ ᑐᑭᓯᑎᑦᓯᒋᐊᕐᑐᒥᒃ ᐅᖄᔪᖃᓲᒍᒻᒥᔪᖅ. ᑕᒪᐅᓐᖓᓚᐅᔪᒐᑦᑕᓂᑦ, ᐃᓕᓵᑦ ᔪᐊᓇᓯ ᖃᕐᖁᑐᒧᑦ ᐅᓂᒃᑳᕕᐅᓯᒪᓕᕐᑐᑦ ᕿᑭᕐᑕᔪᐊᑉ ᐱᐅᓯᖃᕐᕕᐅᓯᒪᓂᖓᑕ ᒥᑦᓵᓄᑦ. ᑐᓴᕐᑎᑕᐅᓚᐅᔪᔪᑦ ᖃᒻᒥᖅ ᐱᓇᓱᐊᕐᑐᖃᓚᐅᔪᒻᒪᑦ Elsa Cencig-ᒥᒃ, (ᐊᕙᑕᒃᑯᑦ ᐃᑦᓴᓂᑕᕐᓂᐊᑎᖁᑎᖓᓂᒃ) ᓄᓀᑦ ᐊᑎᖏᓐᓂᒃ ᑲᑎᕐᓱᐃᕕᖓᓐᓅᙯᑦᓱᓂ. ᐃᓕᓵᑦ Pierre Desrosiers-ᒧᑦ (ᐊᕙᑕᒃᑯᑦ ᐃᑦᓴᓂᑕᕐᓂᐊᑎᖁᑎᖓᓄᑦ) ᑐᑭᓯᑎᑕᐅᒋᐊᓚᐅᔪᒻᒥᔪᑦ ᐃᑦᓴᓂᑕᕐᓂᐊᓂᐅᓲᑉ ᒥᑦᓵᓄᑦ ᐊᒻᒪᓗ ᐅᑭᐅᕐᑕᑐᒥᐅᑦ ᐃᓅᕐᖄᓚᐅᕐᑐᕕᓃᑦ ᒥᑦᓵᓄᑦ. Ruth Mienert-ᒧᑦ (Switzerland ᐃᓕᓐᓂᐊᕕᕐᔪᐊᖓᓐᓂᒥᐅᒧᑦ) ᑐᓵᑎᑕᐅᓚᐅᔪᒻᒥᔪᑦ ᑕᕆᐅᑉ ᐊᑭᐊᓂᒥᐅᔦᑦ Syria-ᒥᐅᑦ ᐱᐅᓯᕆᓚᐅᕐᑕᕕᓂᖏᑦᑕ ᒥᑦᓵᓄᑦ.

ᐃᓕᓵᑦ ᐱᓇᓱᐊᖃᑎᖃᓚᐅᔪᒻᒥᔪᑦ Jessica Kotierk-ᒥᒃ (Canadian Conservation Institute)-ᑯᓂᑦ ᐱᓯᒪᔪᒥᒃ. ᔨᐊᓯᑲᓗ ᐃᓕᓐᓂᐊᑎᑦᓯᓚᐅᔪᑦᓱᓂ ᖃᓄᖅ ᐃᑦᓴᓂᑌᑦ ᓇᕝᕚᑕᕕᓃᑦ ᑲᒪᒋᔭᐅᒋᐊᖃᓲᒍᒻᒪᖔᑕ ᓴᓗᒻᒪᓴᕐᑕᐅᒋᐊᖃᓲᒍᒻᒪᖔᑕᓗ ᓱᕐᖁᐃᓯᒐᓱᐊᕐᕕᒥ - ᑕᒪᓐᓇ ᐱᑦᓯᐊᒐᓱᐊᒻᒪᕆᒋᐊᓕᒃ ᐃᑦᓴᓂᑌᑦ ᐊᑦᑕᕆᐊᐱᓪᓗᒋᑦ ᐱᓇᓱᐊᕐᑕᐅᒋᐊᖃᓲᒍᒻᒪᑕ, ᑭᓯᐊᓂ ᑭᑦᑐᕆᐊᓪᓕᐅᖏᑦᑐᓯᐊᒍᑦᓱᑎᒃ ᐊᓄᕆᑦᔪᐊᒦᓐᖏᑐᑦᓯᐊᒍᑦᓱᑎᓗ ᐱᓇᓱᐊᓚᐅᔪᔪᑦ! ᖃᕆᑕᐅᔭᑎᒍᑦ ᑕᑯᓐᓇᑎᑦᓯᓚᐅᔪᒻᒥᔪᑦ ᐊᒥᓱᑲᓪᓚᓂᒃ ᐊᑦᔨᓕᐊᕕᓂᕐᒥᓂᒃ ᐃᑲᔪᕐᑕᐅᓱᑎᒃ (ᒧᓐᑐᔨᐊᑉ ᐃᓕᓐᓂᐊᕕᕐᔪᐊᖓᓂ ᐃᓕᓭᔨᒧᑦ) Jrene Rahm-ᒧᑦ. ᑭᖑᓪᓕᐹᒥ ᓂᕆᒍᑎᕕᓂᕐᒥᓂᒃ ᐴᒍᑕᕐᓂᒃ ᐃᕐᕈᑐᐃᒋᐅᕐᑐᐊᓘᓕᓚᐅᔪᒻᒥᔪᑦ, ᓓᓇ ᐊᓇᐅᑕᖅ ᐃᒐᔨᕗᑦ ᐃᓱᒫᓗᐃᑦᔫᒥᑎᓪᓗᒍ. ᐅᓐᓄᑐᐊᕐᒪᑦ ᐱᓐᖑᐊᓗᑳᖃᑦᑕᓚᐅᔪᔪᑦ, ᐃᑦᓴᓂᑕᕐᓂᐊᓂᕐᒨᓕᖓᔪᓂᒃ ᐅᖄᔭᐅᔪᓂᒃ ᑐᓵᖃᑦᑕᓚᐅᔪᔪᑦ, ᐃᔪᕿᑕᐅᑎᒌᓗᑳᓐᖑᐊᖃᑦᑕᓚᐅᔪᔪᑦ ᐃᓛᓐᓂᓗ ᐊᓃᕆᐊᖃᕈᓐᓀᑐᐊᕋᒥᒃ ᐃᒐᕕᒻᒥᒃ ᐅᒋᐊᕐᓯᓯᐊᖃᑦᑕᓚᐅᔪᑦᓱᑎᒃ ᐄᕐᖃᒐᑦᓴᓗᑳᕐᓯᐅᓱᑎᒃ! ᓀᓈᕐᓱᒍ, ᐊᔪᒉᑦᑐᓕᔪᖃᒐᓛᓚᐅᔪᓐᖏᑐᖅ ᐊᑯᓃᕐᓱᑕ ᕿᑭᕐᑕᔪᐊᒥ ᐃᑦᓴᓂᑕᕐᓂᐊᓂᕐᒥᒃ ᐃᓕᓭᓂᑦᑎᓂ.

ᐅᓪᓗᖅ ᐃᓛᓐᓂ ᐃᕿᐊᓇᕐᑐᐊᓘᒍᓐᓇᑐᖅ ᑲᕙᕐᓇᓕᕋᑕᕐᓱᓂ, ᐊᑦᔨᒌᕌᓗᑐᐃᓐᓇᓂᒃ ᓴᐅᓂᕕᓂᕐᓂᒃ ᑕᑯᖃᑦᑕᓕᑐᐊᕋᑦᑕ, ᑌᒪ ᓴᓃᔭᐅᑎᒧᑦ ᓴᓗᒻᒪᓴᕐᓱᒋᑦ, ᑌᒪ ᓴᒡᒐᒋᐊᓪᓚᓯᑦᓴᕆᕗᒍᑦ, ᑌᒣᓘᕐᓂᓕᒫᑦᑎᓂᓗ ᑭᑦᑐᕆᐊᒐᓴᕐᔪᐊᓄᑦ ᐅᒋᐊᕐᑕᐅᒪᑦᓱᑕ, ᐊᐅᕗᑦ ᑎᒥᕗᓪᓗ ᓂᓪᓕᓇᕐᑐᐊᓗᒻᒦᑐᕕᓂᐅᑦᓱᑎᒃ ᓂᕈᒥᑦᓯᓴᕋᑕᕐᒪᑕ ᕿᐅᓐᓇᑐᒻᒪᕆᐅᖃᑦᑕᒪᑦ ᓂᓪᓕᓇᕐᑐᐊᓗᒻᒥᒃ ᐊᓄᕆᑦᓱᓂ. ᑕᒪᒃᑯᐊᓕᒫᕌᓗᐃᑦ ᖃᐅᑕᒫᑦ ᐊᑑᑎᖃᑦᑕᓕᓚᐅᔪᔭᕗᑦ, ᑌᒪ… ᓴᒡᒐᕕᒻᒥᑦ ᓯᒃᑭᑖᐱᒻᒥᑦ ᓇᕝᕚᑐᖃᑦᓴᕋᑕᕐᓂᐊᓕᕐᒪᑦ ᓇᐅᓚᐅᓚᐅᕐᑐᕕᓂᕐᒥᒃ! ᑕᒪᓐᓇᓗ ᓇᕝᕚᓂᖅ ᐃᑭᑦᓯᒋᐊᓪᓚᑑᔮᓚᐅᔪᑦᓱᓂ ᐊᐅᒫᐱᒥᒃ! ᐃᓕᓵᑦ ᐃᑦᓴᓂᑕᕐᓂᐊᑏᓪᓗ ᐃᑦᓴᓂᑕᕐᓂᐊᕆᐊᓪᓚᒍᒫᓚᕿᓕᓚᐅᔪᔪᑦ ᐃᓕᓵᑦ ᓴᒡᒐᓱᑎᒃ ᓱᑲᑦᓯᐅᒥᓚᕿᑎᓪᓗᒋᑦ ᐃᑦᓴᓂᑕᕐᓂᒃ ᑕᑯᒋᐊᓪᓚᒍᒪᒃᑯᐊᓗᒧᑦ. ᑌᒪ ᓇᕝᕚᕆᐊᓪᓚᑐᖃᕐᓂᐊᓕᕐᒪᑦ! ᖃᐅᑐᐊᕐᒪᑦ ᓇᐅᓚᐅᒻᒥᔪᒥᒃ ᓇᕝᕚᑐᖃᓕᓚᐅᔪᔪᖅ! ᐃᒫᒃ ᐅᖃᓐᖑᐊᓲᖑᒐᑦᑕ, ᐱᐅᓂᓕᒫᑦ ᑎᑭᐅᕐᖃᓲᑦ ᐱᖓᓲᓈᕐᑎᓱᑎᒃ, ᑌᒣᒻᒪᑦ ᓱᕐᖁᐃᑐᒥᒃ ᐱᓇᓱᐊᕈᓯᐅᓛᕐᑐᒥ ᓇᕝᕚᑐᖃᓛᖏᓐᓈᑐᖅ.

ᔪᐊᓇᓯ ᖃᕐᖁᑐᖅ ᐊᒻᒪᓗ ᓭᒪ ᐃᖃᓗᒃ, ᒪᙯᑦᑎᒋᑦᓱᒋᒃ-ᒪᓕᒐᒋᑦᓱᒋᒃ ᐊᒻᒪᓗ ᐃᑲᔪᕐᑎᒋᑦᓱᒋᒃ ᑲᖐᒋᓇᕐᑐᖑᐊᕋᑕᕐᒥᒃ ᑕᑯᓕᓚᐅᔪᒻᒥᔫᒃ ᓄᓗᐊᓂᒃ ᑕᑯᓭᑦᓱᑎᒃ. ᐊᑕᐅᓯᖅ ᐃᖃᓗᒃ ᐊᒡᒐᔮᒧᑦ ᓂᐱᓐᖓᕕᐅᓚᐅᔪᔪᖅ. ᐊᒡᒐᔮᖅ ᐲᕐᑕᐅᑐᐊᕐᒪᑦ ᐃᖃᓗᒃ ᐊᖏᔪᐊᓗᒻᒥᒃ ᕿᓪᓚᖃᓚᐅᔪᔪᖅ, ᑌᒣᒻᒪᑦ ᐊᒡᒐᔮᑦ ᓱᕐᖁᐃᑐᒥᒃ ᓂᕆᓲᑦ ᐃᖃᓗᓐᓂᒃ.

ᐱᓇᓱᐊᕈᓰᑦ ᓯᑕᒪᖓᓂ (ᐊᐅᔭᓕᕈᑦ 4-ᒥᑦ 10-ᒧᑦ) ᓂᕆᐅᓐᓇᖏᑦᑐᑦ

ᐊᑕᐅᓯᖅ ᐱᒻᒪᕆᕋᑕᖅ ᐱᓇᓱᐊᕐᑕᑎᓐᓅᓕᖓᔪᖅ ᐃᓚᖃᕐᐳᖅ ᓄᓇᕐᔪᐊᑉ ᓴᓇᒻᒪᖓᓂᒃ ᓱᑯᐃᔦᔨᓂᒃ ᓚᕚᓪ ᐃᓕᓐᓂᐊᕕᕐᔪᐊᖓᓐᓂᑦ ᐱᓯᒪᔪᓂᒃ ᐅᕙᓐᖓᑦ ᐱᒍᑦᔨᕕᒻᒥᐅᒍᑦᓱᑎᒃ: Centre for Northern Studies: ᐅᑯᐊ ᓱᑯᐃᔦᔩᑦ: Najat Bhiry, Dominique Todisco, Sebastien Lafrance ᐊᒻᒪᓗ Annie-Pier Trottier. ᑖᒃᑯᐊ ᖃᐅᔨᓴᕐᑐᑦ ᓄᓇᐅᑉ ᓯᓚᒧᑦ ᐊᐅᓚᑕᐅᑦᓱᓂ ᐊᓯᑦᔨᐸᓪᓕᐊᒍᓯᖓᓂᒃ. ᖃᐅᔨᓴᕐᒥᔪᑦ ᖃᓄᖅ ᓇᔪᒐᐅᓚᐅᕐᑐᕕᓃᑦ ᓄᓇᒧᑦ ᓴᐅᔭᐅᕙᓪᓕᐊᓂᕐᒪᖔᑕ. ᐊᑕᐊᓯᖅ ᑲᖐᒋᓇᑐᓐᖑᐊᖅ ᖃᐅᔨᓴᕐᑕᖓᓅᓕᖓᔪᖅ ᓇᔪᒐᐅᓚᐅᕐᑐᕕᓂᕐᒥ ᑎᑦᔭᓗᐃᑦ ᓇᓂᓕᒫᑦᓯᐊᒪᑕ ᐃᓪᓗᕈᐊᓕᐊᕆᔭᐅᓲᕕᓂᐅᑦᓱᑎᒃ. ᓇᑭᓂᒃᑯᐊ ᑎᑦᔭᓗᐃᑦ ᐱᔪᕕᓃᑦ? ᖃᓄᖅ ᓇᑭᓪᓗ ᓄᐊᑕᐅᓲᕕᓃᑦ? ᑖᒃᑯᐊ ᐊᐱᕐᓲᑏᑦ ᐃᓚᖏᑦ ᑕᒐᑕᒐ ᖃᐅᔨᓴᕐᑕᐅᔪᑦ.

ᐃᓛᓂᐅᓐᖏᑑᒐᓗᐊᖅ ᑌᒪᓐᖓᓕᒫᑲᓵᒃ ᐊᑑᑎᓲᖅ ᓄᓇᑐᐃᓐᓇᒦᓕᑐᐊᕋᑦᑕ ᓱᓇᓗᑳᑦ ᐱᓇᓲᑏᓪᓘᓃᑦ ᓯᖁᒥᓲᒍᒻᒪᑕ ᐃᓅᓯᑦᑎᓂᒃ ᐃᓱᐃᓪᓕᐅᑫᒐᓛᐱᑦᓱᑎᒃ, ᐆᑦᑑᑎᒋᓗᒍ ᐊᓪᓕᓂᖅ ᐳᕕᕐᑕᐅᒋᐊᖃᓲᖅ ᐳᓪᓓᕌᓗᑦᓴᑎᓪᓗᒍ … ᐅᕝᕙᓘᓐᓃᑦ ᖁᕐᕕᑯᕕᑦᑕ ᓯᑦᑕᑐᖓ ᓱᒍᓐᓇᖏᕐᑎᓗᒍ ᖁᕐᕕᑐᕐᑐᖅ ᑕᑯᑦᓴᑲᓪᓛᓘᓯᑎᓗᒍ … ᑭᓯᐊᓂ ᐃᓱᒫᓗᑦᓴᕋᓯ; ᓭᒪᐅᑉ ᐋᕐᕿᒍᓐᓇᑕᖓ! ᓭᒪ ᓯᖁᒥᓯᒪᔪᕐᓂᐊᑎᕗᑦ ᓱᓇᓕᒫᑲᓵᑦᓯᐊᓂᒃ ᐋᕐᖀᒍᓐᓇᒪᑦ!

ᐊᑯᓕᕕᒻᒥ ᑐᓴᕐᓂᔮᕐᑎᓯᓂᖃᕐᒪᑦ, ᑕᕝᕙᓂ ᐱᓇᓱᐊᕈᓯᕐᒥ ᐅᓪᓘᓕᑐᐊᕐᒪᑦ ᐃᑦᓴᓂᑕᕐᓂᐊᖃᑦᑕᑐᒍᑦ ᐅᓐᓄᑐᐊᕐᒪᓗ ᑐᓴᕐᓂᔮᕆᐊᕐᑐᖃᑦᑕᓱᑕ. ᐱᔭᑦᓴᓕᕋᑕᐅᖃᑦᑕᑐᒍᑦ ᑭᑦᑐᕆᐊᓪᓕᐅᓱᑕ, ᓂᐸᕆᑦᑐᕋᑕᕐᓂᒃ ᑐᓴᕐᓂᔮᖃᑦᑕᓱᑕᓗ, ᓴᒡᒐᑕᐅᔪᑦ ᐃᑎᓕᕙᓪᓕᐊᑐᐃᓐᓇᑎᓗᒋᑦ, ᐅᓐᓄᐊᑐᓯᐅᑦᓱᓂᓗ, ᐅᓪᓛᕈᖃᑦᑕᓱᑕ ᐃᔨᑭᑦᑐᐊᐱᐅᓕᕐᓱᑕ … ᑭᓯᐊᓂᓗᑦᑕᐅᖅ ᓴᒡᒐᓱᑕ ᐱᐅᔪᕋᑕᕐᓂᒃ ᐃᑦᓴᓂᑕᕐᓂᒃ ᓇᕝᕚᑐᖃᖃᑦᑕᑐᖅ. ᖃᕐᒪᐅᓚᐅᕐᑐᕕᓂᐅᑉ ᕿᑎᓪᓗᐊᖓᓂ ᓄᓀᑦ ᖃᓕᐊᕇᑦ ᐊᑖᓂ ᐃᑦᓴᓂᑕᖃᕐᓱᓂ ᑐᓂᕐᑕᕙᓪᓗᓂᒃ, ᓴᐅᓂᕐᓂᒃ ᖁᓪᓕᐅᓗ ᑯᑐᕐᓂᓗᑯᕕᓂᖏᓐᓂᒃ ᐅᕐᓱᒥᒃ, ᓇᕝᕚᓚᐅᔪᔪᒍᑦ ᖃᒻᒥᓂᑕᐹᓗᓂᒃ ᓴᐅᓂᕐᓂᒃ ᖃᕐᒪᕕᓂᐅᑉ ᓇᑎᖓᑕ ᐊᑖᕌᐱᑐᐃᓐᓇᖓᓃᑦᑐᓂᒃ. ᑌᒫᒃ ᓴᐅᓃᑦ ᖃᒻᒥᓂᑕᒐᓚᐅᑦᓴᕋᒥᒃ ᑕᑯᑦᓱᒋᑦ ᐃᒍᓇᕋᓱᐊᕐᐸᓕᐊᓕᑌᓐᓇᑐᑦ. ᑖᒃᑯᓇᓐᖓᑦ ᐃᓚᐅᓚᐅᔪᔪᖅ ᐱᐅᔪᕋᑕᖅ ᐃᑦᓴᓂᑕᖅ, ᐸᓇᐅᕐᖂᑑᑉ ᐃᐳᕕᓂᖓ ᐃᐳᑦᑕᖓ ᓴᓇᓐᖑᐊᓯᒪᔪᕐᑕᖃᕐᑎᓗᒍ. ᑭᖑᓪᓗᐹᒥ ᐊᐅᓪᓚᓛᓕᕐᓱᑕ ᓂᕿᑦᓯᑐᓂ, ᓈᕝᕚᓚᐅᔪᔪᒍᑦ ᓴᐅᓃᑦ ᐊᑖᖏᓐᓂ ᐊᒥᐅᓚᐅᕐᑐᕕᓂᕐᒥᒃ!

ᐃᑦᓴᓂᑕᕐᓂᐊᑎᓄᑦ ᐊᐱᕐᓲᑕᐅᓂᕐᐸᐅᓲᑦ ᐃᓚᖓ ᐅᓇᐅᕙᓗᑦᑐᖅ: ᓱᓇᐅᔪᕆᕓᑦ ᐱᐅᔪᓪᓗᑐᐊᓘᓗᓂ ᐃᑦᓴᓂᑕᑦ ᓇᕝᕚᑕᐅᔪᖅ? ᑕᒪᑦᓱᒧᖓ ᑭᐅᒍᑕᐅᓗᓂ ᐱᐅᓂᕐᐸᐅᖂᕐᑐᖅ ᐅᓇ: ᓂᕆᐅᓐᓇᖏᑦᑐᖅ!

ᐱᓇᓱᐊᕈᓰᑦ ᑕᓪᓕᒪᖓᓂ (ᐊᐅᔭᓕᕈᑦ 11-ᒥᑦ 17-ᒧᑦ): ᐊᒥᕐᓂᒃ ᐱᑦᓯᐊᓂᖅ ᑕᑯᑦᓴᐅᑎᑦᓯᓂᕐᓗ

ᑭᖑᓪᓕᐹᒥ ᐱᓇᓱᐊᕈᓯᕐᒥ ᐱᔭᑦᓴᓕᕋᑕᐅᓚᐅᔪᔪᒍᑦ ᑰᑐᐃᓐᓇᑐᓂᓗ ᐱᐅᔪᐊᓗᓐᓂᒃ ᐃᑦᓴᓂᑕᕐᓂᒃ ᓇᕝᕚᖃᑦᑕᓱᑕ. ᓇᕝᕚᑕᕕᓂᕗᑦ ᐱᓇᓱᐊᒻᒪᕆᒋᐊᓖᑦ ᓱᔪᑦᑎᑌᓕᓗᒋᑦ ᓈᒻᒪᓈᕐᑐᓂᓗ ᐊᓪᓚᖁᑎᓕᐅᕐᓗᒋᑦ.

ᐊᒥᕐᓂᒃ ᐱᑦᓯᐊᓂᖅ: ᐅᕕᓂᒃ ᐅᕐᓲᓗᐊᕐᑐᖅ, ᓴᓗᐊᖓᓗᐊᕐᑐᖅ ᓱᕐᕋᒍᐊᕐᑐᓘᓐᓃᑦ, ᐅᕕᓂᕐᓗᓂᓕᒫᑦ ᐋᕐᕿᑕᐅᒍᓐᓇᐳᑦ … ᐃᒃᑯᐊᓕ ᐊᒦᑦ ᒥᕐᖁᓕᐊᓗᐃᑦ, ᐃᒍᓈᓘᑦᓱᑎᒃ, ᐊᐅᕋᑖᕌᓘᑦᓱᑎᒃ 100-ᐅᓈᕐᑎᑐᓂᒃ ᖁᐊᕕᓈᓘᒋᑐᐊᕋᒥᒃ? ᑖᓐᓇ ᐱᓀᓗᑕᕆᓚᐅᔪᔭᕗᑦ ᓇᕝᕚᒌᑐᐊᕋᑦᑕ ᐊᒥᕐᒥᒃ ᓂᐱᓐᖓᔪᑐᖃᕕᓂᕐᒥᒃ ᖃᕐᒪᐅᓚᐅᕐᑐᕕᓂᐅᑉ ᓇᑎᖓᓄᑦ. ᑖᑦᓱᒥᖓ ᐱᓀᓗᑕᒥᒃ ᐋᕐᖀᒐᓱᐊᕐᓱᓂ, ᔨᐊᓯᑲ ᐊᑦᑕᕈᓱᒻᒪᕆᑦᓱᓂ ᐊᒥᕐᒥᒃ ᐅᔭᕋᕐᒧᑦ ᓂᐱᓐᖓᔪᒥᒃ ᐲᕐᓯᒐᓱᐊᓚᐅᔪᔪᖅ ᕿᓪᓕᑐᔭᒥᓪᓗ ᐊᑖᓅᕆᑦᓱᓂ. ᑌᒣᑦᓱᒍ ᑭᕕᑦᑕᐅᒍᓐᓇᓯᓚᐅᔪᔪᖅ ᐲᕐᑕᐅᓱᓂ ᐃᓕᔨᕕᒋᕐᖄᑐᐃᓐᓇᓱᒍ ᕿᓪᓕᑐᔭᐅᑦᓱᓂ ᓵᑦᑐᔮᒥᒃ.

ᓈᒻᒪᓯᕗᖅ ᑕᑯᑦᓴᐅᑎᑦᓯᒋᐊᖃᕐᓂᖅ: ᒪᕐᕉᓂᒃ ᐱᓇᓱᒐᑦᓴᖃᓕᓚᐅᔪᔪᒍᑦ ᓴᒡᒐᑐᕕᓂᐅᓕᕐᓱᑕ ᐱᓇᓱᐊᕈᓯᐅᑉ ᑭᖑᓪᓕᐹᖓᒥ. ᓯᕗᓪᓕᒥ ᐊᓪᓕᑑᓚᐅᕐᑐᓂ, ᕿᑭᕐᑕᒥ ᐃᑦᓴᓂᑕᕐᓂᐊᕕᕕᓂᑦᑎᓂ ᑐᒃᓯᐊᓂᖃᓚᐅᔪᔪᖅ ᑐᒃᓯᐊᕆᐊᕐᑐᕕᓃᑦ (ᐊᕙᑕᐅᑉ ᐃᑦᓴᓂᑕᕐᓂᐊᑎᖁᑎᖓᓂᒃ) ᑖᒥ ᐅᐃᑖᓗᑦᑐᒥᒃ ᒪᓕᑦᓱᑎᒃ ᐅᓂᒃᑳᕕᐅᑎᓪᓗᒋᑦ ᓴᒡᒐᓂᐅᕋᑖᓛᐅᕐᑑᑉ ᒥᑦᓵᓄᑦ. ᓂᕿᑦᓯᑐᓂ 16-ᒨᓕᖓᔪᓂᒃ, ᐸᕐᓇᓯᒪᔪᖃᓚᐅᔪᔪᖅ ᑕᑯᑦᓴᐅᑎᑦᓯᑎᓪᓗᑕ ᓇᕝᕚᖃᑦᑕᑕᕕᓂᑦᑎᓂᒃ ᐃᑦᓴᓂᑕᕐᓂᒃ ᑐᑭᓯᓂᐊᕐᕕᐅᑉ ᐃᓕᓴᕐᕕᖓᓂ. ᑖᒃᑯᐊ ᒪᕐᕉᒃ ᐱᓇᓱᐊᕐᓂᕗᑦ ᐊᒥᓱᑲᓪᓚᓄᑦ ᐃᓄᓐᓄᑦ ᐅᐸᑦᑕᐅᓚᐅᔪᔫ. ᑕᑯᑦᓴᐅᑎᑕᐅᔪᓂ ᐃᓚᐅᓚᐅᔪᔪᑦ ᐱᓇᓱᐊᕈᓯᐅᓚᐅᕐᑐᒥ ᓇᕝᕚᖃᑦᑕᓚᐅᔪᔭᑦᑕ ᐃᓚᖏᑦ: ᐅᔭᕋᐅᑦᓱᓂ ᓴᕕᒃ ᕿᔪᒻᒥᒃ ᐃᐳᖃᕐᓱᓂ, ᒥᕐᖁᑎᐅᓚᐅᕐᑐᕕᓂᖅ, ᓱᕐᖃᐅᓱᓂ ᐊᑦᓱᓈᓕᐊᕆᓯᒪᔪᖅ ᕿᓚᓯᒪᑦᓱᓂ, ᐊᖏᔪᕋᑕᐅᑦᓱᓂ ᓇᐅᓚᖅ ᐊᒻᒪᓗ ᕿᔫᑦᓱᓂ ᐃᓅᔭᖅ.

ᐃᑦᓴᓂᑕᕐᓂᐊᒍᓐᓇᕋᔭᓚᐅᔪᓐᖏᓚᒍᑦ ᓴᐳᑦᔭᐅᓯᒪᓐᓂᖏᑐᐊᕈᑦᑕ ᐊᑯᓕᕕᒻᒥᐅᓄᑦ ᐊᒻᒪᓗ ᖁᓕᓪᓗ ᒪᕐᕈᓘᓄᑦ ᐃᓕᓵᓄᑦ ᐅᑯᓄᖓ: ᓗᐃᓴ ᐊᐅᓪᓚᓗᒃ, ᐃᑦᑐᕕᒃ ᐊᓇᐅᑕᖅ, ᓰᒥᐅᓂ ᕿᓐᓄᐊᔪᐊᖅ, ᒫᑭ ᐃᕐᕈᒥᐊᖅ, ᓵᓐᑎ ᖁᖏᓯᕈᖅ-ᐃᔦᑦᑐᖅ, ᑎᒪᖏᐊᖅ ᓄᕙᓕᓐᖓᖅ, ᔩᓂ ᕿᓐᓄᐊᔪᐊᖅ, ᓗᐊᔭ ᐊᓕᖁ, ᑖᒪᔅ ᐊᓓᑯ, ᓘᑲᓯ ᐊᐅᓪᓚᓗᒃ, ᐃᓪᓗᑖᖅ ᐊᓇᐅᑕᖅ ᐊᒻᒪᓗ ᓈᓐᓯ ᐊᓓᑯ. ᐃᑦᓴᓂᑕᕐᓂᐊᓚᐅᔪᔪᒍᑦ ᐱᕕᖃᕐᑎᓯᒐᓱᐊᕐᓱᑕ ᐃᓄᓐᓂᒃ ᐃᓕᓵᓂᒃ ᐃᒻᒥᓂᕿᓗᑎᒃ ᖃᐅᔨᔭᕕᓂᕐᒥᑕ ᐱᐅᓯᕆᓯᒪᔭᖓᓂᒃ ᐊᓪᓚᖁᑎᓕᐅᕆᓗᑎᒃ. ᓴᐳᑦᔭᐅᓯᒪᔪᒻᒪᕆᐅᓚᐅᔪᔪᒍᑦ ᕿᒡᒋᒋᐊᒃᑯᑦ ᓄᓇᒥᒃ ᑎᒍᒥᐊᕐᑎᑯᓐᓄᑦ ᐅᕙᑦᑎᓂᒃ ᐊᐅᓚᒍᑎᖃᕐᑎᓯᓚᐅᔪᒻᒪᑕ, ᐊᒻᒪᓗ ᑲᑎᕕᒃ ᐃᓕᓐᓂᐊᓂᓕᕆᔨᒃᑯᓂᒃ ᐅᕙᑦᑎᓂᒃ ᐃᓪᓗᕈᐊᖁᑎᒥᓂᒃ ᐊᑐᕐᑎᓯᓚᐅᔪᒻᒪᑕ ᐊᒻᒪᓗ ᐃᓕᓐᓂᐊᕕᖁᑎᒥᓂᒃ ᐊᑐᕐᑕᐅᑎᑦᓯᓚᐅᔪᒻᒪᑕ ᑕᑯᑦᓴᐅᑎᑦᓯᑎᓪᓗᑕ. ᐅᐱᒍᓱᑦᑐᒪᕆᐅᒻᒥᔪᒍᑦ ᓄᓇᓕᐅᑉ ᑲᕙᒫᐱᒃᑯᖏᓐᓂᒃ ᓴᐳᑦᔨᓯᒪᓚᐅᔪᒻᒥᒪᑕ ᐅᕙᑦᑎᓂᒃ. ᐊᑯᓕᕕᒻᒥᐅᑦ ᐃᓕᓵᑦ ᐃᑦᓴᓂᑕᕐᓂᐊᖃᑕᐅᔪᑦ ᑮᓇᐅᑦᔭᓴᕐᑎᑕᐅᒍᓐᓇᓚᐅᔪᔪᑦ ᑲᑎᕕᒃ ᓄᓇᓕᓕᒫᒃ ᖃᕙᒪᖓᑕ ᐊᐅᔭᒥ ᐱᓇᓱᐊᕐᑎᓯᓂᕆᓲᖓᓄᑦ. ᕿᑭᕐᑕᔪᐊᒧᑦ ᓅᓯᒪᑫᓐᓇᓂᕆᓚᐅᔪᔭᕗᑦ (ᓂᕿᑎᒍᑦ, ᐱᓇᓲᑎᖃᕐᓂᑯᑦ, ᐊᓯᖏᑎᒍᓪᓗ) ᐊᐅᓚᑕᐅᓂᕆᖃᑦᑕᓚᐅᔪᔭᑦᑕᓗ ᐃᓚᖓ (ᐅᓯᐅᑦᔭᐅᓂᒃᑯᑦ, ᑎᒻᒥᔫᕐᓂᑯᑦ) ᑮᓇᐅᔭᕐᑎᑕᐅᓚᐅᔪᔪᖅ ᑲᕙᒪᑐᖃᒃᑯᓂᑦ, ᐅᓇ ᖃᕆᑕᐅᔭᑎᒍᑦ ᑐᕌᒍᑎᖓ: (http://www.sshrc-crsh.gc.ca/) ᐊᕙᑕᒃᑯᑦ ᑮᓇᐅᔭᓂᒃ ᐱᔪᕕᓃᑦ, ᐊᒻᒪᓗ ᖃᐅᔨᓴᕐᓂᖅ ᑮᓇᐅᔭᖃᕐᑎᑕᐅᑦᓱᓂ ᐅᐃᒍᐃᑦ ᓄᓇᖓᓐᓂᒥᐅᔭᓄᑦ, ᐅᓇ ᖃᕆᑕᐅᔭᑎᒍᑦ ᑐᕌᒍᑎᖓ: (http://www.institut-polaire.fr/). ᐊᒻᒪᓗ, ᐱᓇᓱᐊᕐᓂᖅ ᐊᑯᓕᕕᒻᒥᐅᓂᒃ ᐃᓕᓵᓂᒃ ᐃᓚᐅᑎᑦᓯᒐᓱᐊᕐᓂᒥᒃ ᓱᔪᑎᑦᓯᑌᓕᓂᕐᒧᑦ ᐃᑦᓴᓂᑕᕐᓂᒃ ᐊᒻᒪᓗ ᐊᓪᓚᖁᑎᓕᐅᕆᓂᒃᑯᑦ ᐱᐅᓯᖃᕐᕕᐅᓯᒪᓂᖏᓐᓂᒃ ᓇᕝᕚᑕᕕᓃᑦ ᑮᓇᐅᔭᖃᕐᑎᑕᐅᓚᐅᔪᔪᖅ ᑲᕙᒪᑐᖃᒃᑯᓂᑦᓭᓇᖅ (SSHRC-ᑯᓂᑦ).