• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᓯᕗᓂᑦᓴᑎᓐᓄᑦ ᐃᓕᓐᓂᐊᐳᖓ ᐊᐅᓚᑕᐅᓗᓂ ᐃᓄᓐᓄᑦ ᐅᕕᒐᕐᑐᓄᑦ ᓄᓇᑐᐃᓐᓇᒦᓪᓗᑎᒃ ᐃᓕᓐᓂᐊᓛᕐᑎᓗᒋᑦ ᐃᓕᓐᓂᐊᕕᕐᔪᐊᒥ ᐃᓕᓐᓂᐊᕇᒍᓐᓇᕋᔭᓐᖑᐊᒪᑕ ᐃᑦᓴᓂᑕᕐᓂᐊᓗᑎᒃ ᓄᓇᑐᐃᓐᓇᒥ, ᐃᓅᖃᑎᒌᑦᑐᓂᒃ ᑲᑎᒃᑫᖃᑦᑕᓗᑎᒃ/ᐅᑳᓚᖃᑎᒌᑦᑎᓯᖃᑦᑕᓗᑎᒃ, ᐃᓗᕐᕈᓯᑎᒎᕐᑐᑎᒍᓪᓗ ᑐᓴᕋᑦᓴᓕᐅᕐᐸᓗᑎᒃ ᐳᕐᑐᓂᓴᒥ ᐃᓕᓐᓂᐊᕕᒻᒥ. ᑕᕝᕙᓂ ᐊᕐᕌᒍᕐᒥ ᐱᓇᓱᐊᕋᑦᓴᖅ ᐱᓇᓱᐊᕐᑕᐅᓛᕐᓂᐊᑐᖅ ᑲᑐᑦᔮᖑᓗᓂ ᐳᕐᑐᓂᕐᓴᒥ ᐃᓕᓐᓂᐊᑎᓄᑦ ᓄᓇᑐᐃᓐᓇᒥ ᐃᑦᓴᓂᑕᕐᓂᐊᓂᕐᒥᒃ ᐃᓕᓐᓂᐊᑎᑕᐅᓗᑎᒃ ᕿᑭᕐᑕᔪᐊᕐᒥ.

1985-ᒥᓂᑦ, ᐊᕙᑕᖅ ᑲᒪᒋᔭᖃᕐᐸᐳᖅ ᓄᓇᑐᐃᓐᓇᒥ ᐃᑦᓴᓂᑕᕐᓂᐊᓂᕐᒥᒃ ᐃᓕᓐᓂᐊᓂᐅᓲᓂᒃ ᐱᒍᑦᔨᓱᓂ ᐊᑯᓕᕕᒻᒥᐅᓂᒃ ᐃᓕᓐᓂᐊᑎᑦᓯᓱᓂᓗ ᐃᓄᓐᓂᒃ ᐅᕕᒐᕐᑐᓂᒃ ᐃᓚᐅᑎᑦᓯᕙᑦᓱᓂᓗ ᐃᓄᒻᒪᕆᓐᓂᒃ/ᐃᓄᑐᖃᕐᓂᒃ ᐊᓪᓚᖁᑎᓕᐅᕈᑎᒋᒍᒪᑦᓱᒍ ᐱᐅᓕᑦᓯᒍᑎᒋᒍᒪᑦᓱᒍᓗ ᐊᑦᓱᐃᑐᒻᒪᕆᐅᑦᓱᓂ ᑲᔪᓯᑦᓱᓂ ᐱᐅᓯᑐᖃᕐᒥᒃ ᓄᓇᕕᐅᓪᓗ ᐱᐅᓯᕆᓯᒪᔭᖓᓂᒃ. ᐊᕙᑕᖅ ᓴᐳᑦᔨᓯᒪᓚᐅᔪᒻᒥᔪᖅ ᖃᓪᓗᓈᑦ ᓄᓇᖓᓐᓅᓂᖏᓐᓂᒃ ᐃᓄᐃᑦ ᐅᕕᒐᕐᑐᐃᑦ ᐳᕐᑐᓂᕐᓴᒥ ᐃᓕᓐᓂᐊᓱᑎᒃ ᓴᕐᕿᓚᕿᑎᓪᓗᒍ ᐊᕙᑕᐅᑉ ᐃᑦᓴᓂᑕᕐᓂᐊᓂᕐᒧᑦ ᐱᓇᓱᐊᕈᓯᖁᑎᖓ. ᐊᕙᑕᐅᑉ ᐃᑦᓴᓂᑕᕐᓂᐊᓂᕐᒧᑦ ᐱᓇᓱᐊᕈᓯᖁᑎᖓ ᐱᒋᐊᕐᑎᑕᐅᓯᒪᔪᖅ ᐃᑲᔪᕐᓯᒪᑎᓪᓗᒍ ᑲᑎᕕᒃ ᐃᓕᓐᓂᐊᓂᓕᕆᕕᒃ ᓴᐳᑦᔨᔭᐅᑦᓱᓂ ᐃᓄᐃᑦ ᖃᖓᑦᑕᔫᒃᑯᖏᓐᓄᑦ ᐊᒻᒪᓗ ᓄᓇᓖᑦ ᐃᓕᓐᓂᐊᕕᕐᔪᐊᓗ ᐱᓇᓱᐊᖃᑎᒌᓐᓂᕆᓲᖏᓐᓄᑦ (CURA)-ᒧᑦ. CURA-ᐅᑉ ᑐᕌᕐᓂᕆᓗᐊᓐᖑᐊᑕᖓ ᑫᓪᓗᑐᐃᓗᓂ ᐃᓄᓐᓂᒃ ᐅᕕᒐᕐᑐᓂᒃ ᐃᓕᓐᓂᐊᓂᕐᒥᒃ ᓄᕐᙯᓇᓐᖏᓂᕐᒧᑦ. ᑌᑲᓂ ᐱᓇᓱᐊᕈᓯᐅᓛᕐᑐᒥ, ᐅᕕᒐᕐᑐᐃᑦ ᒧᓐᑐᔨᐊᒦᓐᓂᒥᓂ ᑲᑎᓯᖃᑦᑕᓛᕐᓂᐊᑐᑦ ᐊᑦᔨᒌᓐᖏᑐᓂᒃ ᑭᓇᒃᑯᑐᐃᓐᓇᓂᒃ ᐱᓇᓱᒐᖃᓲᓂᒃ ᐃᓗᕐᕈᓯᕐᒨᓕᖓᔪᓂᒃ, ᑌᒣᓪᓗᑎᒃ ᖃᐅᔨᒍᑎᒋᒐᔭᕋᒥᐅᒃ ᓯᕗᓂᑦᓴᒥᓐᓂ ᐱᓇᓱᒐᕆᒍᒪᒐᔭᓐᖑᐊᑕᕐᒥᓂᒃ. ᑐᖓᓕᐊ CURA-ᐅᑉ ᑐᕌᕐᓂᕆᔭᖓ ᐅᕕᒐᕐᑐᐃᑦ ᐃᓕᓐᓂᐊᑎᓪᓗᒋᑦ ᐃᑦᓴᓂᑌᑦ ᓄᐊᑕᕕᓃᑦ ᖃᓄᐃᓘᕐᑕᐅᓲᒍᒻᒪᖔᑕ ᓴᒡᒐᑕᐅᓚᐅᕐᑐᕕᓂᐅᑦᓱᑎᒃ, ᖃᓄᖅ ᓴᓂᕐᕙᑕᐅᓯᒪᒍᓯᖃᓲᒍᒻᒪᖔᑕ ᖃᓄᕐᓗ ᓱᔪᑎᑕᐅᑦᑌᓕᓲᖑᒻᒪᖔᑕ. ᑕᑯᔭᒐᖃᕐᕖᑦ, ᐃᓕᓐᓂᐊᕕᕐᔪᐊᑦ, ᐳᕐᑐᓂᕐᓴᒥᓪᓗ ᐃᓕᓐᓂᐊᕖᑦ ᐃᓓᓐᓇᑐᐃᓐᓇᕆᕙᖏᑦ ᑎᒥᐅᔫᑦᓱᑎᒃ ᐃᓕᓐᓂᐊᑏᑦ ᐳᓛᕆᐊᖃᑦᑕᓛᕐᑕᖏᓐᓂ ᑌᑲᓂ ᐱᓇᓱᐊᕈᓯᕐᒥ.

ᑖᑦᓱᒪ ᐱᓇᓱᐊᕐᓂᐅᓛᕐᑑᑉ ᑐᕌᕐᓂᖓ ᐱᕙᓪᓕᑎᑦᓯᓗᓂ ᐊᐅᔭᒥ ᓄᓇᑐᐃᓐᓇᒦᑦᓱᑎᒃ ᐃᑦᓴᓂᑕᕐᓂᐊᓂᐅᓲᒥ ᖃᐅᔨᔭᕕᓂᖏᓐᓂᒃ ᐊᕐᖁᑎᖃᕐᓗᓂ ᐅᕕᒐᕐᑐᒋᐊᓪᓚᓅᓕᖓᑦᓱᑎᒃ ᐃᓕᓐᓂᐊᑎᑦᓯᓂᐅᓲᒥᒃ ᐊᐅᔭᐅᓕᑐᐊᕐᒪᑦ ᐃᓕᓴᕐᓇᐅᓕᕐᒪᓗ. ᒪᓂᔭᐅᒪᔪᑦ ᐅᕕᒐᕐᑐᐃᑦ ᐱᓇᓱᐊᖃᑕᐅᒐᔭᕐᓂᖏᓐᓄᑦ ᐱᓇᓱᒍᑎᒋᒍᓐᓇᐸᐅᒃ ᐃᓄᐃᑦ ᐅᕕᒐᕐᑐᐃᑦ ᓱᓪᓕᑎᑦᓯᓗᑎᒃ ᓇᒻᒥᓂᖃᕈᓐᓇᓯᓗᑎᓗ ᖃᐅᔨᔭᕕᓂᕐᒥᓂᒃ ᓄᓇᑐᐃᓐᓇᒥ ᐃᑦᓴᓂᑕᕐᓂᐊᓱᑎᒃ ᕿᑲᑫᓐᓇᑐᕕᓂᐅᑦᓱᑎᓗ ᐱᒋᐊᕆᐊᓪᓚᐸᓪᓗᑎᒃ ᐊᒻᒪᓗ ᓄᐃᑎᑦᓯᒋᐊᓪᓚᕈᑎᒋᓗᒍ ᐃᓗᕐᕈᓯᑎᒍᑦ ᑭᓇᐅᕐᓂᒥᓂᒃ. ᑖᓐᓇ ᐅᕕᒐᕐᑐᓂᒃ ᐱᕕᖃᕐᑎᓯᒻᒥᔪᖅ ᐊᓯᑦᔩᒍᓐᓇᕋᔭᕐᑎᓗᒋᑦ ᑐᑭᓯᓕᐅᒥᓗᑎᓗ ᐃᓕᓐᓂᐊᓂᐅᑉ ᒥᑦᓵᓅᓕᖓᔪᓂᒃ ᐃᓅᓯᓕᒫᖅ ᐃᓕᓐᓂᐊᓂᐊᓕᕐᓗᓂᐅᒃ ᐃᓱᒪᓐᖑᐊᒍᑎᒋᓗᒍᓗ ᓯᕗᓂᑦᓴᑎᓐᓂ ᐱᓇᓱᒐᒋᒍᒪᒐᔭᓐᖑᐊᑕᒥᓂᒃ ᐃᓅᓯᓕᒫᑦᓯᐊᖅ ᐃᓕᓐᓂᐊᕈᑎᒋᓗᒍᓗ ᐃᑦᔭᕈᒥᓇᕐᑑᓚᕿᓗᑎᒃ ᐅᕕᒐᕐᓂᓴᕐᓄᑦ ᑭᖑᕚᑦᓴᑎᓐᓄᑦ, ᐱᕙᓪᓕᐊᓕᕐᓱᑎᒃ ᑭᒡᒐᑐᕐᑎᐅᓗᑎᒃ ᓄᓇᓕᓐᓄᓗ ᓂᐱᒋᔭᐅᓗᑎᒃ, ᓱᔪᑎᑦᓯᑌᓕᒐᓱᐊᕐᓂᒧᑦ ᐃᓗᕐᕈᓯᕐᒥᒃ. ᐊᒻᒪᓗᒋᐊᓪᓚᒃ, ᑖᓐᓇ ᐱᓇᓱᐊᕐᑕᐅᓛᕐᑐᖅ ᑕᑯᑎᑦᓯᒍᓐᓇᒥᔪᖅ ᐃᓄᓐᓂᒃ ᐅᕕᒐᕐᑐᓂᒃ ᐊᑦᓱᐃᑐᒻᒪᕆᐊᓘᑦᓱᓂ ᐃᓅᖃᑎᒌᑦᑐᑦ ᐃᑲᔪᕐᑎᕇᓐᓂᕆᓲᖏᓐᓂᒃ ᐃᑦᔭᕈᒥᓇᓚᕿᑦᓱᑎᒃ ᐊᒻᒪᓗ ᐃᒻᒥᑯᐊᕐᑎᑐᑦ, ᐃᓚᐅᑎᓪᓗᒋᑦ ᐃᓄᐃᑦ ᐅᕕᒐᕐᑐᐃᑦ, ᐃᓄᑐᙯᑦ/ᐃᓄᒻᒪᕇᑦ ᐊᒻᒪᓗ ᐱᔪᓐᓇᑐᓪᓚᕇᑦ, ᐃᓘᓐᓇᑎᒃ ᐊᔪᐃᓐᓈᖃᓲᖑᑦᓱᑎᒃ ᐃᓚᐅᔪᑦ ᐃᑲᔪᕐᑎᒌᓐᓂᕆᓲᖏᓐᓂᒃ ᑭᖑᕝᕕᕈᑎᑦᓴᓕᐅᕈᑎᒋᑦᓱᒍᓗ ᓲᓱᑦᓴᖃᑦᑕᐅᑎᓗᑎᒃ ᐃᓕᓐᓂᐊᖃᑦᑕᐅᑎᖃᑦᑕᓗᑎᓗ.

ᐊᒥᕐᖄᖃᑎᒌᓐᓂᖏᓐᓄᑦ ᐅᕕᒐᕐᑐᓄᑦ ᐊᐅᓚᑕᐅᑦᓱᓂ ᓄᐃᑕᕕᓂᖏᓐᓂᒃ ᐃᑦᓴᓂᑕᕐᓂᐊᖃᑎᖃᕐᓱᑎᒃ ᓄᓇᓕᒻᒥᒃ ᐃᓕᓐᓂᐊᕕᒻᒥᐅᓂᓗ ᑕᕐᕋᒦᑦᑐᓂᒃ ᐊᕙᑕᕐᑎᒍᓪᓗ, ᐅᕕᒐᕐᑐᐃᑦ ᐃᓱᒪᑖᕕᓂᖏᑦ ᐱᓇᓱᐊᕈᒪᒐᔭᓐᖑᐊᓱᒋᑦ ᑕᑯᑦᓴᕈᓕᐅᒥᓛᕐᓂᐊᑐᑦ ᐅᕕᒐᕐᑐᓂᓗ ᑎᒍᓯᓚᕿᑎᑦᓯᓗᓂ ᐱᑦᓯᐊᑐᕆᔪᕕᓂᐅᓂᕐᒥᒃ ᑕᒪᓐᓇᓗ ᑐᑭᖃᕐᑎᑐᐃᓐᓇᕆᐊᖃᕐᓱᒍ ᐳᕐᑐᓂᕐᓴᒋᐊᓪᓚᒪᕆᒻᒥᒃ ᐃᓕᓐᓂᐊᕈᒫᓚᕿᑎᓪᓗᒋᑦ.