• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᑖᓐᓇ ᐊᕐᕌᒍᖅ ᐱᖓᑦᓯᐅᑎᐅᓚᐅᔪᕗᖅ ᐊᕙᑕᐅᑉ ᐃᑦᓴᓂᑕᕐᓂᐊᑎᖁᑎᖏᑦ ᐱᓇᓱᐊᕈᓯᖁᑎᖃᕐᑎᓗᒋᑦ. ᐊᑯᓕᕕᒻᒥᐅᑦ ᐱᖓᓲᔪᕐᑐᑦ ᐃᓕᓐᓂᐊᑏᑦ, ᐊᕐᕌᓂ ᐃᓚᐅᔪᕕᓃᑦ ᐃᑦᓴᓂᑕᕐᓂᐊᓂᕐᒧᑦ ᑲᖏᐊᑲᓪᓚᒥ ᕿᑭᕐᑕᔪᐊᒥ, ᙯᕐᖁᔭᐅᓚᐅᔪᕗᑦ ᑖᑦᓱᒧᖓ ᐱᓇᓱᐊᕈᓯᖁᑎᓕᐊᕕᓂᕐᒧᑦ. ᒪᕐᕉᒃ ᑐᕌᒐᕆᔭᐅᓪᓚᕆᓚᐅᔪᕘᒃ ᐃᓕᓐᓂᐊᑏᑦ ᖃᐅᔨᒋᐅᖁᑦᓱᒋᑦ ᐃᑦᓴᓂᑌᑦ ᓴᒡᒐᑕᕕᓂᐅᓕᕐᓱᑎᒃ ᑭᖑᓂᐊᒍᑦ ᖃᓄᐃᓘᕐᑕᐅᓲᒍᒻᒪᖔᑕ - ᖃᓄᖅ ᓇᓗᓀᒃᑯᓯᕐᑐᑕᐅᓲᒍᒻᒪᖔᑕ ᖃᓄᕐᓗ ᓇᓗᓀᒃᑯᑕᕆᓕᕐᑕᖏᑦ ᖃᕆᑕᐅᔭᒨᕐᖃᑕᐅᓲᒍᒻᒪᖔᑕ - ᐊᒻᒪᓗ ᖃᐅᔨᑎᑕᐅᓚᐅᔪᑦᓱᑎᒃ ᐊᑦᔨᒌᓐᖏᑐᓂᒃ ᐱᓇᓱᒐᒋᒍᓐᓇᑕᖏᓐᓂᒃ ᐊᑦᑐᐊᓱᑎᒃ ᐱᐅᓯᑐᖃᑦᑕ ᐊᓯᐅᖏᓐᓇᑎᑕᐅᑦᑌᓕᒋᐊᖃᕐᓂᖓᓄᑦ. ᐃᓕᓐᓂᐊᑏᑦ ᐅᑯᐊᒍᓚᐅᔪᕗᑦ: ᐄᕕ ᐊᓕᖁ, ᐃᓪᓗᑖᖅ ᐊᓇᐅᑕᖅ, ᓘᑲᓯ ᐊᐅᓪᓚᓗᒃ, ᒫᑭ ᐃᕐᕈᒥᐊᖅ, ᐅᕿᑦᑐᖅ ᐊᒫᒪᑦᑐᐊᖅ ᐊᒻᒪᓗ ᐹᑦᕆᒃ ᕿᓗᕐᕿ. ᒪᓕᑦᑕᐅᓚᐅᔪᑦ ᐃᓕᓭᔨᒧᑦ ᐅᔮᓐᑎ ᒪᒃᓚᐅᑦ-ᒧᑦ ᑐᑭᓯᓂᐊᕐᕕᒃ ᐃᓕᓐᓂᐊᕕᖓᓐᓂᑦ ᐱᓯᒪᔪᒧᑦ.

ᐊᕙᑕᕐᒥᒃ ᑕᑯᓂᐊᕐᑎᑕᐅᓯᒪᓂᕐᒥᓂ, ᐃᓕᓐᓂᐊᑏᑦ ᐅᖄᖃᑎᖃᒍᓐᓇᓯᓚᐅᔪᑦ ᐃᓚᒌᓐᓂᓕᕆᔨᒥᒃ ᒫᑕ ᐹᓕᓴᒥᒃ ᐃᓚᒐᓵᓗᒻᒥᑕ ᒥᑦᓵᓄᑦ ᐅᖄᒍᑎᖃᕐᓱᑎᒃ, ᐊᑯᓕᕕᒻᒨᓕᖓᔪᓂᒃ ᐊᑦᔨᖑᐊᑐᖃᕐᓂᒃ ᕿᒥᕐᕈᑎᑕᐅᑦᓱᑎᒃ ᑕᑯᒋᐅᕐᑎᑕᐅᑦᓱᑎᓗ ᑖᒧᓯ ᖁᒪᐅᑉ ᐅᓕᕐᓀᓯᒍᑎᓕᐊᕕᓂᖓᓂᒃ. ᖃᐅᔨᒪᑦᓯᐊᕋᓗᐊᕐᒪᖔᑕ ᐆᒪᔪᕕᓃᑦ ᓱᓇᐅᓐᓂᒪᖔᑕ ᓴᐅᓂᖏᑦᑎᒍᑦ ᓇᐅᑦᓯᑐᕐᑕᐅᓚᐅᔪᒻᒥᔪᑦ ᐊᑐᕐᓱᑎᒃ ᓴᐅᓂᕕᓃᑦ ᓄᐊᑕᐅᒪᔪᑦ ᖃᐅᔨᒪᐅᑎᖏᓐᓂᒃ. ᓄᓇᕕᒻᒥᐅᑦ ᐃᑦᓴᓂᑕᖁᑎᒥᓐᓂᒃ ᓴᓂᕐᕓᓯᒪᕕᖓᓐᓂ (ᖃᕐᒪᒥ), ᑕᑯᒋᐅᕐᑎᑕᐅᓚᐅᔪᒻᒥᔪᑦ ᓴᓇᓐᖑᐊᑕᐅᕙᑦᑐᕕᓂᕐᓂᒃ ᐃᓅᖃᑎᒌᑦᑐᑦ ᐱᐅᓯᑐᖃᖏᑦᑕᓗ ᐅᓕᕐᓀᓯᓂᑎᒍᑦ ᓇᓗᓀᕐᑕᐅᒍᓯᖏᓐᓅᓕᖓᑦᓱᑎᒃ ᐃᑦᓴᓂᑕᕐᓂᐊᓂᕐᒨᓕᖓᑦᓱᑎᓗ ᓄᐊᑕᐅᒪᔪᓂᒃ, ᑭᖑᓂᐊᒍᑦ ᐊᑦᔨᒌᓐᖏᑐᓂᒃ ᐱᓐᖑᐊᑎᑕᐅᓂᐊᓕᕐᒥᒐᒥᒃ ᐊᑐᐃᓐᓇᕈᕐᑎᑕᕕᓂᕐᒧᑦ ᔫᓕ-ᐋᓐ ᑦᕌᒻᑉᓖ-ᒧᑦ, ᖃᕐᒪᒥ ᓄᐊᑕᐅᒪᔪᓂᒃ ᐊᓪᓚᖁᑎᓕᐅᕐᑎᒧᑦ. ᐱᓐᖑᐊᑎᑕᐅᑦᓱᑎᒃ ᓇᓗᓀᕐᓯᒋᐊᖃᖃᑦᑕᓚᐅᔪᑦ ᖃᖓᓂᑕᐅᒻᒪᖔᑕ ᐊᑦᔨᒌᓐᖏᑐᑦ ᐃᑦᓴᓂᑌᑦ, ᐊᑐᕐᑎᑕᐅᑦᓱᑎᒃ ᐊᑦᔨᒌᒐᑎᒃ ᓇᓗᓀᒃᑯᓯᕐᑐᐃᒍᓯᕐᓂᒃ ᓇᕝᕚᕈᑎᒋᒐᓱᐊᕐᓱᒋᑦ ᐃᑦᓴᓂᑌᑦ ᓄᐊᑕᐅᒪᔪᑦ ᓇᓪᓕᐊᓂᑦ ᓄᓇᓕᓐᓂᑦ ᐱᓯᒪᒻᒪᖔᑕ.

ᐅᓪᓗᓂ ᑭᖑᓂᖏᓐᓂ ᐳᓛᕆᐊᕐᑎᑕᐅᖃᑦᑕᓚᐅᔪᑦ ᑕᑯᔭᕐᑐᕖᑦ ᓴᓂᕐᕓᓯᒪᕕᖏᓐᓂᒃ ᒪᑯᐊᑦ ᑕᑯᔭᕐᑐᕕᖓᓐᓂ ᑲᓇᑕᐅᑉ ᐱᐅᓯᕆᓯᒪᔭᖓᓄᑦ (McCord Museum of Canadian History-ᒥᒃ) ᐊᒻᒪᓗ ᑲᓇᑕᒥ ᑕᑯᔭᕐᑐᕖᑦ ᑎᒥᖁᑎᖓᓐᓂᒃ (CMC-ᒥᒃ), ᑖᕙᓂᓗ ᑲᑎᓯᖃᑦᑕᓚᐅᔪᑦᓱᑎᒃ ᐅᖄᖃᑎᖃᕐᓱᑎᓗ ᑕᑯᔭᕐᑐᕕᓕᕆᔨᓂᒃ ᐱᔪᓐᓇᑐᓪᓚᕆᐅᑦᓱᑎᓗ ᐊᓯᐅᖏᓐᓇᑎᑦᓯᑌᓕᔨᓂᒃ ᐃᑦᓴᓂᑕᕐᓂᒃ ᑕᑯᑦᓴᐅᑎᑕᐅᔪᑦ ᐃᓂᓪᓚᑕᐅᒪᒍᓯᖏᓐᓂᒃ ᐅᑯᓂᖓ ᑲᑎᓯᑦᓱᑎᒃ: ᔨᔅᓓᓐ ᓚᒣ, ᐸᑦᕇᓴ ᓴᑐᓚᓐ, ᔫᑎ ᖄᓪ, ᓄᐊᒪ ᕗᕌᓄ. ᔦᒥᓴᓐ ᑉᕌᓐᑦ ᐅᓂᒃᑳᕕᖃᓚᐅᔪᒻᒥᔪᖅ ᐃᓕᓐᓂᐊᑎᓂᒃ ᑕᑯᑎᑦᓱᒋᑦ ᓄᓇᖃᕐᖄᓯᒪᔪᑦ ᐃᓕᓐᓂᐊᑎᑕᐅᓂᕆᓲᖏᓐᓂᒃ CMC-ᒥ. ᑌᑰᓇ ᐳᓚᕋᕐᓂᒥᓂ ᑕᑯᒍᓐᓇᓯᓚᐅᔪᒻᒥᔪᑦ ᐃᓚᖏᓐᓂᒃ ᐱᐅᔪᒻᒪᕆᐊᓗᓐᓂᒃ ᐃᑦᓴᓂᑕᕐᓂᒃ ᓇᕝᕚᑕᐅᑕᑦᑕᓕᓂᕐᓂᒃ ᐅᑭᐅᕐᑕᑐᒥ 4000 ᐊᕐᕌᒍᐃᑦ ᐊᓂᒍᕐᓯᒪᓕᕐᑐᑦ ᖃᒻᒥᐅᓂᕐᓴᒧᑦ ᑎᑭᑦᑐᓂᒃ. ᐳᓛᕆᐊᓚᐅᔪᒻᒥᔪᑦ Redpath ᑕᑯᔭᕐᑐᕕᒻᒥᒃ ᐊᒻᒪᓗ ᐃᑦᓴᓂᑕᕐᓂᒃ ᓱᕐᖁᐃᓯᒐᓱᐊᕐᕕᒥᒃ ᒪᑭᓪ ᐃᓕᓐᓂᐊᕕᕐᔪᐊᖓᓐᓂ, ᑌᑲᓂ ᒫᕆ-ᐱᔦᕐ ᑲᑑᐊ ᑕᑯᑎᑦᓯᓚᐅᔪᑦᓱᓂ ᓄᐊᑕᐅᒪᔪᓂᒃ ᐃᓄᑐᐃᓐᓇᖄᕕᓃᑦ ᐃᑦᓴᓂᑕᖁᑎᖏᓐᓂᒃ ᑕᑯᑎᑕᐅᓚᐅᔪᑦᓱᑎᓗ ᐆᒪᔪᕕᓃᑦ ᓴᐅᓂᕕᓂᖏᓐᓂᒃ ᓄᐊᑕᐅᒪᔪᓂᒃ ᐃᓚᖃᕐᓱᑎᒃ ᐃᐊᓕᕙᐅᑉ ᕿᖓᑯᑖᓕᐊᓘᑉ ᓂᐊᖁᕕᓂᖓᓂᒃ ᐊᒻᒪᓗ ᑯᑭᑐᐊᓕᐅᑉ ᖁᐳᐊᓪᓛᑉ ᓴᐅᓂᕕᓂᖏᓐᓂᒃ. ᐃᓚᒋᔭᐅᓚᐅᔪᖅ ᐱᒻᒪᕆᐅᓂᕐᐸᐅᖃᑕᐅᑦᓱᓂ ᐃᓕᓐᓂᐊᑏᑦ ᓱᖃᑦᓯᑎᑕᐅᓂᕆᓚᐅᔪᔭᖓ ᐳᓚᕋᕐᑎᑕᐅᑦᓱᑎᒃ ᔮᓐ ᐋᐸᑦ ᐃᓕᓐᓂᐊᕕᖓᓐᓂᒃ, ᐳᕐᑐᓂᕐᓴᒥ ᐃᓕᓐᓂᐊᒋᐊᓪᓛᕕᒻᒥᒃ, ᐳᓚᕋᕐᑎᓯᑎᓪᓗᒍ ᔦᓴᓐ ᐋᓇᖃᑕᒃ ᐳᓛᕆᐊᕐᑎᑕᐅᑦᓱᑎᓗ ᑲᑎᕕᒃ ᐃᓕᓐᓂᐊᓂᓕᕆᕕᖓᓂ ᐃᓕᓐᓂᐊᑏᑦ ᐊᓂᕐᕋᒋᓲᖓᓂᒃ ᐃᓕᓐᓂᐊᓕᕋᒥᒃ, ᑕᑯᑎᒐᓱᐊᕐᓱᒋᑦ ᐃᒻᒪᖄ ᓯᕗᓂᑦᓴᕆᑐᐃᓐᓇᕆᐊᖃᕐᒥᒪᐅᒃ. ᐊᒥᓱᕕᑦᓱᑎᒃ ᓱᖃᑦᓯᑎᑕᐅᖃᑦᑕᓚᐅᔪᒻᒥᔪᑦ, ᐃᓚᐅᑎᓪᓗᒋᑦ ᑕᑯᓂᐊᕐᑎᑕᐅᑦᓱᑎᒃ ᒧᓐᑐᔨᐊᑐᖃᕐᒥᒃ ᑯᑭᑐᐊᓕᒧᑦ ᑲᓕᑦᑕᐅᓱᑎᒃ, ᐊᒻᒪᓗ ᑕᑯᓐᓇᐅᔮᕐᑎᑕᐅᒋᐊᕐᑐᓱᑎᒃ ᐊᔪᑦᑕᑐᓂᒃ ᐅᓕᒻᐱᒃ ᐱᓐᖑᐊᕕᕐᔪᐊᒥ, ᐳᓛᕆᐊᕐᑎᑕᐅᒻᒥᓱᑎᒃ ᐆᒪᔪᕕᓂᕐᓂᒃ ᑭᕝᕕᐊᑕᐅᒪᔪᓂᒃ ᐆᒪᔪᓪᓗᑐᕐᓂᓗ ᓯᓚᕐᔪᐊᓕᒫᒥᑦ ᐱᓯᒪᔪᓂᒃ ᐊᒻᒪᓗ ᒧᓐᑐᔨᐊᑉ ᖁᐱᕐᕈᖃᐅᑎᕐᔪᐊᖓᓐᓂᒃ, ᐊᒻᒪᓗ ᓂᕆᒻᒫᑎᑕᐅᑦᓱᑎᒃ ᐊᑯᓂᓂᑕᑦᓴᔭᐅᑦᓱᓂ ᓂᕆᕕᒻᒥ.

ᓇᑯᕐᒦᒃ ᐊᓐᑦᔫ ᐸᐱᑲᑦᑐᖅ ᐊᕙᑕᐅᑉ ᐃᑦᓴᓂᑕᕐᓂᐊᕕᖓᓐᓂᑦ ᐱᓯᒪᔪᖅ, ᐃᓕᓐᓂᐊᑏᑦ ᖃᐅᔨᒋᐊᓕᓕᒫᒥᓂᒃ ᖃᐅᔨᑎᑕᐅᖃᑦᑕᓚᐅᔪᒻᒪᑕ ᐃᓄᒃᑎᑐᑦ ᒧᓐᑐᔨᐊᒦᓐᓂᒥᓂ. ᑖᓐᓇ ᐱᓇᓱᐊᕐᑕᐅᔪᖅ ᐊᑑᑎᒍᓐᓇᓯᓚᐅᔪᖅ ᑮᓇᐅᔭᑎᒍᑦ ᐃᑲᔪᕐᓯᒪᑎᓪᓗᒋᑦ ᐃᓄᐃᑦ ᖃᖓᑦᑕᔫᖏᑦ, ᒪᑭᕝᕕᒃ, ᑲᑎᕕᒃ ᐃᓕᓐᓂᐊᓂᓕᕆᓂᖅ ᐊᒻᒪᓗ ᐊᕙᑕᕐᒥ SSHRC-ᒥᒃ ᐱᓇᓱᐊᕐᓂᖅ. ᐅᓇ ᓃᓂᕐᓗᒍ ᑕᑯᒋᐊᕈᒪᒍᕕᑦ: (http://www.avataq.qc.ca/en/CURA/Le-projet-ARUC). ᓇᑯᕐᒦᑐᒻᒪᕆᐅᕗᒍᑦ ᑖᒃᑯᓂᖓ!