• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᐋᕐᔪᓕᐅᑦ (ᑎᓯᐱᕆ) 18, 2011-ᒥ, ᓴᓪᓗᓂ ᑲᑦᓱᙰᑦᑐᒪᕇᑦ ᑕᑯᓐᓇᒍᒪᔪᕐᔪᐊᒍᑦᓱᑎᓗ ᑕᑯᓐᓇᕆᐊᕐᓯᒪᔪᑦ ᑕᑯᓐᓇᐅᔮᕐᑎᑕᐅᓚᐅᔪᕗᑦ ᓱᓕᔪᓐᖑᐊᓕᐊᕕᓂᕐᒥᒃ ᐊᑎᖃᕐᓱᓂ ᑲᐅᑦᔭᔪᒃ-ᒥᒃ, ᑖᓐᓇ ᐅᓂᒃᑳᑐᐊᖅ ᐊᖓᔪᕐᙯᑑᑦᓱᓂ ᐃᓕᐊᕐᕉᓚᐅᕐᑐᕕᓂᐅᑉ ᒥᑦᓵᓄᑦ, ᓱᓕᔪᓐᖑᐊᓕᐅᕐᓂᖃᕐᑎᓗᒍ ᓄᓇᕕᒻᒥᐅᑦ ᓱᓕᔪᓐᖑᐊᓕᐅᕐᕕᖁᑎᖓᑎᒍᑦ.
2009-ᒥ, ᐃᓚᒋᔭᐅᑎᓪᓗᒍ ᐃᓄᒃᑎᑑᕐᓂᐅᑉ ᓴᑐᕐᑕᐅᒐᓱᐊᕐᓂᖓᑕ ᐱᓇᓱᐊᕐᑕᐅᓂᖓᓄᑦ, ᐊᕙᑕᐅᑉ ᐃᓄᒃᑎᑐᑦ ᐅᖃᐅᓯᕐᒥᒃ ᐱᒍᑦᔨᕕᖓ ᐱᒋᐊᕐᑎᓯᓚᐅᔪᕗᖅ ᐊᑦᔨᒌᓐᖏᑐᓂ ᓱᓕᔪᓐᖑᐊᓕᐅᕆᐅᕐᓴᓂᕐᓂᒃ, ᐃᓕᓐᓂᐊᑎᑦᓯᑎᓪᓗᒋᒃ ᒧᓐᑐᔨᐊᒥᐅᒃ Les Vidanges en Cavale-ᒥᑦ ᓱᓕᔪᓐᖑᐊᓕᐅᕐᕕᒥᑦ ᐱᓯᒪᔫᒃ, ᓱᓕᔪᓐᖑᐊᓕᐅᕐᓂᒧᓪᓗ ᐊᕙᑎᓗ ᖁᓕᓪᓘᑦ ᒥᑦᓵᓃᑦᑐᑦ ᓄᓇᕕᒻᒥᐅᑦ ᐅᕕᒐᕐᑐᐃᑦ ᓄᕿᑎᕐᑕᐅᓚᕿᑎᓪᓗᒋᑦ.
ᐱᓇᓱᐊᕐᑕᐅᔪᖅ ᐊᕐᖁᑎᖃᓚᐅᔪᖅ ᓱᓕᔪᓐᖑᐊᓕᐅᕐᓂᒥᒃ ᑕᑯᓐᓇᐅᔮᕐᑕᐅᔪᖃᕐᑎᓗᒍ ᓱᓕᓪᓗᑐᓚᐅᕐᑐᕕᓂᕐᓂᒃ, ᑐᕌᕐᓂᕆᔭᐅᒐᓱᐊᕐᑎᓗᒍ ᐃᓕᓐᓂᐊᑎᑦᓯᓂᖅ ᓄᓇᕕᒻᒥᐅᓂᒃ ᐅᕕᒐᕐᑐᓂᒃ ᑕᑯᑦᓴᐅᑎᑦᓯᒐᔭᕐᑎᓗᒋᑦ ᐃᓄᐃᑦ ᐱᐅᓯᑐᖃᖓᓂᒃ ᐅᖃᐅᓯᖓᓂᓪᓗ ᐊᑦᓱᐃᑐᒻᒪᕆᐅᑦᓱᑎᒃ ᐆᒪᔪᒻᒪᕆᐅᑦᓱᑎᓗ.
ᓱᓕᔪᓐᖑᐊᓕᐅᕆᐅᕐᓴᑐᖃᕐᓂᖓᓂ, ᐅᕕᒐᕐᑐᐃᑦ ᐃᓚᖏᑦ ᑲᖐᒋᔭᖃᕐᓂᕋᕐᑐᕕᓂᐅᓚᐅᔪᑦ ᓱᓕᔪᓐᖑᐊᓕᐅᕆᐊᒥᒃ ᐃᓄᐃᑦ ᐅᓂᒃᑳᑐᐊᖓᓂᒃ ᑐᑭᓯᓐᓇᑎᑦᓯᑎᓗᑎᒃ ᓱᓕᔪᓐᖑᐊᒍᑎᓪᓗᒍ. ᑕᒪᓐᓇ ᐱᓇᓱᐊᕈᒪᔭᕕᓂᖓ ᓄᐃᓚᕿᓚᐅᔪᖅ ᓄᓇᕕᒻᒥ ᓯᕗᓪᓕᐹᑦᓯᐊᒍᑦᓱᓂ ᐅᕕᒐᕐᑐᐃᑦ ᓱᓕᔪᓐᖑᐊᓕᐅᕐᓂᖃᕐᑎᓗᒋᑦ.
ᑌᒣᒻᒪᑦ 2011-ᖑᓕᕐᒪᑦ, ᐊᒥᓱᒐᓛᓂᒃ ᓱᓕᔪᓐᖑᐊᓕᐅᕆᐅᕐᓴᓂᖃᖃᑦᑕᕇᑐᐊᕐᒪᑦ, ᓱᓕᔪᓐᖑᐊᓕᐊᕆᒐᑦᓴᓗ ᓯᑯᑦᓴᔭᒨᔭᕐᑕᐅᒌᑐᐊᕐᒪᑦ ᐊᒻᒪᓗ ᐱᒋᐅᕐᓴᖃᑦᑕᓂᖃᕇᑐᐊᕐᒪᑦ, ᓱᓕᔪᓐᖑᐊᖅ ᑲᐅᑦᔭᔪᒃ - ᐊᓯᑦᔨᑐᕐᑕᐅᒐᓛᐱᑦᓱᓂ ᐃᓄᒃᑎᑑᓕᕐᑎᑕᐅᑦᓱᓂᓗ ᐋᑕᒥ ᖃᓕᖑᒧᑦ - ᓱᓕᔪᓐᖑᐊᓕᐊᕆᒐᑦᓴᖑᓚᐅᔪᕗᖅ.
ᑲᐅᑦᔭᔪᒃ ᓱᓕᔪᓐᖑᐊᓕᐊᕆᔭᐅᒍᓐᓇᓯᓚᐅᔪᕗᖅ ᐃᑲᔪᕐᓯᒪᑎᓪᓗᒋᑦ ᐅᑯᐊ: ᓄᓇᕕᒻᒥ ᒥᕐᓱᒉᑦ ᐊᓐᓄᕌᖃᕐᑎᓯᓚᐅᔪᖅ, ᒪᑦᑎᐅᓯ ᐃᔦᑦᑐᖅ ᑮᓈᓐᖑᐊᖃᕐᑎᓯᓚᐅᔪᖅ (ᑮᓇᑉᐸᖅ), ᐃᓄᑦᔪᐊᒥ ᐅᓈᖅ ᐊᖑᑏᑦ ᑲᑐᑦᔨᖃᑎᒌᓐᓂᖓ ᐊᑐᕐᑎᓯᓚᐅᔪᖅ ᓱᓕᔪᓐᖑᐊᓕᐅᕐᑏᑦ ᐊᑐᕐᑕᖏᓐᓂᒃ ᑎᒍᒥᐊᕐᑕᖏᓐᓂᓗ, ᐄᑐᐊ ᓯᓅᐸ ᐃᓐᖏᖑᐊᕐᑕᕕᓂᖏᑦ ᑐᓴᕐᓴᐅᖃᑦᑕᑎᓪᓗᒋᑦ, ᐊᒻᒪᓗ Acme Services Scéniques ᓱᓕᔪᓐᖑᐊᓕᐅᕐᕕᖃᕐᑎᓯᑎᓪᓗᒍ ᐊᐳᑎᓐᖑᐊᒍᑦᓱᓂ ᐃᓪᓗᖑᐊᒥᒃ.
2012-ᒥ, ᓄᓇᕕᒻᒥ ᓄᓇᓕᓕᒫᓄᑦ, ᓄᓇᕕᒻᒥ ᓱᓕᔪᓐᖑᐊᓕᐅᕆᐅᕐᓴᖃᑦᑕᑐᕕᓃᑦ ᐊᕐᕕᑕᓛᕐᓂᐊᓕᕐᑐᑦ ᑕᑯᓐᓇᐅᔮᕐᑕᐅᒋᐊᕐᑐᑲᑦᑕᓗᑎᒃ ᑲᐅᑦᔭᔪᒥᒃ ᓱᓕᔪᓐᖑᐊᓕᐅᕐᑎᓗᒋᑦ.