ᓴᓪᓗᒥᐅᖅ ᐃᓄᒻᒪᕆᒃ ᐁᓴᑭ ᐹᑦᓚᔮᑦ ᐊᕙᑕᐅᑉ ᐊᖓᔪᕐᖄᖓᑕ ᑐᖓᓕᕆᓚᐅᕐᑕᖓ ᐃᓅᒍᓐᓀᑐᖅ
ᑭᓇᒨᒻᒪ¯ᑦ Taqralik Partridge
ᑐᑦᓯᒪᒍᑎᒋᒻᒪᕆᑦᓱᒍ ᐊᕙᑕᖅ ᓇᓗᓀᕐᓯᕗᖅ ᐃᓅᒍᓐᓀᓚᐅᕐᓂᖓᓂᒃ ᐃᓄᒻᒪᕆᐅᑉ ᐁᓴᕿ ᐹᑦᓚᔮᑉ.
ᐁᓴᑭ ᐹᑦᓚᔮᑦ ᐱᒋᐊᕐᑎᓯᖃᑕᐅᓚᐅᕐᓯᒪᕗᖅ ᐊᕙᑕᖅ ᐱᐅᓯᑐᖃᓕᕆᕕᒻᒥᒃ ᓂᕈᐊᕐᑕᐅᒋᐊᓕᕐᕿᑖᕐᐸᓱᓂ ᑲᑎᒪᔨᐅᓂᕐᒧᑦ ᑌᒪᓐᖓᓂᑦ ᐊᕙᑕᖅ ᐱᒋᐊᓚᐅᕐᓂᒪᑦ 1980-ᒥ ᐃᓅᒍᓐᓀᑐᐃᓐᓇᕋᑕᕐᓱᓂ. ᖁᓖᑦ ᐊᕐᕌᒍᐃᑦ ᐅᖓᑖᓄᑦ ᐊᕙᑕᐅᑉ ᐊᖓᔪᕐᖄᖓᑕ ᑐᖓᓕᕆᓚᐅᔪᔭᖓ ᐃᓅᓯᕐᒥᓂᓗ ᓂᐱᒋᔭᐅᓪᓚᕆᓲᒍᓚᐅᔪᑦᓱᓂ ᐃᓄᐃᑦ ᐃᓗᕐᕈᓯᖓᓐᓅᓕᖓᔪᓄᑦ ᐅᖃᐅᓯᖓᓅᓕᖓᔪᓄᓪᓗ.
ᐁᓴᑭᐅᑉ ᓄᓇᒥᒃ ᐊᓕᐊᒋᔭᖃᕐᓂᕆᓚᐅᔪᔭᖓ ᒪᙯᑦᑎᓚᕆᐅᓂᖓᓗ ᖃᐅᔨᒪᔭᐅᑦᓯᐊᓚᐅᔪᔫᒃ, ᐃᓅᓯᓕᒫᑲᓵᒥᓂ ᓴᓪᓗᐃᑦ ᐁᑉᐸᖏᓐᓂᒥᐅᒍᓯᒪᒐᒥ, ᑖᓐᓇ ᓄᓇᒃ ᓴᓪᓗᐃᑦ ᓯᓚᑖᓃᑦᑐᖅ.
ᐁᓴᑭᐅᑉ ᐊᓕᐊᓱᑐᐃᓐᓇᓱᓂ ᐱᐅᓯᕆᓚᐅᔪᔭᖓ ᐊᔪᐃᓐᓇᐅᔨᓂᖓᓗ ᓴᓪᓗᒥᐅᒍᖃᑎᒥᓂᒃ ᐱᐅᔪᑎᒍᑦ ᓱᕐᕃᓂᖃᖃᑦᑕᓚᐅᔪᖅ ᑭᓇᓕᒫᑦᓯᐊᓂᒃ ᖃᐅᔨᒪᔮᓕᓐᓂᒃ ᐁᓴᑭᒥᒃ. ᐃᓅᒍᓐᓀᓱᓂ ᐅᒡᒍᓇᕐᑐᒪᕆᐊᓘᒐᓗᐊᖅ ᐃᓚᖏᓐᓄᑦ, ᐃᓅᖃᑎᖏᓐᓄᑦ ᓄᓇᕕᒻᒥᐅᓄᓪᓗ, ᐁᓴᑭ ᕿᒣᔪᖅ ᐊᐅᓚᔨᔭᐅᑦᔪᑎᑦᓯᐊᕌᓗᒻᒥᒃ ᐃᓅᓯᕆᒋᐊᓕᒻᒥᓂᒃ ᐃᓅᓯᖃᓚᐅᔪᒻᒪᑦ ᐆᑦᑑᑎᑦᓴᓯᐊᒍᑦᓱᓂ ᐃᓄᓐᓄᑦ ᐅᕕᒐᕐᓂᓴᕐᓄᑦ ᑭᖑᕚᕆᖃᑦᑕᓛᕐᑕᑎᓄᓪᓗ.
ᐱᓇᓱᐊᖃᑎᒋᕙᑦᓱᒍ ᐊᕐᕌᒍᕐᓂ ᐅᓄᕐᑐᓂ, ᐊᕙᑕᐅᑉ ᐱᓇᓱᑦᑎᖏᑦ ᑲᑎᒪᔨᖏᓪᓗ ᖃᐅᔨᒪᔭᖃᑦᓯᐊᓚᐅᔪᕗᑦ ᐁᓴᑭᐅᑉ ᐃᓅᑦᓯᐊᓂᖓᓂᒃ, ᐃᔪᕐᓇᑑᓂᖓᓂᒃ ᐃᓅᓯᕐᒥᑎᒍᓪᓗ ᓲᖑᔫᓂᖓᓂᒃ. ᐲᕐᕙᓚᑦᓯᒪᒻᒪᕆᓛᕐᓂᐊᓕᕐᑐᖅ.
ᐁᓴᑭ ᐹᑦᓚᔮᑦ ᐃᓅᒍᓐᓀᓚᐅᔪᔪᖅ ᐊᓂᕐᕋᒥᓐᓂ ᓴᓪᓗᓂ ᐊᒥᕃᔭᐅᑦ ᑕᕐᕿᖓᓂ (ᓯᑎᐱᕆ) 26, 2010-ᒥ.
