• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᐁ !

ᐃᓄᒃᑎᑑᕐᓂᐅ ᓴᑐᕐᑕᐅᒐᓱᐊᕐᓂᖓ ᐊᕙᑕᖅ ᐱᐅᓯᑐᖃᓕᕆᕕᒃᑯᑎᒎᕐᑐᖅ ᑕᒐᑕᒐ ᒪᕐᕉᓂ ᐱᓇᓱᐊᕈᓰᓐᓂ ᓱᓕᔪᓐᖑᐊᓕᐅᕆᐅᕐᓴᓂᕐᒥᒃ ᐃᓕᓐᓂᐊᑎᑦᓯᓂᖃᕐᑐᖅ ᐃᓄᑦᔪᐊᒥ ᔪᓓ 5-ᒥᑦ 16-ᒧᑦ 2010-ᒥ.

ᑲᔪᓯᑎᑕᐅᑦᓱᓂ Onira Lussier-ᒧᑦ Marie Deaudelin-ᒧᓪᓗ, Vidanges en Cavale-ᒥᑦ ᐱᓯᒪᔫᓐᓄᑦ, ᑕᒐᑕᒐ ᓱᓕᔪᓐᖑᐊᓕᐅᕆᐅᕐᓴᓂᖅ ᑲᔪᓯᑎᑕᐅᔪᖅ ᒪᕐᕉᓂᒃ ᐊᓯᖏᓐᓂᒃ ᓱᓕᔪᓐᖑᐊᓕᐅᕆᐅᕐᓴᓂᖃᓚᐅᔪᑎᓪᓗᒍ ᐅᑭᐊᑦᓴᐅᓚᐅᔪᔪᒥ. ᑖᓐᓇ ᐱᒋᐅᕐᓴᑎᑦᓯᓂᖅ ᑲᑎᑎᑦᓯᓚᕿᔪᖅ ᐊᕙᑎᑦ ᐅᖓᑖᓅᕐᓱᑎᒃ ᐅᕕᒐᕐᑐᓂᒃ ᐊᕐᕌᒍᖃᕐᓱᑎᒃ 14-ᒥᑦ 30-ᒧᑦ, ᓄᓇᓕᓕᒫᑲᓵᓂᑦ ᐱᓯᒪᔪᓂᒃ.

ᖃᐅᔨᓚᐅᔪᑦᓱᑕ ᐱᑦᓯᐊᑐᒻᒪᕆᐅᓚᐅᔪᓂᖏᓐᓂᒃ ᑖᒃᑯᐊ ᒪᕐᕉᒃ ᓱᓕᔪᓐᖑᐊᓕᐅᕆᐅᕐᓴᑎᑦᓯᓃᒃ, ᐅᑉᐱᕆᔭᖃᓕᕐᑐᒍᑦ ᓱᓕᔪᓐᖑᐊᓕᐅᕆᐅᕐᓴᓂᕐᒥᒃ ᐃᓕᓐᓂᐊᑎᑦᓯᓂᖅ ᑭᓐᖒᒪᒋᔭᒻᒪᕆᐅᒻᒪᑦ ᓄᓇᕕᒻᒥ. ᑐᕌᕐᓂᕆᓗᐊᓐᖑᐊᑕᕗᑦ ᐆᒻᒪᑎᖏᓐᓅᓯᒍᒪᓗᑕ ᓱᓕᔪᓐᖑᐊᓕᐅᕈᒪᓂᓪᓗᑐᕐᒥᒃ, ᐃᓕᓐᓂᐊᑎᑦᓯᓯᐊᕐᓂᓴᐅᓗᑕ ᐅᕕᒐᕐᑐᓂᒃ ᓱᓕᔪᓐᖑᐊᓕᐅᕆᐅᕐᓴᓂᕐᒥᒃ ᓄᓇᓕᒻᒥᓃᓪᓗᑎᒃ.

ᑖᓐᓇ ᓱᓕᔪᓐᖑᐊᓕᐅᕆᐅᕐᓴᑎᑦᓯᓂᒻᒪᕆᒃ ᒪᕐᕉᓂ ᐱᓇᓱᐊᕈᓰᓐᓂ ᒪᕐᕉᓕᕿᖓᔪᖅ. ᓯᕗᓪᓕᒥ ᐱᓇᓱᐊᕈᓯᕐᒥ ᐃᓕᓐᓂᐊᑎᑕᐅᔪᑦ ᓱᓕᔪᓐᖑᐊᓕᐅᕆᐅᕐᓴᕈᓯᕐᓂᒃ, ᐆᑦᑑᑎᒋᓗᒋᑦ ᐃᔪᕐᓵᕆᔨ, ᐊᑐᐃᓐᓇᕈᕐᑎᓯᒪᒐᓛᒐᑎᒃ ᐃᔪᕐᓵᕆᓃᑦ, ᐃᑉᐱᓂᐊᕐᓂᖃᕐᑑᔮᕋᑎᒃ ᑮᓈᓐᖑᐊᑦ, ᐊᓯᖏᓪᓗ. ᑌᒣᓘᓚᐅᕐᑐᕕᓂᐅᓗᑕ, ᐱᓇᓱᐊᕈᓯᐅᑉ ᑐᖓᓕᐊᓂ ᓱᓕᔪᓐᖑᐊᓕᐅᓛᕐᑐᒍᑦ ᑕᑯᓐᓇᒐᖃᓗᐊᓐᖑᐊᓗᑕ ᐃᓄᐃᑦ ᐃᓗᕐᕈᓯᖓᓂᒃ ᐅᖃᐅᓯᖓᓂᓪᓗ. ᓱᓕᔪᓐᖑᐊᓕᐅᕆᐅᕐᓴᓂᕐᒦᖃᑕᐅᔪᑦ ᐊᕙᑕᐅᑉ ᐅᖃᐅᓯᓕᕆᓂᕐᒧᑦ ᐱᔪᓇᕐᓭᔨᒋᒃ, ᐋᑕᒥ ᖃᓕᖑ ᐊᒻᒪᓗ ᒨᓱᓯ ᓄᕙᓕᓐᖓᖅ ; ᐊᕙᑕᕐᒥ ᐃᓄᒃᑎᑐᑦ ᐅᖃᐅᓯᓕᕆᕕᖓᓐᓂ ᑐᑭᒧᐊᕐᑎᓯᔨ ᔦᐱᑎ ᓄᓐᖓᖅ ᐊᒻᒪᓗ ᐃᔪᒃᑲᖅ ᐱᓐᖑᐊᑐᖅ, ᐃᓄᒃᑎᑐᑦ ᐃᓕᓐᓂᐊᑎᑦᓯᔨ. ᑖᒃᑯᐊ ᐱᓇᓱᐊᕈᓰᒃ ᒪᕐᕉᒃ ᓈᑐᐊᕐᐸᓃᒃ, ᐃᒻᒥᒎᕐᑎᑐᑦ ᓄᑖᒥᒃ ᓱᓕᔪᓐᖑᐊᓕᐊᕕᓂᕐᒥᓂᒃ ᐃᓄᒃᑎᑑᕐᑎᓗᒍ ᑕᑯᑦᓴᐅᓂᖃᓛᕐᑐᑦ.

ᑕᕝᕘᓇᑦᓭᓇᕐᓗ, ᐅᖃᖃᑎᒌᒍᑎᖃᕐᑐᒍᑦ ᓱᓕᔪᓐᖑᐊᓕᐅᕆᐅᕐᓴᐸᑦᑐᑦ ᑲᔪᓯᒐᔭᕐᓂᖏᓐᓂᒃ ᓱᓕᔪᓐᖑᐊᓕᐅᕐᓂᓂ ᓄᓇᓕᒻᒥᑕ ᐃᓗᐊᓂ, ᑕᕝᕘᓇᓗ ᐃᑲᔪᕐᓯᒍᒪᑦᓱᒋᑦ. ᓴᕐᕿᑎᑦᓯᓂᐅᒍᒪᓯᒪᔪᖅ ᓄᓇᕕᒻᒥ ᓱᓕᔪᓐᖑᐊᓕᐅᕐᑎᓂᒃ ᖃᓂᓪᓕᕙᓪᓕᐊᑐᐃᓐᓇᑑᔮᓕᕐᑐᖅ ᐊᑑᑎᓪᓗᑐᓛᓕᕐᓂᒥᓄᑦ!

ᖃᕆᑕᐅᔭᑎᒍᑦ ᑕᑯᓇᓱᐊᕈᓐᓇᐳᑎᑦ ᐅᕙᓂ ᐃᓱᒣᔭᖃᑎᒌᕝᕕᒥ:

uqavvik.wordpress.com

ᐅᕝᕙᓘᓐᓃᑦ ᐊᕙᑕᐅᑉ ᖃᕆᑕᐅᔭᑎᒍᑦ ᓄᐃᑕᑎᑦᓯᒍᑎᖓᓐᓂ ᐅᕙᓂ:

http://www.avataq.qc.ca/fr/L-institut/Departements/Langue-Inuktitut/Atelier-theatre

ᐊᑦᓱᓀ,

ᓕᐊ ᐄᕋᒻ

ᐱᓇᓱᐊᕐᑕᐅᔪᒥᒃ ᐊᑕᐅᑦᓯᑰᕐᑎᓯᔨ

ᐊᕙᑕᖅ ᐱᐅᓯᑐᖃᓕᕆᕕᒃ

ᖃᕆᑕᐅᔭᑎᒍᑦ ᐊᓪᓚᕕᒋᒍᒪᒍᕕᐅᒃ: leahiram@avataq.qc.ca