• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

2009-ᒥ ᐊᐅᔭᒥ/ᐅᐱᕐᖔᒥ, ᐊᕙᑕᐅᑉ ᑐᓂᕐᑕᓂᐊᕐᑎᖁᑎᖏᑦ ᑐᓂᕐᑕᓂᐊᕐᓂᖃᓚᐅᔪᕗᑦ ᖃᐅᔨᓴᕐᓱᑎᒃ ᖃᓄᖅ ᐱᐅᒃᑯᑎᑦᓴᔦᑦ ᐅᔭᕃᓐᓀᑦ ᓴᓇᕐᕈᑎᓕᐅᕈᑎᑦᓴᐅᓱᑎᒃ ᐱᔭᐅᕙᓐᓂᒪᖔᑕ. ᓈᒻᒪᓯᐊᕐᑐᓂᒃ ᐱᐅᒃᑯᑎᑦᓴᔭᕐᑕᓂᖅ ᐱᒻᒪᕆᐊᓘᑎᓪᓗᒍ ᐱᓇᓱᐊᕐᑕᐅᕙᑦᑐᕕᓂᖅ ᐃᓄᓐᓄᑦ ᓯᕗᓪᓕᕕᓂᖏᓐᓄᓗ ᐃᓄᕐᖄᕕᓂᕐᓄᑦ. ᐃᓚᖏᓐᓂᒃ ᐱᒻᒪᕆᐅᑦᓱᑎᒃ ᖃᐅᔨᔭᐅᔪᕕᓂᕐᓂᒃ ᐱᒍᓐᓇᑐᒍᑦ ᐆᑦᑑᑎᖃᑎᒌᑦᑎᓯᓗᑕ ᐱᐅᒃᑯᑎᑦᓴᔭᕐᑕᕕᓐᓂᒃ ᓇᔪᒐᕕᓂᕐᓂᓗ. ᐆᑦᑑᑎᒋᓗᒍ, ᓯᑐᔪᔭᐅᑦᓱᓂ ᐊᖕᒫᖅ, ᓛᐸᑐᐊᔨᒥᑦ ᐱᔭᐅᕙᑦᑐᕕᓂᐅᑦᓱᓂ, ᓴᓇᕐᕈᑎᓕᐅᕈᑕᐅᕙᑦᑐᕕᓂᖅ ᑕᑯᔭᐅᓯᒪᕗᖅ ᕿᒪᑦᑕᐅᓂᑰᑎᓪᓗᒍ ᐅᖓᓯᑦᑐᒪᕆᒻᒥ ᓴᓪᓗᐃᑦ ᒥᑦᓵᓂ, ᓴᓪᓗᐃᑦ 100-ᒍᓈᕐᑎᑐᓄᑦ ᑭᓗᒦᑕᓄᑦ ᐅᖓᓯᓐᓂᓕᒃ ᓛᐸᑐᐊᔨᒥᑦ. ᑖᓐᓇ ᐱᓇᓱᐊᕐᑕᐅᔪᖅ ᑮᓇᐅᔭᖃᕐᑎᑕᐅᓚᐅᔪᔪᖅ ᓄᓇᓖᑦ/ᐃᓕᓐᓂᐊᕕᕐᔪᐊᓗ ᖃᐅᔨᓴᖃᑎᒌᓐᓂᕆᓲᖓᓄᑦ, ᐃᓅᖃᑎᒌᑦᑐᓂᒃ ᐅᓕᕐᓀᓯᔨᕐᔪᐊᓄᑦ ᑲᓇᑕᒥ (SSHRC)-ᑯᓐᓄᑦ, ᐊᒻᒪᓗ ᑲᓇᑕᒥ ᒥᕐᖑᐃᓯᕕᓕᕆᔨᕐᔪᐊᓄᑦ (ᓛᐸᑐᐊᔨᒨᓕᖓᔪᓂᒃ) (Parks Canada (for Labrador)ᑯᓐᓄᑦ.

ᖃᐅᔨᓴᕐᓂᖃᕆᐊᓐᖓᓚᐅᔪᔪᖅ ᐅᒥᐅᔭᐅᑉ ᒥᑦᓵᓂ. ᐱᓇᓱᐊᕈᓯᕐᒥ ᓯᕗᓪᓕᐹᒥ, ᖃᐅᔨᓴᕐᑐᑦ ᐅᑯᐊᒍᓚᐅᔪᔪᑦ: ᒍᐃᓕ ᖁᒫᓗᒃ (ᒪᙯᑦᑎ-ᒪᓕᒐᖅ), ᔫ ᖁᒫᓗᒃ ᒃᔫ (ᒪᓕᒐᐅᑉ ᐃᑲᔪᕐᑎᖓ), Marianne-Marilou Leclerc (student, Université de Montréal) (ᒪᕆᔮᓐ-ᒪᕆᓘ ᓚᒃᓓᕐ, ᐃᓕᓐᓂᐊᑎ, ᒧᓐᑐᔨᐊᑉ ᐃᓕᓐᓂᐊᕕᕐᔪᐊᖓᓐᓂ) ᐊᒻᒪᓗ Pierre M. Desrosiers (archaeologist) (ᐱᔦᕐ ᑎᕉᓯᔦ, ᑐᓂᕐᑕᓂᐊᕐᑎ). ᑕᑯᓂᐊᓚᐅᔪᔪᒍᑦ ᕿᑭᕐᑕᓂᒃ ᐸᑎᕐᑑᑉ ᑰᖓᑕ ᑕᕐᕋᖓᓃᑦᑐᓂᒃ. ᐱᓇᓱᐊᕈᓯᐅᑉ ᑐᖓᓕᐊᓂ, Adrian Burke (professor, Université de Montréal) (ᐁᑦᔨᐊᓐ ᐴᒃ, ᐃᓕᓐᓂᐊᑎᑦᓯᔨᒻᒪᕆ ᒧᓐᑐᔨᐊᑉ ᐃᓕᓐᓂᐊᕕᕐᔪᐊᖓᓐᓂ) ᐊᒻᒪᓗ Jessica Giraud (post-doctorate, Avataq Cultural Institute) (ᔨᐊᓯᑲ ᔨᕉ, ᐃᓕᓐᓂᐊᕕᕐᔪᐊᒥ ᐱᒋᐅᕐᓭᒍᓐᓇᐅᑎᑖᕇᕐᓯᒪᔪᖅ, ᐊᕙᑕᕐᒥᐅᖅ) ᐃᓚᐅᓯᓚᐅᔪᔫᒃ. ᕿᒥᕐᕈᓚᐅᔪᔪᒍᑦ ᑕᓯᐅᔭᕐᒥᒃ (Lake Guillaume-Delisle)-ᒥ ᕿᑭᕐᑕᓂᓪᓗ ᓴᓂᐊᓃᑦᑐᓂᒃ ᖃᐅᔨᓴᕐᓱᑕ ᐊᖕᒫᑖᕐᕕᐅᓲᓂᒃ, ᕿᓪᓚᕿᐊᕐᑖᕕᐅᓲᓂᒃ ᖃᓐᓄᔭᕐᑖᕕᐅᓲᓂᓪᓗ.

ᐁᑦᔨᐊᓐ ᐴᒃ ᐱᔦᕐ ᑎᕉᓯᔦᓗ ᓴᓪᓗᐃᑦ ᒥᑦᓵᓄᑦ ᐊᕐᕕᑕᓕᓚᐅᔪᒻᒥᔫᒃ ᖃᐅᔨᓴᕙᓪᓗᒋᐊᕐᑐᓱᑎᒃ ᓱᒃᑯᓇᓐᖏᑑᕐᑎᒍᑦ ᓄᓇᕐᔪᐊᒥᒃ ᐅᓕᕐᓀᓯᒋᐊᕐᑐᓱᑎᒃ ᑕᔭᕋᐅᑉ ᓇᔪᒐᕕᓂᖓᓐᓂᒃ KbFk-7-ᒍᓂᕋᕐᑕᒥᒃ ᑕᑯᒐᓱᐊᕐᓱᑎᒃ ᐊᓂᕐᕋᐅᓚᐅᕐᑐᕕᓂᕐᓂᒃ ᓄᓇᐅᑉ ᐊᑖᓃᑦᑐᓂᒃ ᓴᒡᒐᑕᐅᓚᐅᕐᓯᒪᕋᑕᓐᖏᑐᓃᑦᑐᓂᒃ. ᑐᓂᕐᑕᓂᐊᕐᑐᑦ ᐅᑯᓂᖓ ᐃᓚᖃᓚᐅᔪᔪᑦ: ᐁᓴᑭ ᐹᑦᓚᔮᑦ (ᒪᙯᑦᑎ-ᒪᓕᒐᖅ), ᔩᒥ ᑲᑦᔪᓕᒃ (ᒪᙯᑦᑎᐅᑉ-ᒪᓕᒐᐅᑉ ᐃᑲᔪᕐᑎᖓ), Yves Monette (archaeologist, Canadian Museum of Civilizations) (ᐄᕝ ᒨᓂᐊᑦ, ᑐᓂᕐᑕᓂᐊᕐᑎ, ᑲᓇᑕᒥ ᑕᑯᔭᕐᑐᕕᒻᒪᕆᒻᒥᐅᖅ) ᐊᒻᒪᓗ Jean-Christophe Aznar (specialist in geophysics, INRS) (ᔮᓐ-ᒃᕆᔅᑕᕝ ᐊᔅᓈᕐ, ᐱᓯᑎᐅᕕᓕᒃ ᓄᓇᕐᔪᐊᒥᒃ ᐅᓕᕐᓀᓯᓂᕐᒥᒃ.

ᓴᒃᓚᒃ (Saglak) ᐊᒻᒪᓗ ᕌᒪ (Ramah) ᑲᖏᕐᓱᒋᒃ ᓛᐸᑐᐊᔨᒦᑦᑑᒃ ᐁᕕᐅᓱᖓᓚᐅᔪᔫᒃ ᑕᕝᕙᓂ ᐊᕐᕕᑕᕐᓂᐅᓚᐅᔪᔪᒥ. ᐊᕙᑕᖅ ᙯᕐᖁᔭᕕᓂᐅᓚᐅᔪᒻᒪᑦ Jenneth Curtis-ᒧᑦ (archaeologist, Parks Canada) (ᔨᐊᓂᑦ ᑰᔾᑎᔅ-ᒧᑦ, ᑕᓂᕐᑕᓂᐊᕐᑎ ᑲᓇᑕᒥ ᒥᕐᖑᐃᓯᕕᓕᕆᔨᒻᒪᕆᓐᓂ) ᐃᑲᔪᕐᓯᖁᔭᐅᑦᓱᓂ ᖃᐅᔨᓴᕐᓂᒧᑦ ᐅᔭᕋᕐᓂᐊᕕᒻᒥᒃ ᓴᒡᒐᕕᕕᓂᐅᑦᓱᓂ ᓛᐸᑐᐊᔨᒥᐅᔭᐅᑦᓱᓂ ᓯᑎᔪᔭᕐᒥᒃ ᐊᖕᒫᒥᒃ. ᑖᓐᓇ ᐱᓇᓱᐊᕐᑕᐅᔪᖅ ᑲᔪᓯᑎᑕᐅᒍᓐᓇᓚᐅᔪᔪᖅ ᐃᑲᔪᕐᓯᒪᑎᓪᓗᒍ ᓄᓇᑦᓯᐊᕗᑦ ᑲᕙᒪᖓ, ᑭᒡᒐᑐᕐᑎᖃᕐᓱᓂ ᑐᓂᕐᑕᓂᐊᕐᑎᒥᒃ Jamie Brake-ᒥᒃ (ᔦᓯ ᑉᕃᒃ). ᑐᓂᕐᑕᓂᐊᕐᑐᑦ ᐃᓚᑖᓚᐅᔪᔪᑦ ᐃᓕᓐᓂᐊᑎᓗᑳᓂᒃ ᑖᕙᓂᒥᐅᔭᕐᓂᒃ ᐊᒻᒪᓗ ᐃᓄᓐᓂᒃ ᒪᓕᒐᕐᓂᒃ ᑲᖏᕐᓱᔪᐊᕐᒥᐅᒍᑦᓱᑎᒃ ᓀᓂᒥᓪᓗ, ᑖᒃᑯᐊ ᐱᔭᑦᓴᖃᓚᐅᔪᔪᑦ ᐃᑉᐱᒍᓱᓐᓂᒥᒃ ᒥᕐᖑᐃᓯᕕᒻᒥ ᐊᐅᓚᓂᕆᓲᖏᓐᓂᒃ ᓇᓄᐃᑦ.

ᑐᑭᓯᒋᐊᒃᑲᓂᒍᒪᒍᕕᑦ, ᑕᑯᓇᓱᐊᕐᓗᑎᑦ ᓄᓇᓖᑦ ᐃᓕᓐᓂᐊᕕᕐᔪᐊᓗ ᖃᐅᔨᓴᖃᑎᒌᓐᓂᕆᓲᖓᓄᐊᖓᔪᓂᒃ ᖃᕆᑕᐅᔭᑎᒍᑦ ᓄᐃᑕᑎᑦᓯᕈᑎᐊᕈᖓᓐᓂ