• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᐅᑎᕋᑖᓚᐅᕐᖁᖓ ᐊᑑᑎᔭᓐᖑᐊᕌᓗᒋᓚᐅᕐᑕᕋᓂᑦ ᑲᑎᒪᓂᒻᒪᕆᖃᕐᑎᓗᒍ Canadian pavillon of the XIII International Winter Road Congress-ᒍᓂᕋᕐᑕᒥᒃ ᑯᐯᒃ ᓯᑎᒥ Centre des Congrès ᐃᓪᓗᕈᐊᖓᓐᓂ ᕕᕗᐊᕆ 8-ᒥᑦ 11-ᒧᑦ. ᑲᑎᒪᒋᐊᕐᑐᑦ ᐱᐅᑦᓴᑐᒻᒪᕆᐅᓚᐅᔪᔪᑦ ᐃᓄᒃᓱᓕᐊᕕᓂᕋᓂᒃ ᐃᑲᔪᕐᑕᐅᓱᖓ ᓴᓇᓐᖑᐊᑎᒧᑦ Laurent Gagnon-ᒧᑦ (ᓗᕌᖕ ᑳᒡᓅ).

ᖃᓕᐊᕇᑦᑎᓯᒋᐊᓚᐅᕋᓄᒃ ᐅᔭᕋᕐᓂᒃ ᐃᓄᒃᓱᓕᐊᕆᓗᒋᑦ, ᓇᓪᓕᑳᕐᖄᕆᐊᖃᓚᐅᔪᔪᒍᒃ ᐅᔭᕋᕐᓂᒃ ᐅᔭᕋᕐᓂᐊᕕᒻᒥᑦ ᑯᐯᒃ ᓯᑎᐅᑉ ᓯᓚᑎᐊᐱᐊᓂᑦ. ᑌᒣᓘᓚᐅᔪᔪᒍᒃ ᓯᕗᓕᐅᕆᑦᓱᓄᒃ ᐱᓇᓱᐊᕈᓯᕐᓄᑦ ᐅᓄᕐᑑᖏᑦᑑᒐᓗᐊᓄᑦ ᑲᑎᒪᓂᒻᒪᕆᑦᓴᖅ ᑎᑭᓴᕐᑐᓕᕐᑎᓗᒍ. ᓇᓪᓕᑳᕇᑐᐊᕋᓐᓄᒃ ᐅᔭᕋᕐᓂᒃ, ᑖᒃᑯᐊ ᐅᔭᕃᑦ ᑕᑯᑦᓴᐅᑎᑦᓯᕕᑦᓴᒨᓕᓚᐅᔪᔭᕗᑦ ᐃᓪᓗᕈᐊᒧᑦ, ᐊᑐᓂᓪᓗ ᐅᔭᕃᑦ ᓴᓗᒻᒪᓴᕐᓱᒋᑦ. ᐃᓪᓗᕈᐊᑉ ᓇᑎᖓᓂᒃ ᓴᓗᒣᓪᓕᑎᕆᑦᑌᓕᒐᓱᐊᒧᑦ, ᓴᓗᒻᒪᓭᓚᐅᔪᔪᒍᒃ ᐅᓕᑦᓴᔮᓗᓐᓂ. ᐃᓘᓐᓈᒍᑦ, ᓱᓇᓕᒫᑦᓯᐊᑦ ᐱᑦᓯᐊᑐᒻᒪᕆᐅᓚᐅᔪᔪᑦ.

ᐃᓄᒃᓱᓕᐅᕇᑐᐊᕋᒪ ᙯᕐᖁᔭᐅᓕᓚᐅᔪᔪᖓ ᑐᑭᓯᑎᑦᓯᖁᔭᐅᑦᓱᖓ ᐊᑦᔨᒌᓐᖏᑐᓂᒃ ᑐᑭᖏᓐᓂᒃ ᐊᑐᕐᑕᐅᒍᓯᖏᓐᓂᓗ ᐃᓄᒃᓲᑉ, ᑖᓐᓇ ᐅᖃᖃᑎᒌᓐᓂᖅ ᑲᖐᓱᐊᑦᑎᓯᕙᓪᓕᐊᔪᒻᒪᕆᐅᓯᓚᐅᔪᔪᖅ. ᐃᓱᒪᖃᓚᐅᔪᒐᓗᐊᕐᓱᖓ ᐅᖄᒍᒪᒐᔭᓐᖑᐊᕆᐊᒥᒃ ᓇᑦᓴᓚᐅᔪᔭᕐᒪ ᒥᑦᓵᓄᑦ: ᑲᒦᒃ, ᐊᒪᐅᑎᒃ (ᐊᕐᓇᐅᑉ ᐊᑎᒋᖓ) ᐊᒻᒪᓗᐊᓪᓛᑦ ᐅᓗᐃᑦ (ᓴᕖᑦ ᑭᓇᖏᑦ ᑕᕐᕿᐅᔮᕐᓱᑎᒃ ᓇᑉᐸᖁᐊᕐᓯᓱᑎᒃ). ᑭᓯᐊᓂ, ᑲᑎᒪᓂᒻᒪᕆᒻᒥᒃ ᐊᑐᐃᓐᓇᕈᕐᑎᕆᔪᕕᓃᑦ ᐅᖄᒍᒪᔭᕕᓂᕐᓂᐅᕙᖓ ᐱᕕᓈᕐᑎᓯᓚᐅᔪᔪᑦ ᑕᑯᑎᑦᓯ¯ᕐᓗᖓ ᑐᑭᓯᑎᑦᓯᓗᖓᓗ ᐃᓄᒃᓲᑉ ᒥᑦᓵᓄᑦ. ᐅᐱᓐᓇᕋᓂ, ᑲᑎᒪᓂᒻᒪᕆᒻᒥ ᐅᖄᔭᐅᓗᐊᓐᖑᐊᓚᐅᔪᒻᒪᑦ ᐋᕐᕿᒍᑎᑦᓴᐅᒐᔭᓐᖑᐊᑐᖅ ᓈᒻᒪᓈᕐᑐᑯᑦ ᐊᑐᕐᑕᐅᓲᒍᓂᖏᓐᓄᑦ ᓱᒃᑯᑎᑕᐅᑦᑌᓕᓲᒍᓂᖏᓐᓄᓗ ᐊᕐᖁᑏᑦ ᐅᑭᐅᒍᓕᑐᐊᕐᒪᑦ, ᐊᒻᒪᓗ ᐃᓄᒃᓱᒃ ᐊᕐᖁᑎᓄᑦ ᓇᓗᓀᒃᑯᑕᕆᔭᐅᓲᒍᒻᒪᑦ ᐊᓯᐅᒌᒃᑯᑕᐅᑦᓱᓂᓗ. ᐳᓛᕆᐊᕐᓯᒪᔪᑦ, ᐃᓚᖏᑦ ᐅᖓᓯᑦᑐᒪᕆᒻᒥᐅᑦ ᑦᓭᓇᒥᑦ ᑯᕆᐊᒥᓪᓗ, ᓱᕐᖁᐃᑐᒥᒃ ᐊᔪᒉᓪᓕᐅᑐᒻᒪᕆᐅᓚᐅᔪᔪᑦ ᐃᓄᓕᕐᑕᓂᒃ, ᑖᒃᑯᐊᓗ ᐃᓄᓕᕐᑌᑦ ᐅᓚᐱᑦᓯᒐᓛᓚᐅᔪᒐᑎᒃ ᐅᐱᒍᓱᓕᕐᐸᓕᐊᓂᖏᓐᓂᒃ ᖃᓄᖅ ᐃᓄᒃᓱᐃᑦ (ᐊᑕᐅᓯᐅᑐᐊᕋᒥ ᐃᓄᒃᓱᒃ) ᐊᑐᕐᑕᐅᓲᒍᒻᒪ¯ᑕ. ᑲᑎᒪᓂᒻᒪᕆᒃ ᐱᒋᐊᕐᑎᑕᐅᒌᑐᐊᕐᒪᑦ, ᑲᕙᒪᑐᖃᒃᑯᑦ ᑐᕐᖃᑕᕐᕕᖁᑎᖓ ᐊᐅᓚᓂᓕᕆᓂᕐᒧᑦ ᓴᓇᒪᔪᓕᐅᕐᓂᒧᓪᓗ, John Baird (ᔮᓐ ᐯᔾᑦ) ᐃᓄᒃᓱᓕᐊᓕᓚᐅᔪᔪᖅ ᑌᑰᓇᓗ ᐅᖄᖃᑎᒌᓯᑦᓱᓄᒃ. ᑲᑎᒪᒋᐊᕐᓯᒪᖃᑕᐅᔪᕐᑎᑐᑦ, ᔮᓐ ᐅᖃᓚᐅᔪᔪᖅ ᑲᖐᓱᐊᒻᒪᕆᓐᓂᕋᕐᓱᓂ ᐃᓗᕐᕈᓯᑦᑎᓂᒃ.

ᐊᑐᕐᑐᒪᕆᐅᖃᑦᑕᓚᐅᔪᔪᖓ ᐱᕕᑦᓴᖅ ᓴᕐᕿᐊᐱᑐᐊᕐᒪᑦ ᐅᖃᖃᑦᑕᓱᖓ ᖃᓄᖅ ᐊᕙᑕᖅ ᐱᐅᓯᑐᖃᓕᕆᕕᒃ ᓱᓇᓱᐊᕐᑎᓚᕆᐅᒻᒪ¯ᑦ ᐊᓯᐅᖏᓐᓇᑎᑦᓯᑌᓕᒐᓱᐊᕐᓱᓂ ᐱᐅᓯᑐᖃᑦᑎᓂᒃ ᐃᓄᒃᑎᑐᑦ ᐅᖃᐅᓯᑦᑎᓂᓗ. ᐃᓘᓐᓈᒍᑦ, ᑖᒃᑯᐊ ᐊᔪᐃᓐᓇᓂᕆᓚᐅᔪᔭᕗᑦ ᐅᐱᒋᔭᐅᔪᕆᓚᐅᔪᔭᒃᑲ; ᑭᓯᐊᓂᓗᑦᑕᐅᖅ, ᐅᑉᐱᕆᔭᖃᕐᑐᖓ ᑌᒣᓘᕐᑐᖃᓕᕐᒥᐸᑦ ᐱᐅᓂᕐᓴᐅᒐᔭᕐᖂᑐᖅ ᓇᑦᓴᓯᒍᒪ ᖁᕝᕙᑎᑦᓯᒋᐊᕈᑎᓂᒃ ᓇᓗᓀᕐᓯᓱᑎᒃ ᐊᕙᑕᕐᒥᒃ ᐱᓇᓱᐊᓲᖏᓐᓂᓗ.

ᑕᐸᓱᓐᖑᐊᓚᐅᔪᒍᓐᓀᑐᖓ ᑌᑲᓂ ᐊᑑᑎᔭᓕᒫᒃᑲᓂᒃ. ᐃᓱᒪᒋᔭᒃᑯᑦ, ᐃᓚᐅᑎᑕᐅᓂᖓ ᐃᓄᒃᓲᑉ ᑌᒣᑦᑐᓗᑐᕐᒥ ᑲᑎᒪᓂᒻᒪᕆᒻᒥ ᐱᐅᔪᒻᒪᕆᐊᓘᔪᕆᔭᕋ. ᐃᓄᒃᓱᐃᑦ ᑌᒪᓐᖓᓂᐊᐱᒃ ᐅᕙᑦᑎᓂᒃ ᐃᓄᓐᓂᒃ ᖃᐅᔨᒪᑎᑦᓯᓯᒪᔪᑦ ᓇᒧᓐᖓᓕᐊᕋᓱᐊᑦᓴᓕᕐᒪ¯ᑕ, ᐅᓪᓗᒥᓗ ᑌᒣᖏᓐᓈᓱᑎᒃ. ᐃᓄᒃᓱᐃᑦ ᓇᓗᓀᒃᑯᓯᕐᑐᐃᒪᔪᑦ ᓇᒻᒥᓂᑦᑎᓂᒃ “ᐊᕐᖁᑎᐊᓗᓕᐊᕕᓂᑦᑎᓂᒃ”, ᓇᓗᓀᒃᑯᑕᕆᔭᐅᓲᒍᒻᒪᑕ ᐊᕐᖁᑎᒋᔭᐅᓚᖓᔪᒥᒃ ᐅᐸᑦᑕᐅᒐᓱᐊᕐᑐᒥᓪᓗ. ᐊᒻᒪᓗᒋᐊᓪᓚᒃ, ᐃᒻᒪᖄ ᓯᕗᓂᑦᓴᑎᓐᓂ, ᐅᕙᒍᑦ ᓄᓇᕕᒻᒥᐅᒍᔪᒍᑦ ᐱᕙᓪᓕᐊᒍᒪᓛᕐᑐᓴᐅᒻᒥᒐᑦᑕ ᓇᒻᒥᓂᑦᑎᓂᒃ ᐊᕐᖁᑎᓂᒃ ᐱᑐᐃᔪᓂᒃ ᓄᓇᕕᒻᒥ ᓄᓇᓕᓐᓂᒃ. ᑌᒣᑐᐊᕐᐸᑦ ᐊᐅᓚᓂᐅᓲᖅ ᓇᓇᓕᒻᒥᑦ ᓄᓇᓕᐅᒻᒥᔪᒧᑦ ᐱᔭᕆᐊᑭᓪᓕᒪᕆᒐᔭᕐᑐᖅ. ᑖᓐᓇ ᐱᑦᔪᑎᒋᑦᓱᒍ, ᐊᓯᖏᑦ ᐱᒐᓗᐊᕐᒥᑎᓪᓗᒋᑦ, ᑲᑎᒪᓂᒻᒪᕆᒃ ᐅᖄᔭᑐᐊᖃᕐᓱᓂ ᐅᑭᐅᒥᒃ, ᐊᕐᖁᑎᓂᒃ ᐊᐅᓚᓂᕐᓂᓗ, ᐅᕙᑦᑎᓄᓕᒫᖅ ᐱᒻᒪᕆᐅᒻᒪᑦ, ᓄᓇᕕᒻᒥᐅᓄᒐᓚᒃ. ᑕᑯᑎᑦᓯᒍᓐᓇᓂᕆᓚᐅᔪᔭᕗᑦ ᐃᓄᒃᓱᓗᑐᕐᒥᒃ ᐱᒻᒪᕆᐅᒋᕗᖅ: ᐱᒻᒪᕆᐅᓂᕐᐸᐅᖃᑕᐅᒐᒥ ᓇᓗᓀᒃᑯᑕᕆᔭᐅᑦᓱᓂ ᐃᓗᕐᕈᓯᑦᑎᓄᑦ, ᑕᑯᑦᓴᐅᑎᑕᐅᓂᕆᓚᐅᔪᔭᖓ ᐳᐃᒍᕐᑕᐅᑲᐱᓚᖓᓐᖏᑐᖅ ᑕᑯᑎᑦᓯᓚᐅᔪᒐᒥ ᐃᓗᕐᕈᓯᑦᑎᓂᒃ, ᑕᒪᓐᓇ ᐃᑲᔪᕐᓯᓱᓂ ᐱᒻᒪᕆᐅᓂᖓᓂᒃ.

ᑭᖑᓪᓕᐹᒥ, ᓇᑯᕐᒦᒍᒪᕗᖓ Mr. Louis Gagnon-ᒥᒃ (ᓗᐃ ᑳᒡᓅ) ᐊᒻᒪᓗ Mr. Laurent Gagnon (ᕝᓛᕌᓐ ᑳᒡᓅ) ᐅᕙᓐᓂᒃ ᐃᑲᔪᓚᐅᔪᒻᒪᑎᒃ ᐊᑑᑎᓚᕿᑎᓪᓗᖓ ᑖᑦᓱᒥᖓᓐᖑᐊᕌᓗᒃ ᑕᑯᒋᐅᕐᓂᒥᒃ. ᓇᑯᕐᒦᒃ, ᐆᒻᒪᑎᒐᓂᑦ ᐱᔪᒥᑦ!

ᓴᓕ ᑕᕐᕿᖅ