ᐊᕙᑕᖅ ᑲᑎᒪᖃᑕᐅᕗᖅ ᕚᓐᑰᕙᒥᐅᑦ ᐸᕐᓀᑎᖏᑦᑕ ᑲᑎᒪᔨᖏᓐᓄᑦ (VANOC-ᑯᓄᑦ) ᐊᒻᒪᓗ ᓯᑕᒪᑦ ᑐᓐᖓᓱᑦᑎᓯᔩᑦ ᓄᓇᖃᕐᖄᓯᒪᔪᑦ ᑐᕐᖃᑕᕐᕕᖓᓐᓄᑦ (Four Host First Nations Secretariat)
ᑭᓇᒨᒻᒪ¯ᑦ ᖃᐅᔨᒪᔭᐅᓐᖏᑐᖅ
ᐊᕙᑕᖅ ᐱᐅᓯᑐᖃᓕᕆᕕᖅ ᑲᑎᒪᖃᑕᐅᓚᐅᔪᕗᖅ ᕚᓐᑰᕙᒥᐅᑦ ᐸᕐᓀᑎᖏᑦᑕ ᑲᑎᒪᔨᖏᓐᓄᑦ (VANOC-ᑯᓄᑦ) ᑲᑎᒪᐅᑎᖃᕐᓱᑎᒃ 2010-ᒥ ᓄᓇᕐᔪᐊᓕᒫᒥ ᐅᑭᐅᒥ ᐱᓐᖑᐊᓂᒻᒪᕆᐅᓛᕐᑐᒥᒃ ᑎᒥᒧᑦ ᐱᓕᐅᑦᔨᓂᕐᓄᑦ ᐊᒻᒪᓗ ᐃᓗᓯᕐᓗᑐᑦ ᑎᒥᒧᑦ ᐱᓕᐅᑦᔨᓂᕆᓛᕐᑕᖏᓐᓄᑦ ᕚᓐᑰᕙᒥ, ᐊᒻᒪᓗ ᓯᑕᒪᑦ ᑐᓐᖓᓱᑦᑎᓯᔩᑦ ᓄᓇᖃᕐᖄᓯᒪᔪᑦ ᑐᕐᖃᑕᕐᕕᖓ (Four Host First Nations Secretariat) ᑲᑎᒪᖃᑕᐅᑎᓪᓗᒍ ᑐᕓᔮᕈᑦ (ᔪᓓ) ᑕᕐᕿᖓᑕ ᐱᒋᐊᕐᓂᖓᓂ. ᑲᑎᒪᓃᑦ ᑐᕌᕐᓂᕆᓚᐅᔪᔭᖓ ᐅᖃᖃᑎᒌᒍᑎᖃᕈᒪᑦᓱᑎᒃ ᖃᓄᖅ ᐃᓚᐅᓪᓗᑐᕈᓐᓇᒪ¯ᑕ ᐃᓄᐃᑦ 2010-ᒥ ᐅᑭᐅᒥ ᐱᓐᖑᐊᓂᒻᒪᕆᖃᓕᕐᐸᑦ ᑎᒥᒧᑦ ᐱᓕᐅᑦᔨᓂᕐᓂ. ᕚᓐᑰᕙᒥᐅᑦ ᐸᕐᓀᑎᖏᑦᑕ ᑲᑎᒪᔨᖏᑦ (VANOC-ᑯᑦ) ᐊᒻᒪᓗ ᓯᑕᒪᑦ ᑐᓐᖓᓱᑦᑎᓯᔩᑦ ᓄᓇᖃᕐᖄᓯᒪᔪᑦ ᑐᕐᖃᑕᕐᕕᖓ (FHFN) ᐋᕐᖀᓯᒪᓕᕐᑐᑦ ᐃᓘᓐᓈᓄᐊᖓᔪᑦᓴᒥᒃ ᑐᕌᕐᓂᕆᔭᐅᒍᒪᔪᒥᒃ “ᖃᐅᔨᔭᐅᓚᐅᕐᓯᒪᓐᖏᑐᑦ ᓄᓇᖃᕐᖄᓯᒪᔪᑦ ᐃᓚᐅᓪᓗᑐᕆᐊᖃᕐᓂᖏᓐᓂᒃ” 2010-ᒥ ᐅᑭᐅᒥ ᐱᓐᖑᐊᓂᒻᒪᕆᓐᓂ ᑎᒥᒧᑦ ᐱᓕᐅᑦᔨᓂᕐᓄᑦ.
NICoVO-ᑯᑦ ᑲᑎᒪᒋᐊᕐᓯᒪᔪᑦ ᐃᕐᕿᓖᑦ/ᐊᓪᓓᑦ Squamish-ᐄᑦ ᑲᑎᒪᔨᒃᑯᖏᓐᓂ
Simon Ménard (ᓯᒨᓐ ᒥᓈᕐ), ᐱᓇᓱᐊᕐᓂᖃᓲᒍᑦᓱᓂ ᐊᕙᑕᒃᑯᓃᑦᑐᓂᒃ ᐃᓄᐃᑦ ᑎᖏᓐᓂᒃ, ᑲᑎᒪᖃᑕᐅᓚᐅᔪᔪᖅ ᐅᖄᒍᑎᖃᕐᓱᑎᒃ ᑮᓇᐅᔭᓕᐅᕋᓱᐊᕈᑎᑦᓴᓂᒃ ᐱᓇᓱᐊᕐᓂᑎᒍᑦ ᐃᓗᕐᕈᓯᑎᒍᓪᓗ ᐱᒍᓐᓇᓯᕕᑦᓴᓯᐊᕐᓂᒃ ᐊᑦᑐᐊᓱᑎᒃ ᐱᓐᖑᐊᓂᒻᒪᕆᓐᓄᑦ. Katarina Soukup (ᑲᑕᕇᓇ ᓲᑲᑉ) ᐊᒻᒪᓗ ᓵᒥ ᑲᓪᓚᒃ ᐊᕙᑕᕐᒥᐅᒃ ᐁᓯᒪᖃᑕᐅᓚᐅᔪᒻᒥᔫᒃ ᓱᖏᕐᑐᐃᓯᒪᒋᐊᕐᑐᓱᑎᒃ ᐃᓄᐃᑦ ᓄᓇᕕᒻᒥᐅᑦ ᓴᓇᓐᖑᐊᑏᑦ ᑕᑯᑦᓴᐅᑎᑦᓯᒍᓐᓇᖁᓪᓗᒋᑦ ᓴᓇᑐᔫᓂᕐᒥᓂᒃ ᐱᔪᓐᓇᓂᕐᒥᓂᓪᓗ ᓄᓇᕐᔪᐊᒥᐅᓄᑦ ᐃᓗᕐᕈᓯᖃᖃᑎᒌᓐᖏᑑᑦᓱᑎᒃ ᐱᓕᐅᑦᔨᑎᓄᑦ, ᑕᒪᓐᓇ ᐊᑑᑎᓛᕐᓂᐊᑐᖅ ᐊᕗᓐᓂᑎ (ᕕᕗᐊᕆ)-ᓇᑦᓯᐊᓕᐅᑦ (ᒫᑦᓯ) 2009-ᒥ ᐊᒻᒪᓗᒋᐊᓪᓚᒃ 2010-ᒥ ᐅᑭᐅᒥ ᐱᓐᖑᐊᓂᒻᒪᕆᖃᓕᕐᐸᑦ ᐱᓕᐅᑦᔨᓂᕐᓂᒃ.
ᓇᐅᓕᒫᓄᐊᖓᔪᑦ ᓴᓇᓐᖑᐊᓯᒪᔪᑦ ᑎᓕᔨᒍᑎᕕᓂᐅᑦᓱᑎᒃ VANOC-ᑯᓄᑦ ᖁᓕᓪᓗ ᑕᓪᓕᒪᓘᓂᒃ ᐱᓕᐅᑦᔨᕕᐅᔪᓃᓛᕐᓂᐊᑐᑦ ᐃᓚᖃᓛᕐᓂᐊᑐᑦ ᓴᓇᓐᖑᐊᑕᐅᒋᐊᓐᖓᑐᕕᓂᕐᓂᒃ ᓄᓇᖃᕐᖄᓯᒪᔪᓄᑦ ᓴᓇᓐᖑᐊᑎᓄᑦ ᑲᓇᑕᓕᒫᒥᑦ ᐱᓯᒪᔪᓄᑦ, ᓇᑯᕐᒦᒃ ᕚᓐᑰᕙᒥ 2010-ᒥ ᐱᓕᐅᑦᔨᕕᐅᓛᕐᑐᓂ ᓄᓇᖃᕐᖄᓯᒪᔪᑦ ᓴᓇᓐᖑᐊᑕᕕᓂᖏᑦ ᐱᓇᓱᐊᕐᑕᐅᓂᕐᒪᑕ. ᑐᒃᓯᕋᐅᑎᒃ ᓴᕐᕿᔮᕐᑎᓯᓂᕐᒧᑦ ᑲᖐᒋᔭᐅᔪᓂᒃ ᑕᑯᑦᓴᕈᕐᑎᑕᐅᓚᐅᔪᔪᖅ ᑐᕓᔮᕈᑦ (ᔪᓓ) 7-ᒥ ᐊᒻᒪᓗ ᓴᓇᓐᖑᐊᑏᑦ ᐊᐅᔭᓕᕈᑦ (ᐊᐅᒡᒍᔅᑎ) 15 ᑎᑭᕋᑕᕐᓗᒍ ᑐᓂᔨᒍᓐᓇᑐᑦ ᐃᓕᒐᓱᐊᕈᑎᒥᓐᓂᒃ, ᑭᖑᓂᐊᒍᑦ ᓇᓪᓕᑳᕐᑕᕕᓃᑦ ᙯᕐᖁᔭᐅᓂᖃᓛᕐᓂᐊᑐᑦ ᑐᒃᓯᕋᕐᕕᐅᓗᑎᒃ ᑐᑭᓯᓐᓇᓯᐊᕐᑐᒥᒃ ᒪᓂᔨᐅᑎᖏᓐᓂᒃ.
ᕚᓐᑰᕙᒥ ᑲᑎᒪᓂᐅᓚᐅᔪᔪᑦ ᐋᕐᕿᓱᕐᑕᕕᓃᑦ ᑲᓇᑕᓕᒫᒥ ᐃᓄᐃᑦ ᑲᑎᒪᔨᖏᓐᓄᑦ ᕚᓐᑰᕙᒥ 2010-ᒥ ᐱᓕᐅᑦᔨᓂᑦᓴᖓᓄᐊᖓᑎᓪᓗᒋᑦ ᑎᕆᓪᓗᓕᐅᓚᐅᔪᔪᒥ (ᐁᕆᓕᐅᓚᐅᔪᔪᒥ) ᐃᓄᐃᑦ ᑕᐱᕇᒃᑯᓄᑦ ᑲᓇᑕᒥ. ᐃᓚᐅᑎᓪᓗᒋᑦ ᑭᒡᒐᑐᕐᑏᑦ ᓯᑕᒣᓂᑦ ᐃᓄᐃᑦ ᓄᓇᖃᕐᕕᖏᓐᓂᑦ ᐱᓯᒪᔪᑦ: ᓄᓇᕕᒻᒥᑦ, ᓄᓇᕘᕐᒥᑦ, ᐃᓅᕕᐊᓗᓐᓂᑦ ᓛᐸᑐᐊᔨᒥᓪᓗ, ᑲᑎᒪᔩᑦ ᑐᑭᒧᐊᕐᑎᓯᒍᒫᕐᓂᐊᑐᑦ ᐃᓄᐃᑦ ᐱᓕᐅᑦᔨᖃᑕᐅᓂᖏᓐᓂᒃ 2010-ᒥ ᐱᓐᖑᐊᓂᒻᒪᕆᖃᓕᕐᐸᑦ. VANOC-ᑯᑦ ᓇᓪᓕᑳᕐᓂᕕᓂᖓᓄᑦ ᐃᓄᐃᑦ ᑕᕐᓴᖁᑎᒋᒐᔭᕐᑕᖓᓂᒃ – ᐃᓄᒃᓱᒥᒃ – ᑲᓇᑕᓕᒫᒥ ᐃᓄᐃᑦ ᑲᑎᒪᔨᖏᑦ ᐅᑉᐱᕆᔭᖃᒻᒪᕆᑦᑐᑦ ᓄᓇᕐᔪᐊᒥᐅᓕᒫᑦ ᖃᐅᔨᒪᒋᐊᖃᕐᒪᑕ ᓄᓇᖃᕐᖄᓯᒪᔪᑦ ᒥᑦᓵᓄᑦ ᑖᑦᓱᒪ ᐃᓄᒃᓲᑉ ᐃᓅᓂᕃᒍᓯᖓᓂᒃ.
ᑲᓇᑕᓕᒫᒥ ᐃᓄᐃᑦ ᑲᑎᒪᔨᖏᓐᓄᑦ (NICoVO-ᑯᓐᓄᑦ) ᐃᓚᐅᔪᑦ VANOC-ᑯᑦ ᐊᓪᓚᕕᖓᓐᓃᑐᑦ ᑭᓪᓕᖓᓃᑦᓱᑎᒃ Tawanee Joseph (ᑖᕗᐊᓃ ᔫᓯᕝ), ᑖᓐᓇ ᑐᑭᒧᐊᕐᑎᓯᔨᒻᒪᕆᒋᔭᐅᔪᖅ ᓯᑕᒪᑦ ᑐᓐᖓᓱᑦᑎᓯᔩᑦ ᓄᓇᖃᕐᖄᓯᒪᔪᑦ ᑐᕐᖃᑕᕐᕕᖓᓐᓄᑦ FHFN-ᒧᑦ.
Charles Dorais (ᓵᕐᓪ ᑐᕃ) ᑭᒡᒐᑐᕐᓱᓂ NICoVO-ᑯᓐᓂᒃ, ᐁᑦᑐᑕᐅᔪᖅ ᐊᖏᖃᑎᒌᒍᑎᒥᒃ ᓯᑕᒪᑦ ᑐᓐᖓᓱᑦᑎᓯᔩᑦ ᓄᓇᖃᕐᖄᓯᒪᔪᑦ ᑐᕐᖃᑕᕐᕕᖓᓐᓄᑦ FHFN-ᒧᑦ, Tawanee Joseph-ᒧᑦ (ᑖᕗᐊᓃ ᔫᓯᕝ-ᒧᑦ), ᑖᓐᓇ ᑐᑭᒧᐊᕐᑎᓯᔨᒻᒪᕆᒋᔭᐅᔪᖅ ᓯᑕᒪᑦ ᑐᓐᖓᓱᑦᑎᓯᔩᑦ ᓄᓇᖃᕐᖄᓯᒪᔪᑦ ᑐᕐᖃᑕᕐᕕᖓᓐᓄᑦ FHFN-ᒧᑦ.
ᑎᕆᓪᓗᓕᐅᓚᐅᔪᔪᒥ (ᐁᕆᓕᐅᓚᐅᔪᔪᒥ), ᐃᓄᐃᑦ ᑕᐱᕇᑦ ᑲᓇᑕᒥ ᐊᑎᓕᐅᕐᓂᖃᓚᐅᔪᔪᕗᑦ ᑐᓴᕐᑎᓯᐅᑎᒥᒃ ᑐᑭᓯᒪᖃᑎᖃᕐᓂᕋᕐᓱᑎᒃ ᓯᑕᒪᑦ ᑐᓐᖓᓱᑦᑎᓯᔩᑦ ᓄᓇᖃᕐᖄᓯᒪᔪᑦ ᑐᕐᖃᑕᕐᕕᖓᓐᓂᒃ, ᑖᒃᑯᐊ ᕚᓐᑰᕙᐅᑉ ᓯᑦᔭᖓᓐᓂᑦ ᐱᓯᒪᔪᑦ, ᓄᓇᑐᐃᓐᓇᒥᓪᓗ ᐃᕐᕿᓖᑦ/ᐊᓪᓓᑦ Salish-ᒍᓂᕋᕐᑕᐅᔪᑦ ᓄᓇᑐᖄᓗᖓ ᐱᓕᐅᑦᔨᕕᐅᓛᕐᓂᐊᑎᓪᓗᒍ: ᐅᑯᐊ ᐃᕐᕿᓖᑦ/ᐊᓪᓓᑦ ᐊᑦᔨᒌᓐᖏᑐᑦ ᐃᓚᐅᔪᑦ: Lil’wat, Musqueam, Squamish ᐊᒻᒪᓗ Tseuil-Waututh. ᐃᓕᒋᔭᐅᓂᕐᐸᐅᓱᓂ ᕚᓐᑰᕙᒥ ᐱᓕᐅᑦᔨᓂᒻᒪᕆᐅᓛᕐᑐᓄᑦ ᐃᓗᓯᕐᓗᑐᓄᓪᓗ ᐱᓕᐅᑦᔨᓂᒻᒪᕆᐅᓛᕐᑐᓄᑦ, ᓯᑕᒪᑦ ᑐᓐᖓᓱᑦᑎᓯᔩᑦ ᓄᓇᖃᕐᖄᓯᒪᔪᑦ ᑐᕐᖃᑕᕐᕕᖓ ᓱᖏᕐᑐᐃᓂᖃᓛᕐᓂᐊᑐᖅ ᐃᓄᐃᑦ, ᐃᕐᖃᓇᕐᑑᓂᖏᑦ ᐃᓗᕐᕈᓯᖏᓪᓗ ᓲᓱᒋᔭᐅᑎᑦᓯᐊᕋᓱᐊᕐᓗᒋᑦ, ᐊᒻᒪᓗ ᐱᔭᕆᐊᑭᓪᓕᑎᕆᓗᑎᒃ ᐃᓚᐅᓂᖏᓐᓂᒃ ᑲᓇᑕᒥᐅᑦ ᓄᓇᖃᕐᖄᓯᒪᔪᑦ, ᐃᕐᕿᓖᑦ/ᐊᓪᓓᑦ ᒦᑏᑦ ᐃᓄᐃᓪᓗ ᓄᓇᕐᔪᐊᓕᒫᒥ ᑎᒥᒧᑦ ᐱᓕᐅᑦᔨᓂᖃᕐᑎᓗᒍ ᐃᓗᕐᕈᓯᕐᒥᓗ ᓄᐃᑕᑎᑦᓯᓂᖃᕐᑎᓗᒍ. ᑕᑯᓐᓇᑕᐅᓗᐊᓐᖑᐊᑐᖅ ᐊᔪᐃᓐᓇᓂᖏᓐᓂ 2010-ᒥ ᓄᓇᖃᕐᖄᓯᒪᔪᑦ ᓂᐅᕐᕈᓯᕐᕕᒋᖃᑦᑕᓛᕐᑕᖓ ᕚᓐᑰᕙᐅᑉ ᓄᓇᓕᖓᑕ ᕿᑎᓪᓗᐊᖓᓃᑲᓵᑦᑐᖅ.
ᐊᕙᑕᖅ ᐃᓕᑕᕆᔭᐅᔪᑎᒍᑦ ᐃᓚᒋᔭᐅᓐᖏᑲᓗᐊᕐᓱᓂ NiCoVO-ᑯᓄᑦ, ᑭᓯᐊᓂ ᙯᕐᖁᔭᐅᓚᐅᔪᔪᖅ ᕚᓐᑰᕙᒥ ᑲᑎᒪᖃᑕᐅᖁᔭᐅᑦᓱᓂ ᓈᓚᑦᑎᑐᐃᓐᓇᐅᓗᓂ/ᐅᓐᓂᑐᐃᔨᑐᐃᓐᓇᐅᓗᓂᓗ.
ᖃᕆᑕᐅᔭᑎᒍᑦ ᐱᑐᕝᕕᓭᑦ:
ᐃᓄᐃᑦ ᑕᐱᕇᑦ ᑲᓇᑕᒥ
ᕚᓐᑰᕙᒥ, ᐅᑭᐅᒥ, 2010-ᒥ ᐱᓐᖑᐊᓂᒻᒪᕆᐅᓛᕐᑐᑦ ᑎᒥᒧᑦ ᐱᓕᐅᑦᔨᓂᕐᓄᑦ ᐊᒻᒪᓗ ᐃᓗᓯᕐᓗᑐᑦ ᑎᒥᒧᑦ ᐱᓕᐅᑦᔨᓂᖏᓐᓄᑦ
ᓯᑕᒪᑦ ᑐᓐᖓᓱᑦᑎᓯᔩᑦ ᓄᓇᖃᕐᖄᓯᒪᔪᑦ ᑐᕐᖃᑕᕐᕕᖓ (Four Host First Nations Secretariat)
ᕚᓐᑰᕙᒥ 2010-ᒥ ᐱᓕᐅᑦᔨᕕᐅᓛᕐᑐᓂ ᓄᓇᖃᕐᖄᓯᒪᔪᑦ ᓴᓇᓐᖑᐊᑕᕕᓂᖏᑦ ᐱᓇᓱᐊᕐᑕᐅᓂᖏᑦ
