ᒧᓐᑐᔨᐊᒥ ᑐᓴᕐᓂᔮᕐᑎᓯᔩᑦ ᐊᒋᐊᕈᑎᓄᑦ/ᑕᐅᑏᕐᓄᑦ ᓱᐴᒐᕐᓄᓗ (OSM) ᓄᓇᕕᒻᒥ ᐊᕐᕕᑕᕐᓂᖓ ᐱᑦᓯᐊᑐᒻᒪᕆᒃ
ᑭᓇᒨᒻᒪ¯ᑦ ᑕᕐᕋᓕᒃ ᐹᑦᑐᔨᑦᔅ, ᐊᑦᔨᓕᐅᕆᖃᑦᑕᑐᕕᓂᖅ: Robert Frechette (ᕈᐱᐊᕐ ᕝᕆᓯᐊᑦ)/ᐊᕙᑕᒃᑯᒥᐅᒃ
ᐃᓚᐅᔪᑦ OSM-ᑯᓄᑦ ᐃᓄᐃᑦ ᖃᖓᑦᑕᔫᖓᑎᒎᕐᑐᑦ Dash-8-ᑎᒍᑦ.
ᐃᓚᐅᔪᑦ OSM-ᑯᓄᑦ ᐊᒻᒪᓗ ᒥᐊᔨ ᐱᓗᕐᑑᑦ, ᑲᖏᕐᓱᔪᐊᑉ ᓯᕗᓕᕐᑎᖓ, ᖃᕐᖃᒦᑦᑐᑦ ᑕᑯᓐᓇᓱᑎᒃ ᓄᓇᓕᒻᒥᒃ. ᑕᕝᕙᓂ ᐊᑦᔨᖑᐊᒥ, ᓴᐅᒥᐊᓂᑦ ᑕᓕᕐᐱᐊᓄᑦ: Brian Robinson (ᐳᔦᔭᓐ ᕌᐱᓐᓴᓐ), Alain Desgagnes (ᐊᓓᓐ ᑎᑳᒡᓃ), Marianne Dugal (ᒪᕆᔭᓐ ᑑᑲᓪ), ᑕᕐᕋᓕᒃ ᐹᑦᑐᔨᑦᔅ, ᐄᕕ ᒫᒃ, Paul Merkelo (ᐹᓪ ᒥᕐᑯᓘ), Kent Nagano (ᑭᐊᓐᑦ ᓇᑲᓅ), Jacques Lavallee (ᔮᒃ ᓚᕙᓖ), Mathieu Harel (ᒫᓯᐅ ᖄᕆᓪ), Alexina Louie (ᐊᓕᒃᓰᓇ ᓗᐃ), James Box (ᔦᒻᔅ ᐹᒃᔅ), ᒥᐊᔨ ᐱᓗᕐᑑᑦ, Alexis Martin (ᐊᓕᐊᒃᓯᔅ ᒫᕐᑎᓐ). ᐊᑦᔨᖑᐊᒥ ᓄᐃᑕᓐᖏᑐᖅ: ᔫᐱ ᐅᐃᑖᓗᑦᑐᖅ.
ᑕᕐᕿᓂ ᐊᒥᓱᓂ ᐊᑐᐃᓐᓇᕈᕐᑎᑲᑦᑕᕇᑐᐊᕋᒥᒃ, ᑮᓇᐅᔭᕐᓯᐅᑲᑦᑕᕇᑐᐊᕋᒥᒃ ᐱᒋᐅᕐᓴᑲᑦᑕᕇᑐᐊᕋᒥᓪᓗ, OSM-ᑯᑦ ᓄᓇᕕᒻᒥ ᐊᕐᕕᑕᕐᓂᖓ ᐊᑑᑎᑦᓴᕋᑕᓯᓚᐅᔪᕗᖅ, ᐊᒥᕃᔭᐅᑦ (ᓯᑎᒻᐱᕆ) 11-ᒥᑦ 15-ᒧᑦ. ᑖᓐᓇ ᐊᕐᕕᑕᕐᓂᕆᓚᐅᔪᔭᖓ ᐃᓚᒋᔭᐅᓚᐅᔪᔪᖅ ᐃᓕᒃᑰᓱᑎᒃ ᐱᓂᐊᕐᓂᕆᖃᑦᑕᑕᖏᓐᓄᑦ ᓲᓱᑦᓴᒍᑎᒋᑦᓱᒍ OSM-ᑯᑦ 75-ᓂᒃ ᐊᕐᕌᒍᕐᑖᓂᖓᓂᒃ.
ᐊᕐᕕᑕᕐᑐᑦ 30 ᒥᑦᓵᓃᓚᐅᔪᔪᑦ ᐃᓚᖃᕐᓱᑎᒃ ᒣᔅᑦᕈ ᑭᐊᓐᑦ ᓈᑲᓅ; ᓯᑕᒪᐅᔪᓐᖏᒐᕐᑐᑦ ᑐᓴᕐᓂᕐᔮᕐᑎᓯᔩᑦ ᐱᓯᒪᑦᓱᑎᒃ OSM-ᑯᓐᓂᑦ; ᑐᓴᕐᓂᔮᕋᑦᓴᓕᐅᕐᑎ ᐊᓕᒃᓰᓇ ᓗᐃ; ᐅᖄᔨ ᔫᐱ ᐅᐃᑖᓗᑦᑐᖅ, ᑲᑕᑦᔭᑏᒃ ᐄᕕᒃ ᒫᒃ ᐊᒻᒪᓗ ᑕᕐᕋᓕᒃ ᐹᑦᑐᔨᑦᔅ; ᐊᒻᒪᓗ ᐱᓇᓱᑦᑎᐅᖃᑎᖏᑦ OSM-ᑯᑦ ᐊᕙᑕᐅᓪᓗ. ᖃᐅᔨᒪᔭᐅᒻᒪᕆᑦᑐᖅ ᖑᐊᑦᓴᑎ/ᑕᑯᓐᓇᕋᑦᓴᓂᒃ ᐊᓪᓚᓯᒪᔪᓕᐅᕐᑎ ᐊᓕᐊᒃᓯᔅ ᒫᕐᑎᓐ ᐊᕐᕕᑕᖃᑕᐅᓚᐅᔪᒻᒥᔪᖅ ᑕᑯᓐᓇᐅᔮᕐᑕᐅᔪᓂᒃ ᑐᑭᒧᐊᕐᑎᓯᔨᒋᔭᐅᑦᓱᓂ ᐱᓐᖑᐊᑕᐅᓕᑐᐊᕐᒪᑦ ᐃᓄᒃᑎᑑᕐᓱᓂ Stravinsky-ᐅᑉ (ᔅᑦᔭᕕᓐᔅᑭ) ᐅᓂᒃᑳᓕᐊᕕᓂᖓ ᐊᑎᖃᕐᑐᖅ ᐅᓇᑕᕐᑎᐅᑉ ᐅᓂᒃᑳᖓ.
ᐱᖓᓱᕕᑦᓱᑎᒃ ᑐᓴᕐᓂᔮᕐᑎᓯᖃᑦᑕᓱᑎᒃ ᑐᓴᕐᓂᔮᕐᑎᓯᐅᑎᖏᑦ ᐃᓚᖃᓚᐅᔪᔪᑦ ᑐᓴᕐᓂᔮᕋᑦᓴᓕᐊᕕᓂᕐᓂᒃ Mozart-ᒧᑦ (ᒨᑦᓵᑦ), ᐊᓕᒃᓰᓇ ᓗᐃ-ᒧᑦ, ᔅᑦᔭᕕᓐᔅᑭ-ᒧᓪᓗ. Take the Dogsled ᐊᓕᒃᓰᓇ ᓗᐃᑉ ᑐᓴᕐᓂᔮᕋᑦᓴᓕᐊᕕᓂᖓ ᐅᐊᕈᑎᖃᓚᖓᑎᓪᓗᒍ ᑲᑕᑦᔭᕙᓪᓛᓂᒃ ᐃᓚᖓᓂᓪᓗ ᐊᔪᒉᑦᑐᖑᐊᓂᒃ ᐊᑦᓴᑕᕐᕙᓛᓂᒃ, ᐃᓚᐅᑎᓪᓗᒋᒃ ᒪᕐᕉᒃ ᐅᔭᕌᒃ ᑎᒍᔭᕕᓂᐅᑦᓱᑎᒃ ᐊᑦᓴᑕᕐᑎᒧᑦ ᔮᒃ ᓚᕙᓖ-ᒧᑦ ᓇᑎᕐᓈᒦᓐᓂᒥᓂ. ᔅᑦᔭᕕᓐᔅᑭᐅᑉ ᐅᓂᒃᑳᓕᐊᕕᓂᖓ ᐅᓇᑕᕐᑎᐅᑉ ᐅᓂᒃᑳᖓ ᐱᓐᖑᐊᑕᐅᓚᐅᔪᔪᖅ ᔫᐱ ᐅᐃᑖᓗᑦᑐᖅ ᐊᑯᓐᓂᖓᓂ ᐅᖄᖃᑦᑕᑎᓪᓗᒍ ᐃᓄᒃᑎᑐᑦ.
ᐱᔭᑦᓴᓕᕋᑕᐅᑦᓱᑎᒃ ᑲᑎᒪᑎᑦᓯᑲᑦᑕᓂᕐᓂᒃ ᐅᓐᓄᑐᒃᑯᓗ ᑐᓴᕐᓂᔮᕐᑎᓯᑲᑦᑕᓂᕐᓂᒃ ᐱᖓᓱᓂ ᓄᓇᓕᓐᓂ ᓄᓇᕕᒻᒥ, ᐊᕐᕕᑕᕐᑐᑦ ᑲᔪᓯᑦᓯᐊᖑᐊᑐᐃᓐᓇᓚᐅᔪᔪᑦ ᓯᓚᕐᓂᓗᑦᓯᐅᒐᓛᒐᑎᒃ ᐊᕐᖁᑎᒥᓐᓂ. ᑭᐊᓐᑦ ᓇᑲᓅ ᐊᒻᒪᓗ OSM ᑐᓴᕐᓂᔮᕐᑎᓯᔨᖏᑦ ᑐᓐᖓᓱᑦᑎᑕᐅᓂᖃᓚᐅᔪᔪᑦ ᐃᓄᒃᔪᐊᒥ ᐅᒥᐊᕐᑐᑎᑕᐅᑦᓱᑎᒃ ᐃᓐᓇᓖᑦ ᓵᖓᑎᒍᑦ ᐊᒻᒪᓗ ᐅᓐᓄᒍᒥᑕᕐᑎᑕᐅᑦᓱᑎᒃ ᑐᒃᑐᕕᓂᕐᒥᒃ ᑯᐊᐸᐅᑉ ᓯᓂᑦᑕᕕᖓᓐᓂ.
ᓂᕿᑦᓯᑐᓂ, ᐊᒥᕃᔭᐅᑦ (ᓯᑎᒻᐱᕆ) 12-ᒥ, ᐃᓕᓐᓂᐊᑏᑦ ᐃᓐᓇᓕᐅᑉ ᐃᓕᓐᓂᐊᕕᖓᓂ ᑲᑦᓱᙰᑦᑐᒪᕆᐅᓚᐅᔪᔪᑦ ᐃᓚᐅᑦᓱᑎᒃ ᕿᑎᕋᕇᕐᓯᒪᑎᓪᓗᒍ ᑲᑎᒪᓂᐊᕈᓯᖃᕐᑎᑕᐅᑦᓱᑎᒃ OSM ᑐᓴᕐᓂᔮᕐᑎᓯᔨᖏᓐᓄᑦ. ᐃᓕᓐᓂᐊᑏᑦ ᐊᑦᑐᐃᒍᓐᓇᓯᑎᑕᐅᓚᐅᔪᔪᑦ ᑐᓴᕐᓂᔮᕐᑎᓯᒍᑎᓂᒃ ᐊᐱᕐᓱᒍᓐᓇᓯᑦᓱᑎᓪᓗ ᖃᓄᖅ ᑐᓴᕐᓂᔮᕐᑎᓯᔩᑦ ᐃᓕᑦᓯᓂᕐᒪ¯ᑕ ᐱᓐᖑᐊᕆᐊᒥᒃ.
ᐊᒥᕃᔭᐅᑦ (ᓯᑎᒻᐱᕆ) 12-ᒥ ᒣᔅᑦᕈ ᑭᐊᓐᑦ ᓇᑲᓅ ᑕᑯᓐᓇᑎᑦᓯᔪᖅ ᐃᓕᓐᓂᐊᑎᓂᒃ ᐃᓐᓇᓕᐅᑉ ᐃᓕᓐᓂᐊᕕᖓᓂ ᐃᓄᒃᔪᐊᒥ ᖃᓄᖅ ᑐᓴᕐᓂᔮᕐᑎᓯᔨᓂᒃ ᐊᑕᐅᑦᓯᑰᕐᑎᓯᔨ ᐃᓵᓪᓛᓱᓂ ᐱᓇᓱᐊᓲᒍᒻᒪ¯ᑦ. ᑕᕝᕙᓂ ᐊᑦᔨᖑᐊᒦᒻᒥᔪᑦ: ᐊᒋᐊᕐᑎ/ᑕᐅᑏᕐᑎ ᒪᕆᔭᓐ ᑑᑲᓪ, ᓃᓂᒐᐅᑦᓱᓂ ᖃᑎᑐᔪᒥᒃ ᓱᐴᒐᕐᑎ ᒫᓯᐅ ᖄᕆᓪ, ᐅᑎᕐᑕᑎᒐᕐᒥᒃ ᓱᐴᒐᕐᑎ ᔦᒻᔅ ᐹᒃᔅ, ᐊᑦᓴᑕᕐᑎ ᔮᒃ ᓚᕙᓖ.
ᐃᓕᓐᓂᐊᑏᑦ ᐃᓐᓇᓕᐅᑉ ᐃᓕᓐᓂᐊᕕᖓᓂ ᐃᑉᐱᒍᓱᒐᓱᐊᕐᑐᑦ ᐊᒋᐊᕈᑎᐅᑉ/ᑕᐅᑏᑉ ᓄᖃᕐᑕᕚᓪᓛᓂᖓᓂᒃ ᐊᒋᐊᕐᑎ/ᑕᐅᑏᕐᑎ ᐱᓐᖑᐊᑎᓪᓗᒍ ᕿᑎᕋᕇᕐᓯᒪᑎᓪᓗᒍ ᐅᖄᒋᐊᕐᑐᓯᒪᓂᕐᒥᓂ.
ᔫᐱ ᐅᐃᑖᓗᑦᑐᖅ ᐃᓄᒃᑎᑐᑦ ᐅᖄᑲᑦᑕᑐᖅ Stravinsky-ᐅᑉ (ᔅᑦᔭᕕᓐᔅᑭ) ᐅᓂᒃᑳᓕᐊᕕᓂᖓ ᐊᑎᖃᕐᑐᖅ ᐅᓇᑕᕐᑎᐅᑉ ᐅᓂᒃᑳᖓ ᐱᓐᖑᐊᑕᐅᑎᓪᓗᒍ. ᐊᑦᔨᖑᐊᒦᒻᒥᔪᑦ: ᒪᕆᔭᓐ ᑑᑲᓪ, ᐊᓓᓐ ᑎᑳᒡᓃ, ᔮᒃ ᓚᕙᓖ.
ᓯᑎᒻᐱᕆ 12-ᒥ ᑭᐊᓐᑦ ᓇᑲᓅ ᐱᒋᐊᖁᔨᔪᖅ ᑲᑕᑦᔭᑏᓐᓂᒃ ᐄᕕ ᒫᒃ-ᒥᒃ ᑕᕐᕋᓕᒃ ᐹᑦᑐᔨᑦᔅ-ᒥᓪᓗ ᐃᓄᒃᔪᐊᒥ ᑐᓴᕐᓂᔮᕐᑎᓯᓂᕐᒥᓂ ᐱᓐᖑᐊᑕᐅᑎᓪᓗᒍ Take the Dogsled ᐊᓕᒃᓰᓇ ᓗᐃᑉ ᑐᓴᕐᓂᔮᕋᑦᓴᓕᐊᕕᓂᖓ.
ᓯᑎᒻᐱᕆ 12-ᒥ ᐃᓄᒃᔪᐊᒥ ᑐᓴᕐᓂᔮᕐᑎᓯᓂᖓ ᓯᕗᓪᓕᐹᒋᑐᐃᓐᓇᓚᐅᔪᓐᖏᑕᖓ ᑐᓴᕐᓂᔮᕐᑎᓯᓂᕆᑕᖓᓂᐅᑉ OSM-ᑯᑦ ᓄᓇᕕᒻᒥ, ᑭᓯᐊᓂ ᓄᓇᕐᔪᐊᓕᒫᒥ ᓯᕗᓪᓕᐹᑦᓯᐊᒍᓚᐅᔪᔪᖅ ᑐᓴᕐᓂᔮᕋᑦᓴᓕᐅᕐᑎᐅᑉ ᐊᓕᒃᓰᓇ ᓗᐃᑉ Take the Dogsled-ᒥᒃ ᐊᑎᓕᒃ ᑐᓴᕐᓂᔮᕐᑕᐅᑎᓪᓗᒍ; ᑖᓐᓇ ᓄᑖᖅ ᑐᓴᕐᓂᔮᕋᑦᓴᓕᐊᕕᓂᖅ ᐱᓐᖑᐊᑕᐅᖁᔭᐅᔪᕕᓂᖅ OSM-ᑯᑦ ᓄᓇᕕᒻᒥ ᐊᕐᕕᑕᕐᓂᖓᓂ.
ᐃᓐᓇᓕᐅᑉ ᐃᓕᓐᓂᐊᕕᖓᑕ ᐃᙯᓕᓴᕐᕕᖓ ᑕᑕᑦᓯᐊᓚᐅᔪᔪᖅ ᐱᓐᖑᐊᕆᐊᓐᖓᑎᓪᓗᒋᑦ, ᑌᑰᓇ ᔮᓂ ᐃᓄᑉᐸᖅ ᓇᕐᑌᕌᓗᒃ ᑐᓐᖓᓱᑦᑎᓯᓚᐅᔪᔪᖅ OSM-ᑯᓂᒃ ᐅᖃᓕᒪᑦᓱᓂ ᐆᒻᒪᑎᒥᑦ ᐱᔪᓂᑦ ᐊᒻᒪᓗ ᐃᓄᒃᔪᐊᒥᐅᑦ ᑐᓴᕐᓂᔮᕐᑎᓯᔨᓂᒃ ᑐᓐᖓᓱᑦᑎᓯᒻᒪᕆᓚᐅᔪᔪᑦ ᓇᖏᕐᓱᑎᒃ ᐸᑎᑦᑕᓱᒋᑦ.
24-ᓂ ᐃᑲᐅᕐᓂᑐᓚᐅᕋᑎᓪᓘᓃᑦ ᑲᖏᕐᓱᔪᐊᕐᒥ, ᑐᓴᕐᓂᔮᕐᑎᓯᔩᑦ ᖁᓕᒥᒎᒍᓐᓇᓯᒃᑰᑲᓪᓛᐱᓚᐅᔪᒻᒥᔪᑦ ᖃᕐᖃᒨᕐᑕᐅᓱᑎᒃ ᑕᑯᓐᓇᑐᒥᒃ ᓄᓇᓕᒻᒥᒃ. ᒣᔅᑦᕈ ᓇᑲᓅ ᐊᕙᑕᐅᓪᓗ ᐊᖓᔪᕐᖄᖓ ᓵᓕ ᐋᕐᖓᖅ ᓯᑕᒪᓕᒻᒧᑦ ᖄᓐᑕᓚᐅᔪᒻᒥᔫᒃ ᓄᓇᓕᐅᑉ ᓯᓚᑖᓄᑦ. ᑲᑎᒪᓂᐊᕈᓯᖃᖃᑦᑕᓚᐅᔪᔪᖅ ᓄᓇᓕᐅᑉ ᐱᓐᖑᐊᕕᖓᓐᓂ, ᑌᑰᓇ ᐃᓅᓱᑦᑐᐃᑦ ᑲᖏᕐᓱᔪᐊᕐᒥᐅᑦ ᑲᑕᑦᔭᑏᑦ ᑲᑕᑦᔭᓂᖃᓚᐅᔪᔪᑦ ᓈᓚᑦᑕᐅᓱᑎᒃ OSM ᑐᓴᕐᓂᔮᕐᑎᓯᔨᖏᓐᓄᑦ. ᐅᓐᓄᑐᒃᑯᑦ ᑐᓴᕐᓂᔮᕐᑎᓯᓂᖃᕐᑎᓗᒋᑦ, ᒥᐊᔨ ᐱᓗᕐᑑᑦ ᐊᕐᕕᑕᕐᑐᓂᒃ ᖁᕕᐊᓲᓰᓚᐅᔪᒻᒥᔪᖅ ᓱᓇᒐᓚᓐᓂᒃ.
ᐄᕕ ᒫᒃ ᑲᑎᒪᓂᐊᕈᓯᖃᕐᑎᓯᔪᖅ ᑲᖏᕐᓱᔪᐊᕐᒥ.
ᒣᔅᑦᕈ ᓇᑲᓅ ᑐᓴᕐᓂᔮᕐᑎᓯᔨᓂᒃ ᐱᒋᐊᖁᔨᔪᖅ ᑲᖏᕐᓱᔪᐊᕐᒥ ᑐᓴᕐᓂᔮᕐᑎᓯᑦᓱᑎᒃ ᓯᑎᒻᐱᕆ 13-ᒥ.
ᑭᖑᓪᓕᐹᒥ ᑐᓴᕐᓂᔮᕐᑎᓯᔨᓂᖓ ᑰᑦᔪᐊᑉ ᐱᓐᖑᐊᕕᖓᓃᓚᐅᔪᔪᖅ ᑲᑎᑦᑕᕕᒻᒥ, ᐆᒻᒪᑎᒧᑦ ᐃᑉᐱᓂᐊᕐᓇᖏᓐᓂᓴᐅᓚᐅᔪᔪᖅ ᐊᓯᖏᑎᑐᑦ ᓄᓇᓕᐅᒻᒥᔪᓃᖃᑦᑕᓚᐅᔪᔪᓂ, ᑭᓯᐊᓂ ᐃᓄᐃᑦ ᑲᑦᓱᙰᑦᑐᒪᕆᐅᓚᐅᔪᒻᒥᔪᑦ ᑐᓴᕐᓂᔮᕆᐊᕐᑐᓱᑎᒃ. ᑭᖑᓪᓕᐹᒥᒃ ᑐᓴᕐᓂᔮᕐᑎᓯᓂᖃᕇᑐᐊᕐᒪᑕ, ᑰᑦᔪᐊᑉ ᓯᕗᓕᕐᑎᖓ ᓛᔨ ᒍᐊᑦ ᐊᑐᐃᓐᓇᐅᓚᐅᔪᒻᒥᔪᖅ ᐃᓕᒃᑰᑐᒥᒃ ᖁᕕᐊᓲᓰᑦᓱᓂ ᑭᐊᓐᑦ ᓇᑲᓅᒥᒃ OSM-ᑯᓪᓗ ᑐᓴᕐᓂᔮᕐᑎᓯᔨᖏᓐᓂᒃ.
ᑭᐊᓐᑦ ᓇᑲᓅ ᓄᓪᓗᐊᑐᕐᓂᔪᖅ ᐃᓄᓐᓂᒃ ᑐᓴᕐᓂᔮᕆᐊᕐᑐᓯᒪᔪᓂᒃ ᑭᖑᓪᓕᐹᒥᒃ ᑐᓴᕐᓂᔮᕐᑎᓯᓂᖃᓕᕐᓱᑎᒃ ᑰᑦᔪᐊᒥ, ᓯᑎᒻᐱᕆ 14, 2008-ᒥ. ᑕᕝᕙᓂ ᑕᑦᔨᖑᐊᒦᒻᒥᔪᑦ: ᐊᓓᓐ ᑎᑳᒡᓃ, ᒫᓯᐅ ᖃᕆᓪ, ᔦᒻᔅ ᐹᒃᔅ, ᐹᓪ ᒥᕐᑯᓘ.
OSM-ᑯᑦ ᓄᓇᕕᒻᒥ ᐊᕐᕕᑕᕐᓂᖓ ᑲᑦᔮᓇᕐᑐᒪᕆᐅᓚᐅᔪᔪᖅ ᐊᑑᑎᔭᐅᒋᐅᕐᓱᓂ ᐃᓚᐅᔪᓕᒫᓄᑦ, ᐃᓚᐅᑎᓪᓗᒋᑦ ᑐᓴᕐᓂᔮᕐᑎᓯᔩᑦ ᓄᓇᕕᒻᒨᓚᐅᕐᓯᒪᓐᖏᑐᑦ, ᐊᒻᒪᓗ ᐅᕙᒍᑦ ᐊᕐᕌᒍᕐᓂ ᐊᒥᓱᓂ ᑕᕐᕋᒥᒃ ᖃᐅᔨᒻᒫᖃᓕᕐᑐᒍᑦ. ᑐᓴᕐᓂᔮᕐᑎᓯᓃᑦ ᑐᓵᑦᑐᐊᓯᐊᕐᑕᐅᓚᐅᔪᔪᑦ ᓄᓇᕕᒻᒥᐅᓄᑦ ᑐᓴᕐᓂᔮᕐᑎᓯᔩᓪᓗ ᐊᒥᓱᕕᑦᓱᑎᒃ ᐅᖃᖃᑦᑕᓚᐅᔪᑦᓱᑎᒃ ᓄᓇᕕᒻᒥᐅᑦ ᑐᓐᖓᓇᕐᑐᒪᕆᐅᓂᖏᓐᓂᒃ.
ᑕᒪᒋᒃ ᐊᕙᑕᖅ OSM-ᑯᓪᓗ ᑐᓴᕐᓂᔮᕐᑎᓯᔨᖏᑦ ᐱᓇᓱᐊᕐᑐᒪᕆᐅᓚᐅᔪᔫᒃ ᑖᑦᓱᒥᖓ ᐊᕐᕕᑕᕐᓂᓴᕐᒥᒃ ᓄᓇᕕᒻᒨᑎᑦᓯᒐᓱᐊᕐᓱᑎᒃ ᖁᕕᐊᓲᑎᒋᒍᒪᑦᓱᒍ ᓄᓇᕕᒻᒥᐅᓄᑦ; ᐱᐅᔪ¯ᑎᒍᑦ ᓱᕐᕃᓂᖃᖁᑦᓱᒍ ᓄᓇᓕᖁᑎᑦᑎᓂᒃ. ᐊᕙᑕᖅ ᓇᑯᕐᒦᒍᒪᕗᖅ ᑮᓇᐅᔭᖃᕐᑎᓯᓚᐅᔪᔪᓂᒃ ᓄᓇᕕᒻᒥᐅᓂᓪᓗ ᐊᓯᖃᓐᖏᑐᒥᒃ ᓴᐳᑦᔨᓯᒪᓂᖃᓚᐅᔪᒻᒪᑕ. ᐊᕐᕕᑕᕐᓂᐅᓚᐅᔪᔪᖅ ᑭᖑᓪᓕᖃᓛᕐᓂᐊᑐᖅ OSM-ᑯᑦ ᑐᓴᕐᓂᔮᕐᑎᓯᓂᖃᕐᑎᓗᒋᑦ ᒧᓐᑐᔨᐊ-ᒥ ᓚᔅ ᐋᓐᔨᓕᔅ-ᒥᓪᓗ 2009 ᐅᐱᕐᖓᓴᖓᓂ. ᑕᒪᑐᒨᓇ ᖃᕆᑕᐅᔭᑎᒍᑦ ᖃᐅᔨᒋᐊᕐᕕᓴᖅ ᐅᓇ: http://nunavik.osm.ca
