• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᓯᑉᑎᒻᐱᕆ 11-15, 2008, ᐃᓄᒃᔪᐊᒥ, ᑲᖏᕐᓱᔪᐊᒥ, ᑰᑦᔪᐊᒥ

ᐅᐱᕐᖓᓴᒃᑯᑦ 2007-ᒥ, ᐊᕙᑕᖅ ᐱᐅᓯᑐᖃᓕᕆᕕᒃ ᐊᒻᒪᓗ ᐊᒋᐊᕈᑎᓄᑦ ᓱᐴᒐᕐᓄᓗ ᐱᖕᖑᐊᑏᑦ ᒪᓐᑐᔨᐊᒥ ᐅᖄᒋᐊᖕᖓᓚᐅᔪᑦ ᓄᓇᕕᒻᒥ ᐊᕐᕕᑕᕐᓂᐅᒐᔭᕐᑐᒥᒃ. ᐅᖄᓪᓚᕆᑦᓱᓂ ᑐᓴᕐᓂᑐᓕᐅᕐᓂᑯᑦ ᑐᑭᒧᐊᑦᑎᓯᔨᖓᑦ ᑭᐊᓐᑦ ᓈᑲᓅ Oᐳᓚ-ᑯᑦ ᑐᓴᕐᓂᑐᓕᐅᕐᓂᕆᓲᖓᓂᒃ ᑎᑭᑎᑦᓯᒍᒪᓯᒪᔪᖅ ᐊᑕᐅᓯᐅᖕᖏᑐᒧᑦ ᐅᖓᓯᑦᑐᒥᐅᓄᑦ ᐃᓄᐃᑦ ᓄᓇᓕᖏᓐᓄᑦ ᑯᐯᒃ ᑕᕐᕋᖓᓂ ᑕᒪᓐᓇ ᐊᕐᕕᑕᕐᓂᕆᓲᖏᓐᓄᑦ ᐃᓚᐅᖁᑦᓱᒍ. Oᐳᓚ-ᑯᑦ ᐱᒋᐊᓚᐅᔪᑦ ᐱᒻᒪᕆᒋᐊᕐᑐᐹᓗᒻᒥᒃ ᓯᓚᕐᔪᐊᑯᑦ ᐊᕐᕕᑕᕐᓂᒪᕆᒻᒥᒃ ᓯᑦᔭᒥᑦ-ᓯᑦᔭᒧᑦ ᑲᓇᑕᒥᐅᑎᒍᑦ ᐊᕐᕕᑕᕐᖄᓱᑎᒃ ᐁᕆᓕᐅᑎᓪᓗᒍ 2007-ᒥ ᐱᒋᐊᕐᓱᑎᒃ ᔭᓗᓀᒥ, ᑲᔪᓯᑦᓱᑎᓪᓗ ᒪᑯᓄᖓ ᕚᓐᑰᕙ, ᑳᓪᑲᕆ, ᑐᕌᓐᑐ, ᑭᑦᓯᓇ, ᐋᑐᕚ, ᑯᐯᒃ ᓯᑎ ᐊᒻᒪᓗ ᓄᕐᖃᕕᖃᕐᓱᑎᒃ ᓭᓐᑦ ᔮᓐᔅᒥᒃ, ᓂᐅᕙᐅᓐᑦᓛᓐᑦᒥ.

ᑖᓐᓇ ᓄᓇᕕᒻᒥ ᐊᕐᕕᑕᕐᓂᖅ ᐊᑦᔨᐅᖏᒻᒪᕆᑦᓱᓂ ᐃᓗᕐᖁᓯᖃᑎᒌᖕᖏᑐᓄᑦ ᐊᑦᑑᑎᓂᐅᓚᖓᔪᖅ ᓄᐃᑦᓯᓗᓂ ᓯᕗᓪᓕᐹᑦᓯᐊᒥᒃ ᐊᒋᐊᕈᑎᓄᑦ ᓱᐴᒐᕐᓄᓗ ᐱᖕᖑᐊᑏᑦ ᓯᓚᕐᔪᐊᒥᐅᓕᒫᓂ ᐱᓯᑎᐅᓂᐅᖃᑕᐅᔪᑦ ᑖᒃᑯᐊᑎᑐᑦ Oᐳᓚ-ᑎᑐᑦ ᑎᑭᓐᓂᖓᓐᓄᑦ ᑯᐯᒃ ᐅᑭᐅᕐᑕᑐᓪᓚᕆᖓᓄᑦ. ᐊᕐᕕᑕᕐᓂᖅ ᑎᑭᑎᑦᓯᓛᕐᓂᐊᑐᖅ ᐃᓄᓐᓄᑦ ᐊᑯᓂᓂᑕᒻᒪᕆᐅᑦᓱᓂ ᐅᐱᒪᐅᑎᒻᒪᕆᐅᑦᓱᓂᓗ ᐱᐅᓯᕐᓱᕈᑎᒧᑦ ᑲᔪᓯᔪᒧᑦ ᓯᓚᕐᔪᐊᓕᒫᒥ ᖃᐅᔨᒪᔭᐅᓪᓚᕆᑦᑐᒥᑦ ᐱᖕᖑᐊᕈᓯᕐᒥᑦ ᐃᑦᓴᓂᑕᒻᒪᕆᐅᑦᓱᓂ ᑐᓴᕐᓂᔮᕈᓯᕐᒥᑦ ᐱᐅᓯᑐᖃᕐᑎᒍᑦ.

ᐊᖓᔪᕐᖄᖃᕐᓗᑎᒃ ᓯᓚᕐᔪᐊᓕᒫᒥ ᖃᐅᔨᒪᔭᐅᔪᒥᒃ ᒣᔅᑦᕈ ᑭᐊᓐᑦ ᓈᑲᓅᒥᒃ, ᓯᑕᒪᐅᔪᖕᖏᒐᕐᑐᑦ ᑐᓴᕐᓂᔮᕐᑎᓯᔩᑦ Oᐳᓚ-ᑯᓂᑦ ᐱᓯᒪᔪᑦ ᐃᓚᖃᕐᓗᑎᒃ ᒪᕐᕉᓂᒃ ᑲᑕᑦᔭᑏᓐᓂᒃ ᐊᒻᒪᓗ ᐃᓄᒻᒥᒃ ᖑᐊᑦᓴᑎᒥᒃ ᐱᖕᖑᐊᓂᖃᓛᕐᓂᐊᑐᑦ ᑐᓴᕐᓂᔮᕐᑎᓯᓂᕐᓂᒃ ᑌᑦᓱᒪᓂᑕᒻᒪᕆᐅᑦᓱᓂ ᐊᒋᐊᕈᑎᓄᑦ ᓱᐴᒐᕐᓄᓗ ᐱᖕᖑᐊᑐᓂᒃ ᐊᒻᒪᓗ ᓄᑖᒥᒃ ᐱᖕᖑᐊᓂᖃᕐᓗᑎᒃ ᓴᕐᕿᓚᕿᑎᑕᕕᓂᕐᒥᑦ ᐃᓄᐃᑦ ᐱᐅᓯᑐᖃᖓᓄᑦ ᑲᓇᑕᒥᐅᔭᒥᑦ ᐱᖕᖑᐊᑎᑦᓯᔨᒧᑦ ᐊᓕᒃᓰᓇ ᓗᐃᒧᑦ. ᐃᓚᐅᖃᑦᑕᓛᕐᓂᐊᒥᔪᑦ ᐃᓕᓐᓂᐊᑎᑦᓯᒍᑎᐅᑦᓱᑎᒃ ᓱᓇᓱᐊᕐᑎᓯᓂᐅᔪᑦ ᐊᑐᓂᑦ ᓄᓇᓕᓐᓂ.

ᓄᓇᕕᒃ ᓄᓇᐅᑦᓱᓂ ᑕᕐᕋᕙᓯᒻᒦᓂᕐᐸᐅᕗᖅ ᑯᐯᓕᒫᒥ. ᐊᒻᒪᓗ 10,000 ᒥᑦᓵᓃᑦᑐᓂᒃ ᐃᓄᑦᑕᖃᕐᓱᓂ ᓄᓇᓯᒪᔪᓂᒃ - ᐊᒥᓲᓂᕐᓴᒪᕇᑦ ᐃᓄᑐᐃᓐᓇᐅᑎᓪᓗᒋᑦ - ᑖᒃᑯᐊ ᓄᓇᓖᑦ ᖁᓕᓪᓗ ᑕᓪᓕᒪᓪᓘᑦ ᓯᑦᔭᒦᑦᓱᑎᒃ. ᓄᓇᕕᒻᒥ ᐊᕐᕕᑕᕐᓂᖓᑦ ᐊᑐᓛᕐᓂᐊᑐᖅ ᓯᑉᑎᒻᐱᕆ 11-15, 2008 ᐅᓪᓗᖏᓐᓂ ᐊᒻᒪᓗ ᑎᑭᓛᕐᓱᓂ ᐃᓄᑦᔪᐊᒧᑦ (ᓄᓇᓯᒪᔪᑦ 1600), ᑲᖏᕐᓱᔪᐊᒧᑦ(ᓄᓇᓯᒪᔪᑦ 600) ᐊᒻᒪᓗ ᑰᑦᔪᐊᒧᑦ (ᓄᓇᓯᒪᔪᑦ 2100). ᑖᒃᑯᐊ ᓄᓇᓖᑦ ᐅᖓᓯᑦᑐᒪᕆᐋᓗᐃᑦ ᖃᖓᑦᑕᔫᓄᑦ ᑭᓯᐊᓂ ᑎᑭᑕᐅᒍᓐᓇᓱᑎᒃ - ᐊᕐᖁᑎᓄᑦ ᑎᑭᑕᐅᕐᖃᔭᖕᖏᑐᑦ ᖃᖓᑦᑕᔫᓄᑦ ᑭᓯᐊᓂ (ᐅᕙᓘᓐᓃᑦ ᐅᒥᐊᒃᑯᑦ ᑭᓯᐊᓂ ᐊᐅᔭᑐᐊᕐᒪᑦ) ᒪᓐᑐᔨᐊᒧᑦ ᖃᓂᑦᓴᓂᕐᐹᖅ ᓄᓇᓕᐅᑦᓱᓂ ᑰᑦᔪᐊᖑᕗᖅ, ᐅᖓᓯᓐᓂᖓ ᒪᓐᑐᔨᐊᒥᑦ 1400 ᑭᓚᒦᑌᑦ, ᐅᖓᓯᑦᓴᓂᕐᐸᐅᑎᓪᓗᒍ ᒪᓐᑐᔨᐊᒥᑦ ᑲᖏᕐᓱᔪᐊᖅ 1800 ᑭᓚᒦᑕᓄᑦ ᖃᓂᖕᖏᑑᑎᒋᑦᓱᓂ!

ᐊᕙᑕᒃᑯᑦ ᐊᒻᒪᓗ ᐊᑕᐅᑦᓯᑰᕐᑎᓯᔨᒻᒪᕆᒃ ᓈᑲᓅ ᐅᑉᐱᓗᑐᑦᓯᐊᑐᑦ ᑕᒪᓐᓇ ᑕᑰᑎᓂᖓᑦ Oᐳᓚ-ᑯᑦ ᐱᖕᖑᐊᑎᖏᑕ ᐊᒻᒪᓗ ᐃᓄᐃᑦ ᓄᓇᓕᖏᑦᑕ ᑐᕌᕈᑕᐅᓛᕐᓂᖓᓂᒃ ᑐᑭᓯᒪᑦᓯᐊᓂᕐᓴᐅᓕᕐᓂᒧᑦ ᑕᒪᖏᓐᓂᒃ ᐃᓄᐃᑦ ᐃᓗᕐᖁᓯᖏᓐᓂᒃ ᐊᒻᒪᓗ ᖃᓪᓗᓈᑦ ᑌᑦᓱᒪᓂᑎᑐᑦ ᑐᓴᕐᓂᑐᓕᐅᕈᓯᖏᓐᓂᒃ, ᐊᒻᒪᓗ ᐃᓱᐊᓂ ᐱᕙᓪᓕᕈᑕᐅᓛᕐᓂᖓᓂᒃ ᑕᒪᖏᓐᓄᑦ ᐃᓗᕐᖁᓯᑦᑎᓄᑦ.

ᐃᓚᐅᖃᑕᐅᒋᐊᓕᕆᑦ ᖃᕆᑕᐅᔭᑎᒍᑦ ᑎᑭᑕᐅᑦᑕᕈᒪᑐᐊᕈᕕᑦ ᐊᕐᕕᑕᕐᓂᓴᓕᒫᑦ ᐅᓪᓗᖁᑎᒋᓛᕐᑕᖏᑦᑕ ᑐᑭᓯᓐᓇᐅᑎᖏᓐᓄᑦ ᓄᐃᑕᐅᓛᓕᕐᑐᓄᑦ ᑕᕐᕿᓂ ᙯᔪᓂ.

http://nunavik.osm.ca/fr

ᐅᓇ ᑕᑯᒋᐊᖃᑦᑕᓗᒍ ᖃᐅᔨᒐᓱᐊᕈᒪᒍᕕᑦ ᖃᕆᑕᐅᔭᒥ ᐊᕐᕕᑕᕐᓂᓭᑦ ᐅᓪᓗᖁᑎᒋᓛᕐᑕᖏᓐᓂᒃ ᓯᑉᑎᐱᕆ 2008-ᖑᓕᕐᐸ!