• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᐊᕙᑕᖅ ᐱᐅᓯᑐᖃᓕᕆᕕᒃ ᐅᐸᑦᑕᐅᖃᑕᐅᓂᕐᐹᒍᖃᑦᑕᑐᒥᒃ ᐃᓪᓗᐊᕈᓯᐊᐱᖃᓚᐅᔪᔪᕗᖅ Northern Lights 2008-ᒥ ᓂᐅᕐᕈᓯᕐᓂᒧᑦ ᑕᑯᓐᓇᐅᔮᕐᑎᓯᓂᖃᕐᑎᓗᒍ ᐋᑐᕚᒥ Ottawa Congress Centre-ᒥ ᓇᓕᕐᑫᑐᖅ (ᔭᓄᐊᕆ) 30-ᒥᑦ ᐊᕗᓐᓂᑎ (ᕕᕗᐊᕆ) 3-ᒧᑦ, 2008-ᒥ. ᑕᒪᓐᓇ ᐊᑑᑎᑦᓱᓂ ᑲᑎᑎᑦᓯᓚᕿᓚᐅᔪᔪᖅ ᐱᓇᓱᕝᕕᐅᓱᑎᒃ ᖄᖏᕐᓂᑯᓕᐅᕐᑎᓂᒃ ᑲᓇᑕᐅᑉ ᑕᕐᕋᖓᓂᑦ ᐱᔪᓂᒃ, ᐃᓚᐅᑎᓪᓗᒋᑦ ᐃᓄᐃᑦ ᓄᓇᕘᕐᒥᐅᑦ, ᓄᓇᑦᓯᐊᕘᕐᒥᐅᑦ (ᓛᐸᑐᐊᔨ) ᓄᓇᕕᒻᒥᐅᓗ (ᑯᐯᒃ ᑕᕐᕋᖓ). ᓂᐅᕐᕈᓯᕐᓂᒧᑦ ᑕᑯᓐᓇᐅᔮᕐᑎᓯᓂᖃᕐᑎᓗᒍ, ᑌᑲᓂ ᐃᓚᐅᔪᑦ ᑲᑎᓯᓚᐅᔪᔪᑦ ᓯᕿᓂᕐᒥᐅᑦ ᐱᓇᓱᕝᕕᐅᓱᑎᒃ ᖄᖏᕐᓂᑯᓕᐅᕐᑏᑦ ᑭᒡᒐᑐᕐᑎᖏᓐᓂᒃ, ᖃᐅᔨᖃᑎᒌᑦᓱᑎᓪᓗ ᖃᐅᔨᒪᐅᓯᕐᒥᓂᒃ ᐃᓗᕐᕈᓯᕐᒥᓂᓗ ᐃᓄᐃᑦ ᐊᑦᔨᒌᓐᖏᑐᓂᑦ ᓄᓇᓕᒻᒥᐅᑦ.

ᐊᕙᑕᖅ ᑭᒡᒐᑐᕐᑕᐅᓚᐅᔪᔪᖅ ᑐᑭᒧᐊᕐᑎᓯᔨᒻᒪᕆᒻᒧᑦ ᕉᑕ ᑯᑭᐊᐱᒧᑦ ᐃᓕᓴᐱ ᓄᕙᓕᓐᖓᒧᓪᓗ. Simon Ménard (ᓯᒨᓐ ᒥᓈᕐ) ᐊᑐᐃᓐᓇᐅᓚᐅᔪᒻᒥᔪᖅ ᖁᕝᕙᑎᑦᓯᒋᐊᕐᑎᓯᔨᐅᑦᓱᓂ ᐊᕙᑕᒃᑯᓃᑦᑐᓂᒃ ᐃᓄᐃᑦ ᑏᖏᓐᓂᒃ. ᐅᖃᕆᐊᕐᑐᓯᒪᔪᓕᒫᑦ ᐁᑦᑐᑕᐅᓚᐅᔪᔪᑦ ᐱᐅᔪᒻᒪᕆᐅᑦᓱᓂ ᕿᔪᐃᓐᓇᐅᓱᓂ ᐃᕐᓯᕕᐊᐱᒻᒥᒃ ᑏᖁᑎᑦᑎᓂᒃ ᑏᑕᓕᒻᒥᒃ, ᑖᒃᑯᐊ ᑏᑐᕐᑎᓯᒍᑕᐅᓚᐅᔪᒻᒥᔪᑦ ᑭᒡᒐᑐᕐᑐᓕᒫᓂᒃ ᑏᑐᕋᓱᐊᕐᕕᒥ ᐊᕙᑕᐅᓪᓗ ᐃᓪᓗᐊᕈᓯᐊᐱᖁᑎᖓᓐᓂ. ᑕᒪᓐᓇ ᐱᐅᔪᒻᒪᕆᐊᓗᒃ ᖃᐅᔨᔭᐅᑎᑦᓯᓕᐅᒥᒋᐊᕈᑕᐅᓗᓂ ᑕᕐᕋᐅᑉ ᓄᓇᕕᐅᓪᓗ ᒥᑦᓵᓄᑦ!

ᐅᓪᓗᓂ ᐱᖓᓱᓂ ᑕᑯᑦᓴᐅᑎᑦᓯᓂᖃᕐᑎᓗᒍ, ᑭᒡᒐᑐᕐᑏᑦ ᑕᑯᓂᐊᕋᒍᓐᓇᓚᐅᔪᔪᑦ ᐃᓪᓗᐊᕈᓯᐊᐱᓐᓂᒃ ᑐᕌᖓᔪᓂᒃ ᐊᑦᔨᒌᓐᖏᑐᓄᑦ ᑕᕐᕋᒥᐅᓄᑦ ᐱᖁᑎᓕᐅᕐᑏᑦ ᐱᓇᓱᕝᕕᖏᓐᓄᑦ: ᐅᔭᕋᓐᓂᐊᑏᑦ, ᐃᒪᑦᓯᐊᓕᕆᔩᑦ, ᐊᖁᐃᒪᔪᓕᕆᔩᑦ, ᐊᐅᓚᒍᑎᓕᕆᔩᑦ, ᓂᐅᕐᕈᓭᕖᑦ, ᐱᐅᒃᑯᑎᓕᐅᕐᕕᒪᕇᑦ, ᐊᓯᖏᓪᓗ. ᑌᑰᓇ ᐅᖃᖃᑎᒌᓐᓂᖃᕐᓂᐊᓚᐅᔪᔪᖅ ᑕᕐᕋᒥᐅᑦ ᐃᓱᒫᓘᑎᖏᓐᓂᒃ ᐅᓪᓛᑯᑦ ᐅᓪᓗᓕᒫᕐᓗ. ᑕᑯᑦᓴᐅᑎᑦᓯᒥᖃᓚᐅᔪᒻᒥᔪᖅ ᓴᓇᓐᖑᐊᓯᒪᔪᓂᒃ ᒥᕐᓱᓯᒪᔪᓂᓪᓗ, ᑌᑰᓇ ᐅᓄᕐᑐᑲᓪᓓᑦ ᐃᓄᐃᑦ ᓴᓇᓐᖑᐊᑏᑦ ᒥᕐᓱᑏᓪᓗ ᑕᑯᑦᓴᐅᑎᑦᓯᓂᖃᓚᐅᔪᔪᑦ ᐱᓇᓱᐊᓕᓂᕐᒥᓂᒃ ᑕᑯᑦᓴᐅᑎᑦᓯᕕᐅᔮᕐᑐᒦᑦᓱᑎᒃ. ᓄᓇᕕᒻᒥᐅᑦ ᓴᓇᓐᖑᐊᑏᑦ ᒥᕐᓱᑏᓪᓗ ᐅᑯᓂᖓ ᐃᓚᖃᓚᐅᔪᔪᑦ: ᓵᒥ ᑲᓪᓚᒃ, ᐃᓕᓴᐱ ᐅᐃᑖᓗᑦᑐᖅ, ᕕᒃᑑᔨᐊ ᑯᔩ, ᐃᓕᓴᐱ ᐃᓄᑉᐸᖅ ᐊᒻᒪᓗ ᔮᔨ ᐱᓗᕐᑑᑦ. ᐃᓄᐃᑦ ᑐᓴᕐᓂᔮᕐᑎᓯᔩᑦ ᐱᓐᖑᐊᓂᖃᓚᐅᔪᒻᒥᔪᑦ, ᐃᓚᐅᑎᓪᓗᒋᒃ ᐊᑭᓂᓯ ᓯᕗᐊᕌᐱᒃ, ᑐᓴᕐᓂᔮᕐᑎᓯᔨ ᐲᑦᕆᔅ ᑎᐊ (ᑖᒃᑯᐊ ᑕᒪᒋᒃ ᓄᓇᕕᒻᒥᐅᒃ) ᐊᒻᒪᓗ ᓄᓇᕘᕐᒥᐅᑦ ᑐᐱᐊᓗᒻᒥ ᐱᓯᑎᐅᓵᓐᖑᐊᑏᑦ ᑕᑯᓐᓇᐅᔮᕐᑕᐅᓱᑎᒃ.

ᐊᕙᑕᖅ ᙯᕐᖁᔭᐅᓚᐅᔪᔪᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓐᓄᑦ ᐃᓚᐅᖁᔭᐅᑦᓱᓂ Northern Lights ᓂᐅᕐᕈᓯᕐᓂᒧᑦ ᑕᑯᓐᓇᐅᔮᕐᑎᓯᓂᖃᕐᑎᓗᒍ, ᐊᒻᒪᓗ ᐃᓪᓗᐊᕈᓯᐊᐱᖁᑎᕗᑦ ᐃᓂᖃᓚᐅᔪᔪᖅ ᓄᓇᕕᒻᒥᐅᓅᓕᖓᔪᒥ ᐃᓚᖃᕐᓱᓂ ᒪᑭᕝᕕᑯᓐᓂᒃ, ᐃᓚᒌᓴᒃᑯᓂᒃ, ᓄᓇᕕᒻᒥ ᐊᖁᐃᒪᔪᓕᕆᓃᑦ ᑲᑐᑦᔨᖃᑎᒌᓐᓂᖓᓄᑦ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓐᓂᒃ. ᑌᑰᓇ ᐊᕙᑕᖅ ᓂᐅᕐᕈᓯᓚᐅᔪᔪᖅ ᐃᓄᐃᑦ ᑏᖏᓐᓂᒃ ᖃᐅᔨᓚᕿᑦᓱᓂ ᓯᕗᓂᑦᓴᑎᓐᓂ ᓂᐅᕐᕈᓯᕐᕕᒋᒍᓐᓇᑕᕐᒥᓂᒃ. ᑭᓇᒃᑯᑐᐃᓐᓇᓕᒫᑦ ᑲᖐᓱᐊᑦᓯᐊᑐᒻᒪᕆᐅᓚᐅᔪᔪᑦ ᐊᕙᑕᐅᑉ ᐱᓇᓱᐊᕐᓂᕆᕙᑦᑕᖏᓐᓂᒃ. ᑕᕐᕋᒥᐅᑦ ᑲᖐᓱᐊᒋᔭᐅᕙᓪᓕᐊᑐᐃᓐᓇᑐᑦ, ᓄᓇᕐᔪᐊᒥᐅᑦ ᖃᐅᔨᕙᓪᓕᐊᑐᐃᓐᓇᒪᑕ ᐱᓇᓱᕝᕕᖃᕐᓂᒧᑦ ᖄᖏᕐᓂᑯᓕᐅᕐᓂᐅᒍᓐᓇᕋᔭᕐᑐᓂᒃ ᑕᕐᕋᒥ. ᐅᓇᑕᒐ ᐅᖃᐅᓯᕆᔭᐅᓚᐅᔪᔪᖅ ᐃᓕᖓᑦᓯᐊᓱᓂ Northern Lights 2008-ᒥ ᓂᐅᕐᕈᓯᕐᓂᒧᑦ ᑕᑯᓐᓇᐅᔮᕐᑎᓯᓂᖃᕐᑎᓗᒍ: ᑕᕐᕋᖅ ᐅᒃᑯᐃ¯ᓕᕐᖁᖅ ᐱᓇᓱᕝᕕᖃᕐᓂᒧᑦ ᖄᖏᕐᓂᑯᓕᐅᕐᑎᓂᒃ!