ᐅᑎᕐᑎᓯᓂᐅᓚᐅᔪᖅ ᐃᓄᕕᓃᑦ ᓴᐅᓂᕕᓂᖏᓐᓂᒃ Dartmouth ᓯᓚᑦᑐᓴᕐᕕᖓᓐᓂᑦ
ᑭᓇᒨᒻᒪ¯ᑦ Michel Patry
ᒪᓐᓂᓕᐅᑦ 2018-ᒥ, ᐊᕙᑕᖅ ᐱᐅᓯᑐᖃᓕᕆᕕᒥᐅᑦ Dartmouth ᓯᓚᑦᑐᓴᕐᕕᖓᓅᓚᐅᔪᕗᑦ New Hampshire-ᒦᑦᑐᒧᑦ ᐁᑦᓯᓱᑎᒃ ᐃᓄᕕᓃᑦ ᓴᐅᓂᕕᓂᖏᓐᓂᒃ 1967-ᒥ ᐃᓗᕕᕐᓂᑦ ᑎᒍᔭᐅᓚᐅᕐᓯᒪᔪᓂᒃ. ᑕᒪᒋᒃ ᐊᕙᑕᕐᒥᐅᑦ Dartmouth-ᒥᐅᓗ ᑌᒣᑦᑐᒥᒃ ᐊᑑᑎᒋᐅᑦᓯᐊᓚᐅᔪᑦ - ᐱᑦᓯᐊᒐᓱᐊᒻᒪᕆᑦᓱᑎᒃ ᐱᓇᓱᓚᐅᔪᒐᒥᒃ ᖃᓄᕐᓗ ᓈᒻᒪᓈᕐᓂᐹᒃᑯᑦ ᐱᖁᔭᑎᒍᑦ ᓂᑲᒍᓱᓐᓂᑯᓪᓗ ᓴᐅᓂᕕᓂᕐᓂᒃ ᐊᐅᓚᑦᓯᒐᔭᕐᒪᖔᒻᒥᒃ ᓄᓇᕐᔪᐊᒥ ᐱᖁᔭᑎᒍᑦ ᐃᑲᐅᕆᐊᖃᕐᓂᖏᓐᓄᑦ ᑲᓇᑕᒧᑦ ᐅᑎᕐᓗᑎᒃ.
1967-ᒥ, ᑐᓂᕐᑕᓂᐊᕐᑎ Elmer Harp ᐊᕐᕕᑕᓚᐅᕐᓯᒪᕗᖅ ᑕᑯᓂᐊᕐᓱᓂ ᑕᓯᐅᔭᕐᔪᐊᑉ ᐅᐊᓐᓂᖓᑕ ᓯᑦᔭᖓᑎᒍᑦ ᓇᔪᒐᐅᓚᐅᕐᑐᕕᓂᕐᓂᒃ ᐅᒥᐅᔭᐅᑉ ᑰᑦᔪᐊᕌᐱᐅᓪᓗ ᐊᑯᓐᓂᖓᓃᑦᑐᓂᒃ. ᑕᑯᓂᐊᕇᑐᐊᕋᒥᒃ ᓴᒡᒐᒌᑐᐊᕋᒥᓪᓗ ᑕᓯᐅᔭᒥ (ᐅᒥᐅᔭᕐᒥ), Elmer ᐱᓇᓱᖃᑎᖏᓪᓗ ᓯᑦᔭᑎᒎᕐᓱᑎᒃ ᓯᕿᓂᓕᐊᓯᓚᐅᕐᓯᒪᔪᑦ. ᐅᓪᓗᓂ ᐃᑭᑦᑐᓂᐅᒐᓗᐊᖅ ᓯᓚᕐᓂᓗᒻᒧᑦ ᓄᓇᑐᕐᓕᒦᓚᕿᔪᕕᓂᐅᓚᐅᕐᓯᒪᔪᑦ ᐅᓪᓗᒥ ᐅᒥᐅᔭᐅᓕᕐᑑᑉ ᑰᑦᔪᐊᕌᐱᐅᓪᓗ ᐊᑯᓐᓂᖓᓃᑦᑐᒥ, ᑕᑯᓚᕿᑦᓱᑎᒃ ᒪᕐᕉᓱᑎᒃ ᐃᓄᒃᓲᓂᒃ ᐃᓗᕕᕐᑕᓖᓐᓂᒃ. ᑖᕙᒃᑯᐊ ᐃᓄᒃᓲᒃ ᐃᓄᐃᑦ ᐱᐅᓯᑐᖃᕐᒥᑎᒍᑦ ᐃᓗᕕᕐᓯᒍᓯᕕᓂᒋᒃ ᐃᓄᕕᓃᑦ ᐅᔭᕋᓱᑦᔪᓄᑦ ᖃᓪᓕᑕᐅᒪᑎᓗᒋᑦ. ᐊᑕᐅᓯᖅ ᐃᓗᕕᖃᕐᕕᒃ ᐊᑕᐅᓯᕐᒥᒃ ᐃᓄᕕᓂᕐᑕᖃᓚᐅᕐᓯᒪᔪᖅ ᓇᐹᕐᑐᕕᓃᑦ ᕿᔪᐃᑦ ᐊᑖᓃᑦᑐᒥᒃ, ᑌᒫᑦᓭᓇᖅ ᖃᓪᓕᑕᐅᒪᒻᒥᓱᓂ ᐅᔭᕋᓱᑦᔪᓄᑦ; ᐁᑉᐸᖓᑦᑕᐅᖅ ᐃᓗᕕᖃᕐᕕᒃ ᐊᒥᓱᐃᒐᓛᓂᒃ ᐅᐊᕈᑎᒌᓂᒃ ᑖᑦᓱᒥᖓᑦᓭᓇᓂᑕᐅᓐᖏᑐᓂᒃ ᓴᐅᓂᑯᖃᕐᑎᓗᒍ. ᓴᐅᓃᑦ ᓇᐅᑦᓯᑐᕋᑦᓭᑦ ᑎᒍᓚᔭᕕᓂᐅᓚᐅᕐᓯᒪᔪᑦ ᑕᒪᒋᓐᓂᑦ ᐃᓄᒃᓲᓂᑦ Dartmouth-ᐅᓗ ᓯᓚᑦᑐᓴᕐᕕᖓᓅᕐᑕᐅᓱᑎᒃ. ᖃᒻᒥᒐᓚᐅᓚᐅᔪᖅ, ᓴᐅᓃᑦ ᓇᓗᓀᕐᑕᕕᓃᑦ ᐃᓅᒍᓐᓀᑐᕕᓂᕐᓂᒃ ᓱᑯᐃᔦᕕᒻᒥ Dartmouth-ᒥ ᖃᐅᔨᔭᐅᓚᕿᑦᓱᑎᒃ ᐱᓐᓂᒪᑕ ᐃᑭᓐᓂᐸᐅᑎᓗᒋᑦ ᐱᖓᓲᔪᕐᑐᓂᑦ ᐃᓄᕕᓂᕐᓂᑦ, ᐃᓚᒋᔭᐅᑎᓪᓗᒍ ᐊᑕᐅᓯᖅ ᓄᑕᕋᕕᓂᖅ, ᐊᑕᐅᓯᖅ ᐱᐊᕋᕕᓂᖅ, ᒪᕐᕉᒃ ᐊᖑᑎᒻᒪᕆᕕᓃᒃ ᒪᕐᕉᓗ ᐊᕐᓇᒪᕆᕕᓃᒃ. ᑖᒃᑯᐊ ᓴᐅᓃᑦ ᐃᑭᓐᓂᐸᐅᑎᓗᒋᑦ ᒥᑦᓴᐅᓵᕐᑕᐅᒪᔪᑦ, ᐅᓄᕐᓂᖏᓪᓗ ᐊᒥᓲᓂᕐᓴᐅᑐᐃᓐᓇᕆᐊᖃᕐᓱᑎᒃ - ᓴᐅᓂᑯᐃᑦ ᓱᓇᒥᓯᒪᓐᓂᖏᑦᑐᐊᓘᒻᒪᑕ.
1967-ᒥ ᐱᖁᔭᖃᓚᐅᕐᓯᒪᓐᖏᑐᖅ ᐃᓗᕖᑦ ᓴᒡᒐᑕᐅᒋᐊᖃᓐᖏᓂᖏᓐᓂᒃ. Harp ᐊᕐᕕᑕᕐᓂᒥᓂ ᐃᓄᕕᓃᑦ ᓴᐅᓂᖏᓐᓂᒃ ᑐᓂᕐᑕᓂᐊᕈᑎᓂᓗ ᓄᐊᑕᕕᓂᕐᒥᓂᒃ ᓇᔪᒐᐅᓚᐅᕐᑐᕕᓂᐅᒻᒥᔪᓂᑦ ᐱᔪᓂᑦ ᐅᑎᐅᑦᔨᔪᕕᓂᐅᓚᐅᕐᓯᒪᔪᖅ. 2009-ᒥ ᐃᓅᒍᓐᓀᑐᐊᕐᒪᑦ ᐃᓄᕕᓃᑦ ᓴᐅᓂᕕᓂᖏᑦ ᑕᑯᔭᕕᓂᐅᓚᐅᔪᔪᑦ ᐃᕐᓂᖓᓄᑦ Douglas Harp-ᒧᑦ, ᑌᑦᓱᒨᓇ 1967-ᒥ ᓱᕈᓯᐅᑦᓱᓂ ᐊᑖᑕᒥᓂᒃ ᐊᕕᕐᑕᕐᑐᒥᒃ ᒪᓕᑦᑐᕕᓂᐅᒐᒥ. ᑕᒐ Dartmouth ᓯᓚᑦᑐᓴᕐᕕᖓᓂᒥᐅᓂᒃ ᖃᐅᔨᑎᑦᓯᓕᕐᓂᖁᖅ, ᐊᕐᖁᑎᖃᕐᓱᓂ ᑐᓂᕐᑕᓂᐊᕐᑎᒥᒃ William Fitzhugh-ᒥᒃ ᑌᒪ ᐊᕙᑕᐅᑉ ᑐᓂᕐᑕᓂᐊᕐᑎᖁᑎᖓᓂᒃ ᑖᒥ ᐅᐃᑖᓗᑦᑐᒥᒃ ᑐᓴᕐᑎᓯᓂᐊᓕᕐᒪᑦ. ᑐᑭᑖᓕᕐᑐᕕᓃᑦ ᐊᕙᑕᕐᒥᐅᑦ ᑕᑯᓂᐊᓛᕐᑎᓗᒋᑦ ᐃᓄᕕᓃᑦ ᓴᐅᓂᖏᓐᓂᒃ ᐅᑎᕐᑎᓯᒋᐊᕐᑐᓗᑎᒃ ᓄᓇᕕᒻᒨᓗᒋᓪᓗ ᐃᓗᕕᕐᑕᐅᒋᐊᓪᓚᓛᕐᑎᓗᒋᑦ.
ᐊᕙᑕᐅᑉ ᐊᖓᔪᕐᖄᖓ, ᔫᓯᐱ ᐹᑦᓚᔮᑦ, ᐃᓚᖏᓪᓗ, ᑲᒪᔨᒻᒪᕆ ᕉᑕ ᑯᑭᐊᐱᒃ, ᓄᓇᓕᓐᓂ ᐱᐅᓯᑐᖃᓕᕆᔨᓂᒃ ᐊᑕᐅᑦᓯᑰᕐᑎᓯᔨ ᓈᓐᓯ ᐹᓕᓴ ᐊᒻᒪᓗ ᑐᓂᕐᑕᓂᐊᕐᑏᒃ Susan Lofthouse ᐊᒻᒪᓗ Elsa Cencig, Dartmouth-ᓕᐊᓚᐅᔪᔪᑦ ᑖᕗᓐᖓᕋᒥᓗ ᑐᓐᖓᓱᑦᑎᑕᐅᑦᓯᐊᑐᕕᓂᐅᑦᓱᑎᒃ. ᐱᓪᓚᕆᐊᓗᑎᒍᑦ ᐱᖁᔭᑎᒍᓪᓗ ᐅᑎᕐᑎᓯᓂᖃᓕᓚᐅᔪᖅ ᐅᖄᔪᖃᕐᓱᓂᓗ ᐊᒻᒪ ᖁᓪᓕᖅ ᐃᑭᑕᐅᑎᓪᓗᒍ. ᐃᓄᕕᓃᑦ ᓴᐅᓂᖏᑦ ᐴᕐᑐᓯᒪᑦᓯᐊᒪᕆᑦᑎᓗᒋᑦ ᐊᕙᑕᕐᒨᑕᐅᓕᓚᐅᔪᔪᑦ ᓄᓇᕕᒻᒧᑦ ᐅᑎᐅᑦᔨᓛᕐᑕᖏᓐᓂ.
ᑌᑦᓱᒨᓇ ᐊᔪᐃᓐᓇᑐᒻᒪᕆᐅᓚᐅᔪᑦ ᐱᖁᔦᑦ ᓯᖁᑦᑎᑕᐅᑦᑌᓕᒻᒪᕆᑦᑎᓗᒋᑦ - ᐊᓪᓛᑦ ᑲᓇᑕᒥ ᑭᖑᕝᕕᒍᓐᓇᑐᓕᕆᔩᑦ ᑐᓴᕐᑎᑕᐅᓚᐅᔪᔪᑦ ᙯᑦᓯᓚᕿᑦᓱᑎᒃ ᐊᓪᓚᓯᒪᔪᓂᒃ ᓇᓗᓀᕐᓯᓂᕋᕐᓱᑎᒃ ᖃᐅᔨᒪᒋᐊᕐᒥᓂᒃ ᑕᒪᑦᓱᒥᖓ, ᑲᓇᑕᒥ ᐃᑲᐅᕐᑎᓯᑦᑌᓕᔩᑦ, Dartmouth-u ᐱᖁᔭᓕᕆᔩᑦ ᓱᓇᓕᒫᑦᓯᐊᓂᒃ ᓇᐅᑦᓯᑐᕐᖄᕆᐊᖃᓚᐅᔪᔪᑦ ᐊᓪᓚᓱᑎᓗ ᓯᕗᓪᓕᐹᕐᓯᐅᑎᒥᒃ ᓴᐅᓂᕐᓂᒃ ᐅᑎᕐᑎᓯᓂᕃᒍᑎᒥᒃ. ᑲᓇᑕᒥ ᑭᒡᒐᑐᕐᑎ Boston-ᒥᐅᖅ ᑎᑭᑎᑦᓯᓚᐅᔪᒻᒥᔪᖅ ᐱᓇᓱᑦᑎᒥᓂᒃ ᐅᑎᕐᑎᓯᒻᒪᕆᓚᖓᔪᒥᒃ ᓴᐅᓂᕐᓂᒃ ᓱᖏᕐᑐᐃᒋᐊᕐᑐᓱᓂᓗ ᐊᕙᑕᕐᒥᐅᑦ ᑲᓇᑕᒧᑦ ᐃᑳᕋᓱᓐᓂᖏᑦ ᐱᓀᓗᑦᓯᓂᐊᓐᖏᓂᖓᓂᒃ.
ᐊᐅᔭᓕᕈᑦ-ᒥ ᐅᒥᐅᔭᕐᒥᐅᑦ ᑰᑦᔪᐊᕌᐱᒥᐅᓪᓗ ᑲᕙᒫᐱᒋᒃ ᐊᕐᕕᑕᓛᕐᓂᐊᑐᑦ ᓇᔪᒐᐅᓚᐅᕐᑐᕕᓃᓐᓄᑦ ᐅᑎᕐᓗᑎᒃ, ᑌᒪ ᐃᓄᕕᓃᑦ ᓴᐅᓂᖏᑦ ᐃᓗᕕᕐᑕᐅᒋᐊᓪᓚᓯᐊᕐᓂᐊᓕᕐᒪᑕ ᐃᓗᕕᕐᑕᐅᒋᐊᓐᖓᕕᒋᓚᐅᕐᑕᕕᓂᕐᒥᓂ.
ᖃᐅᔨᒋᐊᕐᕕᓴᖅ:
ᕉᑕ ᑯᑭᐊᐱᒃ
ᑲᒪᔨᒻᒪᕆ
ᐊᕙᑕᖅ ᐱᐅᓯᑐᖃᓕᕆᕕᒃ
ᐅᖄᓚᐅᑎᖓ ᐊᑭᓕᕆᐊᑐᓐᖏᑐᖅ: 1 866 897-2287
ᐊᕙᑕᐅᑉ ᐊᖓᔪᕐᖄᖓ ᔫᓯᐱ ᐹᑦᓚᔮᑦ ᐊᒻᒪᓗ ᑲᒪᔨᒻᒪᕆ ᕉᑕ ᑯᑭᐊᐱᒃ ᑐᓐᖓᓱᑦᑎᓯᔫᒃ Dartmouth ᐃᓅᖃᑎᒌᑦᑐᓂᒃ ᓱᑯᐃᔦᕕᐅᑉ ᑲᒪᔭᒻᒪᕆᖓᓂᒃ Ken Watanabe-ᒥᒃ ᐃᓄᕕᓃᑦ ᓴᐅᓂᖏᑦᐱᖁᔭᑎᒍᑦ ᐅᑎᕐᑎᑕᐅᓕᕐᑎᓗᒋᑦ.
Dartmouth College/Rob Strong
ᔫᓯᐱ ᐹᑦᓚᔮᑦ ᐊᒻᒪᓗ ᕉᑕ ᑯᑭᐊᐱᒃ ᐊᑎᓕᐅᕐᑑᒃ ᐅᑎᕐᑎᓯᓂᕐᒧᑦ ᐊᓪᓚᖁᑎᒥᑦ Susan Lofthouse, Elsa Cencig ᐊᒻᒪᓗ ᓈᓐᓯ ᐹᓕᓴ ᑕᑯᓐᓇᑎᓗᒋᑦ.
Dartmouth College/Rob Strong
ᐅᖓᑖᓃᑦᑐᑦ (ᓴᐅᒥᐊᓂᑦ ᑕᓕᕐᐱᐊᓄᑦ): Marc Jacques (ᐱᓂᐊᕐᓂᓕᕆᔨᑐᖃᐅᓕᕐᑐᖅ ᑮᓇᐅᔭᑎᒍᓪᓗ ᒪᑭᑕᒐᓱᐊᕐᓂᒧᑦ ᑲᒪᔨᐅᑦᓱᓂ ᑲᓇᑕᐅᑉ ᐊᓪᓚᕕᖃᕐᕕᖓᓂ Boston-ᒥ), Maurice Crandall (ᓯᓚᑦᑐᓭᔨᒻᒪᕆ ᐊᒥᐊᔨᑲᓯ ᓄᓇᖃᕐᖄᓯᒪᔪᑦ ᐱᐅᓯᕆᓯᒪᔭᖏᓐᓄᑦ), Elsa Cencig (ᐊᕙᑕᐅᑉ ᑐᓂᕐᑕᓂᐊᕐᑎᖁᑎᖓ), Jamie Powell (ᐊᒥᐊᔨᑲᒥᐅᑦ ᓄᓇᖃᕐᖄᓯᒪᔪᑦ ᑕᑯᒥᓇᕐᑐᓕᐅᕐᑏᑦᑕᑯᑖᕆᔨᖓ), Susan Lofthouse (ᐊᕙᑕᐅᑉ ᑐᓂᕐᑕᓂᐊᕐᑎᖁᑎᖓ), Douglas Harp (Elmer Harp ᐃᕐᓂᖓ), William Fitzhugh (ᑐᓂᕐᑕᓂᐊᕐᑎᓚᕆ);
ᓯᕗᕌᓃᑦᑐᑦ (ᓴᐅᒥᐊᓂᑦ ᑕᓕᕐᐱᐊᓄᑦ): ᔫᓯᐱ ᐹᑦᓚᔮᑦ (ᐊᕙᑕᐅᑉ ᐊᖓᔪᕐᖄᖓ), ᓈᓐᓯ ᐹᓕᓴ (ᐊᕙᑕᐅᑉ ᓄᓇᓕᓐᓂ ᐱᐅᓯᑐᖃᓕᕆᔨᓂᒃ ᐊᑕᐅᑦᓯᑰᕐᑎᓯᔨᖓ), ᕉᑕ ᑯᑭᐊᐱᒃ (ᐊᕙᑕᐅᑉ ᑲᒪᔨᒻᒪᕆᖓ), Deborah Nichols (ᐃᓅᖃᑎᒌᑦᑐᓂᒃ ᓱᑯᐃᔦᔨ), Ken Watanabe (ᐃᓅᖃᑎᒌᑦᑐᓂᒃ ᓱᑯᐃᔦᔩᑦ ᐅᖃᕐᑎᖓ)
Dartmouth College/Rob Strong
(ᓴᐅᒥᐊᓂᑦ ᑕᓕᕐᐱᐊᓄᑦ) Jay Satterfield (Dartmouth ᐊᑐᐊᒐᑦᓴᑯᕕᓕᕆᔨᖓ), Elsa Cencig, ᕉᑕ ᑯᑭᐊᐱᒃ, ᓈᓐᓯ ᐹᓕᓴ, William Fitshugh (Smithonian Institution Archaelogolist) Susan Lofthouse.
Dartmouth College/Rob Strong
