• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᑲᑎᒪᓂᒻᒪᕆᐅᓲᖅ ᐃᓄᒻᒪᕇᑦ ᑲᑎᕕᓪᓚᕆᐊᓗᒋᓲᕆᕙᐅᒃ. ᒪᕐᕉᒃ ᐊᕐᕌᒍᑕᒫᑦ ᐊᑑᑎᓲᒍᑦᓱᓂ, ᑲᑎᒪᓂᒻᒪᕆᒃ ᐊᕙᑕᐅᑉ ᑲᑎᒪᔨᖏᑦᑕ ᑲᑎᒪᓂᒻᒪᕆᒋᓲᕆᒻᒥᔭᖓ. ᑌᒣᓲᖑᒐᒥᒃ, ᐊᕙᑕᐅᑉ ᐱᓇᓱᐊᕐᑕᕕᓂᖏᑦ, ᐃᓄᒃᑎᑑᕐᓂᐅᑉ ᓴᑐᕐᑕᐅᒐᓱᐊᕐᓂᖓᑕ ᓯᕗᓂᑦᓴᖓ ᐊᒻᒪᓗ ᓄᓇᓕᓐᓂ ᐱᐅᓯᑐᖃᓕᕆᔩᑦ ᐱᓇᓱᐊᕐᑕᕕᓂᖏᑦ ᑐᑭᒧᐊᒍᑎᓃᓚᐅᔪᑦ. ᙯᕐᖁᔭᕕᓂᐅᑦᓱᑎᒃ ᐅᖄᒋᐊᕐᑐᓯᒪᓚᐅᔪᒻᒥᔪᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᑭᒡᒐᑐᕐᑎᖏᑦ, ᓄᓇᕕᒻᒥ ᐃᓗᓯᓕᕆᔩᑦ ᐃᓅᓯᕆᔩᑦ ᑭᒡᒐᑐᕐᑎᖏᑦ, ᓄᓇᕕᒻᒥ ᐳᓚᕋᕐᑐᓕᕆᓂᕐᒧᑦ ᐱᕙᓪᓕᐊᕕᒃ ᐊᒻᒪᓗ ᓄᓇᕕᒻᒥ ᐅᕕᒐᕐᑐᐃᑦ ᑲᑎᒪᔨᖏᑦ. ᑭᖑᓪᓕᐹᒥ, ᑲᑎᒪᒋᐊᕐᓯᒪᔪᑦ ᓂᕈᐊᓕᓚᐅᔪᑦ ᓄᑖᓂᒃ ᐊᕙᑕᐅᑉ ᑲᑎᒪᔨᑦᓴᖏᓐᓂᒃ (ᑕᑯᓗᑎᑦ ᐊᑖᓃᑦᑐᓂᒃ).

ᑲᑎᒪᓂᒻᒪᕆᒃ ᑐᓐᖓᕕᖃᕐᑎᑕᐅᓐᖑᐊᓚᐅᔪᖅ ᐃᒣᓕᔪᒥᒃ : “ᐃᓚᒌᓐᓂᒥᒃ ᐊᖓᔪᕐᖃᐅᕕᖃᕐᓂᖅ“, ᑖᓐᓇᓗ ᐃᓚᒋᔭᐅᓪᓚᕆᑦᓱᓂ ᐃᓅᖃᑎᒌᑦᑐᓂ ᐃᓂᓪᓚᖓᐅᓯᕐᒧᑦ ᓱᕐᕋᑕᐅᒻᒪᕆᓯᒪᓕᕐᓱᓂ ᑲᕙᒪᐅᑏᑦ ᐊᓯᖏᓪᓗ ᐃᓄᐃᑦ ᓄᓇᖓᓐᓅᖃᑐᐊᕐᒪᑕ ᐊᒻᒪᓗ ᐃᓄᐃᑦ ᓄᓇᓕᒻᒥᐅᒍᓯᓚᐅᕐᓯᒪᑎᓗᒋᑦ ᓅᔪᐃᑦᑑᓯᑦᓱᑎᒃ. ᐅᖃᖃᑎᒌᑦᓱᑎᒃ, ᑖᒥ ᑮᓐ ᓯᕗᓕᕐᑎᓗᒍ, ᐱᒐᓱᐊᒻᒪᕆᑦᑐᐊᓘᓕᓚᐅᔪᑦ ᑐᑦᓯᒪᖃᑦᑕᓱᑎᒃ ᐅᖄᓕᕋᒥᒃ.

ᑕᓯᐅᔭᕐᒥᐅᑦ ᑲᑎᒪᒋᐊᕐᓯᒪᔪᐃᓪᓗ ᓂᕆᒻᒫᑎᑕᓂᖏᑦ ᐊᒻᒪᓗ ᑕᕐᕋᓕᔮᕐᑎᑕᐅᓂᖏᑦ `ᓇᐸᒍᓐᓇᓯᖁᓪᓗᓯ`-ᓚᔪᒥᒃ ᑭᖑᓪᓕᐹᕐᓯᐅᑎᐅᓚᐅᔫᒃ.

ᓄᕕᐱᕆ 2017-ᒥ ᑰᑦᔪᐊᕌᐱᒥ ᑲᑎᒪᓂᒻᒪᕆᖃᓛᓕᕐᒥᔪᖅ.

ᐊᕙᑕᕐᒧᑦ ᑲᑎᒪᔨᓐᖑᓚᐅᔪᑦ¹ :

ᔨᓂ ᓄᓐᖓᖅ, ᐊᖓᔪᕐᖄᖅ - ᑲᖏᕐᓱᒥᐅᖅ (ᓂᕈᐊᕐᑕᐅᒋᐊᓪᓚᑐᖅ)

ᒥᓂ ᐃᑎᓪᓗᐃ, ᑲᑎᒪᔨ - ᑲᖏᕐᓱᔪᐊᕐᒥᐅᖅ (ᓂᕈᐊᕐᑕᐅᒋᐊᓪᓚᑐᖅ)

ᔫᓯᐱ ᐹᓪᓚᔮᑦ, ᑲᑎᒪᔨ - ᓴᓪᓗᒥᐅᖅ (ᓂᕈᐊᕐᑕᐅᒋᐊᓪᓚᑐᖅ)

ᓵᓚᒨᓂ ᐊᓓᑯ, ᑲᑎᒪᔨ - ᐊᑯᓕᕕᒥᐅᖅ (ᓂᕈᐊᕐᑕᐅᒋᐊᓪᓚᑐᖅ)

ᐄᕙ ᑯᐊᓐᓇᓈᖅ, ᑲᑎᒪᔨ - ᓴᓪᓗᒥᐅᖅ (ᓂᕈᐊᕐᑕᐅᒋᐅᕐᑐᖅ)

¹ ᐊᕙᑕᕐᒧᑦ ᑲᑎᒪᔨᓐᖑᖃᒻᒦᑦ ᖃᒻᒥᑯᑦ ᐊᖓᔪᕐᖄᑉ ᑐᖓᓕᑦᓴᖓᓂᒃ ᐊᓪᓚᑎ-ᑮᓇᐅᔭᓕᕆᔨᑦᓴᒥᓗ ᑎᒃᑯᐊᓯᓛᕐᑐᑦ.