• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

2012 ᐊᐅᔭᖓᓐᓂ ᐊᕙᑕᖅ ᐱᐅᓯᑐᖃᓕᕆᕕᒃ ᐊᓐᓇᑐᐃᒐᓱᐊᕐᓂᒧᑦ ᓴᒡᒐᓂᖃᓚᐅᔪᕗᖅ ᐱᖓᓱᐃᓂ ᓄᓇᓂ ᐃᓄᑦᔪᐊᑉ ᓴᓂᐊᓂ. ᐊᕙᑕᐅᑉ ᐃᑦᓴᓂᑕᕐᓂᐊᑎᖁᑎᖏᑦ ᓴᒡᒐᖁᔭᐅᓯᓚᐅᔪᔪᑦ ᐃᓄᑦᔪᐊᑉ ᑲᕙᒫᐱᒃᑯᖏᓐᓄᑦ ᐱᑐᕝᕕᒃ ᓄᓇᒥᒃ ᑎᒍᒥᐊᕐᑎᑯᓐᓄᓗ, ᓇᔪᒐᐅᖃᑦᑕᓚᐅᕐᑐᕕᓃᑦ ᓱᕐᕋᑕᐅᓐᖏᓂᖏᓐᓂ ᐃᓄᑦᔪᐊᑉ ᓄᓇᓕᖓ ᐊᖏᓕᒋᐊᕐᑕᐅᓯᑉᐸᑦ. ᐱᓇᓱᐊᕐᓃᑦ ᑮᓇᐅᔭᖃᕐᑎᑕᐅᓚᐅᔪᔪᑦ ᒪᑭᕝᕕᑯᓐᓄᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓐᓄᓗ. ᐱᖓᓱᑦ ᐃᓄᑦᔪᐊᒥᐅᑦ ᐃᓕᓵᑦ ᐃᓚᐅᑎᑕᐅᓚᐅᔪᔪᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᐊᐅᔭᒃᑯᑦ ᐅᓇᒻᒥᓇᕐᑐᑎᒍᑦ ᐱᓇᓱᐊᕐᑎᓯᓂᕆᓲᖓᓄᑦ, ᐊᒻᒪᓗ ᐱᖓᓱᒋᐊᓪᓓᑦ ᐃᓄᑦᔪᐊᒥᐅᑦ ᐃᓄᒻᒪᕇᑦ ᐊᖏᖃᑎᒌᒍᑎᑎᒍᑦ ᐱᓇᓱᐊᕐᑎᑕᐅᓚᐅᔪᑦᓱᑎᒃ ᒪᑭᕝᕕᑯᓐᓄᑦ. ᐃᓕᓐᓂᐊᑏᑦ ᐃᓚᐅᓚᐅᔪᔪᑦ ᐱᓇᓱᐊᕐᑕᐅᔪᒧᑦ ᐅᑯᐊᒍᓚᐅᔪᔪᑦ: ᐋᓕᒃ ᐃᐳ, ᔮᑯᓯ ᐃᖃᓗᒃ, ᖃᐅᑦᓵᓕᒃ ᓇᕐᑌ, ᐋᓯᕙ ᓇᔪᒻᒥᐊᓗᒃ, ᐄᒥ ᓇᔪᒻᒥᐊᓗᒃ ᐊᒻᒪᓗ ᐃᓄᒻᒪᕇᑦ ᐱᓇᓱᐊᕐᑎᑕᐅᖃᑕᐅᓚᐅᔪᔪᑦ ᐅᑯᐊ: ᑖᓄᓪ ᐊᓇᐅᑕᖅ, ᑖᓂᐊ ᐃᖃᓗᒃ, ᔪᐊᓇᓯ ᐃᓄᑉᐸᖅ, ᑰᓂ ᓄᓐᖓᖅ, ᔫᐱ ᓇᐅᒃᑲᕈᐊᖅ, ᐱᓗᐳᓯ ᐃᓓᔭᓯᐊᐱᒃ, ᔫᓯ ᐃᖃᓗᒃ ᐊᒻᒪᓗ ᐋᓕ ᐊᑯᓕᐊᖅ. ᐃᑲᔪᕐᓯᒪᓚᐅᔫᒃ ᑐᔪᕐᒥᐅᕕᖃᕐᑎᓯᓂᕐᒧᑦ Melanie Rousseau (ᓚᕚᓪ ᐃᓕᓐᓂᐊᕕᕐᔪᐊᖓᓐᓂᒥᐅᖅ) ᐊᒻᒪᓗ ᐊᓐᑦᔫ ᐸᐱᑲᑦᑐᖅ (ᐊᕙᑕᖅ ᐱᐅᓯᑐᖃᓕᕆᕕᒻᒥᐅᖅ) ᐃᓚᐅᓚᐅᔪᒻᒥᔫᒃ.

ᓯᕗᓪᓕᐹᖅ ᓇᔪᒐᐅᓚᐅᕐᑐᕕᓂᖅ ᓴᒡᒐᑕᐅᓚᐅᔪᔪᖅ IcGm-25-ᒦᑦᑐᖅ, ᓇᕝᕚᒋᐊᓐᖓᓯᒪᔭᖓ ᑖᓂᐊᓪᓕ ᐅᐃᑖᓗᑦᑑᓯᒪᔫᑉ ᐊᒻᒪᓗ ᓯᐊᕈᒋᐊᖑᓕᕐᒪᑦ ᓇᐅᑦᓯᑐᕐᑕᕕᓂᐅᑦᓱᓂ ᐊᓪᓚᖁᑎᓕᐅᕐᑕᐅᓱᓂᓗ 1985-ᒥ ᐊᕙᑕᖅ ᐱᐅᓯᑐᖃᓕᕆᕕᒻᒧᑦ. ᓇᔪᒐᐅᓚᐅᕐᑐᕕᓂᖅ ᐃᓄᑦᔪᐊᑉ ᐅᓯᖏᐊᕐᕕᐅᓪᓗ ᐊᑯᓐᓂᖓᓃᑦᑐᖅ ᐃᒻᒪᖄ 600-ᒦᑕᓄᑦ ᐅᖓᓯᓐᓂᖃᕐᓱᓂ ᐱᒋᐅᕐᓴᕕᐅᑉ ᐃᓕᓐᓂᐊᕕᐅᑉ ᓂᒡᒋᖓᑕ ᐅᐊᓐᓂᖓᓃᑦᓱᓂ. ᑖᕙᓐᓇ ᓄᓇ ᐱᖓᓱᐃᓕᔭᐅᓚᐅᔪᔪᖅ: ᓄᓇ A ᐱᖓᓲᔪᕐᑐᓂᒃ ᐃᑭᓐᓂᐸᐅᑎᓪᓗᒋᑦ ᐊᓂᕐᕋᕕᓂᕐᑕᖃᓚᐅᔪᔪᖅ ᙯᕐᑐᔮᒥ, ᐃᓚᒋᔭᐅᑎᓪᓗᒋᑦ ᐱᖓᓱᑦ ᐃᑎᔪᒦᒐᑎᒃ ᖃᕐᒪᐅᓚᐅᕐᑐᕕᓃᑦ; ᓄᓇ B ᙯᕐᑐᔮᑉ ᓯᕿᓂᖓᓃᑦᑐᖅ ᓄᖑᓪᓚᓂᐅᓕᕐᑑᑉ ᓯᐅᕃᓐᓇᐅᑉ ᓯᓈᖓᓃᑦᑎᓗᒍ ᐅᐊᓐᓂᒥ; ᓄᓇ C ᓄᖑᓪᓚᓂᐅᓕᕐᑑᑉ ᓯᐅᕃᓐᓇᐅᑉ ᐅᐊᓐᓂᖓᓃᑦᑎᓗᒍ. ᑖᓐᓇ ᑕᒐᑕᒐ ᐊᓪᓚᓯᒪᔪᓕᐊᖑᓕᕐᑎᓗᒍ, ᐃᑦᓴᓂᑕᕐᓂᐊᑐᙯᓐᓈᑐᖅ ᐊᑕᐅᓯᕐᒥᒃ ᐱᓇᓱᑦᑎᒥᒃ, ᐅᓪᓗᒥᒧᓪᓗ ᑎᑭᑦᓱᒍ 67-ᐄᑦ ᒦᑕᐅᓈᕐᑎᑐᑦ ᓯᒃᑭᑌᑦ ᓇᐅᑦᓯᑐᒐᑦᓴᐅᓱᑎᒃ ᓴᒡᒐᑕᐅᓯᒪᓕᕐᓱᑎᒃ, ᓇᕝᕚᑕᐅᓚᕿᑎᓪᓗᒋᑦ 130 ᐱᐅᑎᐅᓚᐅᕐᑐᕕᓃᑦ ᐊᒻᒪᓗ 1,000 ᒥᑦᓵᓃᑦᑐᑦ ᐃᓕᕐᓂᓗᑯᕕᓃᑦ. ᓯᕗᓪᓕᐹᕐᓯᐅᑎᒃ ᓇᐅᑦᓯᑐᕐᓂᕕᓂᖅ ᑕᑯᑎᑦᓯᓯᒪᔪᖅ ᑖᕙᓐᓇ ᓄᓇ ᑐᓂᖃᓚᐅᕐᑐᕕᓂᐅᒋᐊᖓᓂᒃ.

ᑐᖓᓕᐊ ᓇᔪᒐᐅᓚᐅᕐᑐᕕᓂᖅ ᓱᕐᖄᑎᕐᑕᐅᓚᐅᔪᔪᖅ ᓇᐅᑦᓯᑐᕐᑕᐅᓱᓂᓗ IcGm-43-ᒦᑦᑐᖅ. 2004-ᒥ ᐊᕙᑕᖅ ᐱᐅᓯᑐᖃᓕᕆᕕᒃ ᐊᓐᓇᑐᐃᒐᓱᐊᕐᓂᒧᑦ ᓴᒡᒐᓂᖃᓚᐅᔪᔪᖅ ᑖᕙᑦᓱᒪ ᓇᔪᒐᐅᓚᐅᕐᑐᕕᓂᐅᑉ ᐃᓚᖓᓂᒃ, ᓴᓇᔭᐅᓚᐅᕐᑎᓇᒍ ᐅᓯᖏᐊᕐᕕᓴᖅ. ᓇᔪᒐᐅᓚᐅᕐᑐᕕᓂᖅ 400-ᒦᑕᓄᑦ ᓯᕿᓂᐅᑉ ᐅᐊᓐᓂᖓᓃᑦᑐᖅ ᓯᕗᓪᓕᐅᑫᓐᓇᑑᑉ ᓇᔪᒐᐅᓚᐅᕐᑐᕕᓂᐅᑉ. 2004-ᒥ ᐊᐅᔭᐅᓚᐅᔪᔪᒥ 43-ᐄᑦ ᒦᑕᐅᓈᕐᑎᑐᑦ ᓯᒃᑭᑌᑦ ᓴᒡᒐᑕᐅᓚᐅᔪᔪᑦ, ᐃᓚᖏᓐᓂᓗ ᓄᓇᓂ ᐃᑦᓴᓂᑌᑦ ᓇᕝᕚᑕᐅᖃᑦᑕᓚᐅᔪᑦᓱᑎᒃ ᓄᓇᐅᑉ ᖄᖓᓃᑐᐃᓐᓇᑎᓪᓗᒋᑦ. ᑲᑎᓕᕋᒥᒃ 112 ᐅᔭᕃᓐᓇᐅᓱᑎᒃ ᐱᐅᑎᐅᓚᐅᕐᑐᕕᓃᑦ ᐊᒻᒪᓗ 7789 ᐃᓕᕐᓂᓗᑯᕕᓃᑦ ᓄᐊᑕᐅᑦᓱᑎᒃ. ᑕᕝᕙᓂ ᐊᐅᔭᒥ ᐃᑦᓴᓂᑕᕐᓂᐊᑐᑦ ᑕᑯᓐᓇᒐᖃᕙᓪᓗᓚᐅᔪᔪᑦ ᓄᓇᐅᑉ ᓱᒃᑯᑕᐅᑐᐃᓐᓇᕆᐊᖃᓕᕐᓂᖓᓂᒃ ᓄᓇᓕᐅᑉ ᐊᖏᓪᓕᕙᓪᓕᐊᓂᖓᓄᑦ. ᐃᓘᓐᓇᓕᒫᑲᓵᑦ ᐃᑦᓴᓂᑌᑦ ᐱᓯᒪᔪᑦ ᐃᓄᑐᐃᓐᓇᓗᑐᕐᖄᕕᓂᕐᓂᑦ, ᑭᓯᐊᓂ ᓄᓀᑦ ᐃᓚᖏᓐᓂ ᓯᑦᔭᐅᑉ ᓴᓂᐊᓂᐅᓂᕐᓴᖅ ᐃᓄᑐᐃᓐᓀᑦ ᐊᓂᕐᕋᒋᕙᑦᑕᕕᓂᖏᑦ ᓇᐅᑦᓯᑐᕐᑕᐅᓯᒪᑦᓱᑎᒃ ᑌᒫᕌᓗᒃ ᓴᒡᒐᑕᐅᓂᖃᑦᔭᕋᑎᒃ ᓇᕝᕚᑕᐅᓚᐅᔪᒻᒥᔪᑦ.

ᐱᖓᔪᐊ ᓇᔪᒐᐅᓚᐅᕐᑐᕕᓂᖅ ᓇᐅᑦᓯᑐᕐᑕᐅᓚᐅᔪᔪᖅ IcGm-5-ᒦᑦᑐᖅ ᐱᒋᐅᕐᓴᕕᐅᑉ ᐃᓕᓐᓂᐊᕕᐅᑉ ᑭᓪᓕᐊᐱᖓᓃᑦᓱᓂ: 1995 ᐃᓓᓐᓇᖓ ᓴᒡᒐᑕᐅᓚᐅᕐᓯᒪᔪᖅ ᐊᒻᒪᓗ 1996-ᒥ ᐊᕙᑕᖅ ᐱᐅᓯᑐᖃᓕᕆᕕᒻᒥᐅᓄᑦ ᓴᒡᒐᑕᐅᒋᐊᓪᓚᓱᓂ. ᑕᕝᕙᓂ ᐊᐅᔭᒥ 22-ᐆᑦ ᒦᑕᐅᓈᕐᑎᑐᑦ ᓯᒃᑭᑌᑦ ᓴᒡᒐᑕᐅᓚᐅᔪᔪᑦ ᓄᓇᐅᓪᓗ ᖄᖓᓃᑦᑐᑦ ᐃᑦᓴᓂᑌᑦ ᓄᐊᑕᐅᑦᓱᑎᒃ, ᓄᐊᑕᐅᔪᑦ 79-ᖑᓚᕿᑎᓪᓗᒋᑦ ᐅᔭᕃᓐᓇᐅᓱᑎᒃ ᐱᐅᑎᐅᓚᐅᕐᑐᕕᓃᑦ ᐊᒻᒪᓗ 20000 ᐃᓕᕐᓂᓗᑯᕕᓃᑦ.

ᐊᕙᑕᖅ ᐱᐅᓯᑐᖃᓕᕆᕕᒃ ᓇᑯᕐᒦᒍᒪᕗᖅ ᐱᑐᕝᕕᒃ ᓄᓇᒥᒃ ᑎᒍᒥᐊᕐᑎᑯᓐᓂᒃ ᐃᓄᑦᔪᐊᒥ ᐱᓇᓱᐊᖃᑎᒋᑦᓯᐊᖃᑦᑕᓚᐅᔪᒐᑦᑎᒋᑦ ᑐᔪᕐᒥᐅᕕᖃᕐᑎᓯᑦᓯᐊᓱᑎᓗ ᐃᓄᑦᔪᐊᒥᐅᒍᓐᖏᑑᓐᓂᒃ ᐃᑦᓴᓂᑕᕐᓂᐊᑏᓐᓂᒃ. ᓇᑯᕐᒦᒥᔪᒍᑦ ᐃᓚᐅᓚᐅᔪᓂᒃ ᑕᕝᕙᓂ ᐊᐅᔭᒥ ᐃᑦᓴᓂᑕᕐᓂᐊᑎᓪᓗᑕ ᐱᓇᓱᐊᕈᒪᑦᓯᐊᖃᑦᑕᓚᐅᔪᒻᒪᑕ ᓯᓚᓗᐊᓗᑦᓴᕋᓗᐊᕐᒪᑦ, ᐊᓄᕆᐊᓗᑦᓴᕋᓗᐊᕐᒪᑦ ᓯᕿᓐᓂᑐᐊᐱᐅᒐᓗᐊᕐᒪᓘᓐᓃᑦ. ᓈᓓᓐᓇᒐᓱᐊᓚᖓᕗᓯ ᑐᓴᕋᑦᓴᕆᓛᓕᕐᒥᔭᑦᑎᓂᒃ.