• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᑐᕓᔮᕈᑦ (ᔪᓓ) 17, 2012-ᒥ, ᐱᖓᓱᑦ ᐃᑦᓴᓂᑕᕐᓂᐊᑏᑦ – Jennifer M. Bracewell (ᐱᓯᒪᔪᖅ ᐊᕙᑕᖅ ᐱᐅᓯᑐᖃᓕᕆᕕᒻᒥᑦ), Elspeth Ready (ᐃᓕᓐᓂᐊᕕᕐᔪᐊᒥᑦ ᐊᒥᐊᔨᑫᑦ ᓄᓇᖓᓐᓂ ᐃᓕᓐᓂᐊᕇᒍᑎᑖᕋᓱᐊᕐᑐᖅ), ᐊᒻᒪᓗ Dr Frédéric Dessène (ᐃᓕᓐᓂᐊᕕᕐᔪᐊᒥ ᐃᓕᓐᓂᐊᕇᕐᓯᒪᔪᖅ) – ᑎᑭᓚᐅᔪᕗᑦ ᐁᕕᕐᑑᑉ ᑎᑭᕋᖓᓄᑦ, ᐁᕕᕐᑑᖅ 30-ᑭᓛᒥᑕᓄᑦ ᐅᖓᓯᓐᓂᓕᒃ ᑲᖏᕐᓱᔪᐊᑉ ᓯᕿᓂᖓᓃᑦᓱᓂ. ᑖᕗᓐᖓᓚᐅᔪᔪᑦ ᓄᓇᓐᖑᐊᑎᒍᑦ ᓇᓗᓀᕐᓯᒋᐊᕐᑐᓱᑎᒃ ᑐᓃᑦ ᓇᔪᕐᐸᑕᕕᓂᖏᓐᓂᒃ ᑐᒥᐅᔭᐅᑦᓱᑎᒃ ᑐᐱᕐᕕᐊᓗᕕᓂᕐᓂᒃ JiEv4-ᒦᑦᑐᓂᒃ ᓄᓇᒥ. ᒪᕐᕉᒃ ᐃᓕᓐᓂᐊᑏᒃ ᐊᕐᓴᓂᕐᒥ ᐳᕐᑐᓂᕐᓴᒥ ᐃᓕᓐᓂᐊᓱᑎᒃ, ᐋᓂ ᓴᑭᐊᒐᖅ ᐊᒻᒪᓗ ᓕᑎᐊ ᓂᖏᐅᕈᕕᒃ, ᐃᑲᔪᕆᐊᕐᓯᒪᓚᐅᔪᔫᒃ ᐃᑦᓴᓂᑕᕐᓂᐊᑐᓂᒃ. ᐃᑦᓴᓂᑕᕐᓂᐊᑏᑦ ᒪᓕᒐᖃᓚᐅᔪᔪᑦ ᒪᕐᕉᓂᒃ ᐊᖑᓇᓱᑦᑏᓂᒃ/ᒪᓕᒑᓐᓂᒃ: ᓵᓐᑎ ᔮᑲᒥᒃ ᐊᒻᒪᓗ ᐱᑕ ᑭᐊᑌᓐᓇᒥᒃ ᓄᑲᕐᓯᐅᓱᓂ. ᐃᑲᔪᕐᑕᐅᓚᐅᔪᒻᒥᔪᑦ ᓄᐊ ᐋᓇᖃᑕᕐᒧᑦ ᐃᓓᑦᔭ ᕿᓰᕐᒧᓗ ᐊᐅᓚᒍᑎᖃᕐᓂᑯᑦ ᓯᓂᑦᑕᕕᑦᓴᖃᕐᓂᑯᓪᓗ. ᐱᑦᔪᑎᒋᔭᐅᓚᐅᔪᔪᖅ ᑖᑦᓱᒧᖓ ᖃᐅᔨᓴᕐᓂᒧᑦ ᓄᓇᓐᖑᐊᑎᒍᑦ ᓇᓗᓀᕐᓯᒋᐊᕐᑐᓱᑎᒃ ᑐᒥᐅᔭᐅᑦᓱᑎᒃ ᑐᐱᕐᕕᐊᓗᕕᓂᕐᓂᒃ ᓯᕗᓪᓕᐹᑦᓯᐊᒥᒃ ᑐᑭᓯᓇᕐᑎᓯᒐᓱᐊᕐᓱᑎᒃ ᑐᐱᕐᕕᕕᓈᓗᐃᑦ ᒥᑦᓵᓄᑦ, ᐅᓪᓗᒥᒧᑦ ᑎᑭᑦᓱᒍ ᑖᕙᒃᑯᐊ ᖃᐅᔨᓴᕐᑕᐅᓯᐊᓚᐅᕐᓯᒪᒐᓛᓐᖏᒪᑕ.
ᑌᑰᓇᑦᓭᓇᕐᓗ ᐃᑦᓴᓂᑕᕐᓂᐊᑎᓪᓗᒋᑦ, ᐃᓄᑐᐃᓐᓇᓗᑐᕐᖄᕕᓃᑦ ᓇᔪᒐᒋᕙᑦᑕᕕᓂᖏᑦ ᖃᐅᔨᓴᕐᑕᐅᓚᐅᔪᒻᒥᔪᑦ. ᓄᓇᐅᑉ ᖄᖓᓂᒃ ᖃᐅᔨᓴᕐᑏᑦ ᐃᓚᖃᓚᐅᔪᔪᑦ Professor Najat Bhiry-ᒥᒃ, ᓚᕚᓪ ᐃᓕᓐᓂᐊᕕᕐᔪᐊᖓᓐᓂᒥᐅᒥᒃ, ᐊᒻᒪᓗ ᒪᕐᕉᓂᒃ ᐃᓕᓐᓂᐊᕇᓪᓗᑐᕋᑕᓐᖏᑑᓐᓂᒃ ᓄᓇᕐᔪᐊᑉ ᓴᓇᒻᒪᖓᓂᒃ ᓚᕚᓪ ᐃᓕᓐᓂᐊᕕᕐᔪᐊᓭᓐᓇᖓᓂ, Jean-Francois Bernier-ᒥᒃ ᐊᒻᒪᓗ Etienne Brouard-ᒥᒃ. Dominique Marguerie, ᖃᐅᔨᓴᕐᑎ ᐅᐃᒍᐃᑦ ᓄᓇᖓᓐᓂ, ᐱᕈᓲᓂᒃ ᖃᐅᔨᓴᕐᓂᖃᓚᐅᔪᔪᖅ ᐁᑉᐸᖃᕐᓱᓂ Claude Paradis-ᒥᒃ, ᑖᓐᓇ ᓇᐹᕐᑐᓕᕆᓂᕐᒧᑦ ᐃᓕᓐᓂᐊᕇᒍᑎᑖᕋᓱᐊᕐᑐᖅ ᓚᕚᓪ ᐃᓕᓐᓂᐊᕕᕐᔪᐊᖓᓐᓂ. ᐱᑦᔪᑎᐅᓚᐅᔪᔪᖅ ᑖᒃᑯᓄᖓ ᖃᐅᔨᓴᕐᓂᓄᑦ ᓄᐊᑦᓯᒍᒪᓚᐅᔪᒻᒪᑕ ᖃᐅᔨᔭᒥᓐᓂᒃ ᖃᓄᖅ ᐱᓂᐊᕐᓂᖃᖃᑎᒌᓲᒍᒻᒪᖔᑕ ᐃᓄᐃᑦ ᑲᖏᕐᓱᔪᐊᕐᒥᐅᑦ ᐅᓕᕐᓀᓯᒐᓱᐊᕐᓂᑎᒍᑦ ᐊᕙᑎᖓᑕᓗ ᓴᓇᒻᒪᖓᓂᒃ ᐁᕕᕐᑑᒥ. ᑖᓐᓇ ᖃᐅᔨᓴᕐᓂᐅᓚᐅᔪᔪᖅ ᐊᑐᐃᓐᓇᕈᕐᑎᑕᕕᓂᖅ ᐊᕙᑕᖅ ᐱᐅᓯᑐᖃᓕᕆᕕᒻᒧᑦ ᐃᓚᒋᔭᐅᑎᓪᓗᒍ ᓯᕗᓕᑦᑕ ᐃᓅᓯᕆᓚᐅᕐᑕᖏᑦ ᐊᑑᑎᓚᐅᕐᑕᖏᓪᓗ-ᒧᑦ Community-University Research Project (CURA: http://www.avataq.qc.ca/en/ARUC/Le-projet-ARUC), ᐱᓇᓱᐊᕐᑕᐅᓂᖓᓄᑦ ᑮᓇᐅᔭᖃᕐᑎᑕᐅᑦᓱᓂ ᑲᓇᑕᒥ ᑐᕐᖃᑕᕐᕕᒧᑦ Social Sciences and Humanities Reseach Council of Canada-ᒧᑦ. (SSHRC: http://www.sshrc-crsh.gc.ca/home-accueil-eng.aspx). The Paul Émile Victor Polar Institute ᑮᓇᐅᔭᖃᕐᑎᓯᖃᑕᐅᓚᐅᔪᒻᒥᔪᖅ ᐃᓚᒋᔭᐅᑎᓪᓗᒍ LOTECHAIN ᐱᓇᓱᐊᕐᑕᐅᓂᖓᓄᑦ, ᑮᓇᐅᔭᖃᕐᑎᓯᖃᑕᐅᓚᐅᔪᒻᒥᒪᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐃᓚᒋᔭᐅᑎᓪᓗᒍ ᐃᓕᓐᓂᐊᑎᓂᒃ ᐱᓇᓱᑦᑎᓯᓂᕐᒧᑦ ᐱᓇᓱᐊᕐᑕᐅᓂᖓᓄᑦ.
ᐱᓇᓱᐊᕈᓰᒃ ᒪᕐᕉᒃ ᐅᖓᑖᓄᑦ ᐃᑦᓴᓂᑕᕐᓂᐊᓂᑦᑎᓂ, ᐊᓪᓚᖁᑎᓕᐅᓚᐅᔪᕗᒍᑦ 4000-ᒦᑲᓵᑦᑐᓂᒃ ᓄᓇᓐᖑᐊᑎᒍᑦ ᓇᓗᓀᕐᓯᒪᓕᕐᑕᑎᓂᒃ ᓄᓇᓂᒃ. ᑌᒣᓐᓂᑯᕕᓂᑦᑎᓄᑦ ᓈᒻᒪᓈᑦᓯᐊᑐᒥᒃ ᓄᓇᓐᖑᐊᓕᐅᕈᓐᓇᓛᕐᓂᐊᓕᕐᑐᒍᑦ ᓇᕐᓴᒥᒃ ᑖᕙᒃᑯᐊ ᑐᒥᐅᔭᐅᑦᓱᑎᒃ ᑐᐱᕐᕕᕕᓂᐊᓗᐃᑦ JiEv4-ᒥ ᑕᑯᔭᐅᕕᕕᓂᖏᓐᓂ. ᓱᓕᔪᕐᔫᔮᕐᓱᑎᒃ ᓇᕐᓴᐅᑉ ᖃᓄᐃᓕᖓᓂᖏᑦ ᑐᓃᓪᓗ ᑐᐱᕐᕕᕕᓂᐊᓗᖏᑦ ᐱᓇᓱᐊᕐᑕᐅᓛᕐᓂᐊᑐᑦ ᑕᕐᕿᓂ ᙯᔪᓂ. ᐅᓂᒃᑳᓛᖏᓐᓈᖁᒍᑦ…