• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

2011 ᐊᐅᔭᖓᓐᓂ ᐊᕙᑕᖅ ᐱᐅᓯᑐᖃᓕᕆᕕᒃ ᐃᑦᓴᓂᑕᕐᓂᐊᑎᖁᑎᒥᓐᓂᒃ ᓴᒡᒐᑎᑦᓯᓚᐅᔪᕗᖅ ᓄᓇᓂᓪᓗ ᕿᒥᕐᕈᑎᑦᓯᓱᓂ ᕿᑭᕐᑕᔪᐊᒥ ᐊᑯᓕᕕᐅᑉ ᓄᓇᓕᖓᑕ ᓴᓂᐊᓂ. ᐱᓇᓱᐊᕐᑕᐅᔪᖅ ᐃᓕᓐᓂᐊᑎᑦᓯᒍᑎᐅᓚᐅᔪᕗᖅ ᐊᑯᓕᕕᒻᒥᐅᑦ ᐳᕐᑐᓂᕐᓴᒥᒃ ᐃᓕᓐᓂᐊᑎᖁᑎᖏᓐᓂᒃ ᐃᓕᓵᓪᓗ ᐃᓕᓐᓂᐊᑎᑕᐅᒋᐊᒥᒃ ᑲᖐᒋᔭᖃᕋᓱᐊᒻᒪᕆᑦᓱᑎᒃ: ᐊᒥᓱᑲᓪᓓᑦ ᐅᕕᒐᕐᑐᐃᑦ ᐃᓕᒐᓱᐊᕐᑐᕕᓂᐅᓚᐅᔪᑦ ᐃᑦᓴᓂᑕᕐᓂᐊᓂᕐᒧᑦ. ᐅᑯᐊ ᐃᓕᓐᓂᐊᑏᑦ ᐃᓚᐅᓚᐅᔪᑦ ᐃᑦᓴᓂᑕᕐᓂᐊᓂᕐᒧᑦ: ᐄᕕ ᐊᓕᖁ, ᐃᓪᓗᑖᖅ ᐊᓇᐅᑕᖅ, ᓗᐊᔭ ᐊᓕᖁ, ᓘᑲᓯ ᐊᐅᓪᓚᓗᒃ, ᓘᓯ ᐊᓛᓱᐊᖅ, ᒫᑭ ᐃᕐᕈᒥᐊᖅ, ᐅᕿᑦᑐᖅ ᐊᒫᒪᑦᑐᐊᖅ, ᐹᑦᕆᒃ ᕿᓗᕐᕿ ᐊᒻᒪᓗ ᑑᒃᑲᖅ ᕿᓐᓄᐊᔪᐊᖅ. ᒪᙯᕝᕕᒋᔭᐅᔪᖅ ᐃᑉᐱᒋᔨᖃᓚᐅᔪᖅ ᓭᒪ ᒪᑭᒻᒪᒥᒃ ᐃᑲᔪᕐᑎᖃᕐᓱᓂ ᓓᓇ ᐊᓇᐅᑕᕐᒥᒃ, ᓗᐃᓴ ᓇᐃᐸᑐᒥᒃ ᑌᕕᑎ ᒪᑭᒻᒪᒥᓪᓗ. ᐅᑉᐱᓇᖁᑦᑐᕋᑕᐅᓚᐅᔪᒻᒥᔪᒍᑦ ᐃᓕᒃᑰᑎᓪᓗᒍ ᐃᓚᐅᓯᓐᖑᐊᕌᓗᑦᓴᒪᑦ ᒍᐃᓕ ᖁᒫᓗᒃ ᐅᒥᐅᔭᕐᒥᐅᖅ, ᒍᐃᓕᓗ ᐱᔭᑦᓴᖃᓚᐅᔪᑦᓱᓂ ᐊᓪᓚᖁᑎᓕᐅᕆᓂᕐᒥᒃ ᓄᓇᕕᐅᑉ ᐱᐅᓯᕆᓯᒪᔭᖓᓐᓂᒃ ᐃᓄᓐᓄᒃ ᐊᐱᕐᓱᑲᑦᑕᓱᓂ ᐃᑦᓴᓂᑕᕐᓂᐊᑎᒍᓪᓗ ᖃᐅᔨᓴᖃᑦᑕᓱᓂ. ᒪᕐᕉᒃ ᐃᓕᓐᓂᐊᑏᑦ ᓚᕚᓪ ᐃᓕᓐᓂᐊᕕᕐᔪᐊᖓᓐᓂ, ᔅᑎᐊᕙᓂ ᔅᑏᓛᓐᑦ ᐊᒻᒪᓗ ᔮᓇᑕᓐ ᐸᔫ, ᐃᓕᓐᓂᐊᕇᒍᑎᑖᕋᓱᐊᕈᑎᒥᓂᒃ ᖃᐅᔨᓴᕐᓂᖃᓚᐅᔪᒻᒥᔫᒃ ᑎᑦᔭᓗᕕᓃᑦ ᒥᑦᓵᓄᑦ ᓄᓇᐅᓪᓗ ᖄᖓᓃᑦᑐᓂᒃ ᕿᑭᕐᑕᔪᐊᒥ ᖃᐅᔨᓴᕐᓱᑎᒃ. ᐊᕙᑕᕐᒥᐅᑦ ᐱᓇᓱᑦᑏᑦ ᐅᑯᐊᒍᓚᐅᔪᑦ: ᑖᒥ ᐅᐃᑖᓗᑦᑐᖅ, ᐊᓐᑦᔫ ᐸᐱᑲᑦᑐᖅ, ᑌᕕᑦ ᖃᐅᕙᑦ ᐊᒻᒪᓗ ᐱᔦᕐ ᑎᕉᓯᔦᕐ.
2010-ᒥ ᕿᑭᕐᑕᔪᐊᒦᓚᐅᕐᑐᕕᓂᐅᑦᓱᑕ, ᐱᓇᓱᐊᖃᑎᖃᖃᑦᑕᓚᐅᔪᒍᑦ ᐊᑯᓕᕕᐅᑉ ᓯᕗᓕᕐᑎᖑᐊᖏᓐᓂᒃ ᓇᓪᓕᑳᖃᑎᒋᑦᓱᒋᑦ ᐃᑦᓴᓂᑕᕐᓂᐊᕕᐅᒐᔭᕐᑐᒥᒃ ᑲᖏᐊᑲᓪᓚᒥᒃ (ᓇᔪᒐᐅᓚᐅᕐᑐᕕᓂᕐᒦᑐᖅ JeGn-2-ᒥ) ᐃᑦᓴᓂᑕᕐᓂᐊᕕᑦᓴᓯᐊᖁᑎᒋᓂᕐᐹᕆᑦᓱᒍ. ᐃᑦᓴᓂᑌᑦ ᓴᒡᒐᑕᕕᓃᑦ ᑕᑯᑦᓴᑕᖃᓚᐅᔪᑦ ᒪᕐᕈᐃᓄᑦ ᐃᓅᖃᑎᒌᓐᖏᑐᑦᓴᔮᓐᓄᑦ ᓇᔪᕐᑕᐅᓚᐅᕐᓂᒪᑦ, ᑕᒪᒋᒃ ᐃᓅᖃᑎᒌᓐᖏᑐᑦᓴᔮᒃ ᑖᕙᓃᑉᐸᑐᕕᓂᐅᑎᓪᓗᒋᑦ ᐅᑭᐅᒍᓕᑐᐊᕐᒪᑦ. ᑐᓃᑦ ᓇᕿᑦᑐᐊᐱᓐᓂᒃ ᖃᕐᒪᓕᐅᕐᐸᑐᕕᓃᑦ, ᐃᓄᑐᐃᓐᓇᖄᕕᓃᑦ ᖃᕐᒪᓗᑐᕐᓂᒃ ᖃᕐᒪᓕᐅᕐᐸᑐᕕᓂᐅᑎᓪᓗᒋᑦ. ᒪᕐᕉᒃ ᖃᕐᒪᕕᓃᒃ ᓴᒡᒐᑕᐅᓚᐅᔫᒃ; ᐊᑕᐅᓯᖅ ᑐᓃᑦ ᖃᕐᒪᕕᓂᖓ ᐁᑉᐸᖓᓗ ᐃᓄᑐᐃᓐᓇᖄᕕᓃᑦ ᖃᕐᒪᕕᓂᖓ. ᓴᒡᒐᓂᑦᑎᒍᑦ, ᑕᑯᓚᐅᔪᒍᑦ ᓱᔪᑦᓯᒪᑦᓯᐊᒐᓛᓐᖏᑐᓂᒃ ᐃᑦᓴᓂᑕᓗᑳᓂᒃ ᐃᓪᓗᕈᐊᕕᓂᕐᓂᓗ ᕿᔪᓐᓂᒃ. ᑖᒃᑯᐊ ᐊᔪᒉᑦᑐᕋᑌᑦ ᓱᔪᓯᒪᑦᓯᐊᒐᓛᓐᖏᑐᑦ ᓄᐊᑕᐅᒍᓐᓇᓚᐅᔪᑦ ᐱᕈᕐᑐᕕᓂᐅᑦᓱᑎᒃ ᐆᒪᔪᕕᓂᐅᑦᓱᑎᓪᓘᓃᑦ ᐃᑦᓴᓂᑌᑦ ᑕᑯᑦᓴᐅᓲᖑᒐᑎᒃ ᐃᑦᓴᓂᑕᕐᓂᐊᕕᓐᓂ ᓄᓇᕕᒻᒥ.
ᐃᑦᓴᓂᑕᕐᓂᐊᓂᑦᑎᓂ, ᐊᓪᓚᖁᑎᓕᐅᓚᐅᔪᒍᑦ ᐊᒥᓱᑲᓪᓚᓂᒃ ᑐᓃᑦ ᐅᑭᐅᒥ ᓇᔪᒐᒋᕙᑦᑕᕕᓂᖏᓐᓂᒃ ᕿᑭᕐᑕᔪᐊᑉ ᓂᒡᒋᖓᑕ ᐅᐊᓐᓂᖓᓂ, ᐊᒻᒪᓗ ᐊᓯᒋᐊᓪᓚᖏᓐᓂᒃ ᐊᒥᓱᓂᒃ ᓇᔪᒐᐅᓚᐅᕐᑐᕕᓂᕐᓂᒃ ᑕᕐᕋᕙᓯᐅᑉ ᓯᑦᔭᖓᓐᓂ. ᑕᑯᑦᓴᓚᕆᒃ ᕿᑭᕐᑕᔪᐊᑉ ᓂᒡᒋᖓᑕ ᐅᐊᓐᓂᖓ ᓇᔪᕐᑕᐅᒐᔪᑦᑐᕕᓂᐅᒻᒪᑦ ᐅᑮᕐᓯᕕᐅᓲᒍᑦᓱᓂ ᐃᒻᒪᖄᓗ ᑕᒪᑦᓱᒧᖓ ᐱᑦᔪᑎᐅᑐᐃᓐᓇᕆᐊᓕᒃ ᖃᓂᑦᑐᒥ ᑐᕙᓱᐃᑦᑐᖃᕐᒪᑦ ᓄᓇᑐᐃᓐᓇᐅᑉ ᕿᑭᕐᑕᐅᓗ ᐊᑯᓐᓂᖓᓂ. ᓄᓇᐅᑉ ᐊᑖᓃᑦᑐᒪᕆᐅᓕᕐᑐᖅ ᐃᓄᑐᐃᓐᓇᓗᑐᕐᖄᕕᓃᑦ ᓇᔪᒐᒋᓚᐅᕐᑕᕕᓂᖓ ᑕᑯᔭᐅᓚᐅᔪᒻᒥᔪᖅ ᐃᑦᓴᓂᑕᕐᓂᐊᕕᐅᒐᔭᓐᖑᐊᑐᓂᒃ ᓇᐅᑦᓯᑐᕐᓂᖃᕐᑎᓗᒍ (ᓇᔪᒐᐅᓚᐅᕐᑐᕕᓂᖅ ᑕᒐᑕᒐᐅᔪᖅ ᐊᑎᖃᕐᑎᑕᐅᔪᖅ ᐆᒥᖓ: AKU-11-20). ᑖᓐᓇ ᓇᔪᒐᐅᓚᐅᕐᑐᕕᓂᖅ ᐃᑦᓴᓂᑕᓕᐊᓘᒍᓇᖅ ᓯᕗᓂᑦᓴᑎᓐᓂ ᓴᒡᒐᓂᖃᓕᕐᒥᐸᑦ. ᐊᒻᒪᓗ, ᐃᓕᓐᓂᐊᑎᓂᒃ ᐃᓕᓐᓂᐊᑎᑦᓯᓂᐅᓚᐅᔪᖅ ᐳᕐᑐᓂᕐᓴᒥᒃ ᐃᓕᓐᓂᐊᑎᓂᒃ ᐃᓕᑦᓯᒍᑕᐅᑦᓯᐊᓚᐅᔪᖅ ᐃᑦᓴᓂᑕᕐᓂᐊᓂᕐᒥ ᓴᒡᒐᒍᓯᐅᒋᐊᓕᓐᓂᒃ, ᐃᓕᓐᓂᐊᑏᓪᓗ ᖃᐅᔨᒋᐅᕐᑎᓱᒋᑦ ᖃᓄᖅ ᓄᓇᐅᑉ ᖃᖔᓃᑦᑐᓂᒃ ᖃᐅᔨᓴᕐᓂᖃᓲᒍᒻᒪᖔᑦ ᐊᒻᒪᓗ ᖃᓄᖅ ᐃᑦᓴᓂᑌᑦ ᖃᖓᓂᑕᐅᒻᒪᖔᑕ ᓱᕐᖁᐃᑕᐅᒐᓱᐊᓲᒍᒻᒪᖔᑕ.