• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᕿᓚᓗᒐᕐᓯᐅᕕᒻᒥ/ᐅᒥᐅᔭᕐᒥ ᑐᓂᕐᑕᓂᐊᕐᓂᖃᕐᑐᕕᓂᖅ ᐱᓇᓱᐊᖃᑎᒌᑦᑎᓗᒋᑦ ᑕᓪᓕᒪᐅᑦᓱᑎᒃ ᐃᕐᕿᓖᑦ/ᑯᔩᑦ ᐃᓄᐃᓪᓗ ᐱᓪᓗᑯᒋᐊᓕᓐᓂᒃ ᐱᓇᓱᑦᑏᑦ ᑐᕓᔮᕈᑦ (ᔪᓓ) ᐊᒻᒪᓗ ᐊᐅᔭᓕᕈᑦ (ᐊᐅᒡᒍᔅᑎ) 2007-ᒥ. ᑖᓐᓇ ᐱᓇᓱᐊᖃᑎᒌᓐᓂᖅ ᐃᓱᒪᑖᕆᔭᐅᔪᕕᓂᖅ ᐊᓪᓓᑦ/ᑯᔩᑦ ᐊᕕᑦᑐᓯᒪᕕᒻᒥ ᐱᔪᓐᓇᓂᖃᕐᕕᖓᓄᑦ ᐊᕙᑕᖅ ᐱᐅᓯᑐᖃᓕᕆᕕᒻᒧᓗ ᐃᓗᐊᓃᑦᓱᓂ ᓯᕗᓂᑦᓴᑎᓐᓂ ᑲᓇᑕᓕᒫᒥ ᒥᕐᖑᐃᓯᕕᑦᓴᐅᑉ ᑕᓯᐅᔭᕐᒥ. ᐱᓇᓱᐊᖃᑎᒌᑦᑐᑦ ᐅᑯᐊᒍᓚᐅᔪᔪᑦ: ᓵᓕ ᖁᒫᓗᒃ ᐅᐃᓕ ᖁᒫᓗᓪᓗ ᐅᒥᐅᔭᕐᒥᐅᒃ ᐊᒻᒪᓗ ᒃᓛᔭᓐᔅ ᓇᑖᔅᑯᐊᓐ, ᐅᔨᑭ ᓇᑖᔅᑯᐊᓐ ᐊᒻᒪᓗ ᓵᓐᑎ ᐱᑕᑲᒻᔅᑲᒻ ᑰᑦᔪᐊᕌᐱᒻᒥᐅᑦ, ᐃᓚᖃᕐᓱᑎᒃ ᑐᓂᕐᑕᓂᐊᕐᑎᒥᒃ Christian Roy-ᒥᒃ (ᒃᕆᔅᑎᐊᓐ ᕈᐊ). ᐱᑦᔪᑎᒋᓗᐊᓐᖑᐊᓚᐅᔪᔭᖓ ᑐᓂᕐᑕᓂᐊᕐᓂᐅᑉ ᓇᕝᕚᕈᒪᑦᓱᑎᒃ ᐊᑦᔨᒌᓐᖏᑐᓂᒃ ᐃᓪᓗᕈᐊᕕᓂᕐᓂᒃ ᐊᐅᓚᑕᐅᕙᑦᑐᕕᓂᐅᑦᓱᑎᒃ ᑲᒻᐸᓂᕕᓂᒃᑯᓄᑦ ᕿᓚᓗᒐᕐᓯᐅᕕᐅᑉ ᐹᖓᓂ 1700-ᐄᑦ 1800-ᐄᓗ ᐊᕐᕌᒍᖏᓐᓂ ᐊᒻᒪᓗ ᖃᐅᔨᓴᕈᒪᑦᓱᑎᒃ Richmond Fort-ᒥᒃ (HaGb- 11)-ᒍᓂᕋᕐᑕᒥᒃ ᓇᔪᒐᕕᓂᕐᒥᒃ, ᓯᕗᓪᓕᐹᕕᓂᕐᒥᒃ ᑲᒻᐸᓂᒃᑯᑦ ᓂᐅᕐᕈᓯᕐᕕᕕᓂᖓᓂᒃ ᓇᑉᐸᑕᐅᓚᐅᕐᑐᕕᓂᐅᑦᓱᓂ ᕿᑭᕐᑕᑲᓪᓚᐅᑉ ᑕᕐᕋᖓᓂ 1750-ᒥ, ᐃᓄᒃᓱᓕᐊᐱᒻᒦᓱᓂ ᑕᓯᐊᔭᕐᒥᓗ.

ᕿᓚᓗᒐᕐᓯᐅᕕᒻᒥ, ᓇᔪᒐᕕᓂᕐᒦᑐᖅ ᑭᖑᓪᓕᐹᕕᓂᖅ ᓂᐅᕐᕈᓯᕐᕕᕕᓂᖅ ᓇᕝᕚᑕᐅᔪᕕᓂᖅ ᓯᕿᓂᕐᒦᑎᓪᓗᒍ ᓯᑦᔭᒥ. ᑕᑯᓐᓇᓂᑐᐃᓐᓇᑯᑦ ᓇᐅᑦᓯᑐᐃᑦᓱᑎᒃ ᑕᒪᑦᓱᒥᖓ ᓇᔪᒐᕕᓂᕐᒥᒃ, ᑕᑯᔪᕕᓃᑦ ᐊᑦᔨᒌᓐᖏᑐᓂᒃ ᓄᓇᐅᑉ ᐊᑖᓃᑦᑐᓂᒃ ᐃᓪᓗᐊᕈᓯᐅᔮᕐᑐᓂᒃ ᐊᒻᒪᓗ ᖁᓕᐅᓐᖏᒐᕐᑐᓂᒃ ᐊᖏᔪᐊᓘᑦᓱᑎᒃ ᖃᑦᑕᐅᔮᓗᓐᓂᒃ ᑎᕐᑎᑎᑦᓯᕕᐅᕙᑦᑐᕕᓂᕐᓂᒃ ᕿᓚᓗᒐᐅᑉ ᐅᕐᓱᖓᓂᒃ. ᖃᐅᔨᒪᒋᑦ ᕿᓚᓗᒐᕐᓂᐊᒪᕆᑉᐸᑐᕕᓂᐅᒻᒪᑕ ᐃᓅᒐᓱᐊᕈᑎᒋᑦᓱᒍ ᕿᓚᓗᒐᕐᓯᐅᕕᐅᑉ ᓂᐅᕐᕈᓯᕐᕕᖓᓐᓂ ᓇᔪᒐᕕᓂᕐᒥ (GIGe- 9)-ᒍᓂᕋᕐᑕᒥ. ᑕᕐᕋᒦᑦᑐᒥ ᓯᑦᔭᒥ, ᓇᓗᓀᕐᓯᒍᑏᑦ ᓯᒃᑭᑖᐲᑦ ᓴᒡᒐᑕᐅᓚᐅᔪᔪᑦ ᑰᒐᔮᕌᐱᐅᑉ ᓂᒡᒋᖓᓐᓃᑐᑦ ᑰᑦᓱᓂ ᑰᒻᒧᑦ. ᐱᖓᓱᑦ ᓄᓇᐅᑉ ᐊᑖᓃᑦᑐᑦ ᐃᓪᓗᐊᕈᓯᐅᔮᕐᑐᑦ ᐊᒻᒪᓗ ᐊᑕᐅᓯᖅ ᐅᔭᕃᓐᓇᐅᓱᓂ ᖃᑦᓯᑐᑲᓪᓚᒃ ᐃᑯᐊᓚᑦᓯᕕᕕᓂᐅᑦᓱᓂ ᐃᓯᕆᒍᑎᖓᓗ ᓇᕝᕚᑕᕕᓃᑦ ᑖᕙᓂ ᓇᔪᒐᕕᓂᕐᒥ. ᐊᑦᔨᒌᓐᖏᑐᑦ ᑐᓂᕐᑌᑦ, ᐆᑦᑑᑎᒋᓗᒋᑦ ᐆᓯᒪᔪᑦ ᑭᑭᐊᑦ ᐊᓯᖏᓪᓗ ᓴᕕᕋᔭᐅᑦᓱᑎᒃ ᓴᓇᕐᕈᑎᕕᓃᑦ, ᒪᕐᕋᐅᓱᑎᒃ ᓱᐴᕐᑑᑎᕕᓂᐅᑉ ᐃᓚᕕᓂᖏᑦ ᐃᓚᖏᓪᓗ ᒪᕐᕋᓴᔭᐅᑦᓱᑎᒃ ᐃᓕᕐᓂᓗᑯᕕᓃᑦ ᓴᒡᒐᑕᐅᓚᐅᔪᔪᑦ. ᑕᑯᓐᓇᓱᒋᑦ ᑐᓂᕐᑌᑦ ᖃᓄᐃᑦᑐᓴᔭᐅᓂᖏᑦ, ᑖᓐᓇ ᖃᓪᓗᓈᓄᑦ ᓇᔪᕐᑕᐅᓚᐅᕐᑐᕕᓂᖅ GIGe- 10-ᒍᓂᕋᕐᑕᐅᓱᓂ 1700-ᐄᑦ ᐊᕐᕌᒍᖏᑦ ᐃᓱᓕᓕᕐᑎᓗᒋᓂᑕᖅ ᐃᒻᒪᖄᓪᓗ ᐊᑕᐅᑦᓯᑰᖃᑎᖃᑐᐃᓐᓇᒋᐊᖃᕐᑐᕕᓂᐅᑦᓱᓂ ᑲᒻᐸᓂᐅᓚᐅᕐᓯᒪᔪᒃᑯᑦ ᓄᓇᓕᓐᖑᐃᒋᐊᓪᓚᒐᓱᐊᕐᓂᕕᓂᖓᓄᑦ ᑖᕙᓂ 1793-ᒥ.

ᐃᓄᒃᓱᓕᐊᐱᒻᒥ, 21 ᓄᓀᑦ ᓴᒡᒐᑕᐅᓚᐅᔪᔪᑦ Richmond Fort-ᒥ. ᑕᑯᓐᓇᓂᑐᐃᓐᓇᑯᑦ ᓇᐅᑦᓯᑐᐃᑦᓱᑎᒃ ᓇᔪᒐᕕᓂᕐᒥᒃ ᓇᕝᕚᓚᐅᔪᔪᑦ ᒪᕐᕉᓂᒃ ᐅᔭᕃᓐᓇᐅᓱᑎᒃ ᑐᑭᒧᖓᔫᓐᓂᒃ ᐱᕈᕐᕕᐅᓯᒪᓕᕐᓱᑎᒃ ᐱᖏᕐᓄᑦ, ᑖᒃᑯᐊ ᓱᕐᖁᐃᑕᐅᔪᕕᓃᑦ ᐊᒥᐊᒃᑯᕕᓂᕆᒋᐊᖏᑦ ᓯᕿᓂᐅᑉ ᐅᐊᓐᓂᖓᓃᑦᓱᓂ ᖃᕐᖃᐅᑉ ᐊᑭᓐᓇᖓᓂ ᐃᓪᓗᕈᐊᕕᓂᕐᒧᑦ ᓇᑉᐸᑕᐅᓚᐅᕐᑐᕕᓂᕐᒧᑦ 1750-ᒥ. ᑖᓐᓇ ᓴᓇᒪᔪᖅ ᓯᑐᕐᖃᒦᑦᑐᖅ ᕿᕕᖓᔫᔮᕐᑐᒥ. ᑌᒣᑦᑐᒐᓓᑦ ᐊᑭᓐᓀᑦ ᓴᓇᒪᔪᑦ ᐋᕐᕿᓱᕐᑕᐅᕙᑦᑐᕕᓃᑦ ᐅᓇᑕᕐᑎᓄᑦ. ᐃᓚᖏᑦ ᐱᓇᓱᐊᕐᕕᐅᕙᑦᑐᕕᓃᑦ ᓇᓗᓀᕐᑕᐅᓚᐅᔪᒻᒥᔪᑦ, ᓱᒐᓗᑦᑐᖅ ᓇᔪᒐᕕᓂᕐᒥ ᐱᓇᓱᕝᕖᑦ ᐃᒐᕖᓪᓗ ᓇᑉᐸᑕᐅᕙᑦᑐᕕᓃᑦ. ᑖᕙᓐᓇ ᓄᓇ ᓇᕝᕚᕕᐅᓚᐅᔪᔪᖅ ᐊᑦᔨᒌᓐᖏᑐᓂᒃ ᑐᓂᕐᑕᓂᒃ, ᐆᑦᑑᑎᒋᓗᒋᑦ ᐃᓪᓗᕈᐊᑉ ᐃᓚᕕᓂᖏᑦ, ᐃᓚᖏᑦ ᓴᕕᕋᔭᐅᑦᓱᑎᒃ ᓴᓇᕐᕈᑎᕕᓃᑦ, ᓴᒃᑯᕕᓃᓪᓗ ᖁᑭᐅᑎᑐᖄᓗᓐᓄᑦ ᐊᒻᒪᓗ ᐅᓇᑕᐅᑎᕕᓃᑦ. ᒪᕐᕋᐅᑦᓱᑎᒃ ᓱᐴᕐᑐᕈᑎᕕᓂᐅᑉ ᐃᓚᕕᓂᖏᑦ, ᓄᓇᔭᐅᑦᓱᑎᒃ ᐳᓪᓚᐅᔭᑦᓴᔦᑦ ᐊᒻᒪᓗ ᒪᕐᕋᓴᔭᐅᑦᓱᑎᒃ ᓯᖁᑦᑎᓂᓗᑯᕕᓃᑦ ᓴᒡᒐᑕᐅᓚᐅᔪᒻᒥᔪᑦ ᐃᓚᖃᕐᒥᓱᑎᒃ ᐳᓪᓚᐅᔭᑦᓴᔭᐅᑦᓱᑎᒃ ᐱᖁᑎᓂᒃ/ᓴᕐᐸᖓᓂᒃ ᐊᒻᒪᓗ ᓴᐅᓂᕕᓂᕐᓂᒃ.

ᐊᐅᔭᖅ 2007-ᒥ, ᑐᓂᕐᑕᓂᐊᕐᓂᒧᑦ ᖃᐅᔨᓴᕐᓂᐅᓚᐅᔪᔪᑦ ᐱᐅᔪᒻᒪᕆᐊᓘᓚᐅᔪᔪᑦ! ᕿᓚᓗᒐᕐᓯᐅᕕᐅᑉ ᑕᕐᕋᖓᓂ ᓯᑦᔭᒥ, ᖃᐅᔨᓴᕆᐊᓪᓚᑐᐊᕈᑎᒃ ᖃᐅᔨᒪᔭᐅᒋᐊᓕᓐᓂᒃ ᖃᐅᔨᒋᐊᓪᓚᒐᔭᕐᑐᑦ 1700-ᐄᑦ ᐊᕐᕌᒍᖏᑦᑕ ᕿᑎᖓᓂ ᐃᓄᖃᕐᐸᓂᕕᓂᖓᓂᒃ ᕿᓚᓗᒐᕐᓯᐅᕕᒻᒦᑑᑉ ᐃᓪᓗᕈᐊᑉ, ᑖᓐᓇ ᓂᐅᕐᕈᓯᕐᕕᕕᓂᖅ ᓇᑉᐸᑕᐅᓚᐅᕐᑐᕕᓂᐅᑦᓱᓂ ᑲᒻᐸᓂᕕᓂᒃᑯᓄᑦ. ᑖᑦᓱᒪ ᓯᕿᓂᐊᓂ, ᓇᔪᒐᕕᓂᕐᒥᒃ ᖃᐅᔨᓴᕆᐊᓪᓚᑐᐊᕈᑎᒃ ᕿᓚᓗᒐᕐᓯᐅᕕᒻᒦᑐᒥᒃ ᓂᐅᕐᕈᓯᕐᕕᕕᓂᕐᒥᒃ (1851-ᒥᑦ 1891-ᒧᑦ) ᐊᓪᓚᖁᑎᓕᐅᒍᓐᓇᕋᔭᕐᒥᔪᑦ ᑌᑲᓂ ᐃᓄᐃᑦ ᓂᐅᕐᓰᕙᓐᓂᕕᓂᖏᓐᓂᒃ ᐊᒻᒪᓗ ᖃᐅᔨᓕᐅᒥᑎᑦᓯᓗᓂ ᕿᓚᓗᒐᐅᑉ ᐅᕐᓱᖓᓂᒃ ᐱᓇᓱᐊᕐᐸᓂᕕᓂᖏᓐᓂᒃ ᐱᑦᔪᑎᖃᕐᓱᑎᒃ ᒥᕐᖁᓕᓐᓂᒃ ᓂᐅᕐᕈᓯᕐᓂᒧᑦ. ᑌᒣᒐᓗᐊᕐᑎᓗᒍ, ᐃᓄᒃᓱᓕᐊᐱᒻᒥ ᖃᐅᔨᓴᕐᓂᕕᓂᖅ Richmond Fort-ᒥ ᓱᕐᖁᐃᓯᒍᑕᐅᓚᐅᔪᔪᖅ ᐱᒻᒪᕆᐅᒋᐊᖓ HaGb-11-ᒍᓂᕋᕐᑕᖅ ᓇᔪᒐᕕᓂᖅ ᐊᒻᒪᓗ ᑐᓂᕐᑕᓂᐊᕐᑐᑦ ᑕᑯᒍᓐᓇᓴᓕᐅᔪᑦᓱᑎᒃ ᐅᔭᕋᓱᑦᔪᓂᒃ ᑐᓐᖓᕕᕕᓂᕐᓂᒃ ᖃᕐᖃᐅᑉ ᐊᑭᓐᓇᖓᓂ ᐃᓪᓗᕈᐊᕕᓂᕐᒧᑦ, ᐊᒻᒪᓗᐊᓪᓛᑦ ᐅᐊᓐᓂᖓᓃᑦᑐᒥᒃ ᐊᑭᓐᓇᒥᒃ ᐱᓇᓱᕝᕕᐅᕙᑦᑐᕕᓂᐅᑉ. ᖃᐅᔨᓴᕐᓂᕕᓂᕐᒧᑦ ᐊᓪᓚᖁᑎᒋᐊᓪᓓᑦ ᑎᒍᔭᐅᒡᒐᑐᓛᓐᖏᒥᔪᑦ ᐊᕐᕌᒍᕐᓂ ᑎᑭᓴᕐᑐᑐᓂ ᑐᑭᓯᑎᑦᓯᓕᐅᒥᒐᔭᕐᓗᑎᒃ ᐱᖓᔪᒋᔭᐅᑦᓱᓂ ᐊᑯᓂᓂᑕᐅᓂᕐᐸᐅᖃᑕᐅᔪᒥᒃ ᑲᒻᐸᓂᒃᑯᑦ ᓂᐅᕐᕈᓯᕐᕕᕕᓂᖓᓂᒃ ᓇᑉᐸᑕᐅᓚᐅᕐᑐᕕᓂᐅᑦᓱᓂ East Main-ᒥ.