ᐅᓪᓗᕆᐊᒍᓂᕋᕐᑕᐅᔪᒥ ᐅᕕᒐᕐᑐᖃᐅᑎᒥᐅᑦ ᐳᓛᕆᐊᕐᐳᑦ ᓄᓇᕕᒻᒥᐅᑦ ᐃᓄᓕᕐᑕᖁᑎᒥᓐᓂᒃ ᓴᓂᕐᕓᓯᒪᕕᖓᓄᑦ ᐅᒃᑑᐱᕆ 19-ᒥ
ᑭᓇᒨᒻᒪ¯ᑦ ᐊᓪᓚᑐᖅ ᓈᓐᓯᐋᓐ ᑯᔩ
ᐅᓪᓗᕆᐊᖅ ᐅᕕᒐᕐᑐᖃᐅᑎᒃ ᓄᓇᕕᒻᒥᐅᓄᑦ ᐃᓄᓐᓄᑦ ᐅᕕᒐᕐᑐᓄᑦ ᐊᓂᕐᕌᐱᒋᔭᐅᕗᖅ ᒧᓐᑐᔨᐊᒦᑦᓱᓂ. ᑖᕙᓂᒥᐅᑦ ᐅᕕᒐᕐᑐᐃᑦ ᐊᕐᕌᒍᖃᕐᑐᑦ 11-ᒥᑦ 17-ᒧᑦ. ᐱᑦᔪᑎᒋᔭᐅᓚᐅᔪᔪᖅ ᐃᑭᑦᑑᓗᑎᒃ ᐃᒻᒥᒎᕐᑎᑐᑦ ᐅᕕᒐᕐᑐᐃᑦ ᐳᓛᕆᐊᕐᑎᓗᒋᑦ ᓄᓇᕕᒻᒥᐅᑦ ᐃᓄᓕᕐᑕᖁᑎᒥᓐᓂᒃ ᓴᓂᕐᕓᓯᒪᕕᖓᓄᑦ ᕿᒥᕐᕈᒋᐊᕐᑐᓗᑎᒃ ᐃᓄᓕᕐᑕᓂᒃ ᓴᓂᕐᕙᑕᐅᓯᒪᔪᓂᒃ ᑕᑯᔭᕐᑐᕖᑦ ᓴᓂᕐᕓᓯᒪᕕᖓᓐᓂ. ᐳᓛᕆᐊᕐᑎᓯᓂᐅᓚᐅᔪᔫᑉ ᐱᑦᔪᑎᖓ ᑕᑯᑎᓪᓚᕆᓪᓗᒋᑦ ᐅᕕᒐᕐᑐᐃᑦ ᐃᓗᕐᕈᓯᕐᒥᓂᒃ, ᖃᐅᔨᓕᐅᒥᓚᕿᓗᑎᒃ ᐃᒻᒥᓂᒃ ᐃᓄᑐᐃᓐᓇᐅᓂᕐᒥᓂᒃ ᑕᑯᑎᓪᓗᒋᑦ ᐃᓄᓕᕐᑕᓂᒃ ᑖᒃᑯᐊ ᐃᓄᓕᕐᑌᑦ ᐱᑐᑦᓯᒪᒍᑕᐅᒻᒪᑕ ᓯᕗᓕᕕᓂᑦᑕ ᐱᐅᓯᕆᓯᒪᔭᖏᓐᓄᑦ. ᐅᕕᒐᕐᑐᐃᑦ ᑕᐸᓱᐊᒐᓛᓚᐅᔪᓐᖏᒥᔪᑦ ᐋᓐᑎ ᐸᐱᑲᑦᑐᒥᒃ, ᐃᑦᔭᕈᒥᓇᕐᑐᖑᐊᑐᐃᓐᓇᐅᒪᑦ ᑖᒃᑯᓄᖓ ᓱᕈᓯᕐᓄᑦ. ᐋᓐᑎ ᓲᓱᒋᔭᐅᒻᒪᕆᕙᓗᓚᐅᔪᔪᖅ ᑖᒃᑯᓄᖓ ᐅᕕᒐᕐᑐᓄᑦ, ᑌᒫᒃ ᓲᓱᒋᔭᐅᑦᓴᕋᒥ ᑕᑯᔭᕐᑐᕕᒻᒥ ᐱᓇᓱᑦᑏᑦ ᑕᑯᓐᓇᑎᓪᓗᒋᑦ ᐋᓐᑎᒥᒃ “ᐃᓄᓪᓗᑑᑦᓱᓂ, ᐊᓂᕐᑎᕆᑦᓱᓂ” ᐃᓄᓕᕐᑕᐅᒋᐊᖓ. ᑕᒪᓐᓇ ᐱᐅᔪᒻᒪᕆᐅᓚᐅᔪᔪᖅ ᐅᕕᒐᕐᑐᐃᑦ ᑕᑯᒍᓐᓇᓯᓚᐅᔪᒻᒪᑕ ᐅᕕᒐᕐᑑᓱᓂ ᖃᓪᓗᓈᓂᒥᐅᔭᐅᑦᓱᓂᓗ ᐃᓄᑐᐃᓐᓇᒥᒃ ᐊᖑᑎᒥᒃ ᐱᓇᓱᐊᕐᑐᒥᒃ ᑕᑯᔭᕐᑐᕖᑦ ᓴᓂᕐᕓᓯᒪᕕᖓᓐᓂ, ᐃᓕᓐᓂᐊᓱᓂ ᖃᓄᖅ ᐱᐅᓕᑦᓯᔭᐅᒍᓐᓇᒪᖔᑕ ᐃᓄᐃᑦ ᐃᓄᓕᕐᑕᖁᑎᖏᑦ.
ᐳᓛᕆᐊᕐᓂᕆᓛᓕᕐᒥᔭᖓ ᐅᓪᓗᕆᐊᖅ ᐊᓂᕐᕌᐱᒻᒥᐅᑦ ᐊᑐᐃᓐᓇᕈᕐᑕᐅᒪᔪᖅ ᓂᕕᐊᕐᓯᐊᓄᑦ ᑎᓯᒻᐱᕆᐅᑉ ᑕᕐᖃᖓᑕ ᐱᒋᐊᕐᓂᖓᓂ.
