• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᙯᕐᖁᔭᐅᒐᒥᒃ ᑲᓇᑕᒥᐅᑦ ᖃᐅᔨᓴᕐᕕᖓᓐᓄᑦ CERPECA-ᒧᑦ ᐊᒻᒪᓗ ᑐᑭᒧᐊᕐᑎᓯᔨᖓᓄᑦ, Prof. Jacques-Guy Petit-ᒧᑦ (ᐃᓕᓐᓂᐊᑎᑦᓯᔨᒻᒪᕆᒃ ᔮᒃ-ᑮ ᐱᑎᑦ-ᒧᑦ) ᐊᕙᑕᖅ ᐱᐅᓯᑐᖃᓕᕆᕕᐅᑉ ᑭᒡᒐᑐᕐᑎᖏᑦ ᐃᓚᐅᓚᐅᔪᕗᑦ ᓄᓇᕐᔪᐊᒥᐅᒍᖃᑎᒌᑦ ᑲᑎᒪᓂᒻᒪᕆᖓᓄᑦ (ᑲᑎᒪᐅᑎᖃᕐᓱᑎᒃ ᐃᕐᕿᓕᓐᓂᒃ/ᑯᔩᓂᒃ ᐃᓄᓐᓂᓗ ᑯᐯᒃ ᑕᕐᕋᖓᓂᒥᐅᓂᒃ – ᐅᖄᔭᐅᑎᓪᓗᒋᑦ ᓄᓇᒃ, ᑮᓇᐅᔭᑎᒍᑦ ᒪᑭᑕᒐᓱᐊᕐᓂᖅ, ᐃᓅᖃᑎᒌᑦ ᐊᒻᒪᓗ ᐱᐅᓯᑐᖃᖅ), ᐊᕐᓇᓕᓐᖑᑎᕕᒃ (ᐅᒃᑑᐱᕆ) 21-ᒥᑦ 24-ᒧᑦ Angers ᐃᓕᓐᓂᐊᕕᕐᔪᐊᖓᓐᓂ ᐅᐃᒍᐃᑦ ᓄᓇᖓᓐᓂ France-ᒥ. ᐊᕙᑕᖅ ᑭᒡᒐᑐᕐᑕᐅᓚᐅᔪᔪᖅ ᕉᑕ ᑯᑭᐊᐱᒧᑦ ᑕᓂᐊᓪ ᔮᓐᑦᕉᓐ-ᒧᓪᓗ, ᑖᒃᑯᐊ ᓯᑯᑦᓴᔭᕐᓂᒃ ᑕᑯᔭᐅᑎᑦᓯᓚᐅᔪᔫᒃ; ᐃᓚᒌᓐᓂᓕᕆᔨᒧᑦ ᒫᑕ ᐹᓕᓴᒧᑦ; ᐊᒻᒪᓗ Robert Frechette-ᒧᑦ (ᕈᐱᐊᕐ ᕝᕆᓯᐊᑦ) Élodie Parriaux-ᒧᓪᓗ (ᐃᓘᑏ ᐹᕆᐅ), ᑖᒃᑯᐊ ᑕᑯᔭᐅᑎᑦᓯᓚᐅᔪᔫᒃ ᐊᑦᔨᖑᐊᕐᓂᒃ 2008-ᒥ ᐊᕐᕕᓂᐊᕐᓂᕕᓂᕐᒥᒃ ᖃᐅᔨᒋᐅᕐᑕᐅᑎᑦᓯᓱᑎᓪᓗ ᐊᕙᑕᐅᑉ ᓄᑖᖁᑎᒋᓕᕐᑕᖓᓂᒃ ᓄᓇᕐᔪᐊᒥ ᖃᕆᑕᐅᔭᑎᒍᑦ ᓄᐃᑕᑎᑦᓯᒍᑎᖓᓂᒃ.

ᐅᑯᐊ ᑲᑎᒪᖃᑕᐅᓚᐅᔪᒻᒥᔪᑦ ᓄᓇᕕᒻᒥᑦ ᐱᓯᒪᑦᓱᑎᒃ: ᒪᑭᕝᕕᐅᑉ ᐊᖓᔪᕐᖄᖓ, ᐱᑕ ᐋᑕᒥ; Mr. Jean-François Arteau (ᒥᔅᑕ ᔮᓐ-ᕝᕌᓐᓱᐊ ᐊᕐᑑ) ᐊᒻᒪᓗ ᑲᑎᕕᒃ ᐃᓕᓐᓂᐊᓂᓕᕆᕕᖓᑕ ᐱᓇᓱᑦᑎᒐᓴᕐᔪᐊᖏᑦ, ᑖᒃᑯᐊ ᑲᑎᒪᓂᒻᒪᕆᒻᒥ ᑲᑎᒪᖃᑕᐅᒐᓗᐊᕐᒥᓱᑎᒃ ᑐᓵᑦᓱᑎᓪᓗ ᑐᓵᔨᐅᖃᑦᑕᓚᐅᔪᔪᑦ (ᐃᓄᒃᑎᑐᑦ/ᐅᐃᒍᐃᑎᑐᑦ/ᖃᓪᓗᓈᑎᑐᑦ), ᐱᔪᓐᓇᑐᑦᓯᐊᒍᑦᓱᑎᒃ ᐱᔭᕐᓃᑐᓄᑦ ᐊᕐᖁᓵᕐᑕᐅᖃᑦᑕᓕᕋᓗᐊᕋᒥᒃ. ᑭᖑᓪᓕᐹᖅ ᒥᑭᓂᕐᐸᐅᒐᓛᒐᓂ, ᓕᑎᐊ ᐃᑦᑐᒃ ᐊᒻᒪᓗ ᓯᐊᔭ ᐴᓐ ᑲᑕᑦᔭᓚᐅᔪᒻᒥᔫᒃ ᑲᑎᒪᓂᒻᒪᕆᐅᑉ ᐱᒋᐊᕐᑎᑕᐅᓂᖓᓄᑦ.

ᑲᑎᒪᓂᒻᒪᕆᐅᑉ ᑐᕌᕐᓂᕆᓗᐊᓐᖑᐊᓚᐅᔪᔭᖓ ᐅᐃᒍᐃᓂᒃ ᖃᐅᔨᓴᕐᑎᓂᒃ ᑲᑎᓯᒋᐅᖁᔨᑦᓱᑎᒃ ᐃᒻᒥᑯᐊᕐᑎᑐᓂᒃ ᑯᐯᒃ ᑕᕐᕋᖓᓂᒥᐅᓂᒃ ᓄᓇᖃᕐᖄᓯᒪᔫᑦᓱᑎᒃ, ᐃᕐᕿᓖᑦ/ᑯᔩᑦ ᐃᓄᐃᓪᓗ. ᑌᑲᓃᑦᑐᓕᒫᑦ ᐃᓱᒪᒋᔭᕐᒥᓂᒃ ᐅᖃᖃᑎᒌᒍᑎᖃᕈᓐᓇᓯᓚᐅᔪᔪᑦ ᖃᐅᔨᓴᕈᓯᐅᓲᑉ ᒥᑦᓵᓄᑦ, ᑭᓯᐊᓂ ᐱᐅᓂᕐᓴᐅᒐᔭᕐᑐᕕᓂᖅ ᑲᑎᒪᔪᑦ ᐅᐊᕈᑎᒌᑦᑐᕕᓂᐅᑉᐸᑕ ᐊᕕᑦᑐᓯᒪ¯ᒍᓐᓀᓗᑎᒃ. ᓯᕗᓪᓕᒦᑦᑐᑦ ᑲᑎᒪᓂᕐᒥ ᐃᓘᓐᓇᑲᓵᑦᓯᐊᑎᒃ ᓄᓇᖃᕐᖄᓯᒪᔫᓚᐅᔪᓐᖏᑐᑦ, ᑐᖓᓕᐊᓃᑦᑐᑦ ᑲᑎᒪᓂᕐᒥ ᐃᕐᕿᓕᕙᓪᓘᑎᓪᓗᒋᑦ/ᑯᔩᕙᓪᓘᑎᓪᓗᒋᑦ ᐃᓄᕙᓪᓘᓱᑎᓪᓗ. ᑖᒃᑯᐊ ᒪᕐᕉᒃ ᑲᑎᒪᓃᒃ ᑲᑎᒪᑎᑕᕕᓂᐅᑐᐊᕐᐸᓂᒃ ᐃᓱᒫᓘᑎᒋᔭᐅᔪᓕᒫᑦᓯᐊᑦ ᐅᖄᔭᐅᒐᔭᓚᐅᔪᔪᑦ, ᑲᑎᒪᓃᒃ ᑕᑯᓐᓇᐅᑎᓂᖃ¯ᕐᑑᔮᕈᓐᓀᑎᓪᓗᒋᒃ ᐃᓱᒪᒋᔭᐅᔪᓕᒫᑦ ᐃᒻᒥᒎᕐᑎᑑᔮᓕᕐᑎᓗᒋᑦ. ᑌᒣᒐᓗᐊᕐᑎᓗᒍ, ᑲᑎᒪᓂᒻᒪᕆᒃ ᑐᕌᕐᓂᕆᒐᓱᐊᕐᑕᒥᓄᑦ ᑎᑭᐅᑎᑦᓯᐊᓚᐅᔪᔪᖅ ᑲᑎᑎᑦᓯᓱᓂ ᖃᐅᔨᓴᕐᑎᓂᒃ ᓄᓇᖃᕐᖄᓯᒪᔪᓂᓪᓗ ᑕᕝᕙᓂᑦᓭᓈᓚᕿᑎᑦᓱᒋᑦ ᐃᓪᓗᕈᐊᕐᒥ ᐃᓚᐅᔪᓕᒫᑦ ᑲᑎᒪᖃᑎᒥᑕ ᐃᓱᒪᒋᔭᖏᓐᓂᒃ ᐅᐱᒍᓱᒍᓐᓇᓯᑎᓪᓗᒋᑦ.