ᐊᐅᔭᒥ ᐃᓕᓐᓂᐊᓂᖅ ᐊᓕᐊᓇᕐᑑᒍᓐᓇᐳᖅ… ᐃᓕᓐᓂᐊᑕᐅᑉᐸᑦ ᐃᑦᓴᓂᑕᕐᓂᐊᓂᖅ!
ᑭᓇᒨᒻᒪ¯ᑦ ᐱᐊᕆ ᑎᕉᓯᔦᕐ Pierre M. Desrosiers
ᓱᓈ ᐊᓕᐊᓇᕐᓂᓴᐅᕙ ᐊᕙᑕᐅᑉ ᐊᐅᔭᒥ ᐃᓕᓐᓂᐊᑎᑦᓯᓂᕆᓲᖓᑕ ᓴᓂᐊᓂᑦ? ᐊᕙᑕᐅᑉ ᐃᑦᓴᓂᑕᕐᓂᐊᓂᕐᒥᒃ ᐃᓕᓐᓂᐊᑎᑦᓯᓂᕆᓲᖓ ᐊᐅᔭᒃᑯᑦ ᐅᑎᓛᕐᓂᐊᑐᖅ ᐊᑯᓕᕕᒻᒧᑦ ᐊᐅᔭᐅᓚᖓᔪᒥ. ᐊᑐᐃᓐᓇᕈᕐᑎᓯᒪᕗᒍᑦ ᑕᓪᓕᒪᓂ ᐱᓇᓱᐊᕈᓯᕐᓂ ᓄᓇᒦᑦᑎᓯᓛᕐᓂᑎᓂᒃ ᐃᑦᓴᓂᑕᕐᓂᐊᓂᕐᒥᒃ ᐃᓕᓐᓂᐊᑎᑦᓯᒋᐊᕐᑐᓯᒪᓗᑕ ᖁᓕᐅᑉ ᒥᑦᓵᓃᑦᑕᓂᒃ ᐃᓕᓐᓂᐊᑎᓂᒃ ᐊᑯᓕᕕᒻᒥᐅᓂᒃ. ᐃᑦᓴᓂᑕᕐᓂᒃ ᓴᒡᒐᕕᐅᓗᐊᓐᖑᐊᓛᕐᑐᖅ ᑲᖏᐊᑲᓪᓚᒦᑦᑐᖅ JeGn-2-ᒍᓂᕋᕐᑕᖅ ᓇᔪᒐᐅᓚᐅᕐᑐᕕᓂᖅ ᓇᕐᓴᒦᑦᓱᓂ ᐅᐃᒍᕐᓯᐅᑉ ᐊᒻᒪᓗ ᑲᖏᐊᑲᓪᓚᐅᑉ ᐊᑯᓐᓂᖓᓃᑦᓱᓂ ᑖᕙᓂ ᖃᕐᒪᑐᖃᐅᓚᐅᕐᑐᕕᓃᑦ ᓄᐃᑕᖏᓐᓈᒪᑕ ᕿᑭᕐᑕᔪᐊᒥ. ᑐᕌᕐᓂᒋᓗᐊᓐᖑᐊᑕᕗᑦ ᐃᓕᓐᓂᐊᑎᑦᓯᓂᕆᓛᕐᑕᑎᓐᓄᑦ ᐊᑯᓕᕕᒻᒥᐅᓂᒃ ᐃᓕᓐᓂᐊᑎᓂᒃ ᑫᓪᓗᑐᕋᓱᐊᕋᑦᑎᒋᑦ ᐃᓕᓐᓂᐊᓂᕐᒥᒃ ᓄᕐᙯᓇᖁᓐᖏᓇᑦᑎᒋᑦ. ᐃᓕᓐᓂᐊᑏᑦ ᐃᓕᓐᓂᐊᓛᕐᓂᐊᑐᑦ ᐊᑯᓕᕕᐅᑉ ᐱᐅᓯᕆᓯᒪᔭᖓᓂᒃ, ᖃᐅᔨᒪᔭᐅᓗᐊᓐᖑᐊᕆᐊᓕᓐᓂᒃ ᐃᑦᓴᓂᑕᕐᓂᐊᓂᕐᒥ ᖃᐅᔨᓴᕈᓯᐅᓲᓂᒃ ᐊᒻᒪᓗ ᐊᒥᓱᒋᐊᓪᓚᓂᒃ ᐆᑦᑑᑎᒋᓗᒋᑦ ᓄᓇᐅᑉ ᖄᖓᓃᑦᑐᓂᒃ ᖃᐅᔨᓴᕐᓂᖅ, ᑌᑦᓱᒪᓂᒻᒪᕆᐊᓗᒃ ᓄᓇᐅᑉ ᖃᓄᐃᓕᖓᓂᕆᓚᐅᕐᑕᕕᓂᖓᓂᒃ ᐊᒻᒪᓗ ᐊᓯᐅᖏᓐᓇᑎᑦᓯᑌᓕᒍᓯᕐᓂᒃ ᐃᑦᓴᓂᑕᕐᓂᒃ ᐊᒻᒪᓗ ᐃᓕᓐᓂᐊᑏᑦ ᐃᓚᐅᖃᑦᑕᓛᕐᓱᑎᒃ ᐱᐅᓯᑐᖃᕐᑎᒍᑦ ᒪᙯᑦᑐᓂ ᒪᓕᓪᓗᑎᒃ ᐊᑯᓕᕕᒻᒥᐅᒥᒃ ᒪᙯᑦᑎᐅᓱᓂ-ᒪᓕᒐᕐᒥᒃ. ᐱᐅᓯᖃᓲᖑᒐᑦᑕ ᐃᑦᓴᓂᑕᕐᓂᐊᓂᕐᒥᒃ ᐃᓕᓐᓂᐊᑎᑦᓯᓕᑐᐊᕋᑦᑕ, ᐃᓄᑐᙯᑦ ᐱᒻᒪᕆᐊᓗᑎᒍᑦ ᐃᓚᐅᓛᕐᓂᐊᒥᔪᑦ ᐃᓕᓐᓂᐊᑎᑦᓯᓛᕋᒥᒃ ᐃᓕᓐᓂᐊᑎᓂᒃ.
2011-ᒥ, ᑲᖐᒋᓐᓇᑐᓐᖑᐊᒍᓚᐅᔪᔪᖅ ᐊᑯᓕᕕᒻᒥᐅᑦ ᐊᒥᓱᑲᓪᓓᑦ ᑕᑯᓂᐊᖃᑦᑕᓚᐅᔪᒻᒪᑕ ᓴᒡᒐᓕᕐᑎᓗᑕ. ᑕᒪᑐᒨᓇ ᐅᐱᒍᓱᑦᑐᒪᕆᐅᔪᒍᑦ ᐊᑯᓕᕕᒻᒥᐅᓄᑦ ᓯᕗᓕᕐᑎᖑᐊᓄᓪᓗ ᓴᐳᑦᔭᐅᓯᒪᑦᓯᐊᓚᐅᔪᒐᑦᑕ! ᑫᓪᓗᑐᐃᒋᐊᓪᓚᐳᒍᑦ ᑕᑯᓂᐊᕐᑕᐅᖃᑦᑕᓛᕈᒣᓐᓈᕋᑦᑕ ᑕᕝᕙᓂ ᐊᕐᕌᒍᒥ ᐆᑦᑐᕋᕐᓗᑎᓘᒍᓐᓇᖃᑦᑕᓛᕐᒪᑕ ᐃᑦᓴᓂᑕᕐᓂᐊᓂᕐᒥᒃ. ᓴᒡᒐᓂᖃᕇᑐᐊᕈᑦᑕ ᓴᒡᒐᑕᕕᓂᑦᑎᓂᒃ ᑕᑯᑦᓴᐅᑎᑦᓯᓛᕐᓂᐊᑐᒍᑦ. ᐊᒻᒪᓗᒋᐊᓪᓚᒃ, ᐱᓇᓱᐊᕐᒥᔪᒍᑦ ᐸᕐᓇᓂᑦᓱᑕ ᐃᓕᓐᓂᐊᑎᓂᒃ ᓱᖃᑦᓯᑎᑦᓯᓂᕆᖃᑦᑕᓛᕐᑕᑎᓂᒃ ᐊᕐᕌᒍᓕᕐᒥᐸᑦ ᐃᓕᓐᓂᐊᓇᐅᓛᕐᒥᔪᒥ.
