ᑐᓴᕋᑦᓭᑦ

ᑐᓴᕋᑦᓴᓕᒫᑦ

ᓄᓇᓖᑦ ᐃᓕᓐᓂᐊᕕᕐᔪᐊᓗ ᖃᐅᔨᓴᖃᑎᒌᓐᓂᖏᓐᓄᑦ ᐱᓇᓱᐊᕐᓂᖅ

ᓄᓇᓖᑦ ᐃᓕᓐᓂᐊᕕᕐᔪᐊᓗ ᖃᐅᔨᓴᖃᑎᒌᓐᓂᕆᓲᖏᓐᓄᑦ ᐱᓇᓱᐊᕐᓂᖅ ᐊᑎᖃᕐᓱᓂ, ᓯᕗᓪᓕᑕ ᐃᓅᓯᕆᓚᐅᕐᑕᖏᑦ ᐊᑑᑎᓚᐅᕐᑕᖏᓪᓗ-ᒥᒃ ᐊᒥᓱᒐᓛᓂᒃ ᐱᔪᓐᓇᑐᓪᓚᕆᐅᒋᐅᕐᓴᓂᕐᒧᑦ ᐃᓕᓐᓂᐊᑎᑦᓯᓂᕐᒧᑦ ᐱᓇᓱᐊᕐᓂᐅᓲᖅ ᑮᓇᐅᔭᖃᕐᑎᑕᐅᕙᓪᓗᓲᖑᕗᖅ SSHRC-ᑯᓄᑦ (ᐃᓅᖃᑎᒌᑦᑐᓂᒃ ᓱᑯᐃᔦᓂᕐᒧᑦ ᖃᐅᔨᓴᕐᓂᒧᑦ ᑲᑎᒪᔩᑦ ᑲᓇᑕᒥ) ᐊᕐᖁᑎᖃᕐᓱᑎᒃ ᓄᓇᓖᑦ ᐃᓕᓐᓂᐊᕕᕐᔪᐊᓗ ᖃᐅᔨᓴᖃᑎᒌᑦᓱᑎᒃ ᐱᓇᓱᐊᕐᐸᑕᖏᓐᓂᒃ.

ᑖᓐᓇ ᐱᓇᓱᐊᕐᑕᐅᔪᖅ ᐊᐅᓚᑕᐅᓲᖅ ᐊᕙᑕᕐᒧᑦ ᑲᔪᓯᑎᑕᐅᑦᓱᓂᓗ ᐱᓇᓱᖃᑎᒌᑉᐸᑎᓪᓗᒋᑦ ᖃᐅᔨᓴᕐᑏᑦ ᐱᓯᒪᑦᓱᑎᒃ ᐊᑦᔨᒌᓐᖏᑐᓂᑦ ᐱᔪᓐᓇᑐᓪᓚᕆᓐᖑᒐᓱᐊᕐᓂᒧᑦ ᖃᐅᔨᓴᕐᓂᒧᓪᓗ ᐱᓇᓱᕝᕕᓂᑦ, ᐊᒥᓱᑦ ᐃᓄᐃᑦ ᑲᕙᒣᓪᓗ ᑎᒥᐅᔪᖁᑎᖏᑦ, ᓄᓇᓕᓐᓂ ᐃᓕᒋᔦᑦ, ᓇᒻᒥᓂᕆᔭᐅᔪᑦ ᑮᓇᐅᔭᓕᐅᕋᓱᐊᕐᕖᑦ ᐃᓕᓐᓂᐊᑏᓪᓗ:

• ᖃᐅᔨᓴᕐᑏᑦ
• ᐃᓕᒌᑦᑐᑦ ᑲᑐᑦᔨᖃᑎᒌᑦᑐᓗ
• ᐃᓕᓐᓂᐊᑏᑦ

ᐱᑐᑦᓯᒪᑎᑕᐅᓂᒋᒃ ᐱᐅᓯᑐᖃᕐᑎᒍᑦ ᖃᐅᔨᒪᐅᓯᐅᑉ ᓱᑯᐃᔦᓂᑎᒍᓪᓗ ᖃᐅᔨᓴᕐᓂᐅᑉ

ᑐᓐᖓᕕᒋᔭᐅᓪᓚᕆᓐᖑᐊᑐᖅ ᐱᓇᓱᐊᕐᓂᒧᑦ ᓯᕗᓪᓕᑕ ᐃᓅᓯᕆᓚᐅᕐᑕᖏᑦ ᐊᑑᑎᓚᐅᕐᑕᖏᓪᓗ ᐱᓇᓱᐊᕐᑕᐅᓂᖓᓄᑦ ᐆᒥᖓ ᐊᑎᖃᕐᐳᖅ: ‘ᓯᓚᐅᑉ ᐃᖏᕐᕋᓂᖓ ᓇᓃᓐᓂᐅᔪᕐᓗ ᐃᓄᓐᓂ ᓄᓇᕕᒻᒥᐅᓂ‘. ᐃᒫᑕᒐ, ᒍᓐᓇᕕᓕᒫᕐᒥᒍᑦ ᐃᓚᐅᑎᑦᓯᔪᖅ ᑌᑦᓱᒪᓂᑐᖄᓗᒃ ᐱᐅᓯᐅᕙᑦᑐᕕᓂᕐᓂᒃ ᐅᓪᓗᒥᐅᓕᕐᑐᓗ ᐱᐅᓯᐅᓕᕐᑐᓂᒃ, ᓄᓇᐅᓪᓗ ᓇᔪᕐᑕᐅᓲᒍᓂᖓᓂᒃ ᐃᓄᐃᑦ ᓯᕗᓪᓕᕕᓂᖏᑦᑕᓗ ᖃᐅᔨᒪᐅᓯᖏᓐᓂᒃ. ᐃᓄᐃᑦ ᐱᐅᓯᑐᖃᕐᑎᒍᑦ ᖃᐅᔨᒪᐅᓯᖓ ᐊᒻᒪᓗ ᓱᑯᐃᔦᓂᑎᒍᑦ ᖃᐅᔨᒪᓂᖅ ᐱᓯᒪᑦᓱᑎᒃ ᐊᑦᔨᒌᓐᖏᑐᓂᑦ ᐃᓕᓐᓂᐊᑕᐅᓲᓂᑦ (ᐃᑦᓴᓂᑕᕐᓂᐊᓂᖅ, ᓄᓇᐅᑉ ᓴᓇᒻᒪᖓᓂᒃ ᓱᑯᐃᔦᓂᖅ, ᐱᐅᓯᐅᓯᒪᔪᓕᕆᓂᖅ, ᐃᓅᖃᑎᒌᑦᑐᓂᒃ ᖃᐅᔨᓴᕐᓂᖅ, ᓄᓇᓐᖑᐊᓕᕆᓂᖅ ᓄᓇᕐᔪᐊᒥᓪᓗ ᓱᑯᐃᔦᓂᖅ) ᑖᒃᑯᐊᓕᒫᑦ ᑲᑎᑎᑕᐅᓲᑦ ᐱᐅᓯᐅᒦᒋᐊᕈᑕᐅᒐᓱᐊᕐᓱᑎᒃ ᑐᑭᓯᒪᒐᓱᐊᕈᓯᕐᒥᒃ ᖃᐅᔨᒪᒍᓯᕐᒥᓗ ᐃᓕᓐᓂᐊᑕᐅᓲᓂ ᐃᓕᓐᓂᐊᕕᒻᒥ, ᐱᐅᓯᑐᖃᖅ ᐃᒻᒥᓂᕐᓲᑕᐅᓚᖓᑎᓪᓗᒍ ᐊᒻᒪᓗ ᐃᓅᖃᑎᒌᑦᑐᑦ ᐃᓅᒐᓱᐊᕐᓂᖓᑕ ᐱᕙᓪᓕᐊᔭᐅᓂᖓᓄᑦ ᓄᓇᕕᒻᒥ.

ᐊᖏᔪᒻᒪᕆᐊᓗᒃ ᓄᓇᓕᓕᒫᓂ ᐱᓇᓱᐊᕐᑕᐅᓲᖅ

ᐱᓇᓱᐊᕐᓂᕆᓲᕗᑦ ᓇᓗᓀᕐᑕᐅᒪᒍᓯᖃᕐᐳᖅ ᓄᓇᓕᓕᒫᓅᓕᖓᑎᓪᓗᒍ ᐱᑦᔪᑎᖃᕐᓱᓂ ᓄᓇᕕᓕᒫᑦᓯᐊᒥᒃ, ᑕᕝᕘᓇᓗ ᐃᓚᐅᓯᓲᒍᑦᓱᑕ ᓱᑯᐃᔦᓂᑎᒍᑦ ᑲᖐᒋᔭᐅᓕᕐᑐᓂᒃ ᖃᐅᔨᓴᕐᑎᓄᑦ ᐱᑐᑦᓯᒪᑎᒐᓱᐊᕐᓱᒋᑦ ᐃᓱᒫᓗᒋᔭᖏᓐᓄᑦ ᓄᓇᓕᓕᒫᑦ, ᓄᓇᓕᐊᕈᐃᑦ, ᓄᓇᕐᔪᐊᒥᐅᖑᖃᑎᒌᑦ ᐃᓕᓐᓂᐊᕇᕐᓯᒪᔪᒻᒪᕇᓪᓗ, ᑕᒪᒃᑯᐊᓕᒫᑦ ᓴᕐᕿᑎᑦᓯᓚᕿᒻᒪᑕ ᓄᐃᑕᓪᓗᕆᑦᑑᓱᓂ ᓄᓇᓕᓕᒫᑦ ᐱᐅᓯᑐᖃᖓᓂᒃ. ᑌᒣᑐᐊᕐᒪᑦ ᖃᐅᔨᓴᕈᓐᓇᓯᓲᖑᔪᒍᑦ ᐱᐅᓯᐅᓯᒪᔪᓂᒃ ᐃᓅᖃᑎᒌᑦᑐᐃᓗ ᑭᖑᕝᕕᕈᓐᓇᓂᖏᓐᓂᒃ, ᓴᐳᒻᒥᓯᒪᒍᑎᒋᒐᓱᐊᕐᓱᒍᓗ ᓄᐃᑕᔪᕐᑎᒍᑦ ᐃᓕᓐᓂᐊᓂᕐᒥ, ᐁᑦᑐᑕᐅᓂᖏᓐᓄᑦ ᓯᕗᓪᓕᕕᓂᑦᑕ ᖃᐅᔨᒪᐅᓯᕕᓂᖏᓐᓂᒃ ᐊᓯᐅᖏᓐᓇᑎᑦᓯᑌᓕᓂᕐᒧᓗ ᐃᓄᐃᑦ ᐱᐅᓯᑐᖃᖓᓂᒃ.

ᐊᑐᕐᓂᖅ ᐃᓄᐃᑦ ᐱᔪᓐᓇᑐᓪᓚᕆᐅᓂᖏᓐᓂᒃ ᑐᑭᓯᒪᒍᑎᒋᓚᖓᓗᒋᑦ ᓄᓇᒥᒃ

ᐱᐅᓯᐅᒦᒋᐊᓚᖓᒐᓗᐊᕐᑎᓗᒍ ᐃᓘᓐᓈᒍᑦ ᖃᐅᔨᒪᐅᓯᐅᓕᕐᑐᒥᒃ ᓄᓇᕕᐅᑉ ᐃᓄᖃᕐᓯᒪᓂᕆᓕᕐᑕᖓᓂᒃ, ᓄᓇᓖᑦ ᐃᓕᓐᓂᐊᕕᕐᔪᐊᓗ ᖃᐅᔨᓴᖃᑎᒌᓐᓂᕆᓲᖓ ᓯᕗᓪᓖᑦ ᐃᓅᓯᕆᓚᐅᕐᑕᖓᓂᒃ ᐊᑑᑎᓚᐅᕐᑕᖓᓂᓗ ᐊᖏᓖᒋᐊᕈᒪᕗᖅ ᑕᑯᑦᓴᐅᓂᕆᓲᖓᓂᒃ ᐱᐅᓯᐅᒥᒋᐊᕐᑕᐅᑎᓪᓗᒍ ᐃᓄᐃᑦ ᐱᔪᓐᓇᑐᓪᓚᕆᐅᓂᖓ ᐱᑦᔪᑎᖃᕐᓱᓂ ᑐᑭᓯᒪᒐᓱᐊᕈᓯᖅ ᓄᓇᕕᐅᑉ ᓄᓇᖓᓂᒃ. ᑕᕝᕘᓇᑕᒐ, ᐃᓱᒪᒋᐊᖃᒻᒪᕆᑦᑐᒍᑦ ᐃᓄᐃᑦ ᑕᑯᓐᓇᑕᖏᓐᓂᒃ ᐅᑉᐱᕆᔭᖏᓐᓂᓗ ᐊᑦᑐᐊᓱᑎᒃ ᐱᐅᓯᕆᓯᒪᔭᖏᓐᓄᑦ ᐊᕙᑎᖓᓐᓄᓗ. ᓄᓇᕐᔪᐊᒥᒃ ᑕᑯᓐᓇᓂᖏᑦ, ᐱᑐᑦᓯᒪᓪᓚᕆᑦᓱᑎᒃ ᓄᓇᐅᑉ ᓴᓇᒻᒪᓗᑐᖓᓄᑦ, ᐃᑲᔪᕐᓯᖔᕈᓐᓇᑐᑦ ᓱᑯᐃᔦᓂᑎᒍᑦ ᖃᐅᔨᓴᕋᓱᐊᕐᓂᒥᒃ, ᓱᒐᓗᑦᑐᖅ ᐃᑦᓴᓂᑕᕐᓂᐊᓂᑎᒍᑦ, ᓄᓇᓐᖑᐊᓕᕆᓂᑎᒍᑦ ᐃᓅᖃᑎᒌᑦᑐᓗ ᐱᐅᓯᕆᓯᒪᔭᖏᑦᑕ ᖃᐅᔨᓴᕐᑕᐅᓂᖏᑎᒍᑦ, ᖃᓄᕐᓗ ᓴᖑᑎᑦᓯᓂᕐᒪᖔᑕ ᑭᓇᐅᓂᕐᓂᒃ ᓇᓗᓀᒃᑯᑕᐅᓯᑎᓪᓗᒋᑦ. ᑌᒣᒻᒪᑦ, ᓴᕐᕿᑎᑕᐅᓚᕿᔪᕕᓃᑦ ᓄᓇᓕᓐᓂ ᐱᐅᓯᑐᖃᓕᕆᔩᑦ ᑲᑎᒪᔨᖏᑦ, ᓱᒐᓗᑦᑐᓗ ᐱᖁᔭᑎᒍᑦ ᑎᒥᓐᖑᑎᑕᐅᓚᐅᔪᑦᓱᑎᒃ ᐃᓕᖓᓚᖓᓕᕐᑎᓗᒋᑦ ᓄᓇᓖᑦ ᐃᓕᓐᓂᐊᕕᕐᔪᐊᓗ ᖃᐅᔨᓴᖃᑎᒌᓐᓂᕆᓲᖓᓄᑦ ᓯᕗᓪᓕᑕ ᐃᓅᓯᕆᓚᐅᕐᑕᖏᑦ ᐊᑑᑎᓚᐅᕐᑕᖏᓪᓗ ᐱᓪᓗᒋᑦ, ᐅᕙᑦᑎᓂᒃ ᓱᖏᕐᑐᐃᔪᒻᒪᕆᒃ ᐊᑐᕐᑐᒪᕆᒻᒥᒃ ᐱᑐᑦᓯᒪᐅᑎᓚᖓᓕᕐᒪᑕ ᐃᓄᐃᑦ ᓄᓇᓕᖏᑦ ᖃᐅᔨᓴᕐᑏᓗ.

ᓄᑖᖅ ᐱᓇᓱᐊᕈᑎᑦᓴᖅ: ᐊᑦᔨᒌᓐᖏᑐᑦ ᖃᐅᔨᓴᕈᓰᑦ

ᓄᓇᓖᑦ ᐃᓕᓐᓂᐊᕕᕐᔪᐊᓗ ᖃᐅᔨᓴᖃᑎᒌᓐᓂᕆᓲᖓᓄᑦ ᓯᕗᓪᓕᑕ ᐃᓅᓯᕆᓚᐅᕐᑕᖏᑦ ᐊᑑᑎᓚᐅᕐᑕᖏᑦᑕᓗ ᓇᓗᓀᕐᑕᐅᒪᓂᖃᕐᐳᖅ ᐊᑦᔨᒌᓐᖏᑐᓄᑦ ᖃᐅᔨᓴᕈᓯᕕᓂᕐᓄᑦ ᐊᑦᔨᒌᑦᔭᖏᑦᑐᑦ ᐱᓇᓱᐊᕐᓂᕆᓲᖏᑦ ᐱᑐᑦᓯᒪᐅᑎᒻᒪᑕ ᖃᐅᔨᓴᕐᓂᐅᓲᓕᒫᑦᓯᐊᑉ ᐃᓗᐊᓂ ᐅᕘᓇ: ‘‘ᓯᓚᐅᑉ ᐃᖏᕐᕋᓂᖓ ᓇᓃᓐᓂᐅᔪᕐᓗ ᐃᓄᓐᓂ ᓄᓇᕕᒻᒥᐅᓂ‘. ᐊᑐᓂᑦ ᑕᓪᓕᒪᑦ ᖃᐅᔨᓴᕈᓰᑦ, ᖃᐅᔨᓴᕐᓂᕆᕙᓪᓗᓲᖏᑦ ᑐᑭᑖᕐᑕᐅᓲᖑᕗᑦ ᐃᓄᐃᑦ ᐱᓇᓱᐊᕐᓯᒪᓕᕐᑕᖏᓐᓄᑦ, ᐅᖄᑦᓱᑎᒃ ᓱᓇᑐᐃᓐᓇᓂᒃ ᓱᓇᓪᓗᑯᐊᐱᓐᓂᓗ, ᐃᓚᖃᕐᓱᑎᓗ ᓇᒻᒥᓂᕐᒥᓂᒃ ᐃᒻᒥᒎᕐᑎᓱᑎᒃ ᖃᐅᔨᓴᕐᑎᓂᒃ ᐃᑲᔪᕐᑎᖏᓐᓂᓗ:

• ᐃᑦᓴᓂᑕᕐᓂᐊᓂᕐᒥᒃ ᖃᐅᔨᓴᕐᓂᖅ
• ᐊᕙᑎᒥᒃ ᖃᐅᔨᓴᕐᓂᖅ
• ᓄᓇᓐᖑᐊᑦ ᐱᐅᓯᕆᓯᒪᓕᕐᑕᖏᓐᓂᒃ ᖃᐅᔨᓴᕐᓂᖅ
• ᐱᐅᓯᐅᓯᒪᔪᓂᒃ ᐃᓅᖃᑎᒌᑦᑐᐃᓗ ᐱᐅᓯᕆᓯᒪᔭᖏᓐᓂᒃ ᖃᐅᔨᓴᕐᓂᖅ
• ᓄᓇᓐᖑᐊᑎᒍᑦ ᓄᓇᒥᒃ ᖃᐅᔨᒪᒐᓱᐊᕈᓯᖅ ᖃᕆᑕᐅᔭᑎᒍᓪᓗ ᓄᓇᓐᖑᐊᓕᕆᒍᓯᖅ

ᐊᑦᔨᒌᓐᖏᑐᑦ ᖃᐅᔨᒪᔭᐅᑎᑦᓯᒍᓰᑦ ᐃᓘᓐᓈᓄᐊᖓᔪᑦ

ᐃᓕᒃᑰᑐᒥᒃ ᐱᓇᓱᐊᕐᓂᖃᓛᕐᑐᖅ ᐃᕐᐸᑎᑕᐅᑎᓪᓗᒋᑦ ᖃᐅᔨᓴᕐᑕᐅᓱᑎᒃ ᖃᐅᔨᔭᐅᔪᕕᓃᑦ ᓱᑯᐃᔦᔩᑦ ᑕᑯᓐᓇᑕᖓᑎᒍᑦ ᐃᓄᓕᒫᓪᓗ ᑕᑯᓐᓇᑕᖓᑎᒍᑦ. ᑌᑦᓱᒪᓂᑎᑐᑦ ᐃᕐᐸᑎᑦᓯᓂᐅᓲᕕᓂᖅ (ᐊᑐᐊᒐᕐᓂᒃ, ᕿᒥᕐᕈᐊᓂᒃ, ᑕᑯᑦᓴᐅᑎᑦᓯᓂᕐᓂᒃ, ᐊᓯᖏᓐᓂᓗ) ᐃᓚᔭᐅᓛᕐᓂᐊᑐᖅ ᓄᑖᒥᒃ ᐃᑯᒪᐅᑎᒨᕐᑐᑎᒍᑦ ᐃᓕᔭᐅᒍᓐᓇᓯᑎᓪᓗᒋᑦ ᖃᐅᔨᒪᔭᐅᒋᐊᓖᑦ ᖃᐅᔨᔭᐅᑎᒋᐊᕐᓗᒋᑦ, ᑕᑯᓐᓇᒐᖃᓗᓐᖑᐊᓛᕋᒥᒃ ᐱᕙᓪᓕᐊᑎᑦᓯᓂᕐᒥᒃ ᐃᓕᓐᓂᐊᓂᕐᒥᒃ ᑕᒪᖏᓐᓄᓗ ᐱᓇᓲᑎᓂᒃ. ᐊᑐᐊᒐᓐᖑᑎᑕᐅᔪᓕᒫᑦ ᑐᕌᕐᓂᖃᕐᑎᑕᐅᓛᕐᓂᐊᑐᑦ ᑕᕐᕋᒥᐅᓄᑦ ᑲᓇᑕᒥᐅᓕᒫᓄᓪᓗ, ᑲᓇᑕᒥ ᑲᓇᑕᐅᓪᓗ ᓯᓚᑖᓂ ᐃᓕᓐᓂᐊᕕᕐᔪᐊᓂ ᐱᓯᑎᐅᕕᓪᓚᕆᓕᓐᓄᑦ.